ཉེ་ཆར། གྲང་ངར་ཆེ་བའི་སྨར་ཁམས་རྫོང་གྲུ་པ་རོང་ཤང་ཁར་སྡུད་སྒང་གྲོང་ཚོ་ཨུ་ལྷན་གྱི་ཚོགས་ཁང་ནང་མི་མང་པོ་མཉམ་དུ་འཛོམས་ནས་ཚང་མས་གྲོས་བསྡུར་བྱེད་པ་དང་། འཆར་གཞི་འགོད་པ། དགའ་སྤྲོའི་ངང་སྐད་ཆ་ཤོད་རེས་བཅས་བྱེད་བཞིན་འདུག དེ་ནི་2020ལོའི་གྲོང་ཚོ་ཧྲིལ་པོའི་ཁེ་སྤོགས་བགོ་བའི་ཚོགས་ཆེན་འཚོགས་བཞིན་པའི་གནས་ཡིན་པ་རེད།

“དེ་རིང་ནི་དགའ་འོས་པའི་ཉིན་མོ་ཞིག་ཡིན་ཏེ་ངེད་ཁར་སྡུད་གྲོང་ཚོའི་མི་ཚང་མར་མཚོན་ནའང་རྟེན་འབྲེལ་བྱེད་འོས་པའི་ཉིན་ཞིག་རེད”གྲུ་པ་རོང་ཤང་གི་ཏང་ཨུད་ཀྱི་ཧྲུའུ་ཅི་བཀྲ་ཤིས་དགེ་ལེགས་དང་བཅས་པ་ཆེད་མངགས་ཁར་སྡུད་སྒང་གྲོང་ཚོར་ཡོང་ནས་ཁེ་སྤོགས་བགོ་བའི་ཚོགས་ཆེན་གཙོ་སྐྱོང་བྱས་པ་རེད། ཁོང་གིས“ལོ་གཅིག་རིང་ཁར་སྡུད་སྒང་གྲོང་ཚོའི་གྲོང་མི་ཚོས་མཐུན་སྒྲིལ་རྡོག་རྩ་གཅིག་སྒྲིལ་དང་ལས་ཀ་ཧུར་ཐག་འབད་ཐག་བྱས་པས་གྲོང་ཚོའི་མཉམ་སྡེབ་དཔལ་འབྱོར་གྱི་ཡོང་འབབ་སྒོར་ཁྲི་100ལས་བརྒལ་ཡོད། གྲོས་མོལ་བྱས་པ་བརྒྱུད་དེ་རིང་ཆེད་མངགས་སྒོར་ཁྲི་82.4བཏོན་ནས་ཚང་མར་བགོ་བཤའ་རྒྱག་རྒྱུ་རེད”ཅེས་བཤད།

དེ་རྗེས། ཁར་སྡུད་སྒང་གྲོང་ཚོའི་ཏང་ཀྲི་པུའི་ཧྲུའུ་ཅི་ཡར་འཕེལ་དང་གྲོང་ཚོ་ཨུ་ལྷན་གྱི་ཀྲུའུ་རེན་བསྟན་པ་ཚེ་རིང་གིས་ཡོང་འབབ་ཀྱི་ཡོང་ཁུངས་དང་། གྲུབ་ཆ། བགོ་བཤའ་རྒྱག་པའི་རྩ་དོན་བཅས་ཁག་སོ་སོ་ངོ་སྤྲོད་བྱས་པ་རེད།

འདི་ལོར་ལས་ཀར་ཞུགས་པ་དང་། བྱེ་རྡོ་དབོར་འདྲེན། ས་ཆའི་ཐོན་ཁུངས་བེད་སྤྱོད་བཅས་བྱས་པ་བརྒྱུད་ཁར་སྡུད་སྒང་གྲོང་ཚོར་རྒྱལ་ལམ་318ཀྱི་ལམ་བཟོའི་ཁ་གསབ་དངུལ་སྒོར་ཁྲི་56དང་། གྲོང་ཚོའི་མཉམ་སྡེབ་དཔལ་འབྱོར་རྣམ་གྲངས་ཡུལ་སྐོར་སྣེ་ལེན་ལྟེ་གནས་ཀྱི་བོགས་དངུལ་སྒོར་ཁྲི་30 གྲོང་ཚོའི་མཉམ་སྡེབ་སྐྱེལ་འདྲེན་རླངས་འཁོར་རུ་ཁག་གི་ཡོང་འབབ་སྒོར་ཁྲི་18བཅས་བསྡོམས་སྒོར་ཁྲི་104རག་པ་རེད། “མཉམ་སྡེབ་གཉེར་སྐྱོང་དང་། ཉེན་ཁ་མཉམ་འཁུར། ཁེ་སྤོགས་མཉམ་བགོ། ཐུན་མོང་འཕེལ་རྒྱས”བཅས་ཀྱི་རྩ་དོན་ལྟར་གྲོས་མོལ་གང་ལེགས་བྱེད་པ་དང་གྲོང་མིའི་བསམ་འཆར་ལ་ཕྱོགས་བསྡུས་བསམ་གཞིག་བྱས་ཏེ་གྲོང་ཚོའི་མཉམ་སྡེབ་འཁོར་རྒྱུག་གྲོན་དངུལ་དང་རྗེས་གྲབས་འཕེལ་རྒྱས་ཀྱི་མ་དངུལ་འདང་ངེས་བཞག་པའི་རྨང་གཞི་ཐོག་ཁར་སྡུད་སྒང་གྲོང་ཚོའི་སྒོར་ཁྲི་82.4བགོ་བཤའ་རྒྱག་རྒྱུའི་ཐག་བཅད་ནས་གྲོང་ཚོ་ཧྲིལ་པོའི་དུད་ཚང་135ལ་བགོ་བཤའ་རག་པས་དུད་ཚང་ཚང་མས་འཕེལ་རྒྱས་ལས་བྱུང་བའི་ཕན་པ་ལོངས་སྤྱོད་ཐུབ་ཡོད།

