ཉང་ཆུ་གཙང་པོའི་ངོགས་སུ་གནས་པའི་ཉིང་ཁྲི་གྲོང་ཁྱེར་བྲག་ཡིབ་ཆུས་བཅུ་འཕར་གྲོང་ཚོར་སྐྱོད་སྐབས། ཐོག་ཁར་རྒྱལ་དར་གསར་རྐྱང་ལྷབ་ལྷུབ་ཏུ་གཡོ་ཞིང་། གྲོང་ཚོ་རིམ་པའི་བྱེད་སྒོའི་ཐང་ཆེན་དུ“ཏང་གི་བཀའ་ལ་ཉན། ཏང་གི་བཀའ་དྲིན་ཚོར། ཏང་གི་རྗེས་སུ་འབྲང”བཅས་ཀྱི་བོད་རྒྱ་སྐད་ཡིག་གཉིས་ཀྱི་སྦྱར་ཡིག་སེར་པོ་ཆེན་པོ་ལས་འོད་ཟེར་འཕྲོ།

གྲོང་ཚོའི་ལན་ཆིའུ་སྤོ་ལོ་ཐང་གི་འགྲམ་དུ་ཡོད་པའི་ཐོག་སོ་ཉིས་ལྡན་གྱི་བོད་བཟོའི་ཁང་པ་དེ་ནི་གྲོང་མི་དཀོན་མཆོག་བསྟན་པའི་ཁྱིམ་ཡིན་ཞིང་། དེ་དུས་ཁོང་གིས་གཙོ་འཛིན་གྱི་སྐུ་པར་ཕྱིས་པ་དང་། རྒྱལ་དར་གསར་པ་བརྗེ་བ། རང་ཁྱིམ་གྱི་སྒོ་རར་གཙང་སྦྲ་བྱེད་པ། རང་ཉིད་ཀྱི་བོད་ཆས་གྱོན་སྐྱོར་རྒྱག་པ་སོགས་བྱེད་བཞིན་ཡོད། “ལོ་གསར་ལ་ང་ཚོས་ངེས་པར་དུ་རྣམ་པ་གསར་རྐྱང་གི་ཐོག་ནས་ལོ་གསར་གཏོང་རྒྱུ་ཡིན”ཞེས་དཀོན་མཆོག་བསྟན་པས་བཤད།

དེ་ནས་གྲོང་ཚོའི་ཏང་ཀྲི་པུའི་ཧྲུའུ་ཅི་སྟོབས་རྒྱལ་འཛུལ་ཏེ་ཡོང་། གྲོང་ཚོ་དང་དུད་ཚང་དུ་སྐྱོད་པའི་གོ་སྐབས་དང་བསྟུན་ནས་ཏང་གི་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་དང་རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པའི་དགོངས་དོན་སྒྲོག་འགྲེལ་བྱེད་པ་ནི་ཉེ་དུས་སྟོབས་རྒྱལ་གྱི་ཉིན་རེའི་ལས་ཀ་ཞིག་རེད།

“ལོ་གསར་འཆར་གྲབས་ཡོད་པས་ལོ་གསར་གྱི་མཁོ་ཆས་གྲ་སྒྲིག་བྱས་ཟིན་ནམ། གཟུགས་པོ་ཐང་པོ་ཡིན་ནམ། གནམ་གཤིས་གྲང་མོ་འདུག་པས་དྲོ་ཇུས་བྱེད”ཅེས་སྟོབས་རྒྱལ་གྱིས་གཉེན་ཉེ་ལྟར་དཀོན་མཆོག་བསྟན་པར་འཚམས་འདྲི་བྱས།

ཅི་འཕྲོས་མོལ་འཕྲོས་བྱས་རྗེས་ཐབ་ཀྱི་འགྲམ་དུ་བསྡད་དེ་སྟོབས་རྒྱལ་གྱིས་བཅུ་འཕར་གྲོང་ཚོའི་ད་ལྟའི་བདེ་སྐྱིད་ལྡན་པའི་འཚོ་བ་དང་ཟུང་འབྲེལ་བྱས་ནས་དཔེ་མཚོན་དང་བབ་ཆགས་པའི་སྐད་ཆའི་ཐོག་ནས་ཏང་གི་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དྲུག་པ་དང་རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པ་སྐོང་ཚོགས་བྱས་པའི་དོན་སྙིང་གལ་ཆེན་གསལ་འགྲེལ་གཏིང་ཟབ་བྱས་པ་མ་ཟད། ཚང་འཛོམས་གྲོས་ཚོགས་དང་ཏང་གི་འཐུས་མི་ཚོགས་ཆེན་གྱི་དགོངས་དོན་གྱི་ངོ་བོ་དང་ཕུན་སུམ་ཚོགས་པའི་ནང་དོན་འགྲེལ་བཤད་གཏིང་ཟབ་ཀྱང་བརྒྱབ་པ་རེད།

