2021ལོའི་ཟླ་12ཚེས་30ཉིན། གྲོང་སྡོད་ལས་དོན་ཁག་དགུ་པ་མཇུག་འགྲིལ་ཉེར་ཡོད་པའི་སྐབས་སུ་ལྷོ་ཁ་གྲོང་ཁྱེར་སྣེ་གདོང་ཆུས་རྩེད་ཐང་ཁྲོམ་གཞུང་བཙན་ཐང་སྡེ་ཁུལ“ཨུ་ལྷན་གཉིས”ཀྱི་ཚན་ཁག་དང་སྐབས་དེ་དུས་གྲོང་སྡོད་ཧྲུའུ་ཅི་དང་པོའི་འགན་འཁུར་མཁན་གྱི་མིང་འབྲེལ་ཡི་གེ་ཞིག་སྣེ་གདོང་ཆུས་ཡིག་བསྐུར་ངོ་བཅར་ཅུས་ལ་འབྱོར་ནས་ཅུས་དེས་གཤམ་དུ་མངགས་པའི་གྲོང་སྡོད་ལས་བྱེད་པ་ཕུར་བུ་ཚེ་རིང་སྡེ་ཁུལ་དེར་མུ་མཐུད་ལས་གནས་འཁུར་དུ་འཇུག་རོགས་ཞེས་པའི་བླང་བྱ་བཏོན།

དེ་ལྟར། 2022ལོར་ཕུར་བུ་ཚེ་རིང་སླར་ཡང་ཁོང་གིས་རྒྱུས་མངའ་ཆེ་ལ་སེམས་སུ་དྲན་པའི་ས་ཆར་ལོག་ནས་ཧྲུའུ་ཅི་དང་པོ་དང་གྲོང་སྡོད་ལས་དོན་རུ་ཁག་གི་རུ་དཔོན་གཅིག་ལྕོགས་བྱས།

ལོ་གཉིས་ཀྱི་ལས་འགན་འཁུར་རིང་། ཕུར་བུ་ཚེ་རིང་གིས་ཏན་ཏན་ཏིག་ཏིག་དང་ཐེག་པ་ཁུར་ལེན་བྱས་པས་ཚང་མའི་བསྔགས་བརྗོད་ཐོབ་ཡོད།

ཏང་གི་གཞི་རིམ་ལས་བྱེད་པ་ཞིག་ཡིན་པའི་ངོས་ནས་གདོང་ལེན་དཔེ་བཟང་གི་ནུས་པ་ཡག་པོ་བཏོན་ཏེ་ཏང་འཛུགས་སྐྱོང་ལས་དོན་གྱི“གདོང་ལེན་པ”བརྩོན་ལེན་བྱེད་པ་ནི་ཕུར་བུ་ཚེ་རིང་གིས་ཐོག་མཐའ་བར་གསུམ་དུ་འབད་བརྩོན་བྱེད་པའི་ཁ་ཕྱོགས་རེད།

“སྒུལ་ཤུགས་ཡིན་པའི་གཞི་རིམ་ཏང་འཛུགས་སྐྱོང་ལ་དམ་འཛིན་ཡག་པོ་བྱས་ཚེ་ལས་དོན་མཐའ་དག་བདེ་བླག་ཡོང”ཞེས་ཕུར་བུ་ཚེ་རིང་གིས་རྒྱུན་དུ་ཤོད་ཀྱི་ཡོད།

ཁོང་གིས་དང་ཐོག་སྒྲོག་འགྲེལ་ལས་དོན་ལ་དམ་འཛིན་ཡག་པོ་བྱས་ནས་དུས་ཚོད་ཀྱི་མཚམས་ཚིགས་གལ་ཆེན་ལ་གཅིག་སྡུད་སྒྲོག་འགྲེལ་བྱེད་ཀྱི་ཡོད། ཁོང་གིས་བབ་ཆགས་ལ་མང་ཚོགས་དང་ཉེ་བའི་སྐད་ཆ་དང་འཚོ་བའི་ཁྲོད་ཀྱི་གཏམ་རྒྱུད་བཤད་དེ་མང་ཚོགས་ལ་ཏང་གི་དམངས་ཕན་སྲིད་ཇུས་ལས་མི་ཚང་མར་ཕན་བཏགས་པ་དང་ཏང་གིས་སྣེ་ཁྲིད་པའི་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་བྱ་འཕུར་བ་ལྟར་འཕེལ་རྒྱས་འགྲོ་བཞིན་པ་ཚོར་དུ་བཅུག་སྟེ་མང་ཚོགས་རྣམས་གོང་བུ་གཅིག་ཏུ་སྒྲིལ་བ་དང་། མང་ཚོགས་ལ་ཆུ་འཐུང་དུས་ཆུ་འགོ་དྲན་ནས་ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲང་བ་བཅས་ཀྱི་དད་སེམས་བརྟན་དུ་གཏོང་བའི་ཁྲིད་སྟོན་བྱེད་ཀྱི་ཡོད།

