ཉེ་བའི་ལོ་ཤས་རིང་། སློབ་ཆེན་སློབ་མས་རང་བརྟེན་ལས་གཏོད་བྱེད་པར་སྐུལ་མ་གཏོང་ཆེད། རྒྱལ་ཁབ་ཀྱི་གཟིགས་སྐྱོང་སྲིད་ཇུས་རབ་དང་རིམ་པ་དང་། འབྲེལ་ཡོད་སྲིད་ཇུས་དོན་འཁྱོལ་ནུས་ལྡན་ཐུབ་པ་བྱ་ཆེད། སོག་རྫོང་གིས་བྱེད་ཐབས་སྣ་མང་སྤྱད་དེ་སློབ་ཆེན་སློབ་མ་ཕ་ཡུལ་དུ་ལོག་ནས་ལས་གཏོད་བྱེད་པའི་ལས་དོན་ལ་སྐུལ་འདེད་ཏན་ཏིག་བཏང་ཞིང་། སྲིད་ཇུས་དྲིལ་བསྒྲགས་དང་། སྲིད་ཇུས་རོགས་སྐྱོར། ཞབས་ཞུ་གསོ་སྐྱོང་སོགས་ཀྱི་བྱེད་ཐབས་ནུས་ལྡན་བརྒྱུད་སློབ་ཆེན་སློབ་མ་དེ་བས་མང་བ་ཞིག་གི་བསམ་བློར་རིམ་གྱིས་འགྱུར་ལྡོག་བྱུང་ནས་རང་བརྟེན་ལས་གཏོད་ཀྱི་ལམ་བུའི་ཐོག་བསྐྱོད་ཐུབ་པ་བྱུང་ཡོད།

ཤེས་རྟོགས་བྱུང་བར་གཞིགས་ན། སོག་རྫོང་དུ་ད་ཆ་སློབ་ཆེན་ཐོན་པའི་སློབ་མས་གཉེར་བའི་ཞིང་འབྲོག་ཐོན་རྫས་ཚོང་ཁང་དང་། ཟ་འཐུང་ཁང་། རོལ་རྩེད་ཁང་། གྱོན་ཆས་ཚོང་ཁང་སོགས་ཚོང་ཁང་20ལྷག་ཙམ་ཡོད་པ་རེད།

དེའི་ནང་སོག་རྫོང་དུ་ཡོད་པའི་བོད་ཀྱི་གཅིག་གསུམ་དྲུག་ཚོང་དོན་ཚད་ཡོད་ཀུང་སི་ནི་སློབ་ཆེན་ཐོན་པའི་སློབ་མ་གསུམ་གྱིས་མཉམ་དུ་བཙུགས་པ་ཞིག་ཡིན་ཞིང་། ཀུང་སི་བཙུགས་པའི་ཐོག་མར་དཀའ་ངལ་ཡོད་པའི་མང་ཚོགས་1ལས་ཀར་བཅུག་པས་ཁོ་པར་འཚོ་བརྟེན་ཡོང་ཁུངས་བྱུང་བ་མ་ཟད། ཐག་ཉེ་སར་ལས་ཞུཌ་ཐུབ་པར་བྱུང་ཡོད།

བསོད་ནམས་རིན་ཆེན་ནི་ཀུང་སི་མཉམ་དུ་འཛུགས་མཁན་གྱི་གྲས་ཤིག་རེད། སློབ་ཆེན་ཐོན་མ་ཐག་ལས་གཏོད་ཀྱི་ཕུགས་འདུན་ལྡན་པའི་ཁོང་ལ་སྤྱི་ཚོགས་ཀྱི་ཉམས་མྱོང་མི་འདང་བ་དང་མ་དངུལ་ཁ་ཐང་བའི་དབང་གིས་ལས་གཏོད་ཀྱི་ཕུགས་འདུན་འགྲུབ་མེད། སློབ་ཆེན་ཐོན་རྗེས་ཁོང་གིས་ཡིག་ཆས་ཚོང་ཁང་ཞིག་ཏུ་གླ་པ་བྱས། མ་གཞི་གླ་ཆ་མཐོ་པོ་མེད་ཁར་དཀའ་ངལ་ཆེ་རུང་ཁོང་གིས་ལས་ཀ་ཧུར་ཐག་བྱས་ནས་རང་ཉིད་ཀྱི་ལས་ཀའི་འཇོན་ཐང་རྒྱུན་ཆད་མེད་པར་ཆེ་རུ་བཏང་ཡོད། ཁོང་གིས“ཉིན་ལྟར་ལས་ཀ་གཅིག་རང་བྱེད་དགོས་པས་དང་ཐོག་སུན་སྣང་སྐྱེ་ཡི་འདུག འོན་ཀྱང་ལས་ཀ་ཙག་ཙིག་དེ་དག་ལས་ང་ལ་ཉམས་མྱོང་བཟང་པོ་བསགས་ཐུབ་པ་དང་ལས་ཀ་བྱེད་སེམས་སྐྱེས་ཏེ་རང་གིས་གཞན་ལ་འབྲེལ་འདྲིས་དང་སྤེལ་རེས་བྱེད་པའི་ནུས་པའང་ཆེ་རུ་ཕྱིན་པ་དང་དུས་མཚུངས་འཛད་སྤྱོད་པའི་དགའ་ཕྱོགས་དང་། ཚོང་ཁང་གཉེར་སྐྱོང་། ཕྱིར་ཚོང་ཞབས་ཞུ་སོགས་ཐད་ཉམས་མྱོང་ཡག་པོ་བསགས་ནས་ད་ཆའི་ལས་གཏོད་ཐད་རྨང་གཞི་ཡག་པོ་ཞིག་འདིང་ཐུབ་བྱུང”ཞེས་བཤད།

