ལོ་41ལ་ཁོང་ཡུན་ནན་ཏ་ལི་རུ་བསྐྱོད་དེ་མ་རྩ་གང་ཡང་མེད་པར“བཀྲ་ཤིས་ཞིང་འཕྲུལ་དང་ཞིང་ལས་ཡོ་བྱད་བཟོ་གྲྭ”བཙུགས།

ལོ་58ལ་ཁོང་གིས་བློ་ཐག་ཆོད་པོས་ཕ་ཡུལ་དུ་ལོག་ནས་མ་དངུལ་བཏང་སྟེ་མཉམ་ལས་ཁང་བཙུགས་པ་དང་མང་ཚོགས་དབུལ་སྒྲོལ་ཕྱུག་འགྱུར་ཡོང་བར་སྣེ་ཁྲིད་བྱས།

ལོ་67ལ་ཁོང་གིས་མ་དངུལ་བཏང་ནས་བསྐྲུན་པའི་སྨན་ཁང་ཡང་འཇང་མི་རིགས་ཤང་གི་མང་ཚོགས་ལ་སྒོ་ཕྱེ།

ཁོང་ནི་སྨར་ཁམས་རྫོང་འཇང་མི་རིགས་ཤང་འཇང་མི་རིགས་གྲོང་ཚོའི་གྲོང་མི་བཀྲ་ཤིས་དབང་འདུས་ཡིན་ཞིང་།　སྔ་རྗེས་སུ“རྒྱལ་ཡོངས་ཀྱི་གྲོང་གསེབ་ཚན་རིག་སློབ་སྦྱོང་དང་བེད་སྤྱོད་ཀྱི་གཞོན་ནུའི་དཔེ་དམག”དང“རྒྱལ་ཡོངས་ཀྱི་ཚན་རིག་ཁྱབ་གདལ་དང་ཞིང་ཕན་གྲོང་དར་གྱི་སྣེ་ཁྲིད་པ”སོགས་ཀྱི་མཚན་སྙན་ཐོབ་པ་དང་།　ཁོང་གིས་བཙུགས་པའི་སྨར་ཁམས་རྫོང་འཇང་མི་རིགས་ཤང་གཙང་གསུམ་ཞིང་འབྲོག་པའི་ཆེད་ལས་མཉམ་ལས་ཁང་ལ་སྔ་རྗེས་སུ“རང་སྐྱོང་ལྗོངས་ཀྱི་ཞིང་འབྲོག་པའི་ཆེད་ལས་མཉམ་ལས་ཁང་གི་སྔོན་ཐོན་དཔེ་སྟོན་ཁང”དང“རྒྱལ་ཁབ་ཀྱི་ཞིང་པའི་མཉམ་ལས་ཁང་གི་དཔེ་སྟོན་ཁང”གི་གཟི་བརྗིད་མཚན་སྙན་ཐོབ་ཡོད།

1993ལོར།　བཀྲ་ཤིས་དབང་འདུས་འཚོ་བ་བསྐྱལ་ནས་ལོ་41སོང་བའི་ཕ་ཡུལ་དང་བྲལ་ཏེ་ཡུན་ནན་ཏ་ལི་རུ་བསྐྱོད་ནས་ཇ་ཁང་བཙུགས་ཏེ་ལྟོ་གོས་འཕྱིད་ཐབས་བྱས།　དེ་དང་དུས་མཚུངས་ཁོང་གིས་ཁོམ་པ་ཡོད་དུས་ཞིང་འཕྲུལ་འཆར་འགོད་ལ་ཞིབ་འཇུག་བྱས།　འབད་བརྩོན་ལྷོད་མེད་བྱས་མཐར་ཞིང་འཕྲུལ་གསར་པ་སྟེ།　འབྲུ་འདོན་འཕྲུལ་འཁོར་གསར་གཏོད་བྱས་ཡོད།　དུས་ཡུན་རིང་པོ་མ་སོང་བར“བཀྲ་ཤིས་ཞིང་འཕྲུལ་དང་ཞིང་ལས་ཡོ་བྱད་བཟོ་གྲྭ”བཙུགས་པ་དང་བཀྲ་ཤིས་དབང་འདུས་དར་མའི་སྐབས་ལས་གཏོད་ཀྱི་འདུན་པ་མངོན་འགྱུར་བྱུང་ཡོད།

