འབྲོག་མོ་གྲོང་ཚོའི་དེང་གི་རྣམ་པ་གསར་པ།

འདི་ནི་ཁམས་གཙང་བའི་འབྲོག་མོ་གྲོང་ཚོའི་ཟུར་ཞིག་ཡིན་པ།

འདི་ནི་འབྲོག་མོ་གྲོང་ཚོའི་སྒོ་རྩིས་ཚོང་ཁང་ཡིན་པ།

ས་ཞིང་ནི་བོད་ཀྱི་ཞིང་ཁུལ་མི་དམངས་ཀྱི་འཚོ་བའི་རྟེན་ས་ཡིན་ལ་སྔར་ནས་ད་བར་ཞིང་ལས་ཡོང་འབབ་ཁོ་ནར་བརྟེན་ནས་འཚོ་བ་སྐྱེལ་མཁན་ཤིན་ཏུ་མང་། དཔལ་འབྱོར་འཕེལ་རྒྱས་གཏོང་བའི་རླབས་རྒྱུན་བར་མེད་འཕྱུར་བའི་དེང་གི་ཆར། ས་ཞིང་བོགས་མར་བཏང་བའི་ཞིང་པའི་ཡོང་འབབ་ཀྱི་ཁུངས་དང་བདེ་སྐྱིད་འཚོ་བར་རོལ་བའི་ལྡེ་མིག་དེ་གང་ཡིན་ནམ།

གསར་འགོད་པ་སྟོད་ལུང་བདེ་ཆེན་ཆུས་གནས་ཆུང་གྲོང་རྡལ་འབྲོག་མོ་གྲོང་ཚོར་སྐྱོད་སྐབས། ཐག་རིང་གི་རི་བོ་རྣམས་ཉིན་ཤས་བསྟུད་མར་བབས་པའི་ཁ་བས་བཀླུབས་ནས་ཉི་འོད་ཀྱི་ཟེགས་མ་འཕྲོས་རྗེས་འོད་འཚེར་འཚེར་བྱེད་ཅིང་། རྒྱང་ནས་བལྟས་ཚེ་དངུལ་དཀར་གྱི་བུམ་བཟང་ཞིག་དང་གཉིས་སུ་མ་མཆིས། གྲོང་ཚོའི་ཁང་པ་དག་གྲལ་སྟར་སྒྲིག་ལ་ཁོར་ཡུག་གཙང་ཞིང་སྐྱིད་སྣང་དོད། འབྲོག་མོ་གྲོང་ཚོ་ནི་རྒྱལ་ལམ་317དང་ཅིང་བོད་G6མྱུར་བགྲོད་གཞུང་ལམ་གྱི་ཉེ་འགྲམ་དུ་གནས་ཡོད་ཅིང་། ལྷ་ས་གྲོང་ཁྱེར་དང་ལམ་ཐག་སྤྱི་ལེ་20ལས་མེད།  གྲོང་ཚོར་དུད་ཚང་740དང་མི་གྲངས་2000ལྷག་ཙམ་ཡོད་པ་དང(དེའི་ནང་གནས་སྤོས་དུད་ཚང་100དང་མི་གྲངས་411ཚུད་ཡོད)ས་ཞིང་རྒྱ་ཁྱོན་མུའུ་4900ཙམ་དང་ནགས་རའི་རྒྱ་ཁྱོན་མུའུ་2800 རྩྭ་རའི་རྒྱ་ཁྱོན་མུའུ་20000 ཕྱུགས་མགོ་གྲངས་890ཙམ་བཅས་ཡོད་པ་རེད།

