སྨན་སྡེ་གྲོང་ཚོ་ནི་གཞིས་རྩེ་གྲོང་ཁྱེར་གམ་པ་རྫོང་གམ་པ་གྲོང་རྡལ་དུ་གནས་ཤིང་། སྨན་སྡེ་གྲོང་ཚོའི་ལུག་གསོ་ཚགས་ཆེད་ལས་མཉམ་ལས་ཁང་ནི་2018ལོའི་ཟླ་12པར་བཙུགས་པ་ཞིག་རེད། གོང་རིམ་ཏང་ཨུད་དང་སྲིད་གཞུང་གི་ཡང་དག་པའི་འགོ་ཁྲིད་འོག ཁོངས་མི་ཚོས་ལོ་4ཙམ་འཚོལ་ཞིབ་བྱས་པ་དང་འཕེལ་རྒྱས་བཏང་བ་བརྒྱུད། སྨན་སྡེ་གྲོང་ཚོའི་ལུག་གསོ་ཚགས་ཆེད་ལས་མཉམ་ལས་ཁང་གི་ལུག་མགོ་གྲངས་དང་ཐོག་མའི་4300ནས་ད་ཆའི་5900བར་མང་དུ་ཕྱིན་པ་དང་། རིམ་རྩིས་བྱས་ན་ལུག་4100ལྷག་ཙམ་བཤས་བཏང་བ། ལོ་རེར་གཉེར་སྐྱོང་ཡོང་འབབ་སྒོར་ཁྲི་160ལྷག་ཙམ་བྱུང་བ། ཁེ་སྤོགས་སྒོར་ཁྲི་60ལྷག་ཙམ་རག་པ། མང་ཚོགས་དུད་ཚང་རེར་ལོ་རེར་ཆ་སྙོམས་འབབ་འཕར་སྒོར་8000ཟིན་རྒྱུར་སྐུལ་ཁྲིད་བྱས་པ་རེད། གཞན་ཡང་ངལ་ནུས་མི་གྲངས་60ལྷག་ཙམ་བཅིངས་འགྲོལ་བཏང་བ་དང་། ཞིང་འབྲོག་མང་ཚོགས་53གྱི་ལས་ཞུགས་གནད་དོན་ཐག་གཅོད་བྱས་པར་ཡོང་འབབ་སྒོར་ཁྲི་180ལྷག་ཙམ་བྱུང་ཡོད་པ་རེད།

སྨན་སྡེ་གྲོང་ཚོའི་ལུག་གསོ་ཚགས་ཆེད་ལས་མཉམ་ལས་ཁང་དེ་ཉིད་གྲོང་ཚོ་དེས་དབུལ་སྒྲོལ་གྲུབ་འབྲས་སྲ་བརྟན་དུ་གཏོང་བ་དང་གྲོང་གསེབ་དར་རྒྱས་ལ་སྐུལ་འདེད་གཏོང་བའི་རྐང་འཛིན་སྟོབས་ཤུགས་ཤིག་ཏུ་གྱུར་ཡོད།

གམ་པ་རྫོང་གམ་པ་གྲོང་རྡལ་སྨན་སྡེ་གྲོང་ཚོའི་ཏང་ཀྲི་པུའི་ཧྲུའུ་ཅི་མཉམ་ལས་ཁང་གི་ལས་འཛིན་ཉི་བཀྲ་ཡིས། ཉེ་བའི་ལོ་ཤས་རིང་སྨན་སྡེ་གྲོང་ཚོས། ཏང་འཛུགས་སྐྱོང་ལ་དམ་འཛིན་བྱས་ནས་གྲོང་གསེབ་དར་རྒྱས་ལ་སྐུལ་འདེད་གཏོང་རྒྱུའི་སྐོར་གྱི་གཞིས་རྩེ་གྲོང་ཨུད་དང་གམ་པ་རྫོང་ཨུད་ཀྱི་བཀོད་སྒྲིག་ལག་བསྟར་དོན་འཁྱོལ་ནན་ཏན་བྱས་ཏེ། ཞིང་འབྲོག་པའི་ཆེད་ལས་མཉམ་ལས་ཁང་འཕེལ་རྒྱས་དང་སྟོབས་ཆེར་གཏོང་རྒྱུ་དེ་ཐོན་ལས་འཕེལ་རྒྱས་ལ་སྐུལ་འདེད་གཏོང་བ་དང་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ་དང་གྲོང་གསེབ་དར་རྒྱས་འབྲེལ་མཐུད་ནུས་ལྡན་བྱེད་པ་དམ་འཛིན་བྱ་གཞི་གལ་ཆེན་དུ་བརྩིས་ནས་གྲོང་ཚོའི་ཏང་ཀྲི་པུའུ་ཡིས་སྣེ་ཁྲིད་རྒྱུ་མཐའ་འཁྱོངས་ཀྱིས“ཏང་ཀྲི་པུའུ་+མཉམ་ལས་ཁང་+ཞིང་དུད”ཀྱི་འཕེལ་རྒྱས་གཏོང་སྟངས་འཚོལ་ཞིབ་ཧུར་ཐག་བྱས་པ་ཡིན་ཞེས་གསར་འགོད་པར་བཤད།

