2005ལོར་གྲོང་མི་ཚོས་ཡབ་མདའ་ཚོགས་ཆུང་གི་ཙུའུ་ཀྲང་ལ་འོས་འདེམས་བྱས་པ་དང་། 2008ལོར་ཡབ་མདའ་གྲོང་ཚོ་ཨུ་ལྷན་གྱི་ཨུ་ཡོན་ལ་འདེམས་བསྐོ་བྱས་པ། 2011ལོར་ཡབ་མདའ་གྲོང་ཚོ་ཨུ་ལྷན་གྱི་ཀྲུའུ་རེན་གཞོན་པར་འོས་འདེམས་བྱས་པ། 2015ལོར་ཡབ་མདའ་གྲོང་ཚོ་ཏང་ཨུད་ཀྱི་ཧྲུའུ་ཅི་གཞོན་པ་དང་གྲོང་ཚོ་ཨུ་ལྷན་གྱི་ཀྲུའུ་རེན་ལ་འོས་འདེམས་བྱས་པ་ལ་སོགས། དེ་སྔོན“ཕུལ་བྱུང་གུང་ཁྲན་ཏང་ཡོན”ལ་ཐེངས་གསུམ་བདམས་པའི་ཁོང་ནི་ཡབ་མདའ་ཁྲོམ་གཞུང་དོན་གཅོད་ཁྲུའུ་ཡབ་མདའ་གྲོང་ཚོའི་ཏང་ཨུད་ཀྱི་ཧྲུའུ་ཅི་གཞོན་པ་དང་གྲོང་ཚོ་ཨུ་ལྷན་གྱི་ཀྲུའུ་རེན་མིག་དམར་ཚེ་རིང་རེད།
མིག་དམར་ཚེ་རིང་གིས། ཙུའུ་ཀྲང་ལ་འོས་འདེམས་བྱས་པ་དང་ལྷག་པར་དུ་2006ལོར་གཟི་བརྗིད་ལྡན་པའི་ངང་ཏང་ལ་ཞུགས་པ་ནས་བཟུང་། ངས་དུས་དང་རྣམ་པ་ཀུན་ཏུ་ཏང་གི་བཀའ་དྲིན་འཇལ་རྒྱུའི་བསམ་པ་ཞིག་འཁྱེར་གྱི་ཡོད་ཅེས་གསར་འགོད་པར་བཤད་བྱུང་། མིག་དམར་ཚེ་རིང་གིས་དེ་ལྟར་ཁ་བཤད་ལག་བསྟར་བྱས་ཡོད། ཡབ་མདའ་གྲོང་ཚོར་བཅའ་ཁྲིམས་དྲིལ་བསྒྲགས་ཁྱབ་གདལ་གཏོང་བ་དང་སྲིད་ཇུས་ཁག་གསལ་འགྲེལ་བྱེད་པ་ནས་ཡུར་བུ་བཟོ་བ་དང་སྤྱི་པའི་གཙང་སྦྲ་བྱེད་པ་སོགས་བར་མིག་དམར་ཚེ་རིང་གིས་རང་ནུས་ཡོད་རྒུ་འདོན་གྱི་ཡོད།
གསར་འགོད་པར་ཤེས་རྟོགས་བྱུང་བར། མིག་དམར་ཚེ་རིང་གིས་རྒྱུན་དུ་ཕྱོགས་བསྡུས་བཅོས་སྐྱོང་ལས་དོན་གྱི་འགན་འཁུར་ཞིང་། ཁོང་གིས་བཅའ་ཁྲིམས་ཁྱབ་གདལ་དང་། བདེ་འཇགས་སྲུང་སྐྱོང་། མེ་ཟོན། དེ་བཞིན་བདེ་འཇགས་ཞིབ་བཤེར་དང་རྒྱུན་གཏན་གྱི་སྐོར་གཡེང་སོགས་ལས་དོན་ཚང་མ་ཆད་ལུས་མེད་པར་བསྒྲུབས་ཡོད། ལས་ཀ་བྱེད་རིང་མིག་དམར་ཚེ་རིང་ལས་ལ་བརྩོན་ཞིང་བབ་ཆགས་པ་དང་ཏན་ཏན་ཏིག་ཏིག་ཡིན་པ། དེ་བཞིན་ཁོང་གི་ཐོག་ལྟར་དྲག་ལ་རླུང་ལྟར་མྱུར་བའི་ལས་སྒྲུབ་ཀྱི་གཤིས་ཀར་གྲོང་མི་ཚོས་ཧ་ཅང་དགའ་པོ་བྱེད་ཀྱི་ཡོད་ལ། གྲོང་ཚོའི་ལས་བྱེད་པ་གཞན་དག་གི་གདེང་འཇོག་ལས་ཁོང་ལ་ཐོབ་པའི་གཡུར་ཟའི་གྲུབ་འབྲས་ནི་ཁོང་གིས་ལོ་མང་རིང་བརྩོན་པ་བརྒྱ་དང་འབད་པ་སྟོང་གིས་རང་ནུས་སྐྱེས་སུ་ཕུལ་བ་ལས་བྱུང་བ་ཡིན་པའང་ཤེས་ཐུབ།
