ཉེ་ཆར། ཀོང་པོ་རྒྱ་མདའ་རྫོང་མཚོ་མགོ་གྲོང་ཚོའི་ཏང་དང་མང་ཚོགས་ཀྱི་ཞབས་ཞུའི་ལྟེ་གནས་ཀྱི་ཇ་ཁང་གིས་དམངས་ཕན་སྲིད་ཇུས་གསར་པ་བཏོན་པ་སྟེ། ལོ་16མན་དང་60ཡན་གྱི་གྲོང་མིས་ཉིན་རེར་བོད་ཐུག་ཕོར་པ་གང་དང་ཇ་མངར་མོའམ་ཡང་ན་ཇ་དྭངས་ཧུའུ་གང་རིན་མེད་ངང་འཐུང་ཆོག་པ་དང་། གྲོང་ཚོའི་མཉམ་སྡེབ་ཀྱིས་ཇ་ཁང་གི་གཉེར་སྐྱོང་བའི་ཁང་གླ་ཆག་ཡང་དང་རྩ་ཆག་བཏང་སྟེ་དམངས་ཕན་སྲིད་ཇུས་ལག་བསྟར་བྱེད་པར་རྒྱབ་སྐྱོར་བྱས་པ་རེད།

མཚོ་མགོ་གྲོང་ཚོའི་ཏང་དང་མང་ཚོགས་ཞབས་ཞུའི་ལྟེ་གནས་ནི་2019ལོར་མཚོ་མགོ་གྲོང་ཚོའི་གནས་སྤོས་རྣམ་གྲངས་ཀྱི་ལེ་ལག་ཚང་བའི་འཛུགས་སྐྲུན་ཞིག་ཡིན་ཞིང་། འཛུགས་སྐྲུན་གྱི་རྒྱ་ཁྱོན་སྨི་ངོས་གྲུ་705ཟིན་པ་དང་། དེའི་ནང་དམངས་ཕན་ཞབས་ཞུའི་ཚོམས་ཆེན་དང་། ཡུལ་སྐོར་བའི་སྣེ་ལེན་ལྟེ་གནས། ཏང་ཡོན་གྱི་བྱེད་སྒོ་ཁང་། ཞིང་པའི་དཔེ་ཁང་། གྲོང་ཚོ་རིམ་པའི་རླུང་འཕྲིན་ས་ཚིགས། སྤྱི་ཚོགས་གསར་རྙིང་བསྡུར་བའི་འགྲེམས་སྟོན་ཁང་། ཇ་ཁང་། ཚོང་ཁང་སོགས་བྱེད་ནུས་ཁུལ་མང་པོ་བཀོད་སྒྲིག་བྱས་ཡོད་ཅིང་། 2020ལོར་སྤྱོད་འགོ་ཚུགས་པ་རེད། སྤྱོད་འགོ་ཚུགས་མ་ཐག་ཏུ་གྲོང་མིའི་ཚོགས་ཆེན་ཐོག་ཏང་དང་མང་ཚོགས་ཀྱི་ཞབས་ཞུའི་ལྟེ་གནས་ཀྱི་ཇ་ཁང་དེ་གྲོང་མི་པ་སྒྲོན་ལ་འགན་གཙང་སྤྲོད་རྒྱུའི་ཐག་བཅད་པ་རེད། འདི་ལོའི་ཟླ་6པར་པ་སྒྲོན་གྱི་མོས་མཐུན་བྱུང་རྗེས་གྲོང་ཚོས་ཇ་ཁང་གི་དམངས་ཕན་སྲིད་ཇུས་ལག་བསྟར་བྱེད་འགོ་ཚུགས་པ་དང་ཟླ་བ་གཅིག་ལྷག་ཙམ་རིང་ཚོད་ལྟའི་གཉེར་སྐྱོང་བྱས་པར་ཕན་འབྲས་མངོན་གསལ་དོད་པོ་ཐོན་པ་རེད།

