“ངས་སློབ་ཆེན་དུ་སྦྱངས་པའི་ཆེད་ལས་ནི། ཟོག་འགྲེམས་དོ་དམ་ཆེད་ལས་ཡིན། ལྗོངས་ནང་ཁུལ་དུ་ལས་གནས་དེ་ཧ་ཅང་ཉུང་ཉུང་རེད་འདུག ནང་མི་དང་གྲོས་བསྡུར་བྱས་རྗེས་སློབ་གྲྭ་ཐོན་རྗེས་ལྗོངས་ཕྱིར་ལས་ཀ་བྱེད་པར་འགྲོ་རྒྱུའི་ཐག་བཅད་པ་ཡིན”2020ལོར་ཧྥུའུ་ཅན་རང་བྱུང་རིག་པ་དང་བཟོ་སྐྲུན་རིག་པའི་སློབ་ཆེན་ནས་ཐོན་པའི་སྐལ་བཟང་སྒྲོལ་མས་དེ་ལྟར་བཤད།

ལས་ཞུགས་དུས་བབ་གསལ་པོ་ཤེས་རྗེས། སྐལ་བཟང་སྒྲོལ་མས་ལྗོངས་ཕྱིར་ལས་ཞུགས་བྱེད་པ་དེ་ཡང་གདམ་ག་ཡག་པོ་ཞིག་ཡིན་པ་ཤེས། མིང་ཐོ་འགོད་པ་དང་། ཡིག་རྒྱུགས་གཏོང་བ། ངོ་རྒྱུགས་བཅས་བྱས་རྗེས། ཧོ་པེ་ཞིང་ཆེན་གྱིས་སྒྲིག་འཛུགས་བྱས་པའི་ཁ་གཏད་རོགས་སྐྱོར་གྱི་ལས་བསྡུའི་ཡིག་རྒྱུགས་འཕྲོད་དེ་ཧོ་པེ་ཞིང་ཆེན་ཧའེ་ཐུའོ་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དོ་དམ་ཁྲུའུ་རུ་རྒྱུགས་ལོན།

སྐལ་བཟང་སྒྲོལ་མས“ད་ཆ་ངས་ལས་ཀར་ཞུགས་ནས་ལོ་གཉིས་ལྷག་ཙམ་འགྲོ་གི་འདུག ང་ལས་ཀ་དེར་དགའ་པོ་ཡོད་ལ། གླ་ཆ་མཐོ་བ་དང་ལས་ཀའི་ཁོར་ཡུག་ཀྱང་ཧ་ཅང་ཡག་པོ་འདུག”ཅེས་བཤད།

ལས་ཞུགས་བོད་སྐྱོར་ནང་ད་དུང་སྐལ་བཟང་སྒྲོལ་མ་དང་འདྲ་བར་མངའ་རིས་ས་ཁུལ་གྱི་མཐོ་སློབ་སློབ་ཐོན་སློབ་མ་མང་པོ་ཞིག་ཧོ་པེ་རུ་ལས་ཞུགས་ཐུབ་ནས་རང་ཉིད་ཀྱི་ལས་གནས་སུ་ཕུགས་འདུན་མངོན་འགྱུར་བྱེད་བཞིན་ཡོད།

མཚོ་ཆེན་རྫོང་ནས་ཡིན་པའི་བཀྲ་ཤིས་མཚོ་མོ་ད་ཆ་ཧྲའན་ཤིས་ཞིང་ཆེན་ཝུའེ་ནན་གྲོང་ཁྱེར་ཧན་ཁྲེང་གྲོང་ཁྱེར་མཐོ་གསར་ཁུལ་དོ་དམ་ཨུ་ལྷན་དུ་ལས་ཀ་བྱེད་ཀྱི་ཡོད། 2018ལོར་བཀྲ་ཤིས་མཚོ་མོ་བོད་ལྗོངས་སློབ་ཆེན་ནས་ཐོན་རྗེས་ལས་ཀ་བཙལ་ཡང་རང་ཉིད་ཀྱི་བློ་ལ་བབས་པའི་ལས་ཀ་རག་མེད། ཕྱིས་སུ་མངའ་རིས་ས་ཁུལ་མི་སྤྱི་ཅུས་ཀྱིས་ཁྱབ་བསྒྲགས་བྱས་པའི་ལྗོངས་ཕྱིའི་ལས་ཞུགས་སྐོར་གྱི་གནས་ཚུལ་མཐོང་བ་དང་ཕ་མའི་རྒྱབ་སྐྱོར་ཐོབ་རྗེས་ཐེ་ཚོམ་མེད་པར་མིང་ཐོ་བཀོད།

“ཧྲའན་ཤིས་ཞིང་ཆེན་གྱི་ལྗོངས་ཕྱིའི་ལས་ཞུགས་ཡིག་རྒྱུགས་ལོན་སྐབས་ཧ་ཅང་དགའ་པོ་བྱུང”ཞེས་བཀྲ་ཤིས་མཚོ་མོས་བཤད།

2020ལོའི་ཟླ་12པར། བཀྲ་ཤིས་མཚོ་མོ་ཧྲའན་ཤིས་ཞིང་ཆེན་ཝུའེ་ནན་གྲོང་ཁྱེར་ཧན་ཁྲེང་གྲོང་ཁྱེར་གྱི་མཐོ་གསར་ཁུལ་དོ་དམ་ཨུ་ལྷན་གྱི་ལས་ཀར་ཚུད། བོད་ནས་བྲལ་དེ་ནང་སར་འགྲོ་ཐེངས་དང་པོ་ཡིན་པའི་ཁོང་ཧྲའན་ཤིས་ཞིང་ཆེན་ལས་ཞུགས་འབྲེལ་གཏུག་ཞབས་ཞུའི་ས་ཚིགས་དང་ཚན་པའི་འགོ་ཁྲིད་ཀྱི་རོགས་རམ་འོག་ལས་ཀའི་ཁོར་ཡུག་དང་མགྱོགས་མྱུར་འཕྲོད་ཐུབ་པ་བྱུང་ཡོད།

མངའ་རིས་ས་ཁུལ་ཞང་ཞུང་ལམ་གྱི་བརྡ་ཆ་ཀུང་སི་ཞིག་གི་གྱང་འགྲམ་གྱི་ཤིང་སྒྲོམ་ཐོག་ལོ་དེ་དག་ནང་ཀུང་སིས་ཞིབ་འཇུག་གསར་སྤེལ་བྱས་པའི་རིག་གནས་གསར་གཏོད་ཐོན་རྫས་བཞག་ནས་འདུག ཀུང་སིའི་འགན་འཁུར་བ་དགྲ་འདུལ་གྱིས་མིག་ཅེ་རེར་གློག་ཀླད་ཀྱི་ཇུས་འགོད་ལ་ལྟ་བཞིན་བསམ་བློ་ཞིབ་ཚགས་གཏོང་བཞིན་མཆིས། 2020ལོར་དགྲ་འདུལ་གྱིས་མངའ་རིས་ས་ཁུལ་ཁྱུང་དཀར་གསར་གཏོད་སྨྱན་སྦྱོར་བརྡ་ཆ་ཚད་ཡོད་ཀུང་སི་ཐོ་འགོད་བྱས་ནས་བཙུགས་ཤིང་། ད་ཆ་ཀུང་སི་འཕེལ་རྒྱས་ཡག་པོ་བྱུང་ཡོད།