ཡབ་མདའ་གྲོང་ཚོའི་བུད་མེད་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་སྐར་མ་དང་མིག་དམར་ཚེ་རིང་མཉམ་ལས་ལོ་མང་བྱེད་མྱོང་ཡོད། ཁོ་མོས་ང་ཚོའི་ཀྲུའུ་རེན་ནི་ལས་ཀ་མེད་པར་སྡོད་ཐུབ་ཀྱི་མེད། གྲོང་ཚོའི་བྱ་བ་ཆེ་ཆུང་ཚང་མ་ཁོང་རང་ཉིད་ཀྱིས་སྒྲུབ་པ་མ་ཟད། ལས་དོན་སྒྲུབ་སྐབས་ཀྱང་ཧ་ཅང་ཐག་ཆོད་པོ་ཡོད། ང་ཚོའི་གྲོང་ཚོའི་ལས་བྱེད་པ་ཕན་ཚུན་ཧ་ཅང་མཐུན་པོ་ཡོད་ལ། ལས་ཀ་བྱེད་སྐབས་གནད་དོན་གང་འཕྲད་རུང་ཁོང་གིས་ངང་རྒྱུད་རིང་པོས་ང་ཚོས་མ་ཤེས་བར་གསལ་འགྲེལ་བྱེད་ཀྱི་ཡོད་པ་དང་། མང་ཚོགས་ལ་དཀའ་ངལ་གང་འཕྲད་རུང་ཁོང་གིས་རང་འགུལ་ངང་རོགས་རམ་བྱེད་ཀྱི་ཡོད་ཅེས་གསར་འགོད་པར་བཤད་བྱུང་།
“གུང་ཁྲན་ཏང་ཡོན་ཞིག་གི་ངོས་ནས་ངའི་ལས་ཀ་གཙོ་བོ་ནི་མི་དམངས་ལ་ཞབས་འདེགས་ཞུ་དགོས་པ་འདི་རེད་བསམ་གྱི་འདུག དེ་སྔོན་ང་ཚོའི་གྲོང་ཚོར་ཡིག་ཚགས་དང་གཱ་བཟོས་པའི་དུད་ཚང་དབུལ་པོ་67ཡོད། དབུལ་སྒྲོལ་འགག་སྒྲོལ་གྱི་ལས་དོན་སྤེལ་རིང་། ང་ཚོས་རྟག་ཏུ་དུད་ཚང་དུ་འཚམས་འདྲི་དང་བརྟག་ཞིབ་བྱེད་པར་བསྐྱོད་ནས། ཁོ་ཚོའི་དཀའ་ངལ་དངོས་སེལ་རོགས་བྱེད་པ་མ་ཟད། ལས་ཞུགས་གནད་དོན་སོགས་ཐག་གཅོད་བྱེད་པ་གོ་སྐབས་སུ་བརྩིས་ནས་ནུས་ཤུགས་ཡོད་རྒུས་ཁོ་ཚོར་ཏང་གི་བཀའ་དྲིན་ཚོར་བར་བྱེད་དགོས་པའི་སློབ་གསོ་གཏོང་བ་དང་ཁྲིད་སྟོན་ཡང་བྱེད་ཀྱི་ཡོད”
རྒྱུན་གཏན་གྱི་འཚོ་བའི་ནང་དུའང་མིག་དམར་ཚེ་རིང་གིས་གྲོང་མི་ཁྱིམ་མཚེས་ཚོར་ཏང་གི་སྲིད་ཇུས་བཟང་པོར་བརྟེན་ནས་རང་ཉིད་ཀྱི་ལག་གཉིས་སྤྱད་དེ་ཕྱུག་འགྱུར་ཡོང་བར་བྱེད་དགོས་པའི་འབོད་སྐུལ་བྱས་ཏེ་ཁོ་ཚོའི་སྒུག་རྟེན་སློང་གསུམ་གྱི་བསམ་བློ་སེལ་གང་ཐུབ་བྱེད་ཀྱི་ཡོད། མིག་དམར་ཚེ་རིང་གིས། གནད་སྨིན་དབུལ་སྐྱོར་བྱེད་པར་གཙོ་ཆེ་ཤོས་ནི་མང་ཚོགས་ཀྱི་བསམ་བློར་འགྱུར་ལྡོག་གཏོང་དགོས་པ་འདི་རེད། དབུལ་སྐྱོར་བྱེད་པར་སྔོན་ལ་བློ་སྐྱོར་བྱེད་དགོས། དབུལ་སྒྲོལ་འགག་སྒྲོལ་བྱེད་པའི་མང་ཚོགས་ཀྱི་ཡིད་ཆེས་དང་ཆོད་སེམས་ཆེ་རུ་གཏོང་རྒྱུ་ནི་ང་ཚོའི་འབད་འཐབ་ཀྱི་ཁ་ཕྱོགས་རེད། སླད་ཕྱིན་ངས་སྔར་རྒྱུན་བཞིན་མང་ཚོགས་ལ་བྱ་བ་དངོས་སྒྲུབ་པ་དང་དཀའ་ངལ་སེལ་གྱི་ཡིན། འདི་ནི་ངས་རྟག་ཏུ་སྒྲུབ་བསམ་པ་ཡིན་ལ་བསྒྲུབས་དང་སྒྲུབ་མུས་ཀྱི་ལས་དོན་ཡང་ཡིན་ཞེས་གསར་འགོད་པར་བཤད་བྱུང་།