འདི་ནི་རྒྱ་མ་ཤང་གི་མཉམ་ལས་ཁང་གིས་མང་ཚོགས་ལ་2021ལོའི་བགོ་འགྲེམས་རྒྱག་བཞིན་པ། 

ཉེ་བའི་ལོ་ཤས་རིང་། ལྷ་ས་གྲོང་ཁྱེར་གྱི་གྲོང་ཚོ(གྲོང་ལྷན)ཁག་གིས་ཡུལ་བབ་དང་བསྟུན་པ་དང་བརྟན་ཐོག་ཡར་འཕེལ་མཐའ་འཁྱོངས་བྱས་ཏེ་ཐོན་ལས་འཕེལ་རྒྱས་ལ་དམ་པོར་དམིགས་པ་དང་། མཉམ་སྡེབ་དཔལ་འབྱོར་འཕེལ་རྒྱས་ཤུགས་ཆེན་གཏོང་བ། མང་ཚོགས་ཕྱུག་པོ་ཆགས་པའི་སྒུལ་ཤུགས་ཆེན་པོ་གཏོད་པ། གྲོང་གསེབ་དར་རྒྱས་ལ་འགན་ལེན་ནུས་ལྡན་བྱེད་པ་བཅས་བྱས་པས་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་སྔར་བས་ཟབ་ཏུ་སོང་ཡོད།

མལ་གྲོ་གུང་དཀར་རྫོང་དུ་ཅུང་གུ་དོག་པའི་རྒྱ་མའི་ལུང་གཞུང་གི་གཞུང་ལམ་འདེད་ནས་བསྐྱོད་ན་རྒྱ་མ་ཤང་དུ་སླེབས་ཀྱི་ཡོད།

གྲོང་གསེབ་དར་རྒྱས་ཀྱི་འཐབ་ཇུས་སྔར་བས་ལག་བསྟར་གཏིང་ཟབ་བྱས་ནས་དབུལ་སྒྲོལ་འགག་སྒྲོལ་གྱི་གྲུབ་འབྲས་བརྟན་དུ་གཏོང་ཆེད། རྒྱ་མ་ཤང་གིས་ཐོན་ཁུངས་ཀྱི་ལེགས་ཆ་འདོན་སྤེལ་གང་ལེགས་བྱས་ཏེ་ས་གནས་དེ་གའི་མང་ཚོགས་ཀྱི་འཕྲུལ་འཁོར་བསྡུ་སྒྲིལ་བྱས་ནས་རྒྱ་མ་ཤང་ཡུས་ཧའེ་མཉམ་བསྡུས་འཕྲུལ་འཁོར་བོགས་གཏོང་ཆེད་ལས་མཉམ་ལས་ཁང་བཙུགས་པ་དང་ཆབས་ཅིག མཉམ་ལས་ཁང་འཕེལ་རྒྱས་དང་མང་ཚོགས་ཀྱི་འབབ་འཕར་ལ་ནུས་ཤུགས་ཡོད་རྒུས་སྐུལ་འདེད་བཏང་བ་རེད། མཉམ་ལས་ཁང་གིས་ས་གནས་དེ་གའི་མང་ཚོགས་ཀྱི་འཕྲུལ་འཁོར་101བོགས་མར་བླངས་ནས་ས་གནས་དེ་གའི་སློབ་གྲྭ་ཆེ་མོ་བ་3ལ་ལས་ཞུགས་ལས་གནས་མཁོ་འདོན་བྱས་ཡོད། ཉེ་དུས་རྒྱ་མ་ཤང་ཡུས་ཧའེ་མཉམ་བསྡུས་འཕྲུལ་འཁོར་བོགས་གཏོང་ཆེད་ལས་མཉམ་ལས་ཁང་གིས་རྒྱ་མ་ཤང་ཙི་ཙི་རོང་གྲོང་ཚོ་ཨུ་ཡོན་ལྷན་ཁང་དུ་བགོ་འགྲེམས་རྒྱག་པའི་བྱེད་སྒོ་གཉེར་བ་རེད། མཉམ་ལས་ཁང་གི་འགན་འཁུར་བ་དང་། རྒྱ་མ་ཤང་གི་གྲོང་ཚོ་ཁག་གི་ཏང་ཀྲི་པུའི་ཧྲུའུ་ཅི། གྲོང་ཚོ་ཨུ་ལྷན་གྱི་ཀྲུའུ་རེན། དཀའ་ངལ་ཡོད་པའི་མང་ཚོགས་ཁག་གཅིག་བཅས་མཉམ་དུ་འཛོམས་ནས་2021ལོའི་མཉམ་ལས་ཁང་གི་བགོ་འགྲེམས་ལ་ལྷན་དུ་དཔང་པོ་བྱས་པ་རེད། “ང་ཚོའི་མཉམ་ལས་ཁང་བཙུགས་ནས་ལོ་གཉིས་ཙམ་སོང་ཡོད། 2020ལོར་མཉམ་ལས་ཁང་གིས་ས་གནས་དེ་གའི་མང་ཚོགས་ལ་བགོ་འགྲེམས་སྒོར་ཁྲི་16བརྒྱབ་ཡོད། 2021ལོར་མཉམ་ལས་ཁང་ལ་བྱུང་བའི་ཁེ་བཟང་ལོ་གོང་མ་ལས་ཡག་པ་འདུག དེར་བརྟེན་མང་ཚོགས་ལ་བགོ་འགྲེམས་སྒོར་ཁྲི་51བརྒྱབ་ཡོད། སླད་ཕྱིན་མཉམ་ལས་ཁང་འཕེལ་རྒྱས་ཇེ་ཡག་ཏུ་སོང་ནས་མང་ཚོགས་ལ་བགོ་འགྲེམས་དེ་བས་མང་བ་རྒྱག་ཐུབ་ངེས་ཡིན་པའི་ཡིད་ཆེས་ཡོད”ཅེས་མཉམ་ལས་ཁང་གི་འགན་འཁུར་བ་སྤེན་པས་གསར་འགོད་པར་བརྗོད།

