ཀུན་བཟང་མཚོ་མོ་ནི་གྲོང་གསེབ་ནས་ཡིན་པ་དང་སློབ་ཆེན་འགྲིམ་རིང་རྒྱལ་ཁབ་དབུལ་སྐྱོར་དཔྱད་དཔོག་ཚོགས་ཆུང་དང་མཉམ་དུ་ཞིང་འབྲོག་ཁུལ་དུ་བརྟག་ཞིབ་བྱེད་པར་བསྐྱོད་མྱོང་ཡོད། ཞིང་འབྲོག་ཁུལ་གྱི་རྗེས་ལུས་ཆ་རྐྱེན་དང་ཞིང་འབྲོག་མང་ཚོགས་ཀྱི་བབ་ཆགས་ལས་ཁོང་དཀའ་ཚེགས་ཆེ་བའི་ས་ཁུལ་དུ་ལས་དོན་སྒྲུབ་པའི་འདུན་པ་དྲག་པོ་སྐྱེས། ན་ནིང་སློབ་ཆེན་ཐོན་རྗེས། ཡིག་རྒྱུགས་ལོན་ནས་སྣ་དཀར་རྩེ་རྫོང་ལྷུན་པོ་ཞོལ་ཤང་ཆུ་འཛིང་གྲོང་ཚོའི་གྲོང་གསེབ་དར་རྒྱས་ཀྱི་ཆེད་བསྐོས་ལས་བྱེད་པར་གྱུར།
ཆུ་འཛིང་གྲོང་ཚོའི་ས་བབ་མཐོ་ཚད་སྨི་4560ཟིན་ཡོད་པས་དེ་ནི་ས་བབ་ཤིན་ཏུ་མཐོ་བའི་ས་ཁུལ་གྱི་ཁོངས་སུ་གཏོགས། མ་གཞི་རང་བྱུང་ཆ་རྐྱེན་ཞན་པོ་ཡོད་ཀྱང་ས་ཆ་དེ་གའི་མང་ཚོགས་ཚོའི་སྤྲོ་སྣང་ལྡན་པའི་བསམ་པ་དང་ཡར་ཐོན་གྱི་སྙིང་སྟོབས་ཀྱིས་ཀུན་བཟང་མཚོ་མོར་སེམས་འགུལ་ཆེན་པོ་ཐེབས་ཡོད། “མང་ཚོགས་ཚོས་འཚོ་བའི་ཆ་རྐྱེན་ཞན་པར་འཁང་ར་བྱེད་མཁན་ངས་གཏན་ནས་མཐོང་མྱོང་མེད། དེ་ལས་ལྡོག་སྟེ་ཁོང་ཚོས་སྣང་བ་སྐྱིད་པོས་ཕ་ཡུལ་གྱི་རྣམ་པར་འགྱུར་ལྡོག་གཏོང་བཞིན་འདུག”ཅེས་ཀུན་བཟང་མཚོ་མོས་དེ་ལྟར་བཤད།
ཀུན་བཟང་མཚོ་མོ་ཆུ་འཛིང་གྲོང་ཚོར་ལས་ཀར་སླེབས་པ་ནས་བཟུང་། ཁོམ་པ་ཡོད་རིམ་བཞིན་གྲོང་ཚོའི་ཕྲུ་གུར་སློབ་ཚན་གསབ་ཁྲིད་བྱེད་རྒྱུ་མཐའ་འཁྱོངས་བྱེད་ཀྱི་ཡོད། “ད་ཆ་གྲོང་ཚོའི་ནང་སློབ་གྲྭར་འགྲོ་བཞིན་པའི་སློབ་མ་18ཡོད། གལ་ཏེ་ཁོང་ཚོ་ཚང་མ་ཡིག་རྒྱུགས་ལོན་ནས་རི་གྲོང་ནས་ཁ་བྲལ་ཐུབ་ན་ཡག་པོ་གང་འདྲ་མེད་དམ”ཕྲུ་གུ་ཚོའི་སློབ་སྦྱོང་བྱེད་སེམས་ཆེ་རུ་དང་སྦྱངས་འབྲས་ཡག་ཏུ་ཕྱིན་པ་མཐོང་སྐབས་ཀུན་བཟང་མཚོ་མོའི་སེམས་ལ་དགའ་ཚོར་ཆེན་པོ་སྐྱེས་ཀྱི་ཡོད་ལ། ཁོང་ཚོའི་ལུས་ཐོག་ནས་ཆུ་འཛིང་གྲོང་ཚོའི་འབྱུང་འགྱུར་གྱི་རེ་བའང་མཐོང་གི་ཡོད།
ཀུན་བཟང་མཚོ་མོས་འོས་འགན་གྱིས་ཕྲུ་གུ་ཚོར་སློབ་ཚན་གསབ་ཁྲིད་བྱས་པས་མང་ཚོགས་ཚོར་སེམས་འགུལ་ཆེན་པོ་ཐེབས་ཡོད་ལ། མང་ཚོགས་དབར་གྱི་འབྲེལ་བའང་ཟབ་ཏུ་ཕྱིན་ཡོད། གྲོང་ཚོའི་མང་ཚོགས་ཚོས་ཁོ་མོ་འཕྲད་སྐབས་རང་འགུལ་ངང་སྐད་ཆ་ཤོད་པ་དང་དོན་དག་ཡོད་ན་ཁོ་མོར་ཤོད་འདོད་བྱེད་ཀྱི་ཡོད།
