ཟླ་5ཚེས་3ཉིན་མེ་ཏོག་རྫོང་འབྲས་སྤུངས་ཤང་སྤ་སྟེང་གྲོང་ཚོའི་གྲོང་མི་སངས་རྒྱས་ཀྱིས་སྔར་རྒྱུན་བཞིན་ཞོགས་སྔ་ལངས་བྱས་ཏེ། ཞིང་དལ་སྐབས་དང་བསྟུན་ནས་སྨྱུག་མའི་སློ་མ་ཁག་གཅིག་སླ་རྩིས་ཡོད་པ་རེད།

སངས་རྒྱས་ཀྱི་ངོས་ནས་བརྗོད་ན་སྨྱུག་མའི་སློ་མ་སླ་བའི་ལས་ཀ་ནི་དཀའ་ལས་ཁག་པོ་ཞིག་མིན་པ་དང་གྲོང་ཚོའི་ནང་གི་མི་ཚང་མས་ཤེས་པའི་ལག་ཤེས་ཤིག་རེད། སངས་རྒྱས་ཀྱིས་ལག་ནང་སླ་བཞིན་པའི་སློ་མར་ལྟ་གིན་སློ་མ་འདི་འདྲ་ཞིག་ལ་སྒོར་100ལྷག་ཙམ་བྱེད་ཀྱི་ཡོད། གལ་སྲིད་ཉིན་གང་བསླས་ན་སློ་མ་གཉིས་གསུམ་སླ་ཐུབ་པས་འདི་ལྟར་རྩིས་བརྒྱབ་ན་ཡོང་འབབ་སྒོར་གསུམ་བརྒྱ་ཙམ་འདུག་ཅེས་བཤད།

“ང་ཚོའི་གྲོང་ཚོས་སློ་མ་ཐོན་ལས་ཅན་གྱི་ཐོན་སྐྱེད་བྱེད་འགོ་ཚུགས་ཙམ་རེད”ཅེས་སྤ་སྟེང་གྲོང་ཚོར་བཅའ་སྡོད་རང་སྐྱོང་ལྗོངས་ཀྱི་ལས་དོན་རུ་ཁག་གི་རུ་མི་ཆའོ་ཞའོ་མིང་གིས་བཤད། ཁོང་གིས་སྤ་སྟེང་གྲོང་ཚོར་སྨྱུག་མ་སླ་བའི་ལོ་རྒྱུས་ཡུན་རིང་ལྡན་ཡང་ཐོན་ལས་ལ་བརྩིས་ནས་འཕེལ་རྒྱས་གཏོང་བ་ནི་ཐེངས་དང་པོ་རེད། མིག་སྔར་གྲོང་ཚོ་ཡོངས་ཀྱི་སྨྱུག་བསླས་ཐོན་ལས་ཅན་གྱི་ཐོན་སྐྱེད་བྱེད་འགོ་ཚུགས་ཙམ་ཡིན་པས་འཕེལ་རྒྱས་ཀྱི་ལམ་བུར་བསྐྱོད་པར་ད་དུང་དུས་ཡུན་རིང་པོ་དགོས་ཞེས་བཤད།

འདི་ལོ་ལོ་46ལ་སླེབས་པའི་སངས་རྒྱས་སྔོན་ཆད་ནད་ཕོག་པའི་རྐྱེན་པས་ད་ཆ་ལས་ཀ་ལྕི་པོ་བྱེད་ཐབས་བྲལ། གྲོང་སྡོད་ལས་དོན་རུ་ཁག་གི་ལྕག་སྐུལ་འོག་སངས་རྒྱས་ཀྱིས་སྨྱུག་མ་སླ་འགོ་ཚུགས། སངས་རྒྱས་ཁྱིམ་གྱི་ཁང་མིག་གཅིག་ནང་སློ་མ་ཆེ་ཆུང་སྣ་ཚོགས་བཞག་ཡོད། “སློ་མ་ཆེ་བར་སྒོར་120དང་ཆུང་བར་སྒོར་100རེད། ན་ནིང་ལོ་གཅིག་ཁོ་ནར་སྨྱུག་མའི་སློ་མ་ནས་ཡོང་འབབ་སྒོར་ཁྲི་2ལྷག་ཙམ་རག་བྱུང”ཞེས་སངས་རྒྱས་ཀྱིས་བཤད།