འབྲོག་མོ་གྲོང་ཚོར་ཆ་མཚོན་ན། ས་བབ་ཀྱི་ཁྱད་ཆོས་ཤིན་ཏུ་ལེགས་པ་དང་གྲོང་ཚོའི་ས་ཞིང་རྣམས་ཀྱང་ལྷ་ས་གྲོང་ཁྱེར་མ་འཇོག་ཚད་ཡོད་ཀུང་སིར་བོགས་མར་བཏང་བས་གྲོང་ཚོའི་ངལ་ནུས་ལ་བཅིངས་འགྲོལ་ཐོབ་པ་དང་། གྲོང་ཚོའི་ཆ་རྐྱེན་དང་ཕྱོགས་གང་ཅིའི་མཐུན་རྐྱེན་ལ་གཞིགས་ནས་2016ལོར་འབྲོག་མོ་གྲོང་ཚོ་དེ་ཞིང་འབྲོག་མང་ཚོགས་གནས་སྤོས་བྱ་ཡུལ་དུ་གྱུར་མོད། འོན་ཀྱང་གྲོང་ཚོའི་ངལ་ནུས་ལྷག་མ་རྣམས་ཀྱི་ལས་ཞུགས་ཐག་གཅོད་དང་གནས་སྤོས་མང་ཚོགས་བཀོད་སྒྲིག་ཇི་ལྟར་བྱེད་དགོས་མིན་དེ་གྲོང་ཚོའི་ལས་འགན་ཨང་དང་པོར་གྱུར།

གནས་ཚུལ་དེར་གཞིགས་ནས་འབྲོག་མོ་གྲོང་ཚོས་རིག་གནས་དང་ཡུལ་སྐོར་ཐོན་ལས་ལ་བརྟེན་ནས་གྲོང་གསེབ་དར་རྒྱས་གཏོང་བའི་ཐབས་ལམ་འཚོལ་ཞིབ་ཧུར་ཐག་བྱས་ཏེ། བདེ་སྐྱིད་བོད་ཁྱིམ་ཡུལ་སྐོར་རྣམ་གྲངས་ཀྱིས་གནས་སྤོས་མང་ཚོགས་ཀྱི་སྡོད་ཁང་ཁྱིམ་ཚང་མགྲོན་ཁང་དུ་སྒྱུར་བཀོད་བྱས་ཏེ་གནས་སྤོས་མང་ཚོགས་ལ་རང་ཁྱིམ་ནས་ལས་ཞུགས་ཐུབ་པར་སྐུལ་ཁྲིད་བྱས་ཡོད། གཞན་ཡང་གནས་མཆོག་དྲི་ཞིམ་གླིང་ཁ་དང་ལུང་ཧྥུའུ་རླངས་འཁོར་ཞིབ་དཔྱད་ཚད་ལེན་ལྟེ་གནས། འབྲོག་མོ་ཟོག་འགྲུལ་རླངས་འཁོར་འཇོག་ས། གྲོང་ཚོའི་ཟ་ཁང་དང་སྒོ་རྩིས་ཚོང་ཁང་། མཉམ་སྡེབ་དཔལ་འབྱོར་གྱི་ཚོང་སྒྱུར་ཁང་པ་སོགས་གྲོང་ཚོའི་མཉམ་སྡེབ་དཔལ་འབྱོར་ཁག་ལས་མང་ཚོགས་རྣམས་རང་ས་རང་ཡུལ་དུ་ལས་ཞུགས་ཐུབ་པ་དང་ཁྱིམ་གྱི་སྒོ་རྩར་ཡོང་འབབ་གསོག་ཐུབ་པ་མ་ཟད། ལོ་རེར་མཉམ་སྡེབ་དཔལ་འབྱོར་ལས་བགོ་འགྲེམས་རག་གི་ཡོད་པ་རེད།