བྱ་གཞག་ལེགས་གྲུབ་བྱུང་བའི་བཀྲ་ཤིས་དབང་འདུས་ཀྱི་ཕ་ཡུལ་ལ་བཅངས་པའི་འཕྲེང་སེམས་ཀྱང་ཇེ་ཆེར་སོང་ཞིང་།　ཆུང་དུས་མཉམ་དུ་འཚར་ལོངས་བྱུང་བའི་གྲོགས་པོ་ཟླ་བའི་ཁ་པར་འབྱོར་ནས“ལོ་བཅུ་ཕྲག་འདས་ཟིན་ནའང་ང་ཚོ་སྔར་བཞིན་རི་སྟེང་དུ་འཚོ་བ་སྐྱེལ་གྱི་ཡོད།　ཕྲུ་གུ་རྣམས་སློབ་གྲྭར་འགྲོ་བར་སྟབས་བདེ་མི་འདུག　ཁྱེད་རང་ཕ་ཡུལ་དུ་ལོག་ནས་མ་འཇོག་བྱེད་རྒྱུའི་རེ་བ་ཡོད་ལ་ཁྱིམ་གྱི་སྒོ་ཁར་གཞུང་ལམ་ཤར་གཏོང་ཐུབ་པའི་རེ་བའང་ཡོད”ཅེས་བཤད།

ཟླ་བའི་སྐད་ཆ་དེ་བཀྲ་ཤིས་དབང་འདུས་ཀྱི་རྣ་ལམ་དུ་ཡང་སེ་འཁོར་ཞིང་།　མཐར་2008ལོ་དང་2009ལོར་ཁོང་ཕ་ཡུལ་དུ་ཐེངས་ཁ་ཤས་ལོག་ནས་ས་ཆ་དངོས་སུ་རྟོག་ཞིབ་བྱས་པས་རིམ་བཞིན་ཕ་ཡུལ་དུ་མ་འཇོག་བྱེད་པའི་བསམ་ཕྱོགས་ཁ་གསལ་དུ་ཕྱིན་པ་སྟེ།　ལམ་བཟོ་བ་དང་ཁྱད་ལྡན་ཞིང་ལས་འཕེལ་རྒྱས་གཏོང་རྒྱུ་དེ་རེད།

2010ལོར།　བཀྲ་ཤིས་དབང་འདུས་ཕ་ཡུལ་དུ་ལོག་ནས་ཐང་རྒོད་མུའུ་2200ལྷག་ཙམ་འགན་གཙང་བླངས་ཏེ་སྨར་ཁམས་རྫོང་འཇང་མི་རིགས་ཤང་གཙང་གསུམ་ཞིང་འབྲོག་པའི་ཆེད་ལས་མཉམ་ལས་ཁང་བཙུགས་པ་དང་ཆབས་ཅིག་རྒྱལ་ལམ་214ནས་འཇང་མི་རིགས་གྲོང་ཚོའི་བློ་རིན་ཚོགས་ཆུང་བར་གྱི་གཞུང་ལམ་ཉམས་བཟོ་བྱེད་འགོ་བཙུགས་པ་རེད།