2019ལོའི་ལོ་འགོར། བསོད་ནམས་རིན་ཆེན་གྱིས་སློབ་གྲོགས་བསྟན་པ་ཚེ་དབང་དང་སྐལ་རྣམ་དང་མཉམ་དུ་འཛོམས་ནས་ཅི་འཕྲོས་མོལ་འཕྲོས་བྱེད་སྐབས་མཉམ་དུ་ལས་གཏོད་བྱ་རྒྱུའི་བསམ་བློ་འཁོར། དེས་ན་ཁོང་ཚོས་ཡུལ་དངོས་སུ་ཁྲོམ་རའི་དགོས་མཁོར་བརྟག་ཞིབ་དང་ལས་གཏོད་བརྒྱུད་རིམ་དང་དེ་བཞིན་སློབ་ཆེན་སློབ་མའི་ལས་གཏོད་སྲིད་ཇུས་ཤེས་རྟོགས་བྱས་པ་མ་ཟད། ད་དུང་རང་ངོས་ཀྱི་ཆེད་ལས་དང་ལས་ཀའི་ཉམས་མྱོང་དང་ཟུང་འབྲེལ་བྱས་ནས་ཚོང་དོན་ཀུང་སི་འཛུགས་རྒྱུའི་གདམ་ག་བྱས་པ་དང་ཀུང་སི་འཛུགས་ཡུལ་སོག་རྫོང་སློབ་ཆུང་དང་པོའི་ཉེ་འགྲམ་དུ་བདམས། ཀུང་སི་འཛུགས་པའི་མ་དངུལ་གྲབས་གསོག་དང་ཚོང་ཁང་མཛེས་བཟོ་ཡག་པོ་བྱས་རྗེས་2019ལོའི་ཟླ་12པར་ཀུང་སི་དངོས་སུ་སྒོ་ཕྱེ་བ་རེད། ཀུང་སིའི་ནང་སློབ་མའི་མཁོ་ཆས་དང་གཞུང་ལས་མཁོ་ཆས་འཚོང་རྒྱུ་ཡོད་ལ། པར་སློག སྦྱར་ཡིག ཡིག་བརྐོས་སོགས་ཀྱང་བྱེད་ཀྱི་ཡོད་པ་དང་ཆབས་ཅིག་ས་གནས་དེ་གའི་ཁྱད་ལྡན་ཞིང་ཟོག་ཐོན་རྫས་མར་དང་། ཕྱུར་བ། སྤོས། ཇ་སོགས་འཚོང་གི་ཡོད།

