“འབད་བརྩོན་བྱས་ན་གོ་སྐབས་འཕྲད་སྲིད་མོད། འབད་བརྩོན་མ་བྱས་ན་གང་ཡང་ཐོབ་མི་སྲིད། ཏང་དང་སྲིད་གཞུང་གི་དམངས་ཕན་སྲིད་ཇུས་ཁག་གི་རྒྱབ་སྐྱོར་འོག་ང་ཚོས་ལས་ལ་བརྩོན་ཚེ་བདེ་སྐྱིད་ལྡན་པའི་འཚོ་བ་སྐྱེལ་ཐུབ་པ་ང་ལ་ཡིད་ཆེས་བརྟན་པོ་ཡོད”ཅེས་ནག་ཆུ་གྲོང་ཁྱེར་འབྲི་རུ་རྫོང་རླན་ཆུ་ཤང་དེའུ་ཁུལ་གྲོང་ཚོའི་དེ་སྔོན་ཡིག་ཚགས་དང་གཱ་བཟོས་པའི་དུད་ཚང་དབུལ་པོ་ཨ་ནན་གྱིས་དེ་ལྟར་བཤད།

2015ལོའི་གོང་དུ་ཨ་ནན་གྱིས་ཉིན་གང་སྐྱིད་ཉལ་བརྒྱབ་ཏེ་སྡོད་པ་དང་། རྒྱལ་ཁབ་ཀྱི་སྲིད་ཇུས་ཡག་པོའི་འོག་ལྟོགས་ཤི་ཐེབས་མི་སྲིད་པའི་ངོས་འཛིན་བྱེད་ཀྱི་ཡོད། 2015ལོའི་ཟླ་7པར་རང་སྐྱོང་ལྗོངས་ཏང་ཨུད་དང་སྲིད་གཞུང་གི་གཅིག་གྱུར་བཀོད་སྒྲིག་ལྟར་གནད་སྨིན་དབུལ་སྐྱོར་དང་གནད་སྨིན་དབུལ་སྒྲོལ་ལས་དོན་ཕྱོགས་ཡོངས་ནས་སྤེལ་འགོ་ཚུགས་ཏེ། ཨ་ནན་གྱི་ཁྱིམ་རླན་ཆུ་ཤང་དེའུ་ཁུལ་གྲོང་ཚོའི་ཡིག་ཚགས་དང་གཱ་བཟོས་པའི་དུད་ཚང་དབུལ་པོའི་ནང་བཅུག་ནས་དུད་ཚང་དབུལ་པོའི་ཞྭ་མོ་གྱོན་པ་རེད།

དུད་ཚང་དབུལ་པོ་ཨ་ནན་གྱི་ཁྱིམ་གནས་སའི་གྲོང་ཚོའི(གྲོང་ལྷན)གྲོང་སྡོད་ལས་དོན་རུ་ཁག་དང་གྲོང་ཚོའི“ཨུ་ལྷན་གཉིས”ཀྱིས་དབུལ་སྐྱོར་བྱེད་པར་སྔོན་ལ་བློ་སྐྱོར་བྱེད་དགོས་པའི་བླང་བྱ་ལྟར“མི་སྒུག་པ་དང་མི་བརྟེན་པ་དང་། དཀའ་སྤྱད་འབད་འབུངས། གནད་སྨིན་དབུལ་སྐྱོར་བཅས་ནི་སྒྱིད་ལུག་པ་གསོ་བ་མིན་པ”སོགས་ཀྱི་བསམ་བློའི་གསོ་སྦྱོང་ཚོགས་འདུ་འཚོགས་པ་རེད། དེ་ལས་ཨ་ནན་ལ་སློབ་གསོ་ཐེབས་ནས་རང་ཉིད་ཀྱི་ལག་གཉིས་ལ་བརྟེན་ཏེ་འབབ་འཕར་ཕྱུག་འགྱུར་དང་ནང་མིའི་འཚོ་བ་ལེགས་སུ་བཏང་ནས་དབུལ་སྒྲོལ་ཕྱུག་འགྱུར་བྱ་རྒྱུའི་སེམས་ཐག་བཅད་པ་རེད།

2016ལོར་ཨ་ནན་གྱིས་རང་འགུལ་ངང་ཁང་པ་མཛེས་བཟོའི་རྩལ་ནུས་གསོ་སྦྱོང་ནང་ཞུགས་པ་དང་། དཀའ་སྡུག་དང་ངལ་བར་མི་འཛེམ་པར་ཧ་གོ་དོན་རྟོགས་མི་ཆོད་པའི་གནད་དོན་འཕྲད་ཚེ་ཡང་ནས་བསྐྱར་དུ་སྦྱོང་གི་ཡོད། རང་ཉིད་ཀྱིས་སྦྱངས་པའི་རྩལ་ནུས་དང་ཟུང་འབྲེལ་བྱས་ཏེ་2019ལོའི་ཟླ་10པར་ཨ་ནན་གྱིས་རྫོང་གྲོང་དུ་ཁང་པ་མཛེས་བཟོའི་ཀུང་སི་ཞིག་བཙུགས་ནས་ལོའི་ཡོང་འབབ་སྒོར་ཁྲི་20ཡན་ཟིན་པ་དང་། ཁོང་གིས་ད་དུང་གྲོང་ཚོའི་ནང་གི་དུད་ཚང་དབུལ་པོའི་གྲོང་མི་མཛེས་བཟོའི་ལས་ཀའི་ནང་ཧུར་ཐག་བསྡུས་ནས་ཐུན་མོང་ཕྱུག་འགྱུར་ཡོང་བར་བྱས་པ་རེད། ད་ཆ་ཨ་ནན་ཡིག་ཚཌ་དང་གཱ་བཟོས་པའི་དུད་ཚང་དབུལ་པོ་ནས་དབུལ་སྒྲོལ་ཕྱུག་འགྱུར་གྱི་སྣེ་ཁྲིད་པར་གྱུར་ཡོད་པ་རེད།