ཏང་ཀྲི་པུས་མང་ཚོགས་སྣེ་ཁྲིད་དང་མང་ཚོགས་སྒྲིག་འཛུགས་བྱེད་པའི་ནུས་པ་གང་ལེགས་བཏོན་ཏེ། མཉམ་ལས་ཁང་འཛུགས་པ་དང་འཕེལ་རྒྱས་གཏོང་བའི“སྣེ་ཁྲིད་པ”ཡག་པོ་ཞིག་བྱས་ཤིང་། གྲོང་ཚོའི་ཏང་ཀྲི་པུའི་ཧྲུའུ་ཅིས་མཉམ་ལས་ཁང་གི་ལས་འཛིན་དང་། གྲོང་ཚོ“ཨུ་ལྷན་གཉིས”ཀྱི་ཚན་ཁག་གི་ཁོངས་མིས་མཉམ་ལས་ཁང་གི་ལས་འཛིན་ཁོངས་མིའི་འགན་ཁུར་ནས་འཕྲལ་དུ་སྣེ་ཁྲིད་དེ་མཉམ་ལས་ཁང་ལ་ཞུགས་པ། ཏང་ཡོན་བློ་མཐུན་གཞན་དག་གིས་དཔེ་སྟོན་གྱི་ནུས་པ་བཏོན་ནས་མཉམ་ལས་ཁང་ལ་ཧུར་ཐག་ཞུགས་པ་རེད།

གྲོང་ཚོ“ཨུ་ལྷན་གཉིས”ཀྱི་ཚན་ཁག་གིས་ཏང་ཡོན་ལ་སྣེ་ཁྲིད་དང་ཏང་ཡོན་གྱིས་མང་ཚོགས་ལ་སྣེ་ཁྲིད་བྱས་ཏེ་མང་ཚོགས་ཀྱི་ཚོགས་ཆེན་འཚོགས་པ་དང་། གྲོང་ཚོ་དང་དུད་ཚང་དུ་བསྐྱོད་དེ་མང་ཚོགས་ལ་སྲིད་ཇུས་དྲིལ་བསྒྲགས་དང་འབྱུང་འགྱུར་གླེང་བ་སོགས་ཀྱི་བྱ་ཐབས་སྤྱད་དེ། ཞིང་འབྲོག་མང་ཚོགས་ཀྱི་སེམས་ཁྲལ་རིམ་བཞིན་བསལ་བས་སྨན་སྡེ་གྲོང་ཚོ་དེ་ཉིད“100%ལྔ”མངོན་འགྱུར་སྔ་ཤོས་ཐུབ་པའི་གྲོང་ཚོར་གྱུར་པ་མ་ཟད། གྲོང་ཚོ་ཡོངས་མཉམ་ལས་ཁང་དུ་ཞུགས་རྒྱུ་སྔོན་ལ་མངོན་འགྱུར་ཐུབ་ཡོད།