ཀུང་སི་བཙུགས་རྗེས་ཚོང་གཉེར་བྱེད་སྟངས་དེ་ཁོང་ཚོས་བསམ་བློ་གཏོང་ཡུལ་ཨང་དང་པོར་གྱུར་ཡོད། བསོད་ནམས་རིན་ཆེན་གྱིས“འཚོ་བ་ཡག་ཏུ་ཕྱིན་པ་དང་ཆབས་ཅིག་འཛད་སྤྱོད་པས་ཀྱང་ཞབས་ཞུའི་སྤུས་ཚད་ལ་སྔར་བས་མཐོང་ཆེན་བྱེད་ཀྱི་ཡོད་སྟབས་ཞབས་འདེགས་ཡག་པོ་ཞུ་རྒྱུ་ནི་ཁེ་ལས་འཕེལ་རྒྱས་ཀྱི་རྒྱུ་རྐྱེན་གལ་ཆེན་གྱི་གྲས་ཤིག་ཏུ་གྱུར་ཡོད”ཅེས་བཤད། དེར་བརྟེན་ཁོང་ཚོས་རང་ཉིད་ཀྱི་ལས་ཀའི་ལམ་ལུགས་ཆ་ཚང་ཞིག་བཟོས་ཏེ། ཞབས་ཞུའི་འདུ་ཤེས་ཟབ་ཏུ་གཏོང་བ་དང་། བྱང་ཚད་མཐོ་བ་དང་གསོན་ཤུགས་ཀྱིས་ཁེངས་པའི་ལས་བཟོའི་དཔུང་ཁག་གསོ་སྐྱོང་བྱེད་པ། ལས་སྒོའི་ཤེས་བྱ་དང་ཆུ་ཚད་མཐོ་རུ་གཏོང་བ་བཅས་གཞི་རྩའི་ལས་ཀའི་རྩ་དོན་དུ་བཟུང་བ་དང་ཆབས་ཅིག་ས་གནས་དེ་གའི་མང་ཚོགས་ཀྱི་འཛད་སྤྱོད་དགོས་མཁོ་ཤེས་རྟོགས་བྱས་པ་བརྒྱུད། ཁོང་ཚོས་དང་ཐོག་ཞབས་ཞུའི་རྣམ་འགྱུར་ནས་འགོ་བཙུགས་ཏེ་དྲ་ཐོག་དང་དྲ་ཕྱི་ཟུང་འབྲེལ་བྱས་ནས་འཛད་སྤྱོད་པའི་དགོས་མཁོ་བསྐངས་ཡོད། དེ་དང་ཆབས་ཅིག་ཁོང་ཚོས་རང་འགུལ་ངང་ཉོ་མཁན་བཙལ་ཏེ་ཚོང་ཟོག་གི་ཁྱད་ཆོས་དང་ཐོན་སྐྱེད་བཟོ་གྲྭའི་འོས་ཐོབ་དང་ཟོག་འདྲེན་ཐབས་ལམ་ངོ་སྤྲོད་ཞིབ་ཕྲ་བྱས་པ་མ་ཟད། ད་དུང་ཉོ་མཁན་ལ“གལ་སྲིད་སྤུས་ཚད་ཀྱི་གནད་དོན་ཡོད་ཚེ་ག་དུས་ཡིན་ཡང་ཕྱིར་སློག་ཆོག་པའི”ཁས་བླངས་པ་རེད། འབད་བརྩོན་བྱས་པ་བརྒྱུད་ཁོང་ཚོར་སོག་རྫོང་རྒན་གསོ་ཁང་དང་སློབ་གྲྭ་ཁག་གཅིག་དང་དེ་བཞིན་ཁ་ཟང་ཁག་གཅིག་ལ་ཚོང་ཟོག་མཁོ་འདོན་བྱེད་པའི་གོ་སྐབས་རག་ནས་ལས་གཏོད་ལམ་བུ་ཇེ་ཡངས་སུ་སོང་ཡོད།

བསོད་ནམས་རིན་ཆེན་གྱིས་ངོ་སྤྲོད་བྱས་པར། ན་ནིང་སོག་རྫོང་གི“317”རྒྱལ་ལམ་འགྲམ་དུ་ཚོང་ཁང་ཁང་མིག་གཉིས་གཡར་ནས་ཡིག་རྒྱག་པར་སློག་དང་། བརྡ་ཆ་སྣ་ཚོགས་པར་འདེབས། རླངས་འཁོར་མཛེས་བཟོ་སོགས་ཀྱི་རྣམ་གྲངས་གཉེར་སྐྱོང་བྱེད་ཀྱི་ཡོད། ད་ཆ་སོག་རྫོང་སློབ་ཆུང་དང་པོའི་འགྲམ་དུ་ཡོད་པའི་ཚོང་ཁང་ཡང་མཛེས་བཟོ་བྱེད་བཞིན་ཡོད། བསྡོམས་རྩིས་ལ་གཞིགས་ན། 2021ལོ་ཚུན། ཀུང་སིས་མི་11བསྡུས་པ་དང་ཡོང་འབབ་ཁེ་གཙང་སྒོར་ཁྲི་130བྱུང་་ཡོད་པ་རེད།