རང་སྐྱོང་ལྗོངས་སྤྱི་ཚོགས་ཚན་རིག་ཁང་རྨང་བརྟན་གཞུང་ལས་ཁང་གིས་ཤུགས་ཆེའི་རྒྱབ་སྐྱོར་དང་མཐུན་སྦྱོར་འོག ཉེ་ཆར། སྨར་ཁམས་རྫོང་སྤང་མདའ་ཤང་བརྒྱ་བཀག་གྲོང་ཚོར་བཅའ་སྡོད་རང་སྐྱོང་ལྗོངས་སྤྱི་ཚོགས་ཚན་རིག་ཁང་གི་ལས་དོན་རུ་ཁག་ཁག་བརྒྱད་པས་གྲོང་ཚོ“ཨུ་ལྷན་གཉིས”དང་མཐུན་སྦྱོར་བྱས་ཏེ། ཞིང་འབྲོག་པའི་ཆེད་ལས་མཉམ་ལས་ཁང་གི་འཐུས་མིའི་སློབ་སྦྱོང་ཚོགས་པ་ལྷ་ས་གྲོང་ཁྱེར་ཁྲེང་ཀོན་ཆུས་དང་། ལྷོ་ཁ་གྲོང་ཁྱེར་སྣེ་གདོང་ཆུས། གོང་དཀར་རྫོང་སོགས་སུ་བསྐྱོད་དེ་དུས་ཡུན་ཉིན་7གྱི་སློབ་སྦྱོང་དང་རྩལ་ནུས་གསོ་སྦྱོང་ནང་ཞུགས་པ་རེད།
མཉམ་ལས་ཁང་གི་འཁལ་འཐག་ཆུ་ཚད་གོང་མཐོར་གཏོང་བ་དང་། འཁལ་འཐག་ཐོན་རྫས་ཕུན་སུམ་ཚོགས་སུ་བཏང་ནས་ཐོན་རྫས་ཀྱི་གསར་གཏོད་རང་བཞིན་དང་ཡིད་དབང་འགུག་ཤུགས་ཆེ་རུ་གཏོང་ཆེད། སློབ་སྦྱོང་ཚོགས་པས་ལྷ་ས་གྲོང་ཁྱེར་ཞོལ་འདོད་དཔལ་སྲོལ་རྒྱུན་ལག་ཤེས་སྒྱུ་རྩལ་སློབ་གྲྭ་དང་ལྷ་སའི་སྤང་རྒྱན་མེ་ཏོག་བཟོ་ཚོང་ཚད་ཡོད་ཀུས་སིར་ལྟ་སྐོར་བྱས་པ་དང་འབྲེལ། ཤིང་བརྐོས་དང་། ཐང་ག་འབྲི་བ། རྫ་ཆས་སྒྱུ་རྩལ། ཁྱད་ལྡན་བོད་རུམ་སོགས་ལག་ཤེས་སྒྱུ་རྩལ་བཟོ་བའི་ལག་རྩལ་སློབ་སྦྱོང་བྱས་པ་མ་ཟད། ཐོན་རྫས་ཀྱི་ཐོན་སྐྱེད་ཕྱིར་ཚོང་གནས་ཚུལ་ཤེས་རྟོགས་བྱས་པ་རེད།
ལྷོ་ཁ་གྲོང་ཁྱེར་གོང་དཀར་རྫོང་ལྕེ་བདེ་ཞོལ་གྲོང་རྡལ་དང་རྣམ་རྒྱལ་ཞོལ་ཤང་དུ་སློབ་སྦྱོང་ཚོགས་པས་སྲོལ་རྒྱུན་ལག་ཤེས་སྣམ་བུ་འཐག་པའི་མཉམ་ལས་ཁང་དང་། ཁམས་བཟང་ཟངས་ཆས་ཚད་ཡོད་ཀུང་སི། བོད་ལུགས་ཞྭ་མོ་བཟོ་བའི་མཉམ་ལས་ཁང་། རས་ཕྱགས་བཟོ་རྩལ་མཉམ་ལས་ཁང་བཅས་སུ་ལྟ་སྐོར་བྱས་ཏེ་དཔྱད་གཞི་ཉོ་སྒྲུབ་དང་། འཁལ་འཐག་ལས་སྣོན་ལག་རྩལ། ཐོན་རྫས་ཕྱིར་ཚོང་སོགས་ཀྱི་ནང་དོན་སློབ་སྦྱོང་བྱས་པ་རེད།
