ཚད་ལོན་ལག་ཁྱེར་ལེན་པའི་སྐབས་སུ། ལོ་37ལ་སླེབས་པའི་རིག་སྒྲོན་གྱི་ངོ་གདོང་ལས་འཛུམ་མདངས་འཕྱུར། གང་ལགས་ཤེ་ན། ད་ནས་འཚེམ་འཁོར་བཀོལ་སྤྱོད་ཀྱི་གསོ་སྦྱོང་འཛིན་གྲྭ་ཐོན་པས་རེད།

རིག་སྒྲོན་གྱི་ཕ་ཡུལ་ནི་བོད་ལྗོངས་ནག་ཆུ་གྲོང་ཁྱེར་ཨ་མདོ་རྫོང་སེའུ་ཤང་ཡིན་པ་དང་། དེར་ཆ་སྙོམས་ས་བབ་མཐོ་ཚད་སྨི་5000ལྷག་ཟིན་ཞིང་། འབྲོག་པ་1056སྤྱི་ལེ་ངོས་གྲུ་ཁྲི་2.3ཟིན་པའི་སར་འཚོ་བ་སྐྱེལ་བཞིན་ཡོད། གྲོང་ཚོ་ནས་རྫོང་མཁར་བར་སྤྱི་ལེ་300ལྷག་ཙམ་ཡོད་པས་ཕར་ཚུར་ཐེངས་གཅིག་འགྲོ་བར་ཉུང་མཐར་ཡང་ཉིན་གཉིས་འགོར་གྱི་ཡོད། དེ་གར་འབྲོག་ལས་གཙོ་གཉེར་བྱེད་པ་དང་། དགུན་དུས་ཆུ་དང་གློག་ཀྱང་མེད།

2019ལོའི་ཟླ་12ཚེས་19ཉིན། རིག་སྒྲོན་དང་ཁོང་གི་བཟའ་ཟླས་ཕྲུ་གུ་གཉིས་ཁྲིད་དེ་སེའུ་ཤང་གི་གྲོང་ཚོ་གཉིས་པ་ནས་ལྷོ་ཁ་གྲོང་ཁྱེར་གོང་དཀར་རྫོང་སྲིན་བུ་རིའི་གནས་སྤོས་ཁུལ་དུ་སྤོས། དེར་སྲིད་གཞུང་གིས་གུ་ཡངས་ཤིང་ཁམས་གཙང་བའི་གནས་སྤོས་ཁང་པ་བརྒྱབ་ཡོད་ལ། སློབ་གྲྭ་དང་སྨན་ཁང་སོགས་ལེ་ལག་ཚང་བའི་སྒྲིག་བཀོད་ཀྱང་འཛོམས་ཡོད། ཕ་ཡུལ་སེའུ་ཤང་དུ་ཡོད་པའི་ནོར་ལུག་དག་མཉམ་ལས་ཁང་དུ་བཞག་ནས་ཡུལ་མི་ཚོས་སྐོར་རེས་ཀྱིས་འཚོ་ཡི་ཡོད་པས་ལོ་མཇུག་ཏུ་རྐང་དངུལ་གྱི་བགོ་འགྲེམ་ཡོད་པ་དང་། ཕྲུ་གུ་ཉེ་འགྲམ་དུ་སློབ་གྲྭར་འགྲོ་བ་དང་། ཁྱིམ་ནས་སློབ་གྲྭ་བར་སྐར་མ་བཅུ་ཙམ་ལས་འགོར་གྱི་མེད་པ་སོགས་བལྟས་པ་ཙམ་གྱིས་འཚོ་བ་བག་ཕེབས་ཤིག་ཡིན་ནའང་། རིག་སྒྲོན་ལ་ད་དུང་སེམས་ཁྲལ་ཕྲན་བུ་ཞིག་ཡོད་པ་སྟེ། “མཉམ་ལས་ཁང་གི་བགོ་འགྲེམས་ལོ་མཇུག་ལ་མ་གཏོགས་མེད་པས་དུས་རྒྱུན་གྱི་ལག་དངུལ་གཏན་འཇགས་ཀྱི་ཡོང་སྒོར་བརྟེན་དགོས་པ”དེ་རེད།

ད་ཆ་སྲིན་བུ་རི་བཀོད་སྒྲིག་བྱ་ཡུལ་དུ་ས་བབ་ཤིན་ཏུ་མཐོ་བའི་ས་ཁུལ་ནས་ཡོང་བའི་ཞིང་འབྲོག་པ་ཁྲི་ལ་ཉེ་བ་སྡོད་ཀྱི་ཡོད། ཁོང་ཚོའི་ལས་ཞུགས་ཀྱི་གནད་དོན་ཐག་གཅོད་བྱ་ཆེད། བོད་ལྗོངས་ཧན་ལིན་སློབ་གསོའི་ཞབས་ཞུ་ཚད་ཡོད་ཀུང་སིས་ལས་ཞུགས་རྩལ་ནུས་གསོ་སྦྱོང་ཁེ་ལས་ཤིག་བཙུགས་ཤིང་། “སྔོན་ལ་གསོ་སྦྱོང་འཛིན་གྲྭ་གཉེར་ཏེ་ཚེམ་བུ་རྒྱག་སྟངས་བསླབས་ནས་རས་གདན་སོགས་ཐོན་ཟོག་སྤྱིར་བཏང་འཚེམ་སྟངས་ནས་འགོ་བརྩམས་ཏེ། ལག་རྩལ་བྱང་ཆུབ་རྗེས་སློབ་གོས་བཙེམ་རུ་འཇུག་རྒྱུ་ཡིན”ཞེས་ཀུང་སིའི་འགན་འཁུར་བ་སུའུ་ལུང་གིས་བཤད་པ་དང་། ཁོང་གིས་ལས་ཀ་གཏན་འཇགས་ཤིག་བྱུང་བའི་རྗེས་གཞི་ནས་ཡོང་འབབ་བརྟན་པོ་འོང་བ་དང་། ཡོང་འབབ་བརྟན་པོ་བྱུང་ན་ཚང་མའི་སེམས་པ་ལྷོད་ལ་འབབ་ངེས་རེད་ཅེས་བཤད།