ཉེ་དུས་ཁྲེང་ཀོན་ཆུས་བར་སྐོར་སྡེ་ཁུལ་གྱིས་2021ལོའི་མཉམ་སྡེབ་དཔལ་འབྱོར་གྱི་བགོ་འགྲེམས་དང་དེ་བཞིན་འཚམས་འདྲིའི་བྱེད་སྒོ་སྤེལ་ཏེ་གྲོང་མི་དུད་ཚང་187ལ་དྲོ་སྐྱིད་སྦྱིན་པའི“ཁུག་དམར”སྤྲད་པ་རེད། ལོ་7ནང་བར་སྐོར་སྡེ་ཁུལ་གྱི་མཉམ་སྡེབ་དཔལ་འབྱོར་ཏེ“བར་སྐོར་སྲང་ལམ་རྙིང་པའི་ཕུན་ཚོགས་ཟ་ཁང”གིས“མ་བྱན་རིགས་ཀྱི་ལས་གནས་བརྟན་ཚུགས་དང་སྐོར་སྐྱོར་ལས་གནས”ཟུང་དུ་སྦྲེལ་བའི་རྣམ་པ་སྤྱད་དེ་སྡེ་ཁུལ་ནང་གི་ངལ་ནུས་བསྡུས་ནས་གྲོང་མི་མང་ཚོགས་རྣམས་ཐག་ཉེ་སར་སྟབས་བདེ་པོས་ལས་ཞུགས་ཐུབ་པར་བྱས་པ་རེད། 2021ལོར་བར་སྐོར་སྡེ་ཁུལ་གྱི་མཉམ་སྡེབ་དཔལ་འབྱོར་གྱི་ཡོང་འབབ་ཁེ་གཙང་སྒོར་ཁྲི་58.52ཟིན་ཡོད། ཀྲི་པུས་གྲོས་འགོ་བཏོན་པ་དང“ཨུ་ལྷན་གཉིས་ཀྱིས”གྲོས་མོལ་བྱས་པ། ཏང་ཡོན་གྱི་ཚོགས་ཆེན་ཐོག་གྲོས་ཞིབ་བྱས་པ། གྲོང་མིའི་འཐུས་མིས་བརྡས་ཐག་བཅད་པ་བཅས་བརྒྱུད་2021ལོའི་ཁེ་སྤོགས་ཁྲོད་ནས་2022ལོའི་ཁང་གླ་སྒོར་ཁྲི་21.6དང་འཁོར་རྒྱུག་མ་དངུལ་30%ཉར་བ་ཕུད་ཁེ་སྤོགས་70%བགོ་འགྲེམས་དང་འཚམས་འདྲིའི་དངུལ་དུ་སྤྱད་པ་རེད། ད་རེས་ཀྱི་བགོ་འགྲེམས་རྒྱག་སྟངས་དེ་ལས་མང་ཐོབ་མང་གི་རྩ་དོན་གཞིར་བཟུང་མཉམ་སྡེབ་དཔལ་འབྱོར་གཉེར་སྐྱོང་ནང་ཞུགས་མཁན་གྲོང་མི་དང“གཉིས་ལྡན་དུད་སྦྲེལ”གྱི་འཐུས་མི། ཟ་ཁང་གི་ལས་མི་བཅས་དུད་ཚང་87ལ་སྒོར་1000ནས་10000བར་བགོས་ཡོད།

ཉེ་བའི་ལོ་ཤས་ནང་སྟོད་ལུང་བདེ་ཆེན་ཆུས་གདོང་དཀར་ཁྲོམ་གཞུང་གདོང་དཀར་སྡེ་ཁུལ་རྒྱལ་མཚན་ཚོགས་ཆུང་གིས་སྲིད་ཇུས་ཀྱི་རྒྱབ་སྐྱོར་དང་སྟབས་བདེ་བའི་ས་བབ་ཀྱི་ལེགས་ཆར་བརྟེན་ནས་གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་ཤུགས་ཆེན་བཏང་སྟེ་མང་ཚོགས་ཀྱི་ཡོང་འབབ་ཟམ་མི་ཆད་པར་མང་དུ་བཏང་ཡོད།