སྒྲོག་འགྲེལ་ཉན་རྗེས་དཀོན་མཆོག་བསྟན་པས་སེམས་འགུལ་ཆེན་པོ་ཐེབས་བཞིན“ང་ལོ་70ཙམ་ལ་སླེབས་པ་དང་རྐང་པ་ཐང་པོ་མེད་པའི་དབང་གིས་གྲོང་ཚོའི་ནང་གི་ཁང་མིག་ཕྱེད་ཀ་ཞིག་བོགས་མར་བླངས་ནས་ཚོང་ཁང་ཆུང་ཆུང་ཞིག་བཙུགས་པ་ཡིན། བུས་རྒྱུན་དུ་སྐྱེལ་འདྲེན་ལས་ལ་གཞོལ་བ་དང་མནའ་མ་འབྲི་ཏ་ས་འཛིན་རྟེན་གཞིར་ལས་ཀར་བསྐྱོད་དེ་ཁྱིམ་ཚང་ལ་ལོ་རེར་ཡོང་འབབ་སྒོར་ཁྲི་12ཙམ་ཟིན་གྱི་འདུག ད་ཆ་ནང་མི་ཚང་མ་འཆམ་མཐུན་ཡོད། དེ་དག་ཚང་མ་ཏང་གིས་བསྩལ་བས་ངས་ཏང་ལ་སྙིང་དབུས་ནས་ཐུགས་རྗེ་ཆེ་ཞུ་རྒྱུ་ཡིན”ཞེས་བཤད་པ་རེད།

སྟོབས་རྒྱལ་གྱིས་གསར་འགོད་པར་2021ལོར་བཅུ་འཕར་གྲོང་ཚོའི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་ཁྲི་4ལྷག་ཙམ་ཟིན་གྱི་ཡོད་ཅེས་བཤད།

2009ལོར་བཅུ་འཕར་གྲོང་ཚོར་འབྲི་ཏ་ས་འཛིན་འདེབས་འཛུགས་ཀྱི་ཞིང་འབྲོག་པའི་ཆེད་ལས་མཉམ་ལས་ཁང་བཙུགས་ཤིང་། ད་ཆ་དྲོད་ཁང་ཆེ་མོ་56ཡོད་པ་ནས་53ལ་འབྲི་ཏ་ས་འཛིན་བཏབ་པ་དང་3ལ་མངར་ཚལ་ལ་ཕུག་བཏབ་ནས་འབྲི་ཏ་ས་འཛིན་འདེབས་ཁྱོན་མུའུ་26.5ཟིན་གྱི་ཡོད་པ་རེད། “ན་ནིང་འབྲི་ཏ་ས་འཛིན་གྱི་ཐོན་འབབ་རྒྱ་མ་ཁྲི་6ལྷག་ཙམ་ཟིན་ནས་ཡོང་འབབ་སྒོར་ཁྲི་240བྱུང་བ་དང་། མཉམ་ལས་ཁང་གི་ཁོངས་མིའི་དུད་ཚང་རེར་དྲོད་ཁང་ཆེ་མོ་2རེ་ཡོད་པར་བརྟེན། མཉམ་ལས་ཁང་གི་ཁོངས་མིའི་དུད་ཚང་རེར་ཆ་སྙོམས་འབབ་འཕར་སྒོར་ཁྲི་8ལྷག་ཙམ་ཟིན་པར་སྐུལ་ཁྲིད་ཐུབ་ཡོད” ཅེས་སྟོབས་རྒྱལ་གྱིས་ངོ་སྤྲོད་བྱས།