ཉིན་ཉི་ཤུ་ལྷག་ཙམ་སློབ་སྦྱོང་བྱས་པ་བརྒྱུད། རིག་སྒྲོན་དང་སློབ་མ་གཞན་དག་40“སློབ་ཐོན་རྒྱུགས་ལེན”གྱི་དུས་སུ་སླེབས་ནས། རྒྱུགས་སྤྲོད་ཐེངས་དང་པོར་རིག་སྒྲོན་རྒྱུགས་འཕྲོད་མེད་པ་དང་། ཐེངས་གཉིས་པར་རྒྱུགས་འཕྲོད་དེ་དངོས་སུ་ལས་གནས་ཐོག་བསྐྱོད་པ་རེད།

ཟླ་བ་རེར་གཏན་འཇགས་གླ་ཕོགས་སྒོར་3000ཡོད། ད་ཆ་ཉིན་ལྟར་ཐོན་རྫས་སྣེ་ཁ་150བཙེམས་ནས་ལས་འགན་ཚད་བརྒལ་ངང་བསྒྲུབས་པ་དང་། སྣེ་ཁ་རེ་ནས་ཁེ་བཟང་སྒོར་ཟུར་གཉིས་ཡོད་ཅེས་རིག་སྒྲོན་གྱིས་བཤད། ཁོང་གིས་ཕྱིན་འབྱུང་ཕྲུ་གུ་ཚོས་ངས་བཙེམས་པའི་སློབ་གོས་གྱོན་ཐུབ་རྒྱུ་བྱུང་ན་ཅི་མ་རུང་སྙམ་གྱི་འདུག་ཅེས་བཤད།

འདི་ལོ་ནས་བཟུང་། བོད་རང་སྐྱོང་ལྗོངས་ཀྱིས་སྲིད་ཇུས་བཏོན་ནས་མི་སྒེར་དང་། ཁེ་ལས། ངལ་ནུས་ཕྱིར་གཏོང་ཁྲོམ་རའི་བྱེད་པོ་བཅས་ལ་ལམ་དངུལ་ཁ་གསབ་སྤྲོད་པ་དང་། ལས་ཞུགས་བྱེད་མཁན་བསྡུ་བར་བྱ་དགའ་སྤྲོད་པ། ལས་ཞུགས་ལས་གཏོད་ཞབས་ཞུའི་ཁ་གསབ་སྤྲོད་པ་བཅས་བྱེད་ཀྱི་ཡོད། “སྦྱོང་བརྡར་ལས་སྤྲོད”དང“གུད་གསབ་ལས་སྤྲོད”དེ་བཞིན་མངགས་ཐོ་དང་ལས་ཐོ་རྣམ་པའི་གསོ་སྦྱོང་བྱས་པ་བརྒྱུད་ཞིང་འབྲོག་པ་ལས་ཞུགས་གཞན་སྒྱུར་གནད་སྨིན་ཡོང་བར་སྐུལ་འདེད་བཏང་སྟེ་ཞིང་འབྲོག་པར་འབབ་འཕར་ཡོང་བར་བྱས་ཤིང་། ད་ལྟའི་བར་བོད་ཀྱི་ཞིང་འབྲོག་པ་ཁྲི་46.1ལས་ཞུགས་གཞན་སྒྱུར་ཐུབ་ཡོད།

འཚོ་བར་འགན་ལེན་ཐུབ་པས་སྔར་བས་གནས་བཟོད་བདེ་བར་གྱུར། “ངས་འབྱུང་འགྱུར་ལོ་གསུམ་ནང་། སློབ་གོས་ཁྲི་150ནས་ཁྲི་200བར་བཙེམས་ནས་མི་500ནས་1000བར་ལས་ཞུགས་ཐུབ་རྒྱུར་སྣེ་ཁྲིད་བྱ་རྩིས་ཡོད”ཅེས་སུའུ་ལུང་གིས་འཚེམ་འཁོར་རིན་མེད་ངང་ཁྱིམ་ཚང་ལ་སྤྲོད་པ་དང་མ་འཇོག་བྱས་ནས་བཟོ་གྲྭ་རྒྱག་རྒྱུ་དང་ཟུང་འབྲེལ་བྱས་ཏེ་ས་བབ་ཤིན་ཏུ་མཐོ་བ་ནས་གནས་སྤོ་བྱས་པའི་མང་ཚོགས་སྔར་ལས་མང་བ་གསོ་སྦྱོང་ནང་ཞུགས་ནས་ལས་ཞུགས་ཐུབ་རྒྱུར་སྐུལ་མ་གཏོང་རྒྱུ་ཡིན་ཚུལ་བརྗོད།