ཉེ་ཆར་གདོང་དཀར་སྡེ་ཁུལ་རྒྱལ་མཚན་ཚོགས་ཆུང་གིས་2021ལོར་མང་ཚོགས་ལ་བགོ་འགྲེམས་རྒྱག་པའི་བྱེད་སྒོ་གྲོང་ཚོའི་མཉམ་སྡེབ་ཇ་ཁང་དུ་གཉེར་ཞིང་། 2021ལོར་གྲོང་ཚོ་དེས་མཉམ་སྡེབ་ཐོག་བགོ་འགྲེམས་སྒོར་ཁྲི་318.43བརྒྱབ་ཡོད། སྡེ་ཁུལ་གྱིས་ད་དུང་ལོ་65ཡན་གྱི་རྒན་རྒོན་དང་ཁོར་ཡུག་འཕྲོད་བསྟེན་ལས་བཟོ་40ལ་འཚམས་འདྲིའི་དངུལ་སྒོར་400དང་2000སོ་སོར་སྤྲད་ཡོད།

གྲོང་མི་མིག་དམར་ཁྱིམ་ལ་ས་ཞིང་མུའུ་10ཡོད་པས་ད་ལོ་བགོ་འགྲེམས་སྒོར་ཁྲི་6ལྷག་ཙམ་རག་ཡོད། “2012ལོར་བགོ་འགྲེམས་ཐེངས་དང་པོ་རྒྱག་སྐབས་མུའུ་རེར་སྒོར་800ལས་མེད། ད་ཆ་མུའུ་རེར་སྒོར་6000ལྷག་ཙམ་རག་གི་འདུག ཏང་གི་སྲིད་ཇུས་བཟང་པོའི་ཁྲིད་སྟོན་འོག་ང་ཚོའི་འཚོ་བ་ཇི་ཙམ་བསྐྱལ་བ་དེ་ཙམ་གྱིས་སྐྱིད་དུ་འགྲོ་ཡི་འདུག་པས། ཏང་གི་བཀའ་དྲིན་ལ་ཐུགས་རྗེ་ཆེ་ཞུ་རྒྱུ་ཡིན”ཞེས་མིག་དམར་གྱིས་དགའ་ཚོར་ཆེན་པོས་བརྗོད།

ཉེ་བའི་ལོ་ཤས་རིང་། སྟོད་ལུང་བདེ་ཆེན་ཆུས་བདེ་ཆེན་གྲོང་རྡལ་ཆུ་བཟང་གྲོང་ཚོས་ཏང་འཛུགས་སྐྱོང་ཁྲིད་སྟོན་དུ་བྱས་ཏེ་བོད་སྨན་སྨན་རྒྱུ་དང་ཆུ་ཚན་སོགས་ཀྱི་ཐོན་ཁུངས་ཀྱི་ལེགས་ཆར་གཞིགས་ནས་གྲོང་ཚོའི་མཉམ་སྡེབ་ཀྱི་དཔལ་འབྱོར་འཕར་བ་དང་མང་ཚོགས་ལ་འབབ་འཕར་ཕྱུག་འགྱུར་ཡོང་བའི་དམིགས་ཚད་མངོན་འགྱུར་ཡོང་བར་བྱས་ཡོད། “ངའི་ཁྱིམ་ལ་མི་6ཡོད། མི་རེར་སྒོར་1000སྤྲད་པས་མི་6ལ་ཁྱོན་བསྡོམས་སྒོར་6000འདུག དེའི་ཁར་བགོ་འགྲེམས་སྒོར་1500བརྒྱབ་ན་ང་ཚོའི་ཁྱིམ་ལ་སྒོར་7500ཏག་ཏག་འདུག ཉེ་བའི་ལོ་ཤས་རིང་ང་ཚོའི་གྲོང་ཚོ་འཕེལ་རྒྱས་ཡག་པོ་ཕྱིན་པས། མི་སེར་གྱི་འཚོ་བའང་ལེགས་སུ་ཤུགས་ཆེན་སོང་ཡོད། དེ་དག་ཚང་མ་ཏང་གི་སྲིད་ཇུས་བཟང་པོ་ལས་བྱུང་བ་རེད”ཅེས་བགོ་འགྲེམས་རག་པའི་གྲོང་མི་བཀྲ་ཤིས་རྡོ་རྗེས་དེ་ལྟར་བརྗོད།

གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་དང་རྒྱ་སྟོབས་ཆེ་རུ་ཕྱིན་པས་གྲོང་མི་ཚོར་དངོས་དངོས་རྗེན་རྗེན་གྱི་ཁེ་ཕན་ཐོབ་སྟེ་གྲོང་ཚོའི་མཉམ་སྡེབ་དཔལ་འབྱོར་ལས་བྱུང་བའི་ཁེ་ཕན་ལོངས་སྤྱོད་ཐུབ་ནས། མང་ཚོགས་ཚོས་གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་ནང་ཞུགས་པའི་སྤྲོ་སེམས་འཕེལ་ཡོད་ལ། གྲོང་གསེབ་དར་རྒྱས་གཏོང་བར་ཡང་སྐུལ་མ་ཐེབས་ཡོད།