མཉམ་སྡེབ་དཔལ་འབྱོར་ནི་གྲོང་གསེབ་དར་རྒྱས་ཡོང་བའི་རྨང་གཞི་དང་འདེགས་སྐྱོར་ལྟ་བུ་རེད། འབྲོག་མོ་གྲོང་ཚོའི་མཉམ་སྡེབ་དཔལ་འབྱོར་ལ་གྲོང་ཚོའི་ས་ཞིང་བོགས་མ་བཏང་བར་ལོ་རེར་ཡོང་འབབ་སྒོར་ཁྲི་300ལྷག་ཙམ་ཡོད་པ་དང་། 2022ལོར་གནས་མཆོག་དྲི་ཞིམ་གླིང་ཁ་བཙུགས་པ་ལས་ལོ་དེར་ཡོང་འབབ་སྒོར་ཁྲི་300ལྷག་ཙམ་བྱུང་བ། ལུང་ཧྥུའུ་རླངས་འཁོར་ཞིབ་དཔྱད་ཚད་ལེན་ལྟེ་གནས་ལ་ལོ་རེར་ཡོང་འབབ་སྒོར་ཁྲི་100ལྷག་ཙམ་ཡོད་པ། འབྲོག་མོ་ཟོག་འགྲུལ་རླངས་འཁོར་འཇོག་སར་ལོ་རེར་ཡོང་འབབ་སྒོར་ཁྲི་180ལྷག་ཙམ་ཡོད་པ། གྲོང་ཚོའི་མཉམ་སྡེབ་དཔལ་འབྱོར་གྱི་ཚོང་སྒྱུར་ཁང་པར་ལོ་རེར་ཡོང་འབབ་སྒོར་ཁྲི་300ལྷག་ཙམ་ཡོད་པ་བཅས་གྲོང་ཚོའི་མཉམ་སྡེབ་དཔལ་འབྱོར་ཁག་ལ་ལོ་རེར་ཁྱོན་ཡོང་འབབ་སྒོར་ཁྲི་1080ལྷག་ཙམ་ཡོད་པ་དང་། ལོ་མཇུག་ཏུ་ཡུལ་མི་རེར་སྒོར་3000ལྷག་ཙམ་གྱི་བགོ་འགྲེམས་རག་གི་ཡོད་པ་རེད།

རིག་གནས་དང་ཡུལ་སྐོར་ལ་བརྟེན་ནས་གྲོང་གསེབ་དར་རྒྱས་གཏོང་བ་དང་གནས་སྤོས་མང་ཚོགས་ཀྱི་འཚོ་བ་དང་ལས་ཞུགས་ཐག་གཅོད་བྱེད་པ་དེ་འབྲོག་མོ་གྲོང་ཚོའི་ལས་དོན་གྱི་དོ་གནད་ལྟ་བུར་འགྱུར་ཡོད། གནད་དོན་དེར་གཞིགས་ནས་བདེ་སྐྱིད་བོད་ཁྱིམ་ཡུལ་སྐོར་འཕེལ་རྒྱས་རྣམ་གྲངས་ཀྱིས་གནས་སྤོས་མང་ཚོགས་ཀྱི་སྡོད་ཁང་གཞི་རྟེན་དུ་བྱས་ཏེ། སྡོད་ཁང་གི་ཐོག་སོ་དང་པོ་ནང་མི་སྡོད་ས་དང་ཐོག་སོ་གཉིས་པ་ཁྱིམ་ཚང་མགྲོན་ཁང་དུ་སྒྱུར་བཀོད་བྱས་ནས། ཁྱིམ་དུ་ལས་ཞུགས་ཐུབ་པ་དང་ཡུལ་སྐོར་ལ་བརྟེན་ནས་གྲོང་གསེབ་དར་རྒྱས་ཡོང་བར་བྱས་ཡོད།

