ལུགས་རྙིང་ལོའི་ཚེས་30ཉིན་གྱི་སྔ་དྲོ། གསར་འགོད་པས་བྲག་ཡིབ་ཆུས་དགུང་ཚང་ཤང་བཅུ་འཕར་གྲོང་ཚོའི་འབྲི་ཏ་ས་འཛིན་འདེབས་འཛུགས་རྟེན་གཞིར་བཅར་འདྲི་བྱས་པ་ཡིན། དྲོད་ཁང་ནང་འཛུལ་མ་ཐག་མིག་ལམ་དུ་འཆར་བ་ནི་དཔྱིད་དཔལ་རབ་ཏུ་བཞད་ཅིང་སྐྱེ་སྟོབས་ཀྱི་དཔལ་འབར་བའི་རྣམ་པ་ཞིག་མངོན། བཅུ་འཕར་གྲོང་ཚོའི་མཉམ་ལས་ཁང་གི་འདི་ལོའི་འབྲི་ཏ་ས་འཛིན་ཐོག་མར་བཏབ་པར་མང་ཚོགས་ལ་2020ལོའི་དུས་ཚིགས་དང་པོའི་ལོ་ལེགས་བྱུང་བ་རེད།

མང་ཚོགས་ཀྱི་ཡོང་འབབ་མང་དུ་གཏོང་ཆེད། 2011ལོ་ནས་བཟུང་བཅུ་འཕར་གྲོང་ཚོས་སྲོལ་རྒྱུན་གྱི་འདེབས་འཛུགས་བྱེད་སྟངས་ལ་འགྱུར་ལྡོག་བཏང་ནས་བཅུ་འཕར་གྲོང་ཚོའི་འབྲི་ཏ་ས་འཛིན་འདེབས་འཛུགས་མཉམ་ལས་ཁང་བཙུགས་ཏེ་མང་ཚོགས་ཀྱིས་འབྲི་ཏ་ས་འཛིན་འདེབས་འཛུགས་བྱ་རྒྱུར་སྐུལ་མ་ཧུར་ཐག་བཏང་བ་རེད།

མིག་སྔའི་བར་མཉམ་ལས་ཁང་གིས་ལྕགས་སྒྲོམ་དྲོད་ཁང་56བསྐྲུན་པ་དང་འབྲི་ཏ་ས་འཛིན་འདེབས་ཁྱོན་མུའུ་70ལྷག་ཙམ་ཟིན་པས་ལོ་རེར་འབྲི་ཏ་ས་འཛིན་ཐོན་ཚད་རྒྱ་མ་ཁྲི་5.6ལྷག་ཙམ་ཟིན་ཏེ་ཡོང་འབབ་སྒོར་ཁྲི་224བྱུང་བ་དང་མཉམ་ལས་ཁང་གི་ཁོངས་མིའི་དུད་ཚང་རེར་ཆ་སྙོམས་འབབ་འཕར་སྒོར་ཁྲི་8ཡོང་བའི་སྐུལ་ཁྲིད་བྱས་པ་རེད། ད་ཆ་འབྲི་ཏ་ས་འཛིན་གྱི་འདེབས་འཛུགས་དེ་བཅུ་འཕར་གྲོང་ཚོའི་མང་ཚོགས་ཀྱི་འབབ་འཕར་ཕྱུག་འགྱུར་གྱི་ཐབས་ལམ་གལ་ཆེན་ཞིག་ཏུ་གྱུར་ཡོད།

“སྲོལ་རྒྱུན་གྱི་ལོ་ཏོག་འདེབས་པ་ལས་འབྲི་ཏ་ས་འཛིན་བཏབ་ན་ངོ་མ་ཡག་པོ་འདུག ང་ཚོའི་གྲོང་ཚོས་འབྲི་ཏ་ས་འཛིན་ཁོ་ན་བཏབ་པར་ཉུང་ཤོས་ལའང་ཡོང་འབབ་སྒོར་ཁྲི་6དང་མང་ཤོས་ལ་སྒོར་ཁྲི་9ལྷག་ཙམ་ཟིན་གྱི་འདུག”ཅེས་གྲོང་ཚོའི་ཨུ་ལྷན་གྱི་ཀྲུའུ་རེན་དབང་འདུས་ཀྱིས་དགའ་ཚོར་ཆེན་པོས་བཤད།

སྐབས་དེར་ཉི་འོད་གཞི་ནས་ས་གཞིར་འཕྲོས་ཏེ་གནམ་གཤིས་དྲོ་རུ་ཕྱིན། བཅུ་འཕར་གྲོང་ཚོའི་མང་ཚོགས་ཚོའང་གཅིག་རྗེས་གཉིས་མཐུད་ངང་སོ་སོའི་དྲོད་ཁང་དུ་ཡོང་ནས་ཉིན་གཅིག་གི་ལས་ལ་གཞོལ་འགོ་ཚུགས།

“ང་ཚོའི་འབྲི་ཏ་ས་འཛིན་ཚང་མར་ཞིང་སྨན་བརྒྱབ་མེད་པས་བློ་བདེ་པོས་ཟ་ཆོག་པ་མ་ཟད། ད་དུང་ཉིན་འོད་དང་སྨུག་ཕྱིའི་འོད་ཟེར་ཕོག་ཡུན་རིང་སྟབས་འབྲས་བུ་སྨིན་བཟང་བ་དང་བྲོ་བ་ཞིམ་པོ་ཡོད”ཅེས་ཚེ་རིང་གཡང་འཛོམས་ཀྱིས་སྤོབས་པ་ཆེན་པོས་བཤད།