གླེང་གཞི།

ན་ནིང་ཚུན་དུ་རང་ལྗོངས་ཀྱིས“ཐོན་རྫས་གསུམ་དང་མཚོན་རྟགས་གཅིག”འཕེལ་རྒྱས་ཀྱི་དུས་བབ་གསར་པ་སྟངས་འཛིན་ཡང་དག་བྱས་ཏེ་འཕེལ་རྒྱས་ཀྱི་གོ་སྐབས་གསར་པ་དམ་འཛིན་ཏན་ཏིག་བྱས་པ་དང་། རང་ལྗོངས་ཀྱི་ཞིང་ལས་ཐོན་རྫས་ཀྱི“ཐོན་རྫས་གསུམ་དང་མཚོན་རྟཌ་གཅིག”གི་བདེན་དཔང་གཞི་ཁྱོན་ཟམ་མི་ཆད་པར་རྒྱ་ཆེར་བཏང་བ། བདེན་དཔང་གི་སྤྱིའི་ཆུ་ཚད་ལ་སྐུལ་འདེད་ཤུགས་ཆེན་བཏང་བ་བཅས་ལས་ལས་དོན་ཁག་ལ་གྲུབ་འབྲས་མངོན་གསལ་དོད་པོ་ཐོབ་ཡོད། མིག་སྔའི་བར་ལྗོངས་ཡོངས་ཀྱི་ལྗང་མདོག་ཞིང་ལས་ཐད་སྣེ་འདྲེན་ཁེ་ལས་100ལྷག་ཙམ་དང་། ཞིང་འབྲོག་པའི་མཉམ་ལས་ཁང་6000ལྷག་ཙམ། དེ་བཞིན་ས་མཐོའི་ཁྱད་ལྡན་ཐོན་རྫས་དང་ཁྱད་ལྡན་ཐོན་ལས་ཕན་ཚུན་མཐུན་སྦྱོར་ངང་འཕེལ་རྒྱས་གཏོང་བའི་ཐོན་ལས་ཀྱི་རྣམ་པ་ཞིག་རིམ་བཞིན་ཆགས་ཡོད། “ཐོན་རྫས་གསུམ་དང་མཚོན་རྟགས་གཅིག”གི་ནུས་ལྡན་ཁེ་ལས་44དང་ཐོན་རྫས་225ཟིན་པ་དང་། ཐོན་རྫས་ཀྱི་མཚོན་རྟགས་སྤྱོད་ཚད་95%ཟིན་ནས་མཚོན་རྟཌ་ནུས་ལྡན་གྱི་ཐོན་རྫས་བསྡོམས་འབོར་2017ལོ་དང་བསྡུར་ན་18%ཡན་འཕར་ཡོད།

འདི་ནི་རང་སྐྱོང་ལྗོངས་ལྗང་མདོག་བཟའ་བཅའ་གཞུང་ལས་ཁང་གི་ལས་དོན་མི་སྣས་ལྷུན་རྩེ་རྫོང་བོད་བྱ་ནག་པོ་གསོ་ཚགས་ར་བར་བརྟག་ཞིབ་བྱེད་བཞིན་པ།