མང་ཚོགས་རྣམ་དཀར་གྱིས“ཕུར་བུ་ཚེ་རིང་གིས་སྒྲོག་འགྲེལ་བྱེད་སྐབས་མང་ཚོགས་ཀྱིས་གོ་བདེ་ཤེས་སླ་བའི་སྐད་ཆ་ཤོད་པས་ཚང་མས་ཁོང་གི་སྒྲོག་འགྲེལ་ཉན་རྒྱུར་དགའ་པོ་བྱེད་ཀྱི་འདུག”ཅེས་བཤད།

དེ་དང་ཆབས་ཅིག་ཁོང་གིས“ཚོགས་འདུ་གསུམ་དང་སློབ་ཚན་གཅིག”དང“ཚོགས་འདུ་བཞི་དང་ཡོངས་བསྒྲགས་གཉིས”སོགས་ཀྱི་ལམ་ལུགས་ཁག་དོན་འཁྱོལ་ནན་པོ་བྱས་ནས་སྒྲིག་སྲོལ་ལྟར་ལས་དོན་སྤེལ་བ་དང་། ཏང་ཡོན་གྱིས་ཆོས་དད་བྱས་མི་ཆོག་པའི་སློབ་གསོ་ཁྲིད་སྟོན་བྱ་རྒྱུར་སྣང་ཆེན་བྱེད་པ། མཉམ་སྡོད་མཉམ་སྐྲུན་ཚན་པ་དང་རང་འགུལ་ངང་འབྲེལ་གཏུག་མཐུན་སྦྱོར་བྱས་ནས་སྡེ་ཁུལ་དུ་བཅའ་སྡོད་བྱེད་པ། “བསམ་འདུན་ཆུང་ངུ”སོགས་ཀྱི་བྱེད་སྒོ་སྣ་ཚོགས་སྒྲིག་འཛུགས་བྱས་ནས་སྤེལ་བ། ཏང་དང་མང་ཚོགས་དབར་གྱི་མཉམ་སྐྲུན་ཟབ་ཏུ་གཏོང་བ། མང་ཚོགས་ཀྱི“འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག”ཐག་གཅོད་བཅས་བྱས་པས་མང་ཚོགས་ཀྱི་བསྔགས་བརྗོད་ཐོབ་པ་རེད།

དེ་ཙམ་མ་ཟད། ཕུར་བུ་ཚེ་རིང་གིས་ད་དུང་ཏང་གི་རིགས་པའི་གཞུང་ལུགས་དང་། སྲིད་ཇུས། རྒྱལ་ཁབ་ཀྱི་སྤྱི་སྤྱོད་སྐད་ཡིག་བཅས་གསོ་སྦྱོང་ལས་དོན་ནང་བཅུག་ནས་ཏང་འཛུགས་དུས་ཆེན་དང་བུད་མེད་དུས་ཆེན་སོགས་ཀྱི་སྐབས་རྒྱལ་ཁབ་ཀྱི་སྤྱི་སྤྱོད་སྐད་ཡིག་སྦྱོང་བར་བྱ་དགའ་སྤྲོད་པའི་འགྲན་བསྡུར་སྒྲིག་འཛུགས་བྱས་ཏེ་སྤེལ་བས་མང་ཚོགས་ཧ་ཅང་མང་པོ་ཞུགས་ཡོད་པ་རེད།