“གཟིགས་སྐྱོང་སྲིད་ཇུས་ལག་བསྟར་བྱས་རྗེས་ཇ་ཁང་ནང་ཡོང་མཁན་གྲོང་མི་ཇེ་མང་དུ་ཕྱིན་པ་དང་། ཚང་མར་དོན་དག་གང་ཞིག་ཡོད་རུང་ཇ་ཁང་དུ་ཡོང་ནས་གྲོས་བསྡུར་བྱ་རྒྱུར་དགའ་པོ་འདུག་ལ། གནད་དོན་འཕྲད་ཚེ་གྲོང་ཚོའི་ལས་བྱེད་པ་དང་གྲོང་སྡོད་ལས་དོན་རུ་ཁག་འཚོལ་བདེ་པོ་འདུག་པས་ཇ་ཁང་རིམ་བཞིན་འཁྲུག་ཏུ་འགྲོ་གི་འདུག”ཅེས་ཇ་ཁང་གི་སྦྱིན་བདག་པ་སྒྲོན་གྱིས་བྲེལ་འཚུབ་ཀྱི་བར་གསེང་ནས་འཛུམ་འཚེར་འཚེར་ངང་དེ་ལྟར་བརྗོད།

མཚོ་མགོ་གྲོང་ཚོའི་གྲོང་སྡོད་ལས་དོན་རུ་ཁག་དང་གྲོང་ཚོ“ཨུ་ལྷན”གཉིས་ཀྱི་ལས་བྱེད་པ་ཚོ་ཡང་པ་སྒྲོན་དང་འདྲ་བར་ལས་ལ་བྲེལ་བཞིན་ཡོད་ལ། ཇ་ཁང་གི་གཟིགས་སྐྱོང་སྲིད་ཇུས་ལག་བསྟར་བྱས་པ་དང་བསྟུན་ནས་མང་ཚོགས་ཏང་དང་མང་ཚོགས་ཀྱི་ཞབས་ཞུའི་ལྟེ་གནས་སུ་རང་འགུལ་ངང་ཡོང་ནས་སྤྲོ་གསེང་རོལ་རྩེད་བྱེད་པའི་ཧུར་སེམས་སྔར་བས་ཆེ་རུ་ཕྱིན་ཞིང་། གྲོང་སྡོད་ལས་དོན་རུ་ཁག་གིས་གྲོང་ཚོ“ཨུ་ལྷན་གཉིས”ཚན་ཁག་དང་གཞོགས་འདེགས་བྱས་ཏེ་ཏང་དང་མང་ཚོཌ་ཀྱི་ཞབས་ཞུའི་ལྟེ་གནས་ཀྱི་དོ་དམ་པ་ཡག་པོ་བྱེད་པ་དང་། ཏང་ཡོན་དང་མང་ཚོགས་ཀྱི་དགོས་མཁོ་དང་ཟུང་འབྲེལ་བྱས་ཏེ་ཞིང་འབྲོག་པའི་བྱང་ཚད་ལེགས་གཏོང་འཛིན་གྲྭ་དང་། “སྤྱི་ཚོགས་གསར་རྙིང་བསྡུར་བའི་གཏམ་རྒྱུད་འདུ་ཚོགས”གཞོན་ནུ་ལོ་ཆུང་གི་དཔེ་ཀློག་འདུ་ཚོགས། སྤྲོ་སྣང་ལྡན་པའི་ལུས་རྩལ་འགྲན་ཚོགས། གྲོང་ཚོའི་ལོ་རྒྱུས་ཁང་གི་དངོས་རྫས་འཚོལ་བསྡུ་སོགས་བྱེད་སྒོ་རབ་དང་རིམ་པ་སྤེལ་ནས་གྲོང་མིའི་བསམ་པའི་རིག་གནས་འཚོ་བ་སྔར་བས་ཕུན་སུམ་ཚོགས་སུ་བཏང་སྟེ་གྲོང་མིའི་གོང་བུ་འགྲིལ་ཤུགས་ཆེ་རུ་བཏང་བ་རེད།