“2017ལོར་སློབ་ཆེན་ཐོན་རྗེས་ངས་ཕྱིར་གླ་པར་བསྐྱོད་ནས་ཉམས་མྱོང་བསགས་པ་ཡིན། 2021ལོར་ཏང་དང་སྲིད་གཞུང་གི་སྲིད་ཇུས་བཟང་པོའི་འོག་ང་ཕ་ཡུལ་དུ་ལོག་ནས་ཆེད་ལས་དང་འཚམ་པའི་དགུང་སྔོན་སྤྱི་ཚོགས་ལས་དོན་མི་སྣ་དང་དང་བླངས་ཞབས་ཞུའི་མཐུན་ཚོགས་བཙུགས་ཏེ་ཆུ་ཤུར་རྫོང་རྒན་རྒོན་གྱི་ཉིན་མོའི་ལྟ་རྟོག་ལྟེ་གནས་ཀྱི་རྒན་རྒོན་ཚོར་ཆེད་ལས་ཅན་གྱི་རྒན་གསོའི་ཞབས་ཞུ་བྱེད་འགན་ཁུར་བ་ཡིན། ང་ཚོས་རྒན་རྒོན་ལ‘རོགས་རམ་ལྔའི’ཞབས་འདེགས་ཞུས་པ་མ་ཟད། ད་དུང་རྒན་རྒོན་ཚོར་བོད་ལུགས་ཀྱི་འཕུར་མཉེད་སོགས་ཞབས་ཞུའི་རྣམ་གྲངས་སྣ་ཚོགས་མཁོ་འདོན་བྱེད་ཀྱི་ཡོད། ཆུ་ཤུར་རྫོང་གི་རྒན་རྒོན་ཚོ་དང་ང་རང་ལ་སྲིད་ཇུས་བཟང་པོའི་ཕན་པ་ཐོབ་བྱུང་། ངའི་ཕུགས་འདུན་ནི་ཆུ་ཤུར་རྫོང་གི་རྒན་རྒོན་ཚོར་རྒྱལ་ཁབ་ཀྱི་རྒན་གསོའི་སྲིད་ཇུས་སྔར་བས་ལོངས་སྤྱོད་ཐུབ་པ་དང་བདེ་སྐྱིད་ཚོར་ཐུབ་པ་དེ་ཡིན”ཞེས་དགུང་སྔོན་སྤྱི་ཚོགས་ལས་དོན་པ་དང་དང་བླངས་ཞབས་ཞུའི་མཐུན་ཚོགས་ཀྱི་ཚོགས་གཙོ་བདེ་སྐྱིད་དབང་མོས་བཤད།

ལོ་26ལ་སླེབས་པའི་བདེ་སྐྱིད་དབང་མོ་ཁྲང་ཧྲ་དམངས་སྲིད་ལས་རིགས་ལག་རྩལ་སློབ་གླིང་ནས་ཐོན་ཞིང་། ཆེད་ལས་ནི་དམངས་སྲིད་དོ་དམ་ཡིན་པ་དང་ལོ་4འབད་བརྩོན་བྱས་པ་བརྒྱུད་དགུང་སྔོན་སྤྱི་ཚོགས་ལས་དོན་པ་དང་དང་བླངས་ཞབས་ཞུའི་མཐུན་ཚོགས་ཀྱི་ཚོགས་གཙོར་གྱུར། སྤྱི་ཚོགས་དང་རྒན་གསོའི་ལས་དོན་གྱི་ཁྱབ་ཁོངས་ནང་ཞུགས་པ་ནས་བཟུང་རྒན་རྒོན་ཚོའི་སྣ་མང་ཅན་གྱི་རྒན་གསོའི་དགོས་མཁོ་བསྐངས་ནས་རྒན་རྒོན་དེ་བས་མང་བར་རང་ཁྱིམ་གྱི་སྒོ་འགྲམ་དུ་རྒན་གསོའི་ཞབས་ཞུ་ཡག་པོ་ལོངས་སྤྱོད་ཐུབ་པ་བྱ་ཆེད། ཁོང་གིས་རྒན་གསོའི་འབྲེལ་ཡོད་ཤེས་བྱ་སློབ་སྦྱོང་དང་རྒན་གསོའི་ཤེས་བྱ་སློབ་སྦྱོང་ཡག་པོ་བྱེད་པའི་རྨང་གཞིའི་ཐོག་ལག་ལེན་ཁག་ནང་ཧུར་ཐག་ཞུགས་ཏེ་རིགས་པའི་གཞུང་ལུགས་ཀྱི་ཤེས་བྱ་ལག་ལེན་ཁྲོད་སྤྱོད་རྒྱུར་འབད་བརྩོན་བྱས་པ་རེད།

