ཉེ་དུས་ལྗོངས་མཁོ་སྒྲུབ་ཁང་གིས་གཞི་རིམ་མཁོ་སྒྲུབ་མཉམ་ལས་ཁང་དང་མཁོ་སྤྲོད་ཚོང་པའི་དབར་འབྲེལ་མཐུད་ཧུར་ཐག་བྱས་ཏེ། འཛད་སྤྱོད་དབུལ་སྐྱོར་ལས་དོན་ལ་སྐུལ་འདེད་གཏིང་ཟབ་བཏང་ནས་དབུལ་སྒྲོལ་འགག་སྒྲོལ་གྱི་གྲུབ་འབྲས་བརྟན་དུ་དང་གོང་མཐོར་བཏང་བ་རེད།

ཤེས་རྟོགས་བྱུང་བར་གཞིགས་ན། ས་ཁུལ་དབུལ་པོའི་ཞིང་ཞོར་ཐོན་ཟོག་དྲ་རྒྱ་ནས་ཕྱིར་ཚོང་བྱེད་པའི་ལས་སྟེགས་ནི་ས་ཁུལ་དབུལ་པོར་ཞིང་ཞོར་ཐོན་ཟོག་རྒྱལ་ཡོངས་སུ་ཚོང་རོགས་བྱེད་པའི་དྲ་ཐོག་ཚོང་དོན་གྱི་ལས་སྟེགས་ཤིག་རེད། ཏོག་གསར་གློ་ཚད་ཀྱི་རིམས་ནད་ཐོན་རིང་ལས་སྟེགས་དེས་མཁོ་སྤྲོད་ཚོང་པར་མིང་ཐོ་འགོད་པའི་ལྗང་མདོག་བགྲོད་ལམ་དམིགས་སུ་བཏོད་པ་རེད། ལྗོངས་མཁོ་སྒྲུབ་ཁང་གིས་གོ་སྐབས་དེ་དམ་འཛིན་བྱས་ཏེ་རང་སྐྱོང་ལྗོངས་དང་། གྲོང་ཁྱེར་དང་ས་ཁུལ། རྫོང་དང་ཆུས་བཅས་རིམ་གསུམ་མཉམ་འགུལ་གྱིས་ཆེད་དོན་ལས་དོན་ཚོགས་པ་བཙུགས་ཏེ། ཀྲུང་གོ་མཁོ་སྒྲུབ་དྲ་ཐོག་ཚོང་དོན་ཚད་ཡོད་ཀུང་སི་དང་མཐུན་སྦྱོར་ཧུར་ཐག་བྱས་ནས་ཆེད་མི་གཏན་འཁེལ་བྱས་ཏེ། རྫོང་དང་ཆུས་དབུལ་པོའི་མཁོ་སྤྲོད་ཚོང་པ་འདེམས་སྒྲུག་དང་ཚོང་ལས་ལས་སྟེགས་སོགས་ཀྱི་ལས་དོན་འབྲེལ་མཐུད་བྱེད་པའི་འགན་འཁུར་བ་རེད། གཟའ་འཁོར་གཅིག་ཁོ་ནར་ལྗོངས་ཡོངས་ཀྱི་རྫོང་དང་ཆུས་29ཡི་ཞིང་འབྲོག་ཐོན་ཟོག་ཐོན་སྐྱེད་དང་ཕྱིར་ཚོང་ཁེ་ལས་དང་ཞིང་འབྲོག་པའི་ཆེད་ལས་མཉམ་ལས་ཁང་55ལས་སྟེགས་ཀྱི་མཁོ་སྤྲོད་ཚོང་པར་གྱུར་ནས། རང་ལྗོངས་ཀྱི་ཞིང་ཞོར་ཐོན་ཟོག་རྒྱལ་ཡོངས་ལ་ཕྱིར་ཚོང་བྱེད་པའི་ཐབས་ལམ་གཏོད་རོགས་བྱས་པ་རེད།

ཤེས་རྟོགས་བྱུང་བར་གཞིགས་ན། གོམ་སྟབས་རྗེས་མར་ལྗོངས་མཁོ་སྒྲུབ་ཁང་གིས་ལྗོངས་ནོར་སྲིད་ཐིང་དང་ལྗོངས་དབུལ་སྐྱོར་གཞུང་དོན་ཁང་དང་མུ་མཐུད་འབྲེལ་གཏུག་བྱེད་ཤུགས་ཆེ་རུ་བཏང་སྟེ། ས་ཁུལ་དབུལ་པོའི་ཞིང་ཞོར་ཐོན་ཟོག་དྲ་རྒྱ་ནས་ཕྱིར་ཚོང་བྱེད་པའི་ལས་སྟེགས་ལ་བརྟེན་ནས་མཉམ་ལས་ལམ་སྲོལ་འཛུགས་པ་དང་མཉམ་ཤུགས་ཆགས་པ་བྱས་ཏེ། རང་ལྗོངས་ཀྱི་ཞིང་འབྲོག་ཐོན་ཟོག་མཁོ་སྤྲོད་ཚོང་པ་55ཡི་དྲ་ཐོག་འོས་སྦྱོར་དང་གནས་གཏན་འཁེལ་གྱི་ཉོ་སྒྲུབ་སོགས་ཀྱི་ལས་དོན་སྔར་བས་ཡག་པོ་བསྒྲུབ་རྒྱུ་རེད། དུས་མཚུངས་དྲིལ་བསྒྲགས་ལས་དོན་ལ་མཛུབ་ཁྲིད་བྱེད་ཤུགས་ཆེ་རུ་བཏང་སྟེ་ལྗོངས་ཡོངས་ཀྱི་རྫོང་དང་ཆུས་74ཡི་ཐོན་ཟོག་ལ་ཁྱབ་པའི་དམིགས་ཚད་སྔ་ཙམ་མངོན་འགྱུར་ཐུབ་པ་བྱས་ནས། རང་ལྗོངས་ཀྱི་ཞིང་འབྲོག་ཐོན་ཟོག་ཕྱིར་ཚོང་ཐབས་ལམ་ཟམ་མི་ཆད་པར་རྒྱ་ཆེར་བཏང་ནས་ཐོན་ལས་དབུལ་སྐྱོར་གྱི་ཕུགས་ཕན་ལམ་སྲོལ་ཆགས་པ་བྱ་རྒྱུ་རེད།