“ང་ཚོས་ཏང་འཛུགས་སྐྱོང་ལ་བརྟེན་ནས་མཉམ་ལས་ཁང་གི་འཛུགས་སྐྱོང་དང་འཕེལ་རྒྱས་ལ་སྣེ་ཁྲིད་བྱས་པས་གྲོང་ཚོ་ཡོངས་ཀྱི་མང་ཚོགས་ཀྱི་འབབ་འཕར་ཕྱུག་འགྱུར་ལ་སྐུལ་ཁྲིད་ནུས་ལྡན་ཐུབ་པ་དང་། ཏང་ཀྲི་པུའུ་ཡི་གོང་བུ་འགྲིལ་ཤུགས་དང་འབོད་སྐུལ་བྱེད་ཤུགས་ཆེ་རུ་ཕྱིན་པ། གྲོང་ཚོའི་ཏང་ཀྲི་པུའུ་ཡི་གཙོ་ཁྲིད་དབང་ཆ་དང་སྐད་ཆ་ཤོད་དབང་ཆེ་རུ་ཕྱིན་པ་བཅས་བྱུང་ནས་ཞིང་འབྲོག་པས་བློ་བརྟན་འགྱུར་མེད་ངང་ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲང་བ་བཅས་བྱེད་པར་ཁྲིད་སྟོན་སྔར་ལས་ལྷག་པ་བྱས་ཡོད” ཅེས་ཉི་བཀྲ་ཡིས་བཤད།

དེ་དང་ཆབས་ཅིག མཉམ་ལས་ཁང་གིས་མང་ཚོགས་ཀྱི་འབབ་འཕར་ཕྱུག་འགྱུར་ལ་སྐུལ་ཁྲིད་དང་། གྲོང་ཚོའི་མཉམ་སྡེབ་དཔལ་འབྱོར་ལ་རྒྱབ་སྐྱོར་དང་སྟོབས་ཆེར་གཏོང་བ། གྲོང་གསེབ་ཀྱི་ཐོན་ལས་དར་རྒྱས་ལ་སྐུལ་འདེད་གཏོང་བ་བཅས་ཀྱི་དམིགས་ཚད་ལ་དམིགས་ཏེ་ལམ་ལུགས་ཁག་ཟམ་མི་ཆད་པར་འཐུས་སྒོ་ཚང་དུ་བཏང་བ་དང་། ལས་འཛིན་ལྷན་ཚོགས་དང་ལྟ་ཞིབ་ལྷན་ཚོགས་སོགས་རྩ་འཛུགས་སྒྲིག་གཞི་བཙུགས་པ། ཏང་ཡོན་གྱི་ལས་གནས་བཀོད་སྒྲིག་དང་འགན་འཁྲི་གཏན་འཁེལ་དང་། ཐོན་སྐྱེད་གཉེར་འཚོང་། ནོར་དོན་རྩིས་གཉེར་སོགས་དོ་དམ་གཉེར་སྐྱོང་གི་ལམ་སྲོལ་འཐུས་སྒོ་ཚང་དུ་བཏང་བ་རེད།

ཉི་བཀྲ་ཡིས“གོམ་སྟབས་རྗེས་མར། སྨན་སྡེ་གྲོང་ཚོས་དོན་དངོས་ལ་གཞི་བཙུགས་ཏེ། དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ་དང་གྲོང་གསེབ་དར་རྒྱས་འབྲེལ་མཐུད་ནུས་ལྡན་བྱེད་པ་དམིགས་ཚད་དུ་བཟུང་ནས། རྫོང་དང་ཆུས་གཞན་པའི་མཉམ་ལས་ཁང་འཕེལ་རྒྱས་གཏོང་སྟངས་བཟང་པོ་དང་ཉམས་མྱོང་བཟང་པོ་སློབ་སྦྱོང་དང་དཔྱད་གཞིར་བཟུང་བ་དང་། གྲུབ་ཆ་ལེགས་སྒྲིག་དང་གཉེར་སྐྱོང་ནུས་པ་ཆེ་རུ་གཏོང་བ། སྨན་སྡེ་གྲོང་ཚོའི་མཉམ་ལས་ཁང་འཕེལ་རྒྱས་སྐྱོན་བྲལ་དང་བརྟན་པོ་འགྲོ་བར་སྐུལ་འདེད་གཏོང་བ་བཅས་བྱས་ཏེ། དེ་བས་ཕུལ་བྱུང་གི་གྲུབ་འབྲས་ནས་ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་རྒྱུ་ཡིན”ཞེས་བཤད།