ཉེ་ཆར། བྲག་ཡིབ་ཆུས་དགུན་ཚང་མོན་པ་མི་རིགས་ཤང་ཁོངས་གཏོགས་ཀྱི་འཕྲེད་ལུང་ས་ཁོངས་ཀྱི་ཁྲོན་བོད་ལྕགས་ལམ་སྐྲུན་འགོ་ཚུགས་ཤིང་། དགུན་ཚང་ཤང་གིས་ལྕགས་ལམ་སྐྲུན་པ་གོ་སྐབས་སུ་བྱས་ཏེ“རང་ཤང་གི་ཞིང་འབྲོག་པ་རྣམས་ཐག་ཉེ་ས་དང་སྟབས་བདེ་སར་ལྕགས་ལམ་གྱི་རྨང་གཞིའི་སྒྲིག་བཀོད་འཛུགས་སྐྲུན་ནང་ཞུགས་རྒྱུར་ཁྲིད་སྟོན་བྱས་ཏེ། དེ་གའི་མང་ཚོགས་ཀྱི་ཡོང་འབབ་མང་དུ་གཏོང་རྒྱུ”དམིགས་ཚད་དུ་བྱེད་པ་དང་། ཉིང་ཁྲིའི་ཀྲུང་ཡོན་ལས་གྲྭ་འཕྲུལ་ཆས་བོགས་གཏོང་ཚད་ཡོད་ཀུང་སི་དང་འབྲེལ་མཐུད་ཧུར་ཐག་བྱེད་པ། དུས་ཐོག་ཏུ་ཆེད་དོན་ཚོགས་འདུ་འཚོགས་ནས་ཞིབ་འཇུག་བཀོད་སྒྲིག་བཅས་བྱས་ཏེ། “བྱེད་ཐབས་གསུམ”གྱི་ལས་དོན་སྒྲུབ་ཐབས་སྤྱད་ནས་ཞིང་འབྲོག་པར་འབབ་འཕར་ཡོང་རྒྱུར་གཡས་གཞོགས་གཡོན་འདེགས་བྱས་པ་རེད།
གོ་རིམ་ལྡན་པའི་ངང་ལས་མི་སྤྱོད་ཐུབ་པའི་འགན་ལེན་བྱས་པ། ཚན་རིག་དང་མཐུན་ལ་གོ་རིམ་ལྡན་པའི་ངང་ལས་མི་སྤྱོད་པ་དང་རླངས་འཁོར་གཏོང་ཐུབ་པའི་འགན་ལེན་བྱ་ཆེད། དགུན་ཚང་མོན་པ་མི་རིགས་ཤང་ཏང་ཨུད་ཀྱིས་ཤང་ཏང་ཨུད་ཀྱི་ཧྲུའུ་ཅི་གཞོན་པ་དང་མི་དམངས་འཐུས་ཚོགས་ཀྱི་ཀྲུའུ་ཞིས་ཙུའུ་ཀྲང་བྱས་པའི་མཐུན་སྦྱོར་འགོ་ཁྲིད་ཚོགས་ཆུང་བཙུགས་པ་མ་ཟད། དེའི་གཤམ་འོག་ཏུ་བཀྲ་ཆོས་གྲོང་ཚོའི་ཀྲི་པུའི་ཧྲུའུ་ཅིས་རུ་དཔོན་དང་གྲོང་ཚོ་ཁག་གི་འཐུས་མིས་རུ་དཔོན་གཞོན་པ་བྱས་པའི་རླངས་འཁོར་རུ་ཁག་འགོ་ཁྲིད་ཚུགས་ཆུང་བཙུགས་ནས་རླངས་འཁོར་120ལྷག་ཙམ་ཕྱིར་གཏོང་གི་ལས་དོན་སྤྱི་འདོམས་བཀོད་སྒྲིག་བྱས་པར་མི་100ལྷག་ཙམ་ལས་ཞུགས་ཐུབ་ཡོད།
ཞི་མཐུན་ངང་ལས་མི་སྤྱོད་ཐུབ་པའི་འགན་ལེན་བྱས་པ། ལས་དོན་དེ་བདེ་འཇགས་དང་གོ་རིམ་ལྡན་པའི་ངང་སྤེལ་ཐུབ་པར་བྱ་ཆེད། རླངས་འཁོར་རུ་ཁག་འགོ་ཁྲིད་ཚོགས་ཆུང་གིས་དུས་ཐོག་ཏུ་ལས་དོན་མི་སྣའི་བསམ་བློ་ཤེས་རྟོགས་བྱས་པ་དང་ལས་དོན་མི་སྣ་དབར་གྱི་འགལ་ཟླ་དང་རྩོད་གཞིའི་མངོན་མེད་རྐྱེན་ངན་ཁོང་དུ་ཆུད་པར་བྱས་པ་མ་ཟད། འགལ་ཟླ་དང་རྩོད་གཞི་སྔ་ཙམ་དང་ཚབས་ཆུང་དུས་ནས་འདུམ་འགྲིག་ཐག་གཅོད་བྱས་ཡོད།
བདེ་འཇགས་ངང་ལས་མི་སྤྱོད་ཐུབ་པའི་འགན་ལེན་བྱས་པ། “མི་དམངས་ཀྱི་ཚེ་སྲོག་དང་བདེ་འཇགས་གོང་དུ་བཀུར་བའི”འདུ་ཤེས་མཐའ་འཁྱོངས་ཀྱིས་རླངས་འཁོར་རུ་ཁག་འགོ་ཁྲིད་ཚོགས་ཆུང་གིས་ཞོགས་པ་ཞིབ་བཤེར་དང་མཚན་མོར་དྲིལ་བསྒྲགས་སློབ་གསོ་སྤེལ་བའི་བྱེད་ཐབས་སྤྱད་དེ། ཉིན་ལྟར་རླངས་འཁོར་རྡོག་ཐོན་མ་བྱས་གོང་རླངས་འཁོར་ལ་ཞིབ་བཤེར་བྱ་རྒྱུ་མཐའ་འཁྱོངས་བྱས་ནས་རླངས་འཁོར་གྱི་གནས་ཚུལ་དང་དེ་བཞིན་ཁ་ལོ་བས་ཆང་རག་བཏུངས་མིན་དང་ངལ་དུབ་ངང་རླངས་འཁོར་གཏོང་མིན་ཞིབ་བཤེར་བྱས་ཡོད།
“བྱེད་ཐབས་གསུམ”གྱི་ལས་ཀའི་བྱེད་ཐབས་སྤྱད་པ་ལས་དགུན་ཚང་ཤང་གི་ཞིང་འབྲོག་པ་ལྕགས་ལམ་གྱི་རྨང་གཞིའི་སྒྲིག་བཀོད་འཛུགས་སྐྲུན་ནང་ཞུགས་ཐུབ་པ་བྱུང་བ་དང་འབབ་འཕར་ཕྱུག་འགྱུར་ཡོང་རྒྱུར་གཡས་གཞོགས་གཡོན་འདེགས་ཐུབ་ནས། མིག་སྔའི་བར་དགུན་ཚང་ཤང་གི་ཞིང་འབྲོག་པར་འབབ་འཕར་སྒོར་ཁྲི་800ཙམ་བྱུང་ཡོད་པ་རེད།