བདེ་སྐྱིད་བོད་ཁྱིམ་ཡུལ་སྐོར་འཕེལ་རྒྱས་རྣམ་གྲངས(གཤམ་དུ་བདེ་སྐྱིད་བོད་ཁྱིམ་ཞེས་བསྡུ་རྒྱུ)ནི་འབྲོག་མོ་གྲོང་ཚོའི་གནས་སྤོས་བཀོད་སྒྲིག་བྱ་ཡུལ་ལ་སྒྱུར་བཀོད་བྱས་ཏེ་གྲོང་གསེབ་དར་རྒྱས་ཡོང་བར་སྣེ་ཁྲིད་དང་དབུལ་སྒྲོལ་ཕྱུག་འགྱུར་དམིགས་ཡུལ་དུ་བྱས་པའི་ཁྱིམ་ཚང་མགྲོན་ཁང་ཞིག་རེད། རྣམ་གྲངས་དེར་མ་རྩ་སྒོར་ཁྲི་6815བཏང་བ་དང་ལོ་རེའི་ལས་གཉེར་ལ་འགྲོ་སོང་སྒོར་ཁྲི་300ལྷག་ཙམ་གཏོང་གི་ཡོད། བདེ་སྐྱིད་བོད་ཁྱིམ་2018ལོའི་ཟླ་9པ་ནས་ལས་གཉེར་བྱས་ཚུན། ཉིན་རེར་ཡུལ་སྐོར་བ་200ལྷག་ཙམ་ལ་སྣེ་ལེན་བྱེད་ཀྱི་ཡོད་པ་དང་། རིམ་རྩིས་བྱས་ན། 2018ལོ་ནས་2022ལོ་བར་ཡུལ་སྐོར་བ་ཁྲི་12ཙམ་ལ་སྣེ་ལེན་བྱས་པ་དང་ཡུལ་སྐོར་གྱི་ཡོང་འབབ་སྒོར་ཁྲི་800ལྷག་ཙམ་ཟིན་ཡོད། བདེ་སྐྱིད་བོད་ཁྱིམ་ལ་ཁྱིམ་ཚང་མགྲོན་ཁང་ཁྱོན་བསྡོམས་140ཡོད་པ་དང་དེའི་ནང་གནས་སྤོས་དུད་ཚང་15ཡོད་པ་རེད། ལོ་རེའི་རྣམ་གྲངས་ཀྱི་ཡོང་འབབ་ལས་གནས་སྤོས་མང་ཚོགས་ལ་བགོ་འགྲེམས་སྒོར་4000ནས་8000བར་རྒྱག་གི་ཡོད་པ་དང་། གནས་སྤོས་མང་ཚོགས་རྣམས་གནས་སྤོ་ཐུབ་པ་དང་། གཞིས་ཆགས་ཐུབ་པ། ཕྱུག་པོ་ཆགས་ཐུབ་པ་བཅས་ལ་སྐུལ་འདེད་ནུས་ལྡན་བཏང་ཡོད། བདེ་སྐྱིད་བོད་ཁྱིམ་གྱིས་ལོ་མཇུག་ཏུ་ད་དུང་གནས་སྤོས་མང་ཚོགས་མི་རེར་སྒོར་200དང་དབང་པོ་སྐྱོན་ཅན་དང་སློབ་མ། རྒན་རྒོན་ལོ་དྲུག་ཅུ་ཡན་བཅས་ལ་སྒོར་400སྤྲོད་ཀྱི་ཡོད། གནས་སྤོས་མང་ཚོགས་ཀྱི་ལས་ཞུགས་ཐག་གཅོད་ནུས་ལྡན་བྱས་ཡོད་ལ། གྲོང་ཚོ་འཕེལ་རྒྱས་དང་དེའི་ཉེ་འཁོར་གྱི་འགྲིམ་འགྲུལ་སྐྱེལ་འདྲེན། ཚོང་ཁང་དང་ཟ་ཁང་སོགས་ཀྱི་འཕེལ་རྒྱས་ལའང་སྐུལ་འདེད་ནུས་ལྡན་ཐེབས་ཡོད།