བཀྲ་ཤིས་དབང་འདུས་ཀྱིས་མ་དངུལ་གྲོན་ཆུང་བྱ་ཆེད་ད་དུང་རྐོ་འདྲུའི་འཕྲུལ་འཁོར་དང་འདོན་འཇུག་འཕྲུལ་འཁོར་སོགས་སྒྲིག་ཆས་ཉོས་པ་མ་ཟད།　ད་དུང་ལག་རྩལ་པ་བསྡུ་བ་ཕུད།　ཁོང་རང་ཉིད་ཀྱང་ལས་ཀ་བྱེད་མཁན་མང་ཚོགས་དང་མཉམ་ཟ་མཉམ་སྡོད་དང་མཉམ་དུ་ངལ་རྩོལ་བྱེད་ཀྱི་ཡོད།　ཟླ་བདུན་ཙམ་ལས་དུས་འཕར་མ་བྱས་པ་བརྒྱུད་རིང་ཚད་ལ་སྤྱི་ལེ་15ཙམ་དང་འགྲོ་གྲོན་སྒོར་ཁྲི་1000ལྷག་ཙམ་ཟིན་པའི་རི་ལམ་ཀྱག་ཀྱོག་བསྐྲུན་ཟིན་པ་རེད།

གཞུང་ལམ་ཤར་གཏོང་ཐུབ་རྗེས་མཉམ་ལས་ཁང་གི་དཔལ་འབྱོར་འཕེལ་རྒྱས་གཏོང་དགོས་ཀྱི་ཡོད།　རྒུན་འབྲུམ་དང་།　ཚ་ལུ་མ།　ལི།　ཀུ་ཤུ་བཅས་ནས་སྟར་ཁ་དང་།　ཇ་ལོ།　སེའུ་འབྲུ་བར་དང་།　ཆུ་འགོ་འཚོལ་བ་དང་།　ཆུ་རྫིང་བཟོ་བ།　མདོང་ལམ་འདིང་བ་ནས་སྐས་ཞིང་གསར་སྤེལ་བར།　དཔལ་འབྱོར་ནགས་ཤིང་འདེབས་འཛུགས་ནས་ཕྱུགས་རིགས་གསོ་ཚགས་བར་བཀྲ་ཤིས་དབང་འདུས་ཀྱིས་ལོ་དགུ་ཙམ་དཀའ་སྤྱད་འབད་འཐབ་བྱས་ཡོད།　མིག་སྔར་ཐང་རྒོད་སྔོ་ལྗང་དུ་གྱུར་པ་དང་སྐས་ཞིང་བརྒྱ་ལྷག་ཙམ་གྱི་བཀོད་པ་རགས་ཙམ་ཆགས་ཡོད།

མིག་སྔའི་བར།　མཉམ་ལས་ཁང་གིས་སྟར་ཁ་མུའུ་1200ཙམ་འདེབས་འཛུགས་བྱས་པ་མ་ཟད།　ད་དུང་རྒུན་འབྲུམ་དང་།　ཚ་ལུ་མ།　ཀུ་ཤུ་སོགས་དཔལ་འབྱོར་འབྲས་ཤིང་སྡོང་པོ་7500བཏབ་པ་དང་།　ཆུ་རྫིང་4བཟོས་པ།　ཆུ་འདྲེན་མདོང་ལམ་སྤྱི་ལེ་22བཏིང་བ།　སྐས་ཞིང་མུའུ་500གསར་སྤེལ་བྱས་པ།　སེག་མའི་ལམ་སྤྱི་ལེ་15ཙམ་ཉམས་བཟོ་བྱས་པར་ཁྱོན་མ་དངུལ་སྒོར་ཁྲི་5285.8བཏང་ཡོད།