མཉམ་ལས་ཁང་གི་ལག་རྩལ་དང་དོ་དམ་བྱ་ཐབས་ལ་སྔར་བས་སློབ་སྦྱོང་དང་ཁོང་དུ་ཆུད་པ་བྱ་ཆེད། ལྷོ་ཁ་གྲོང་ཁྱེར་སྣེ་གདོང་ཆུས་སུ་སློབ་སྦྱོང་ཚོགས་པས་རྩེད་ཐེར་མི་རིགས་ལག་ཤེས་འཁལ་འཐག་མཉམ་ལས་ཁང་། མི་རིགས་རྒྱན་གོས་ཚད་ཡོད་ཀུང་སི་བཅས་ལ་ལྟ་སྐོར་བྱས་པ་དང་འབྲེལ། འཁོར་ཁང་དུ་བསྐྱོད་ནས་རང་ཉིད་ངོ་མས་བཀོལ་སྤྱོད་བྱས་པ་རེད། དགེ་རྒན་གྱི་ངང་རྒྱུད་རིང་བའི་མཛུབ་ཁྲིད་འོག་ཉིན་གཉིས་སློབ་སྦྱོང་བྱས་པས་སློབ་སྦྱོང་ཚོགས་པའི་ཁོངས་མིས་འཁལ་འཐག་ལག་རྩལ་དང་བཟོ་རྩལ་བརྒྱུད་རིམ་རགས་ཙམ་ཁོང་དུ་ཆུད་པ་རེད།
ལྟ་སྐོར་བྱ་ཡུལ་ཚང་མའི་དགེ་རྒན་གྱིས་རྩལ་ནུས་བརྒྱུད་སྤྲོད་བྱས་པས་སློབ་སྦྱོང་ཚོགས་པའི་ཁོངས་མིའི་མཐོང་རྒྱ་ཆེ་རུ་སོང་བ་མ་ཟད། འཁལ་འཐག་ལས་སྣོན་ཁྱབ་ཁོངས་ཀྱི་ཁྱད་ལྡན་རྩལ་ནུས་ཁོང་དུ་ཆུད་པ་དང་མཉམ་ལས་ཁང་གི་སྔོན་ཐོན་འཁོར་རྒྱུག་བྱ་ཐབས་ཤེས་རྟོགས་ཐུབ་ཡོད། ཚང་མས་ད་ཐེངས་ཀྱི་ལྟ་སྐོར་དང་རྩལ་ནུས་གསོ་སྦྱོང་ནང་རྩལ་ནུས་མང་པོ་ཤེས་བྱུང་། ད་ཐེངས་ཤེས་རྟོགས་ཐུབ་པའི་རྩལ་ནུས་ཡག་པོ་སྤྱད་དེ་ཐོན་རྫས་ཀྱི་སྤུས་ཚད་སྔར་བས་གོང་མཐོར་གཏོང་རྒྱུ་ཡིན་ལ་མཉམ་ལས་ཁང་གི་གཞི་ཁྱོན་ཆེ་རུ་བཏང་ནས་བརྒྱ་བཀག་གྲོང་ཚོའི་དཔལ་འབྱོར་འཕེལ་རྒྱས་ལ་སྐུལ་འདེད་ཧུར་ཐག་གཏོང་རྒྱུ་ཡིན་ཞེས་གཅིག་རྗེས་གཉིས་མཐུད་ངང་བརྗོད་པ་རེད།