རྒན་རྒོན་གྱི་དགོས་མཁོ་སྔར་བས་ཤེས་རྟོགས་དང་འབྲེལ་ཡོད་གྲངས་གཞི་འཚོལ་བསྡུ་བྱ་ཆེད། ཁོང་དང་ཚོགས་པའི་ཁོངས་མིས་2021ལོའི་ཟླ་9པ་ནས་བཟུང་། གཞི་རིམ་དུ་བརྟག་ཞིབ་བྱེད་པར་བསྐྱོད་དེ་སྦྱངས་པའི་ཆེད་ལས་ཀྱི་ཁྱད་ཆོས་འདོན་སྤེལ་གང་ལེགས་བྱས་པས་རྒན་རྒོན་ཚོའི་གདེང་འཇོག་བཟང་པོ་ཐོབ་ཡོད། དེ་དང་ཆབས་ཅིག་གཅིག་སྡུད་ཐོག་ཚོགས་འདུ་འཚོགས་པ་དང་འཚམས་འདྲི་བྱེད་པའི་ཐབས་ལ་བརྟེན་ནས་རྒན་རྒོན་ལ་རྒན་གསོའི་སྐོར་གྱི་འབྲེལ་ཡོད་སྲིད་ཇུས་འགྲེལ་བཤད་བརྒྱབ་སྟེ་རྒན་རྒོན་ཚོས་རྒྱལ་ཁབ་ཀྱིས་རྒན་རྒོན་ལ་བཏོན་པའི་གཟིགས་སྐྱོང་སྲིད་ཇུས་སྔར་བས་ཤེས་རྟོགས་ཐུབ་པར་བྱས་ཡོད། ཟླ་བ་བཞི་ཡི་རིང་འབད་བརྩོན་ལྷོད་མེད་བྱས་པ་བརྒྱུད། དགུང་སྔོན་སྤྱི་ཚོགས་ལས་དོན་པ་དང་དང་བླངས་ཞབས་ཞུའི་མཐུན་ཚོགས་2022ལོའི་ཟླ་1ཚེས་3ཉིན་དངོས་སུ་གཉེར་སྐྱོང་བྱེད་འགོ་ཚུགས་ཡོད།

བདེ་སྐྱིད་དབང་མོས་རྒན་རྒོན་ཚོར་རང་ཉིད་ཀྱི་ནང་མི་ལྟར་ཞབས་ཞུ་བསྒྲུབས་པ་མ་ཟད། “རོགས་རམ་ལྔའི”ཞབས་ཞུ་བྱེད་པ་ཕུད་ད་དུང་ཁོང་ཚོར་བོད་ལུགས་ཀྱི་འཕུར་མཉེད་སོགས་ཞབས་ཞུ་སྣ་ཚོགས་བྱེད་ཀྱི་ཡོད་པ་རེད།

དགུང་སྔོན་སྤྱི་ཚོགས་ལས་དོན་པ་དང་དང་བླངས་ཞབས་ཞུའི་མཐུན་ཚོགས་གཉེར་སྐྱོང་བྱས་ནས་ཟླ་བ་གསུམ་སོང་རྗེས་ཐོག་མའི་རྒན་རྒོན་15ནས་ད་ལྟའི་50ལྷག་ཙམ་བར་མང་དུ་ཕྱིན་ཡོད། ཁོང་ཚོས་ལྷག་བསམ་རྣམ་དག་ངང་ཞབས་འདེགས་ཞུས་པས་རྒན་རྒོན་ཚོའི་ཡིད་ཆེས་དང་གདེང་འཇོག་བཟང་པོ་ཐོབ་པ་མ་ཟད་རྒན་རྒོན་ཚོའི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་ཟམ་མི་ཆད་པར་ཆེ་རུ་ཕྱིན་ཡོད་པ་རེད།