པ་སངས་དགྲ་འདུལ་ནི་2016ལོར་སྟོད་ལུང་རྒུ་རུམ་ཤང་སྣ་མཁར་གྲོང་ཚོ་ནས་འབྲོག་མོ་གྲོང་ཚོར་གནས་སྤོས་བྱས་པ་ཞིག་ཡིན་ཞིང་། ལས་ཞུགས་ཐག་གཅོད་ཀྱི་གནད་དོན་འདིར་གཞིགས་ནས་པ་སངས་དགྲ་འདུལ་འདྲ་བའི་གནས་སྤོས་མང་ཚོགས་ཀྱི་དུད་ཁྱིམ་བཅོ་ལྔ་ཡི་སྡོད་ཁང་ཁྱིམ་ཚང་མགྲོན་ཁང་དུ་སྒྱུར་བཀོད་བྱས་ནས་རང་ཁྱིམ་དུ་ལས་ཞུགས་ཐུབ་ཡོད། “ང་ནི་འབྲོག་པ་ཞིག་ཡིན། གནས་སྤོས་མ་བྱས་གོང་ལོ་གཅིག་དུས་བཞི་ཕྱུགས་འཚོ་བར་འགྲོ་དགོས་ལ། ཁྱིམ་གྱི་ཡོང་འབབ་ཀྱང་དེ་ཙམ་མང་པོ་མེད། འབྲོག་མོ་གྲོང་ཚོར་གནས་སྤོས་བྱས་རྗེས་བདེ་སྐྱིད་བོད་ཁྱིམ་གྱིས་ལས་ཞུགས་ཐག་གཅོད་བྱས་བྱུང་ལ། ལོ་རེའི་གཉེར་སྐྱོང་ལ་གཞིགས་ནས་བགོ་འགྲེམས་སྒོར་4000ནས་8000བར་རག་གི་འདུག ང་ཚོས་ཁང་པ་བོགས་མར་བཏང་བ་ཙམ་རེད། མགྲོན་ཁང་གི་གཉེར་སྐྱོང་དང་གཙང་སྦྲ་སོགས་བདེ་སྐྱིད་བོད་ཁྱིམ་གྱིས་འགན་འཁུར་གྱི་ཡོད་པས། ང་ཚོས་མགྲོན་ཁང་གཉེར་སྐྱོང་ཐད་ལས་ཀ་གང་ཡང་བྱེད་དགོས་ཀྱི་མེད”ཅེས་པ་སངས་དགྲ་འདུལ་གྱིས་བརྗོད།

གྲོང་ཚོར་མི་འབོར་མང་ཞིང་འཚོ་བའི་མཁོ་ཆས་ཉོ་དགོས་ཚེ་རླངས་འཁོར་བསྡད་ནས་རྫོང་གྲོང་དུ་སྐྱོད་དགོས་པས་གྲོང་ཚོ་ཨུ་ལྷན་གྱིས་གྲོང་ཚོ་རང་ལ་དབང་བའི་ཟ་ཁང་དང་སྒོ་རྩིས་ཚོང་ཁང་འཛུགས་རྒྱུའི་གྲོས་བསྡུར་ཡང་ཡང་བྱས་མཐར་2019ལོར་གྲོང་ཚོའི་སྒོ་རྩིས་ཚོང་ཁང(སྟོད་ལུང་བྱམས་བསྟན་སྒོ་རྩིས་ཚོང་ཁང)དང་ཟ་ཁང(སྟོད་ལུང་བྱམས་བསྟན་བོད་ཟས་ཁང)བཙུགས་ཤིང་། ཚོང་ཁང་ལ་ལོ་རེར་ཡོང་འབབ་སྒོར་ཁྲི་10ཙམ་ཡོད་པ་དང་ཟ་ཁང་ལ་སྒོར་ཁྲི་20ཙམ་ཡོད་པ་རེད། ཚོང་ཁང་དང་ཟ་ཁང་གི་འགན་འཁུར་བ་འཇམ་དཔལ་སྐལ་བཟང་གིས་ངོ་སྤྲོད་བྱས་དོན། གྲོང་ཚོའི་ཚོང་ཁང་བཙུགས་པས་མང་ཚོགས་རྣམས་ལ་སྟབས་བདེ་གང་ལེགས་བསྐྲུན་ཡོད། སྒོ་རྩིས་ཚོང་ཁང་ལ་ལས་མི་བཞི་དང་ཟ་ཁང་ལ་ལས་མི་དྲུག་བསྡུས་ཡོད་པས་ཁྱོན་མི་10ཡི་ལས་ཞུགས་ཐག་གཅོད་བྱས་པར་གྲོང་ཚོ་རང་གི་མི་5དང་གནས་སྤོས་མང་ཚོགས་མི་5ཡོད། སྒོ་རྩིས་ཚོང་ཁང་གི་ལས་མིར་ཟླ་རེར་སྒོར་4000དང་ཟ་ཁང་གི་མ་བྱན་ལ་ཟླ་རེར་སྒོར་7500 ལས་མི་གཞན་ལ་སྒོར་4000ཡོད། ཟ་ཁང་དང་ཚོང་ཁང་གི་ལོ་རེའི་ཡོང་འབབ་ཀྱིས་ཡུལ་མིའི་གློག་རིན་དང་ཆུ་རིན་ཐག་གཅོད་བྱེད་ཀྱི་ཡོད། དེ་བཞིན་འབྲས་དང་གྲོ་ཞིབ་ཉོས་ནས་ལོ་མཇུག་ཏུ་དུད་ཚང་ལ་གཞིགས་ནས་སྤྲོད་པ་དང་། གནས་སྤོས་མང་ཚོགས་དབང་པོ་སྐྱོན་ཅན་ལ་ལོ་མཇུག་ཏུ་འཚམས་འདྲིའི་དངུལ་སྒོར་1000རེ་སྤྲོད་ཀྱི་ཡོད།