ཐོན་སྐྱེད་ལ་མཐོང་ཆེན།

ལྗང་མདོག་ཞིང་ལས་དང་སྤུས་ཚད་ཞིང་ལས།

ཉེ་བའི་ལོ་ཤས་རིང“ཐོན་རྫས་གསུམ་དང་མཚོན་རྟགས་གཅིག”གི་གཞི་ཁྱོན་ལོ་རེ་བཞིན་བརྟན་པོའི་ངང་ཆེ་རུ་འགྲོ་བའི་རྣམ་པ་གྲུབ་པ་དང་བསྟུན་ནས་ལྗོངས་ཡོངས་ཀྱི“ཐོན་རྫས་གསུམ་དང་མཚོན་རྟགས་གཅིག”ཐོན་ཡུལ་གྱི་ཁྱབ་འགྱེད་རྒྱ་ཁྱོན་ཡང་ལོ་རེ་བཞིན་ཆེ་རུ་ཕྱིན་པ་དེས་རང་ལྗོངས་ཀྱི་ལྗང་མདོག་སྣོད་བཅུད་ཞིང་ལས་དང་ཞིང་ལས་ཐོན་རྫས་ཀྱི་སྤུས་ཚད་བདེ་འཇགས་མཐོར་གཏོང་ལ་ལེགས་སྐྱེས་ཧུར་ཐག་ཕུལ་ཡོད། དེ་ཙམ་མ་ཟད་རང་ལྗོངས་ཀྱིས“ཐོན་རྫས་གསུམ་དང་མཚོན་རྟགས་གཅིག”གི་ཞིང་ལས་ཐོན་རྫས་ཀྱི་སྤུས་ཚད་བརྟན་པོ་དང་བློས་འགེལ་ཆོག་པ་སོགས་ལ་ཤུགས་སྣོན་རྒྱག་རྒྱུར་ཚད་མཐོའི་མཐོང་ཆེན་བྱས་པར་བདེན་དཔང་ཐོབ་པ་དང་ཆབས་ཅིག་བདེན་དཔང་ཐོབ་རྗེས་ཀྱི་ལྟ་སྐུལ་དོ་དམ་ལ་ཚད་མཐོའི་མཐོང་ཆེན་བྱས་ནས་ཐོན་སྐྱེད་ནས་ལས་སྣོན་དང་། ཐུམ་སྒྲིལ་རྒྱག་པ། དེ་བཞིན་གསོག་འདྲེན་བཅས་བར་གྱི་བརྒྱུད་རིམ་ནང“ཞིང་ས་ནས་གསོལ་ཅོག་བར”གྱི་བརྒྱུད་རིམ་ཧྲིལ་པོའི་སྤུས་ཚད་ཚོད་འཛིན་མཐའ་འཁྱོངས་བྱས་པས་དཔང་ཡིག་ཐོབ་པའི་ཐོན་རྫས་ཀྱི་སྤུས་ཚད་བློས་འགེལ་ཆོག་པའི་འགན་ལེན་ཐུབ་ཡོད། ཤེས་རྟོགས་བྱུང་བར་གཞིགས་ན། ལོ་རེའི་ཞིང་ལས་གྲོང་གསེབ་པུས་སྒྲིག་འཛུགས་བྱས་པའི་ཆེད་དོན་འཐེན་བཤེར་ཁྲོད་ལྗོངས་ཡོངས་ཀྱི“ཐོན་རྫས་གསུམ་དང་མཚོན་རྟགས་གཅིག”གི་ཞིང་ལས་ཐོན་རྫས་ཚད་གཞི་ལོན་ཚད་ཚང་མ་100%རྒྱུན་འཁྱོངས་ཐུབ་ཡོད། དེ་དང་ཆབས་ཅིག་རང་སྐྱོང་ལྗོངས་ཀྱི་ལྗང་མདོག་བཟའ་བཅའ་གཞུང་ལས་ཁང་གིས་ལོ་རེར་རང་ལྗོངས་ཀྱི“ཐོན་རྫས་གསུམ་དང་མཚོན་རྟགས་གཅིག”གི་ཐོན་རྫས་ལ་ཡོངས་ཁྱབ་རང་བཞིན་གྱི་འཐེན་བཤེར་བྱེད་པ་དང་ལོ་ཕྱེད་ལ་ལྟ་སྐུལ་འཐེན་ཞིབ་ཐེངས་རེ་བྱས་པར་ཚད་གཞི་ལོན་ཚད་ཚང་མ་100%ཟིན་ནས་ལྗོངས་ཕྱི་ནང་གི་རྒྱ་ཆེའི་འཛད་སྤྱོད་པའི་ཡིད་ཆེས་ཆེན་པོ་ཐོབ་ཡོད།

བོད་ལྗོངས་རྒྱ་ཚ་རྫོང་ཡར་ཀླུང་གཙང་པོ་ཁེ་ལས་ཚད་ཡོད་འགན་འཁྲི་ཀུང་སིའི་འགན་ཁུར་བས“སྲིད་གཞུང་གིས་ཞིང་འབྲོག་མང་ཚོགས་དབུལ་སྒྲོལ་ཕྱུག་འགྱུར་ཡོང་བར་ཐབས་བརྒྱ་ཇུས་སྟོང་ངང་སྐུལ་འདེད་བཏང་བས་ང་ཚོའི་ཁེ་ལས་ལ་འཕེལ་རྒྱས་ཀྱི་གོ་སྐབས་དང་ལས་སྟེགས་ཤིག་མཁོ་འདོན་བྱས་བྱུང་། དཔང་ཡིག་སྤྲད་པ་དེ་ནི་ང་ཚོའི་སྟར་ཁའི་སྤུས་རྟགས་ལ་ཁས་ལེན་གང་ལེགས་བྱས་པ་ཞིག་རེད་ལ། ང་ཚོའི་ལས་དོན་ལ་རྒྱབ་སྐྱོར་ཤུགས་ཆེན་བྱས་པ་ཞིག་ཀྱང་རེད། སླད་ཕྱིན་ང་ཚོས་ཏང་དང་སྲིད་གཞུང་གི་ཐུགས་ཁུར་དང་རེ་བ་ཆུད་ཟོས་སུ་མི་གཏོང་བར་སྟར་ཁ་ཐོན་སྐྱེད་དང་། ལས་སྣོན། ཐུམ་སྒྲིལ། གསོག་འདྲེན་སོགས་ཀྱི་ཐད་བརྒྱུད་རིམ་ཧྲིལ་པོའི་སྤུས་ཚད་ཚོད་འཛིན་བྱས་ཏེ་འཛད་སྤྱོད་པར་བདེ་འཇགས་དང་། སྤུས་ལེགས། བྲོ་ཞིམ་བཅས་ཀྱི་ཐོན་རྫས་མཁོ་འདོན་བྱས་ནས་མི་སེར་ཚོའི‘ལྕེ་ཐོག་གི་བདེ་འཇགས’འགན་ལེན་བྱ་རྒྱུ་ཡིན”ཞེས་བརྗོད།