ཉེ་བའི་ལོ་ཤས་རིང་། བཅུ་འཕར་གྲོང་ཚོ་ཨུ་ལྷན་གྱིས་ད་དུང་གྲོང་ཚོ་དེ་གའི་དོན་དངོས་དང་ཟུང་འབྲེལ་གྱིས་གྲོང་སྲོལ་དམངས་ཆིངས་ཁ་གསབ་དང་འཐུས་སྒོ་ཚང་དུ་བཏང་སྟེ་གཏན་འབེབས་3གསར་དུ་བཟོས་པ་དང་དོན་ཚན་1ལ་བཟོ་བཅོས་བརྒྱབ་པ་དང་། “སྒོ་འགྲམ་གྱི་འགན་ལེན་བཞིའི”འགན་འཁྲིའི་ལམ་ལུགས་དུད་ཚང་ཡོངས་ཀྱི་གྱང་ལྡེབས་སུ་སྦྱར་བའི་ལས་དོན་སྤེལ་ནས། རྒྱ་ཆེའི་མང་ཚོགས་ཀྱི་ས་སྲུང་གི་འགན་འཁྲི་འཁུར་སེམས་ཆེ་རུ་བཏང་སྟེ་རང་རྟོགས་ངང་སྒོ་འགྲམ་གྱི་ས་ཁོངས་ལ་གཙང་སྦྲ་དང་བསྡུ་གསོག་ཡག་པོ་བརྒྱབ་པ། “གྲོས་བཞི་དང་ཡོངས་བསྒྲགས་གཉིས”ཀྱི་ལས་ཀའི་བྱེད་ཐབས་མཐའ་འཁྱོངས་བྱས་ནས་གྲོང་ཚོའི་དོན་དག་གལ་ཆེན་ཡོད་ཚད“གྲོས་བཞི་དང་ཡོངས་བསྒྲགས་གཉིས”ཀྱི་གོ་རིམ་ལྟར་ཇུས་ཐག་བཅད་ནས་ལག་ལེན་བསྟར་བར་གཞོགས་འདེགས་བྱས་ཡོད། “གྲོས་བཞི་དང་ཡོངས་བསྒྲགས་གཉིས”ཀྱི་ལས་ཀའི་བྱེད་ཐབས་ལག་ལེན་དང་འཐུས་སྒོ་ཚང་དུ་བཏང་བ་བརྒྱུད་གཞི་རིམ་གྱི་དམངས་གཙོ་མི་སེམས་སུ་གཏིང་ཟབ་ཟུག་ཡོད། དུས་མཚུངས་སུ་གྲོང་དོན་ལྟ་སྐུལ་ཨུ་ཡོན་ལྷན་ཁང་གི་ནུས་པ་འདོན་སྤེལ་བྱས་ཏེ། དུས་བཀག་ལྟར་ཏང་དོན་དང་། གྲོང་དོན། ནོར་དོན་བཅས་ཡོངས་བསྒྲགས་བྱས་ཏེ། མང་ཚོགས་གྲོང་དོན་ནང་ཞུགས་སུ་བཅུག་ཡོད་ལ་མང་ཚོགས་དབར་ཕན་ཚུན་ལྟ་སྐུལ་དང་དམངས་གཙོའི་རང་སྐྱོང་བྱེད་དུའང་བཅུག་ཡོད། མིག་སྔར། བཅུ་འཕར་གྲོང་ཚོས་ཏང་ཀྲི་པུས་འགོ་ཁྲིད་པ་དང་། གྲོང་ཚོ་ཨུ་ལྷན་གྱིས་དོན་འཁྱོལ་བྱེད་པ། གྲོང་དོན་ལྟ་སྐུལ་ཨུ་ལྷན་དང་གྲོང་མིས་ལྟ་སྐུལ་བྱེད་པ་བཅས“ཕྱོགས་གསུམ་གཞི་གཅིག”གི་དམངས་གཙོས་གྲོང་སྐྱོང་གི་རྣམ་པ་བཏོད་ཡོད།

སྟོབས་རྒྱལ་གྱིས། གོམ་སྟབས་རྗེས་མར་བཅུ་འཕར་གྲོང་ཚོའི་ཏང་ཀྲི་པུས་བྲག་ཡིབ་ཆུས་ཀྱི“ཏང་འཛུགས་སྐྱོང་གིས་སྣེ་ཁྲིད་དང་། ལེགས་ཆར་བརྟེན་ནས་སྐུལ་འདེད། གདོང་ལེན་བྲག་ཡིབ”བཅས་ཀྱི་ཏང་འཛུགས་སྐྱོང་ལས་དོན་གྱི་བསམ་ཕྱོགས་ལ་དམ་པོར་གཞིགས་ནས། ཏང་རྩ་འཛུགས་ཀྱི་དམག་འཐབ་མཁར་རྫོང་ནུས་པ་དང་ཏང་ཡོན་གྱི་གདོང་ལེན་དཔེ་བཟང་ནུས་པ་འདོན་སྤེལ་གང་ལེགས་བྱས་ནས། གཞི་རིམ་རྩ་འཛུགས་འཛུགས་སྐྱོང་ལ་རྒྱུན་ཆད་མེད་པར་ཤུགས་སྣོན་རྒྱག་པ་དང་འབྲེལ། “ཀུང་སི་དང་། ཏང་ཀྲི་པུའུ། མང་ཚོགས་བཅས་ཟུང་དུ་འབྲེལ་བའི”བྱེད་སྟངས་སྤྱད་དེ་ཡུལ་སྐོར་ཐོན་ལས་འཕེལ་རྒྱས་གཏོང་བ་དང་། དམངས་སྲོལ་གནས་ཚང་དང་ཞིང་པའི་སྤྲོ་སྐྱིད་ཁང་འཕེལ་རྒྱས་ལ་སྐུལ་འདེད་བརྟན་པོ་བཏང་སྟེ་མང་ཚོགས་བདེ་སྐྱིད་ལམ་བུར་བསྐྱོད་པར་རོགས་རམ་བྱ་རྒྱུ་ཡིན་ཞེས་བཤད།