འབྲོག་མོ་གྲོང་ཚོའི་སྒོ་རྩིས་ཚོང་ཁང་གི་ལས་མི་སྒྲོལ་མ་ཆོས་མཚོས“ང་ནི་འབྲོག་མོ་གྲོང་ཚོར་གནས་སྤོས་བྱས་པ་ཞིག་ཡིན། གནས་སྤོས་མ་བྱས་གོང་འབྲོག་ལས་མ་གཏོགས་ཡོང་འབབ་གཞན་གང་ཡང་མེད། འབྲོག་མོ་གྲོང་ཚོར་གནས་སྤོས་བྱས་རྗེས་གྲོང་ཚོའི་སྒོ་རྩིས་ཚོང་ཁང་དུ་ལས་ཀ་བྱས་པར་ཟླ་རེར་ཡོང་འབབ་སྒོར་4000འདུག ཐག་རིང་དུ་ལས་ཀ་འཚོལ་བར་འགྲོ་མི་དགོས་པར་ཁྱིམ་གྱི་སྒོ་རྩར་ལས་ཞུགས་ཐུབ་པ་མ་ཟད། ཡོང་འབབ་ཡང་མང་པོ་འདུག་པས་འཚོ་བར་སེམས་ཁྲལ་མི་འདུག”ཅེས་དགའ་ཚོར་ཆེན་པོས་བརྗོད།

འབྲོག་མོ་གྲོང་ཚོས་མཉམ་སྡེབ་དཔལ་འབྱོར་ལ་བརྟེན་ནས་གྲོང་ཚོའི་མང་ཚོགས་རྣམས་ཕྱུག་འགྱུར་གྱི་དམིགས་ཡུལ་སྒྲུབ་བཞིན་པ་དང་། བདེ་སྐྱིད་བོད་ཁྱིམ་གྱིས་གནས་སྤོས་མང་ཚོགས་རྣམས་གནས་སྤོ་ཐུབ་པ་དང་། གཞིས་ཆགས་ཐུབ་པ། ཕྱུག་པོ་ཆགས་ཐུབ་པ་བཅས་ཡོང་བར་རམ་འདེགས་ནུས་ལྡན་བྱས་པར། 2019ལོར་བོད་རང་སྐྱོང་ལྗོངས་དབུལ་སྒྲོལ་འགག་སྒྲོལ་གྱི་རྩ་འཛུགས་གསར་གཏོད་བྱ་དགའ་དང་། 2019ལོར་ལོ་འཁོར་གྱི་སྟོད་ལུང་བདེ་ཆེན་ཆུས་ཐོན་ལས་ཀྱིས་ལས་ཞུགས་ལ་སྐུལ་འདེད་བཏང་བའི་སྔོན་ཐོན་ཁེ་ལས་ཀྱི་བྱ་དགའ་ཨང་གཉིས་པ། 2020ལོར་ཞིང་ལས་གྲོང་གསེབ་པུས་སྤྲད་པའི་ཀྲུང་གོའི་མཛེས་སྡུག་ལྡན་པའི་སོས་དལ་གྲོང་གསེབ་ཀྱི་གཟི་བརྗིད་མཚན་སྙན། 2020ལོར་རིག་གནས་དང་ཡུལ་སྐོར་པུས་སྤྲད་པའི་ཁག་གཉིས་པའི་གྲོང་གསེབ་ཡུལ་སྐོར་གྱི་གཙོ་གནད་གྲོང་ཚོ་སོགས་ཀྱི་གཟི་བརྗིད་མཚན་སྙན་ཐོབ་ཡོད།