དམངས་འཚོར་གཞི་ཚུགས་པ།

ཐོན་ལས་དབུལ་སྐྱོར་དང་བདེ་ཐང་དབུལ་སྐྱོར།

བདེ་ཐང་ཐོན་ལས་འཕེལ་རྒྱས་གཏོང་བ་ནི་དཔལ་འབྱོར་གྲུབ་ཆ་ལེགས་སྒྲིག་དང་མཁོ་སྤྲོད་ཕྱོགས་ཀྱི་གྲུབ་ཆའི་རང་བཞིན་གྱི་སྒྱུར་བཅོས་ལ་སྐུལ་འདེད་གཏོང་བའི་བྱེད་ཐབས་གལ་ཆེན་ཞིག་ཡིན་པ་སྨོས་མེད་རེད།

གྲངས་གཞི་ལས་མངོན་པ་གཞིགས་ན། 2020ལོར་སླེབས་སྐབས་རང་ལྗོངས་ཀྱི་འབྲུ་རིགས་ཐོན་ཚད་ཏུན་ཁྲི་100ལྷག་ཙམ་རྒྱུན་འཁྱོངས་ཐུབ་རྒྱུ་ཡིན་པ་ལས་ནས་ཐོན་ཚད་ཏུན་ཁྲི་70ལྷག་ཙམ་རྒྱུན་འཁྱོངས་ཐུབ་རྒྱུ་དང་། ཞིང་ལས་དང་། ནགས་ལས། འབྲོག་ལས། ཉ་ལས་བཅས་ཀྱི་ཐོན་སྐྱེད་བསྡོམས་འབོར་ཁྲོད་ཞིང་འབྲོག་ལས་ཀྱིས་བཟུང་བའི་བསྡུར་ཚད་50%རྒྱུན་འཁྱོངས་ཐུབ་རྒྱུ། ལྗོངས་ཡོངས་ཀྱི་ཕྱུགས་རིགས་གསོན་ཚད་མགོ་གྲངས་ཁྲི་2000ལྷག་ཙམ་ཚོད་འཛིན་ཐུབ་རྒྱུ། ཤ་རིགས་དང་། དཀར་ཆུའི་རིགས་ཐོན་ཚད་ཏུན་ཁྲི་36དང་ཏུན་ཁྲི་44ཁག་སོ་སོར་ཟིན་རྒྱུ། ཞིང་འབྲོག་ལས་ཐོན་ལས་ཅན་གྱི་གཉེར་སྐྱོར་བྱེད་ཚད་50%ཟིན་རྒྱུ། ཞིང་འབྲོག་པའི་མི་རེར་ལོ་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་13%ལྷག་ཙམ་འཕར་རྒྱུ་བཅས་རེད།

གྲངས་གཞི་གཞན་ཞིག་ལས་མངོན་པར། མིག་སྔའི་བར་ལྗོངས་ཡོངས་ཀྱི“ཐོན་རྫས་གསུམ་དང་མཚོན་རྟགས་གཅིག”གི་ཁེ་ལས་ཀྱི་ལོ་རེའི་ཐོན་རྫས་རིན་ཐང་སྒོར་དུང་ཕྱུར་30.32ཟིན་པ་ལས་སྤྱི་གནོད་མེད་པའི་ཞིང་ལས་ཐོན་རྫས་ཀྱི་རིན་ཐང་སྒོར་དུང་ཕྱུར་5.75དང་། ལྗང་མདོག་བཟའ་བཅའ་སྒོར་དུང་ཕྱུར་4.84 སྐྱེ་ལྡན་ཟས་རིགས་སྒོར་དུང་ཕྱུར་4.25 ས་གཤིས་མཚོན་རྟགས་ཀྱི་ཐོན་རྫས་སྒོར་དུང་ཕྱུར་15.48བཅས་ཟིན་པ་དེས་རིམ་རྩིས་བྱས་ན་དུད་ཚང་ཁྲི་3.78དང་ཞིང་འབྲོག་པ་ཁྲི་13ཙམ་དབུལ་སྒྲོལ་ཕྱུག་འགྱུར་ཡོང་བར་སྐུལ་ཁྲིད་ཐུབ་པ་དང་། ལོ་རེར་མི་1200གསར་དུ་ལས་ཞུགས་ཐུབ་པ། ཡིག་ཚགས་དང་གཱ་བཟོས་པའི་དུད་ཚང་དབུལ་པོ་3200ལྷག་ཙམ་འབབ་འཕར་ཕྱུག་འགྱུར་ཡོང་བར་སྐུལ་ཁྲིད་ཐུབ་ནས་རིམ་རྩིས་བྱས་ན་ལོ་རེར་དུད་ཚང་རེར་དངུལ་སྨར་ཡོང་འབབ་སྒོར་ཁྲི་1.2ལྷག་ཙམ་འཕར་ཡོད། (པད་ཆོས་ཀྱིས་བསྒྱུར། ཉི་དོན་དང་པད་ཆོས་ཀྱིས་ཞུས)

འདི་ནི་རྒྱ་ཚ་རྫོང་གི་མང་ཚོགས་ཀྱིས་གནོད་མེད་སྟར་ཁ་འཐུ་བཞིན་པ།