གྲོང་གསེབ་བཅོས་སྐྱོང་གི་ནུས་པ་དང་ཞབས་ཞུའི་སྤུས་ཚད་སྔར་བས་མཐོ་རུ་བཏང་ནས་ཏང་འཛུགས་སྐྱོང་གིས་གཞི་རིམ་བཅོས་སྐྱོང་ལ་སྣེ་ཁྲིད་བྱེད་པའི་རྣམ་པ་ཞིག་མགྱོགས་མྱུར་ཆགས་པར་བྱ་ཆེད། ཉིན་ཤས་གོང་། ལྷ་ས་གྲོང་ཁྱེར་ཆུ་ཤུར་རྫོང་གིས་དྲ་མིག་ཅན་གྱི་དོ་དམ་ལམ་སྲོལ་ལ་བརྟེན་ནས། མང་ཚོགས་ཀྱི་དགོས་མཁོར་དམིགས་ཏེ་གྲོང་གསེབ་བཅོས་སྐྱོང་གི་ཐབས་ལམ་འཚོལ་ཞིབ་ཧུར་ཐག་བྱས་ཤིང་། ཞབས་འདེགས་དང་། བཀོད་འདོམས། བཀོད་གཏོང་བཅས་གཞི་གཅིག་ཏུ་འདུས་པའི་རིག་ལྡན་བཅོས་སྐྱོང་ཞབས་འདེགས་ལས་སྟེགས་བཏོད་དེ། གྲོང་གསེབ་བཅོས་སྐྱོང་བྱེད་སྟངས་ཞིབ་ཕྲ་ཅན་དང་། བློ་རིག་ཅན། དེང་རབས་ཅན་བཅས་ཀྱི་ཆུ་ཚད་ཕྱོགས་ཡོངས་ནས་མཐོ་རུ་བཏང་ཡོད།

ཆུ་ཤུར་རྫོང་གིས་གནམ་ཤང་ལྗང་གྲོང་ཚོའི་གྲོང་གསེབ་བཅོས་སྐྱོང་གི“1334”དཔེ་མཚོན་བྱེད་ཐབས་ལ་རྟོག་ཞིབ་དང་ཕྱོགས་སྡོམ་ནན་ཏན་བྱས་པའི་རྨང་གཞིའི་ཐོག ཏང་གིས་གཞི་རིམ་བཅོས་སྐྱོང་ལ་ཕྱོགས་ཡོངས་ནས་འགོ་ཁྲིད་བྱེད་པར་ཤུགས་སྣོན་རྒྱག་པར་དམིགས་ནས། གྲོང་གསེབ་བཅོས་སྐྱོང་གི“བཅོས་སྐྱོང་ལྔ་མཉམ་འདྲེས”ཀྱི་བྱེད་སྟངས་གསར་པ་འཚོལ་ཞིབ་བྱས་ཤིང་། གྲངས་འཛིན་ཅན་གྱིས་སྣེ་ཁྲིད་དང་། མང་ཚོགས་ཀྱི་དགོས་མཁོས་ཕྱོགས་སྟོན། བློ་རིག་བཅོས་སྐྱོང་གིས་ཐབས་ལམ་བཅས་སུ་བྱས་ཏེ། གཞི་རིམ་དུ་བརྟག་ཞིབ་ཐེངས་25བྱས་པ་དང་། བསམ་འཆར་32བསྡུས་པ། ཏང་འཛུགས་སྐྱོང་གིས་གྲོང་གསེབ་བཅོས་སྐྱོང་ལ་སྣེ་ཁྲིད་བྱེད་པའི་གྲངས་འཛིན་ཅན་གྱི་ལས་སྟེགས་འཛུགས་སྐྲུན་ཇུས་གཞི་བཟོས་པ། སྲིད་གཞུང་གི་དོ་དམ་ཕན་འབྲས་ཆེ་བ་དང་། མང་ཚོགས་ཀྱི་བློ་ལ་བབ་པ། བེད་སྤྱོད་བྱེད་བདེ་བ་བཅས་ཀྱི་གྲངས་འཛིན་དོ་དམ་ཞབས་ཞུའི་ལས་སྟེགས་ཧུར་ཐག་བསྐྲུན་ནས“དྲ་མིག་ལ་རྟེན་པ་དང་། དོན་དག་དྲ་ཐོག་ནས་སྒྲུབ་པ། དྲ་མིག་ཡོངས་སུ་ཁྱབ་པ། ཞབས་འདེགས་ཐད་ཀར་ཞུ་བ”བཅས་ཀྱི་གྲོང་གསེབ་བཅོས་སྐྱོང་བྱེད་སྟངས་གསར་པ་མངོན་འགྱུར་ཡོང་བར་བྱས་ཡོད།

བཅོས་སྐྱོང་ཆེད་དོན་ཚོགས་ཆུང་དང་རྫོང་ཐད་གཏོགས་ཚན་པའི་འགན་འཁུར་བ་གཙོ་བོས་ཧང་ཀྲོའུ་གྲོང་ཁྱེར་དང་། ཀྲེ་ཅང་སློབ་ཆེན། དབྱི་ཁྲང་གྲོང་ཨུད་རྩ་འཛུགས་པུའུ། སི་ཁྲོན་སློབ་ཆེན་སོགས་ལ་གྲོང་གསེབ་བཅོས་སྐྱོང་གི་གྲངས་འཛིན་ཅན་གྱི་ལས་སྟེགས་འཛུགས་གཏོད་གསར་གཏོད་བྱེད་སྟངས་དང་སྔོན་ཐོན་ཉམས་མྱོང་རྟོག་ཞིབ་དང་སློབ་སྦྱོང་བྱེད་པར་སྔ་རྗེས་སུ་བསྐྱོད་ཅིང་། རྟོག་ཞིབ་བྱེད་རིང་། རིགས་གཅིག་མཁས་ཅན་དང་མཁས་དབང་དང་ཏང་འཛུགས་སྐྱོང་གིས་གྲོང་གསེབ་བཅོས་སྐྱོང་ལ་སྣེ་ཁྲིད་དང་གཞི་གྲངས་ཆེན་པོའི་ལས་སྟེགས་གཏོད་པ་སོགས་ཀྱི་ནང་དོན་ལ་གྲོས་བསྡུར་གཏིང་ཟབ་བྱས་ཡོད། བོད་ལྗོངས་སློབ་ཆེན་དང་ཧའེ་ཁང་ཝུའེ་ཧྲེ་ཀུང་སི་དང་མཉམ་དུ་ཏང་འཛུགས་སྐྱོང་གིས་གྲོང་གསེབ་བཅོས་སྐྱོང་ལ་སྣེ་ཁྲིད་བྱེད་པའི་ལས་སྟེགས་བཏོད་དེ། མང་ཚོགས་ཀྱི་དོན་དག་ཆེ་ཆུང་ཚང་མ་དྲ་ཐོག་ནས་ཐག་གཅོད་ཐུབ་པར་བྱས་ཏེ་ཏང་ཡོན་གྱི་དྲ་ཐོག་སློབ་སྦྱོང་ཐབས་ལམ་མང་དུ་བཏང་ནས། ཏང་གི་རིགས་པའི་གཞུང་ལུགས་དང་སྲིད་ཇུས་ཁག་དུས་ཐོག་ཏུ་ཤེས་པར་བྱས་ཡོད།