མང་ཚོགས་ཀྱི་སྣེ་ཁྲིད་དེ་འཕེལ་རྒྱས་དོན་གཉེར་བྱེད་པ་དང་གྲོང་གསེབ་དར་རྒྱས་གཏོང་བར་སྐུལ་འདེད་གཏོང་རྒྱུ་ནི་ཕུར་བུ་ཚེ་རིང་གི་གཙོ་གནད་ལས་དོན་གཞན་ཞིག་རེད། དེར་བརྟེན་ཁོང་གིས་ཐབས་བརྒྱ་ཇུས་སྟོང་ངང་སྡེ་ཁུལ་གྱི་དཔལ་འབྱོར་འཕེལ་རྒྱས་གཏོང་རོགས་བྱས་ནས་མང་ཚོགས་ཀྱི་ཕྱུག་འགྱུར་སྣེ་ཁྲིད་པ་ཡག་པོ་ཞིག་ཧུར་ཐག་བྱས་པ་རེད།

2021ལོར་ཁོང་གིས་སྡེ་ཁུལ་དུ་གྲོང་གསེབ་ཀྱི་བདག་དབང་ལམ་ལུགས་སྒྱུར་བཅོས་ལེགས་སྒྲུབ་བྱ་རྒྱུར་མཛུབ་ཁྲིད་བྱེད་པའི་ནང་ཞུགས་ནས་བཙན་ཐང་སྡེ་ཁུལ་གྱི་མ་རྐང་དཔལ་འབྱོར་མཉམ་ལས་ཁང་བཙུགས་ཏེ་མང་ཚོགས་རང་ཁྱིམ་གྱི་སྒོ་རྩ་ནས་ལས་ཞུགས་ཐུབ་རྒྱུར་རོགས་རམ་བྱས་པ་རེད།

འགན་ཡུན་ནང་སྡེ་ཁུལ་གྱིས་ལོ་ལྟར་མང་ཚོགས་ལ་ཁེ་སྤོགས་བསྡོམས་སྒོར་ཁྲི་150ལྷག་ཙམ་བགོ་འགྲེམས་བྱེད་ཀྱི་ཡོད། དེ་དང་ཆབས་ཅིག་ཁོང་གིས་ད་དུང་སྨན་བཅོས་འགན་བཅོལ་དང་རྒན་གསོ་འགན་བཅོལ་གྱི་གྲོན་དངུལ་དང་ཐོན་སྐྱེད་དང་འཚོ་བའི་ཐད་ཀྱི་གློག་རིན་ཚབ་སྐྱེལ་སོགས་དམངས་ཕན་ཁུར་པོ་ཡང་དུ་གཏོང་བའི་སྲིད་ཇུས་ཁག་བཅུ་གཉིས་མུ་མཐུད་དོན་འཁྱོལ་བྱས་པས་མང་ཚོགས་ཀྱི་ཐོབ་སྣང་དང་སྐྱིད་སྣང་ཟམ་མི་ཆད་པར་ཆེ་རུ་ཕྱིན་ཡོད། ད་ཆ་ཁེ་སྤོགས་ལས་ཐད་ཀར་འབབ་འཕར་དང་། ཁུར་པོ་ཡང་དུ་བཏང་ནས་འབབ་འཕར་ལ་སྐུལ་ཁྲིད། ལས་ཞུགས་ཐུབ་ནས་འབབ་འཕར་བརྟན་པོ་ཡོང་བ་བཅས་ནི་བཙན་ཐང་སྡེ་ཁུལ་གྱི་མཉམ་སྡེབ་དཔལ་འབྱོར་འཕེལ་རྒྱས་ཀྱི་བཀྲག་མདངས་འཚེར་ས་ཞིག་ཏུ་གྱུར་ཡོད།

དམངས་ཀྱི་སེམས་ཁྲལ་དང་དཀའ་ངལ་སེལ་བ་དང་འགག་རྩའི་དུས་སུ་མདོང་མཆོང་གིས་མང་ཚོགས་ཀྱི“ཞབས་ཞུ་བ”ཡག་པོ་བྱེད་པའི་ཐད་ཕུར་བུ་ཚེ་རིང་གིས་ཧོལ་རྒྱུག་གཏན་ནས་བྱེད་ཀྱི་མེད།