དབུལ་སྒྲོལ་འགག་སྒྲོལ་གྱི་གྲུབ་འབྲས་སྔར་བས་སྲ་བརྟན་དུ་གཏོང་ཆེད་འགན་ལེན་ལྔའི་དུད་ཚང་གིས་ཁེ་སྤོགས་གཞན་ལོངས་སྤྱོད་བྱས་ཆོག་པ་ཕུད་2019ལོར་དབུལ་ཞྭ་ཕུད་པའི་དུད་ཚང་83གྱི་གྲོང་མི་ཚང་མར་ཁེ་སྤོགས་སྒོར་6568རག་ཡོད་པ་དེ་གྲོང་མི་གཞན་དང་བསྡུར་ན་སྒོར་568ཡིས་མང་བ་ཡོད་པ་རེད།

ཁེ་སྤོགས་བགོ་བཤའ་རྒྱག་པའི་ཚོགས་ཆེན་མཇུག་འགྲིལ་རྗེས་གྲུ་པ་རོང་ཤང་གི་ནོར་དོན་ལས་བྱེད་པས་བགོ་བཤའི་དངུལ་ལོར་ཆག་པ་རྣམས་ཀྲུའུ་ཞི་སྡིངས་ཆའི་ཐོག་བཞག་རྗེས་གྲོང་སྡོད་ལས་དོན་རུ་ཁག་གི་ལས་བྱེད་པ་དང་མཉམ་དུ་མིང་ཐོ་གཞིར་བཟུང་མང་ཚོགས་རེ་རེའི་མིང་ནས་འབོད་དེ་དངུལ་ལེན་དུ་བཅུག

“དེ་རིང་དགའ་པོ་འདུག་གམ”ཞེས་གྲོང་སྡོད་ལས་བྱེད་པས་དྲིས་པས།

“དགའ་པོ་འདུག དངོས་གནས་དགའ་པོ་འདུག ལོ་གཅིག་གི་ངལ་རྩོལ་ལ་དེ་རིང་གྲུབ་འབྲས་ཡག་ཤོས་ཐོབ་པ་རེད། ལག་གཉིས་ལ་བརྟེན་ནས་བསགས་པའི་དངུལ་ལེན་སྐབས་བློ་བདེ་པོ་འདུག”དངུལ་བླངས་ཚར་མ་ཐག་པའི་གྲོང་མི་བུ་ཆུང་གིས་རང་གི་སྡོད་སར་ལོག་རྗེས་དངུལ་ལ་གྲངས་ཀ་ཐེངས་གཉིས་བརྒྱབ་པ་དང་སྒོར་6568ཏག་ཏག་འདུག་ཅེས་བརྗོད།

“ད་ཆ་དངུལ་རག་པས་བེད་སྤྱོད་ཇི་ལྟར་བྱེད་རྩིས་ཡོད་དམ”ཞེས་གྲོང་སྡོད་ལས་དོན་པས་སླར་ཡང་དྲིས།

“སྔོན་ལ་བརྙན་འཕྲིན་གསར་པ་ཞིག་ཉོ་ཡི་ཡིན། སྔོན་ནས་མངགས་ཟིན། ཐད་ཀར་ལེན་པར་ཕྱིན་ན་འགྲིག་པ་ཡོད། དེ་རྗེས་ཤ་ཕྲན་ཙམ་ཉོས་ནས་ནང་མི་རྣམས་དང་ཁ་ལག་ཞིམ་པོ་ཞིག་ཟ་རྒྱུ་ཡིན། དེ་བྱིངས་རྣམས་བཅོལ་ནས་ཕྲུ་གུ་སློབ་ཆེན་འགྲིམ་སྐབས་གཏོང་རྒྱུ་ཡིན”ཞེས་བུ་ཆུང་གིས་དེ་ལྟར་བརྗོད་པ་དང་གདོང་ལས་དགའ་བའི་འཛུམ་མདངས་འཕྱུར།