གྲོང་གསེབ་ཀྱི་སྤུས་ལེགས་ཁེ་ལས་ནི་གྲོང་གསེབ་དར་རྒྱས་ལ་སྐུལ་འདེད་གཏོང་བའི་སྟོབས་ཤུགས་གལ་ཆེན་ཞིག་དང་ཞིང་འབྲོག་པ་རང་ཡུལ་དང་ཐག་ཉེ་སར་ལས་ཞུགས་དང་ཡོང་འབབ་འཕར་བའི་གཞི་རྟེན་གཙོ་བོ་ཞིག་རེད། བོད་ལྗོངས་ཁྲང་རུང་ནགས་ཤོད་གྱོན་ཆས་ཚད་ཡོད་ཀུང་སི་2019ལོའི་ཟླ་12པར་ནག་ཆུ་གྲོང་ཁྱེར་འབྲི་རུ་རྫོང་ཤག་ཆུ་ཤང་དུ་བཙུགས་པ་དང་། དེ་ནི་ཀྲེ་ཅང་ཉིང་པོའི་བོད་སྐྱོར་གྱི་དངོས་ཚན་ཁེ་ལས་ཤིག་རེད།

2020ལོའི་ཟླ་4པར་ལས་འགོ་བསྐྱར་འཛུགས་དང་ཐོན་སྐྱེད་སླར་གསོ་བྱས་རྗེས་ཀུང་སིས་ཡུལ་བབ་དང་བསྟུན་ནས“རང་བརྟེན་རྣམ་པའི”གྲོང་གསེབ་དར་རྒྱས་ཀྱི་ལམ་བུར་བསྐྱོད་པ་དང་། 2020ལོའི་ཟླ་12པའི་བར་ཀུང་སིའི་ཚོང་གཉེར་ཡོང་འབབ་སྒོར་ཁྲི་2000ཟིན་ནས་ས་གནས་དེ་གའི་ནོར་སྲིད་ཡོང་འབབ་དང་གྲོང་གསེབ་ཀྱི་དཔལ་འབྱོར་འཕེལ་རྒྱས་ཆེད་ལེགས་སྐྱེས་ངེས་ཅན་ཕུལ་ཡོད།

“ལས་ཞུཌ་ནི་དམངས་འཚོའི་རྩ་བ་དང་འཕེལ་རྒྱས་ཀྱི་རྨང་གཞི་རེད” བོད་ལྗོངས་ཁྲང་རུང་ནགས་ཤོད་གྱོན་ཆས་ཚད་ཡོད་ཀུང་སིས་ས་གནས་དེ་གའི་ཞིང་འབྲོག་པ་དབུལ་སྒྲོལ་ཕྱུག་འགྱུར་ཡོང་བར་རོགས་རམ་བྱ་ཆེད། ལས་མི་བསྡུ་སྐབས་ས་གནས་དེ་གའི་ཆ་རྐྱེན་འཛོམས་པའི་ཞིང་འབྲོག་པ་སྔོན་ལ་བསྡུས་ནས་མིག་སྔའི་བར་ཞིང་འབྲོག་པ་172བསྡུས་པ་རེད།

“ཀུང་སིར་ལས་ཀ་རག་རྗེས་ངས་སྲིད་གཞུང་གི་ཁ་གསབ་ཁོ་ནར་བརྟེན་ནས་འཚོ་བ་སྐྱེལ་དགོས་ཀྱི་མི་འདུག ཡོང་འབབ་བརྟན་པོ་ཡོད་པས་ངའི་ཁྱིམ་གྱི་འཚོ་བ་ཇེ་ལེགས་སུ་འགྲོ་བཞིན་ཡོད”ཅེས་དབུལ་པོ་ལས་གྲོལ་བའི་གསུམ་མཆོག་གིས་བཤད།

“ཀུང་སིས་ས་གནས་དེ་གའི་ཞིང་འབྲོག་པའི་ལས་ཞུགས་ལས་གཏོད་ལ་སྐུལ་ཁྲིད་བྱས་ཏེ་དབུལ་སྒྲོལ་འགག་སྒྲོལ་ལ་རམ་འདེགས་ཏན་ཏིག་བྱེད་ཀྱི་་ཡོད” ཀུང་སིར་སྔ་རྗེས་སུ་རང་སྐྱོང་ལྗོངས་རིམ་པའི“ཞིང་འབྲོག་པའི་ལས་ཞུགས་གཞན་སྒྱུར་རྟེན་གཞི”དང“དབུལ་སྒྲོལ་ཕྱུག་འགྱུར་གྱི་སྔོན་ཐོན་མཉམ་སྡེབ”སོགས་ཀྱི་གཟི་བརྗིད་མཚན་སྙན་ཐོབ་མྱོང་ཡོད་ཅེས་འབྲི་རུ་རྫོང་གི་རྫོང་དཔོན་གཞོན་པ་དབུལ་སྒྲོལ་འགག་སྒྲོལ་བཀོད་འདོམས་པུའི་བཀོད་འདོམས་པ་གཞོན་པ་ལི་ཅན་ཅུན་གྱིས་བཤད།

མིག་སྔར་བོད་ལྗོངས་ཁྲང་རུང་ནགས་ཤོད་གྱོན་ཆས་ཚད་ཡོད་ཀུང་སིས“ཞིང་གསུམ”ལས་དོན་ལ་སྐུལ་འདེད་ཏན་ཏིག་གཏོང་བ་དང་གྲོང་གསེབ་དར་རྒྱས་ལ་མུ་མཐུད་སྐུལ་འདེད་བཏང་སྟེ“ཞིང་ལས་སྟོབས་ཆེན་དང་། གྲོང་གསེབ་མཛེས་པ། ཞིང་པ་ཕྱུག་འགྱུར”བཅས་ཡོང་བར་རམ་འདེགས་བྱེད་ཀྱི་ཡོད།