ལོ་གཉིས་རིང་ཁོང་གིས《གྲོང་མིའི་སྤྱི་ཆིངས》ལ་བཟོ་བཅོས་བརྒྱབ་ནས་འགལ་ཟླ་དང་རྩོད་གཞི་གྲལ་བཤེར་འདུམ་འགྲིག་དང་། བདེ་འཇགས་ཐོན་སྐྱེད། བརྟན་ལྷིང་སྲུང་སྐྱོང་དང་ལས་རེས་གྲ་སྒྲིག་བཅས་མཐའ་འཁྱོངས་ལྷོད་མེད་ངང་དམ་འཛིན་བྱེད་པ་དང་ཚང་མར་རང་དཔེ་གཞན་སྟོན་བྱེད་ཀྱི་ཡོད། 2021ལོར་ཁོང་གིས་སྡེ་ཁུལ“ཨུ་ལྷན་གཉིས”དང་མཉམ་དུ་ལས་ཡུལ་ཞིག་གིས་སྡེ་ཁུལ་གྱི་འཁོར་བདག་ལ་འགྱངས་ཆད་བྱས་པའི་དབོར་གླ་སྒོར་ཁྲི་400ལྷག་ཙམ་མཐུན་སྦྱོར་ངང་ལེན་རོགས་བྱས་པ་རེད། 2022ལོར་བཙན་ཐང་སྡེ་ཁུལ་གྱིས“རིམས་མེད་སྡེ་ཁུལ”གྲུབ་འབྲས་ཐོབ་པའི་ངང་བཏོད་པ་དང་ཕུར་བུ་ཚེ་རིང་ལ་སྣེ་གདོང་ཆུས་ནས་བརྡ་ཁྱབ་བཏང་སྟེ་བསྔགས་བརྗོད་བྱས་པ་དང་སྡེ་ཁུལ་ནས“རིམས་ནད་སྔོན་འགོག་དང་ཚོད་འཛིན་གྱི་དཔེ་དམག”གི་མཚན་སྙན་སྤྲད་པ་རེད།

ལོ་གསུམ་བསྟུད་མར་གྲོང་ཚོར་བཅའ་སྡོད་བྱས་པས་ཕུར་བུ་ཚེ་རིང་གིས་རང་ཉིད་ཀྱི་བཟའ་ཟླ་དང་ཕྲུ་གུར་ལྟ་རྟོག་བྱ་རྒྱུ་བྱུང་མེད། ཁོང་གིས་སེམས་ནུས་ཚང་མ་ལས་ཀར་འཇོག་པ་དང་བཟའ་ཟླ་གཅིག་པུས་དབང་སྐྱོན་ཡིན་པའི་བུ་དང་ལོ་ན་ཕྲ་བའི་བུ་མོར་ལྟ་སྐྱོང་བྱེད་པའི་འགན་འཁྲི་ལྕི་པོ་འཁུར་གྱི་ཡོད།

ཁོང་གིས“མི་ཚང་མར་ཁྱིམ་ཚང་ཡོད། སྡེ་ཁུལ་ཁྱིམ་ཚང་ཆེན་པོར་ཡང་ང་ཚོ་གྲོང་སྡོད་ལས་བྱེད་པས་བརྟན་སྲུང་བྱེད་དགོས་ཀྱི་རེད། དེར་བརྟེན་ངའི་བཟའ་ཟླས་འཁང་ར་མེད་པར་ངར་རྒྱབ་སྐྱོར་བྱེད་པ་ནི་ངས་གཞི་རིམ་བརྟན་སྲུང་གིས་མང་ཚོགས་ལ་ཞབས་འདེགས་ཞུ་བའི་སྒུལ་ཤུགས་ཆེ་ཤོས་དེ་ཡིན”ཞེས་བཤད།

ཕུར་བུ་ཚེ་རིང་2021ལོ་དང་2022ལོ་བསྟུད་མར་ཕུལ་བྱུང་གི་གཞུང་ལས་པར་བདམས་པ་དང་རྩེད་ཐང་ཁྲོམ་གཞུང་ཏང་དོན་ཨུ་ལྷན་གྱིས་2022ལོའི་ཕུལ་བྱུང་གི་ཧྲུའུ་ཅི་དང་པོར་བདམས་པ་རེད།

མཚན་སྙན་ནི་འདས་ཟིན་པར་གཏོགས་པས་མ་འོངས་པར་དེ་བས་འབད་འབུངས་བྱེད། ཕུར་བུ་ཚེ་རིང་གིས་ཐོག་མའི་བསམ་འདུན་མ་བརྗེད་པར་མུ་མཐུད་འབད་འཐབ་བྱས་ཏེ་གྲུབ་འབྲས་གསར་པ་ཧུར་ཐག་གཏོད་པ་དང་ལག་ལེན་ལ་བརྟེན་ནས་དམངས་ལ་ཞབས་འདེགས་ཞུ་རྒྱུ་ཡིན་ཞེས་བཤད།