“སྨྱུག་བསླས་དང་ཕྱིར་ཚོང་བྱ་རྒྱུ་ནི་ཁ་འབྲལ་ཐབས་མེད་པ་ཞིག་རེད། གྲོང་མིས་སློ་མ་བསླས་རྗེས་མེ་ཏོག་རྫོང་གིས་ཆེད་མི་སྒྲིག་འཛུགས་བྱས་ནས་རླངས་འཁོར་མངགས་ཏེ་སློ་མ་དེ་དག་གཅིག་སྡུད་ཐོག་སྤོ་བོ་རྫོང་དང་བྲག་ཡིབ་ཆུས་སོགས་སུ་དབོར་ནས་ལྗོངས་ཕྱི་ནང་དུ་འཚོང་གི་ཡོད། མངགས་ཐོ་རྣམ་པའི་ཕྱིར་ཚོང་ལས་གྲོང་མིའི་སེམས་ཁྲལ་བསལ་ཡོད”ཅེས་མེ་ཏོག་རྫོང་ཨུད་དྲིལ་བསྒྲགས་པུའི་པུའུ་ཀྲང་གཞོན་པ་བསྟན་འཛིན་གྱིས་བཤད།

“སྨྱུག་བསླས་ཐོན་ལས་འཕེལ་རྒྱས་བཏང་བ་དང་སྦྲགས་སྨྱུག་མའི་ཐོན་རྫས་རིན་ཐང་ལ་འགྱུར་ལྡོག་ཆེན་པོ་ཕྱིན་ཡོད། དེ་སྔོན་སྨྱུག་མ་རྐང་གཅིག་ལ་སྒོར་ཁ་ཤས་ལས་བྱེད་ཀྱི་མེད། འོན་ཀྱང་སྨྱུག་མ་རྐང་གཅིག་གིས་སློ་མ་ཞིག་བསླས་ཚེ་དེའི་རིན་གོང་སྒོར་100ལྷག་ཙམ་རག་གི་ཡོད་པས་ཕན་འབྲས་ལྡབ་ཐོན་གྱི་ཡོད། དེས་མ་ཟད། རྒན་གཞོན་ཚང་མས་སྨྱུག་མའི་སློ་མ་སླ་ཤེས་པས་ཕྱིར་བསྐྱོད་མི་དགོས་པར་ཡོང་འབབ་རག་གི་ཡོད”ཅེས་བསྟན་འཛིན་གྱིས་སངས་རྒྱས་ཀྱིས་ལས་སྣོན་བྱེད་བཞིན་པའི་སྨྱུག་མ་དེར་ལྟ་བཞིན་དུ་བཤད།

སྤ་སྟེང་གྲོང་ཚོས་སྨྱུག་བསླས་ལ་བརྟེན་ནས་ས་གནས་འདི་གའི་སྨྱུག་མའི་ཐོན་ཁུངས་ཀྱི་ལེགས་ཆ་དེ་དཔལ་འབྱོར་གྱི་ཕན་འབྲས་སུ་གྱུར་བར་བྱས་པས་དེ་སྔོན་ས་ཞིང་ཁོ་ན་བཏབ་ནས་འཚོ་བ་སྐྱེལ་བའི་རྣམ་པར་འགྱུར་ལྡོག་ཕྱིན་པ་མ་ཟད། མང་ཚོགས་ལའང་དེའི་ཁྲོད་ནས་ཕན་པ་ཆེན་པོ་ཐོབ་ཡོད་པ་རེད།