ཡུལ་མི་ཚོས་ཞུས་པའི་གནད་དོན་རང་ཉིད་ཀྱིས་ཐག་གཅོད་མི་ཐུབ་ན། ཀུན་བཟང་མཚོ་མོས་ཕྱོགས་གཅིག་ནས་གྲོང་ཚོ“ཨུ་ལྷན”དང་གྲོང་སྡོད་ལས་དོན་རུ་ཁག་ལ་སྙན་སེང་ཞུ་བ་དང་། ཕྱོགས་གཞན་ཞིག་ནས་གྲོང་ཚོ“ཨུ་ལྷན”དང་གྲོང་སྡོད་ལས་དོན་རུ་ཁག་དང་མཉམ་དུ་མང་ཚོགས་ལ་དོན་དངོས་དཀའ་ངལ་ཐག་གཅོད་བྱེད་རོགས་བྱེད་ཀྱི་ཡོད། དེ་དང་དུས་མཚུངས་དེའི་ཐོག་ནས་གནད་དོན་ཐག་གཅོད་བྱེད་སྟངས་ཤེས་རྟོགས་བྱུང་བ་དང་རང་ཉིད་ལ་འཕྲད་པའི་གནད་དོན་རང་གཅིག་པུས་ཐག་གཅོད་བྱེད་ཆོག་མིན་དང་གང་འདྲ་བྱས་ནས་ཐག་གཅོད་བྱེད་མིན་ཐད་བསམ་བློ་ཡང་ཡང་གཏོང་གི་ཡོད།
ལས་རོགས་དང་བློ་མཐུན་རྒན་གྲས་ཚོར་སློབ་སྦྱོང་བྱེད་པ་དང་དུས་མཚུངས། ཀུན་བཟང་མཚོ་མོས་ད་དུང་ཨ་མའི་ས་ནས་སློབ་སྦྱོང་བྱེད་རྒྱུ་མཐའ་འཁྱོངས་བྱེད་ཀྱི་ཡོད། ཀུན་བཟང་མཚོ་མོའི་ཨ་མ་ནི་ལྷོ་བྲག་རྫོང་རྫ་ར་ཤང་སྨོན་མདའ་གྲོང་ཚོའི་ཚོགས་ཆུང་གསུམ་པའི“གཉིས་ལྡན་དུད་སྦྲེལ”གྱི་སྤྱི་མི་ཡིན་ཞིང་། ཨ་མ་པ་སངས་ནི་ཀུན་བཟང་མཚོ་མོའི་མིག་དཔེ་ཡག་ཤོས་ཡིན་པ་དང་། “ང་རང་ཞིང་འབྲོག་ཁུལ་དུ་ལས་ཀ་བྱེད་པར་འགྲོ་རྒྱུའི་གདམ་ག་བྱེད་པ་དེའང་ཨ་མའི་ཤུགས་རྐྱེན་ཆེན་པོ་ཐེབས་བྱུང”ཞེས་བཤད།
“ལས་བྱེད་པ་ཞིག་གི་སྙན་གྲགས་ནི་ཉིན་རེ་བཞིན་མང་ཚོགས་ཀྱི་དོན་དངོས་དཀའ་ངལ་ཐག་གཅོད་བྱེད་རིང་ཆེ་རུ་སོང་བ་ཞིག་ཡིན”ཞེས་ཨ་མ་པ་སངས་ཀྱི་སྐད་ཆ་དེས་ཀུན་བཟང་མཚོ་མོར་ལས་ཀར་འབད་བརྩོན་བྱེད་པའི་ཁ་ཕྱོགས་རྙེད་ཡོད། ལས་དོན་སྒྲུབ་རིང་ཁོང་གིས་རྟག་ཏུ་མང་ཚོགས་ཀྱི་ཁྱིམ་དུ་རང་འགུལ་ངང་འགྲོ་བ་མ་ཟད། མང་ཚོགས་དང་གླེང་མོལ་ཡང་སེ་བྱེད་པ་དང་། མང་ཚོགས་ཀྱི་བསམ་ཚུལ་དང་། རེ་འདོད། རེ་འབོད་བཅས་ཤེས་རྟོགས་བྱེད་ཀྱི་ཡོད། ཀུན་བཟང་མཚོ་མོའི་ཞིབ་ཚགས་ཀྱི་ལས་ཀ་སྒྲུབ་སྟངས་ལ་མང་ཚོགས་ཀྱི་རྒྱབ་སྐྱོར་དང་ཁས་ལེན་ཐོབ་ནས་གྲོང་མི་ཚོས་ཁོ་མོར“མང་ཚོགས་ཀྱི་སྙིང་ཉེ་བའི་ལས་བྱེད་པ”ཞེས་འབོད་ཀྱི་ཡོད། “ཁོང་སྐད་ཆ་ཤོད་སྐབས་ངང་རྒྱུད་རིང་བ་དང་ལས་དོན་སྒྲུབ་སྐབས་ཞིབ་ཚགས་པས་མང་ཚོགས་ཚོས་འདི་ལྟར་འབོད་ཀྱི་ཡོད”ཅེས་གྲོང་ཚོའི་ཏང་ཀྲི་པུའི་ཧྲུའུ་ཅི་འཇིགས་མེད་ཀྱིས་དེ་ལྟར་བཤད།