ལོ་10ཙམ་གྱི་འཕེལ་རྒྱས་བརྒྱུད་རིམ་ནང་བཀྲ་ཤིས་དབང་འདུས་ཀྱིས་ས་གནས་དེ་གའི་ཞིང་འབྲོག་མང་ཚོགས་མི་ཐེངས་3800ཙམ་ལ་ལས་གནས་མཁོ་འདོན་བྱས་པ་དང་།　མང་ཚོགས་ལ་ངལ་ནུས་ཡོང་འབབ་སྒོར་ཁྲི་1200ལྷག་ཙམ་ཟིན་པ།　དཀའ་ངལ་ཡོད་པའི་མང་ཚོགས་དུད་ཚང་10དབུལ་སྒྲོལ་ཕྱུག་འགྱུར་ཡོང་བར་རོགས་རམ་བྱས་པ།　ཁྱིམ་ཚང་ལ་དཀའ་ངལ་ཡོད་པའི་སློབ་གྲྭ་ཆེ་མོ་བ་8ལ་སློབ་ཡོན་རོགས་རམ་བྱས་པ་བཅས་རེད།　མཉམ་ལས་ཁང་གིས་སྔ་རྗེས་སུ་གསོ་སྦྱོང་སྣ་ཚོགས་ཐེངས་27སྒྲིག་འཛུགས་བྱས་ནས་མི་520ལ་འདེབས་འཛུགས་ལག་རྩལ་བསླབས་པ་དང་།　མི་26ལ་ཁ་ལོ་བའི་ལག་རྩལ་བསླབས་པ།　མང་ཚོགས་དུད་ཚང་380ཡི་སྣེ་འཁྲིད་དེ་འབབ་འཕར་ཡོང་བ་བྱས་པ་རེད།

2019ལོའི་ཟླ་6པར་བཀྲ་ཤིས་དབང་འདུས་ཀྱིས་མ་དངུལ་སྒོར་ཁྲི་3000ལྷག་ཙམ་བཏང་ནས་བསྐྲུན་པའི་སྨན་ཁང་དུ་སྨར་ཁམས་རྫོང་གི་མང་ཚོགས་ཀྱི་ནད་གཞི་བཅོས་ཐུབ་པ་བྱུང་བས་མང་ཚོགས་སྨན་བཅོས་བྱེད་དཀའ་བའི་གནད་དོན་ཐག་གཅོད་ཐུབ་ཡོད།　ཁོང་གིས་རི་བོ་དེར་མཛུབ་མོ་བཙུགས་ཏེ་དགའ་ཚོར་ཆེན་པོའི་སྒོ་ནས“རང་ཉིད་ཕྱུག་པོ་ཆགས་ཀྱང་ཕྱུག་པོར་མི་བརྩི་བར་ཡུལ་མི་སྤུན་ཟླ་ཚོ་ཕྱུག་པོ་ཆགས་ཚེ་གཞི་ནས་ཕྱུག་པོར་བརྩི་བའི”རང་གི་ཕུགས་འདུན་མངོན་འགྱུར་རགས་ཙམ་བྱུང་སོང་ཞེས་བཤད།

གོམ་སྟབས་རྗེས་མར་བཀྲ་ཤིས་དབང་འདུས་ཀྱིས་དཔལ་འབྱོར་ནགས་ཤིང་འདེབས་པའི་རྨང་གཞིའི་ཐོག་ས་གནས་དེ་གའི་ཡུལ་སྐོར་ཐོན་ཁུངས་ལ་བརྟེན་ནས་ཁྱད་ལྡན་གསོ་ཚགས་དང་།　དཔལ་འབྱོར་ནགས་ཤིང་འདེབས་འཛུགས།　སྤུས་ལེགས་ཤིང་འབྲས་ལས་སྣོན།　བཟའ་འཐུང་།　ལྟ་སྐོར་སྤྲོ་གསེང་བཅས་གཅིག་ཏུ་འདུས་པའི་སྣོད་བཅུད་ཞིང་ལས་ཡུལ་སྐོར་ཐོན་ལས་འཕེལ་རྒྱས་གཏོང་རྩིས་ཡོད་པ་རེད།　དེ་དག་ཚང་མ་ཐོན་སྐྱེད་བྱེད་འགོ་ཚུགས་རྗེས་ལོར་ཐོན་རྫས་རིན་ཐང་སྒོར་ཁྲི་300ལས་བརྒལ་ནས་མང་ཚོགས་དེ་བས་མང་བ་འབབ་འཕར་ཕྱུག་འགྱུར་ཡོང་བར་སྣེ་འཁྲིད་ཐུབ་རྒྱུ་རེད།