ཇ་ཁང་ནང་འོ་ཇ་ཚ་པོ་བླུགས་པའི་ཕོར་པ་རེ་རེ་ལས་རླངས་པ་འཕྱུར། སྐུ་མགྲོན་ཁ་ཤས་ཕན་ཚུན་འཚོ་བའི་ཁྲོད་ཀྱི་གཏམ་རྒྱུད་གླེང་བཞིན་ཡོད་པ་དང་། ཇ་ཁང་གི་སྦྱིན་བདག་ལྷག་སྒྲོན་ཐབ་ཚང་ནང་བྲེལ་བས་ཁེངས། ཁོ་མོའི་ངོས་ནས་བརྗོད་ན། ཇ་ཁང་དེ་ཁོང་གི་ཁྱིམ་ཚང་གི་བདེ་སྐྱིད་འཚོ་བའི་འབྱུང་རྩ་ཞིག་རེད།

དཀའ་ལས་མ་བརྒྱབ་པར་འབྲས་བུ་བཟང་པོ་ཐོབ་མི་སྲིདད། འཚོ་བ་སྐྱིད་པོ་ནི་འབད་འཐབ་ལ་བརྟེན་ནས་བྱུང་བ་དང་། རྒྱལ་ཁབ་ཀྱི་སྲིད་ཇུས་རྒྱབ་རྟེན་དུ་བྱེད་པ་དང་རང་ཉིད་ཀྱི་ལག་གཉིས་ལ་བརྟེན་ནས་དཀའ་སྤྱད་འབད་བརྩོན་བྱས་ཚེ་བདེ་སྐྱིད་ལྡན་པའི་འཚོ་བ་སྐྱེལ་ཐུབ་ངེས་རེད།

“དཀའ་སྤྱད་འབད་འཐབ་ལ་བརྟེན་ནས་ཕྱུག་པོ་ཆགས་པའི”བརྗོད་དོན་གཙོ་བོའི་སྒྲོག་འགྲེལ་བྱེད་སྒོ་རེ་རེ་ལས་གོང་དཀར་རྫོང་བྱང་ཐང་གྲོང་རྡལ་བྱང་ཐང་གྲོང་ཚོའི་ཚོགས་ཆུང་བཞི་པའི་གྲོང་མི་ལྷག་སྒྲོན་ལ་མྱོང་ཚོར་ཟབ་མོ་བྱུང་ཡོད།

ལྷག་སྒྲོན་གྱི་ཁྱིམ་ལ་ནང་མི་6ཡོད་པ་དང་ཕྲུ་གུ་གཉིས་སློབ་གྲྭར་འགྲོ་གི་ཡོད། ཁྱིམ་ཚང་གི་འཚོ་བའི་ཡོངས་ཁུངས་གཙོ་བོ་ནི་ཞིང་ཁ་མུའུ་ཁ་ཤས་དང་བཟའ་ཟླ་བསོད་ནམས་ཕྱིར་གླ་པ་རྒྱུག་པར་སོང་བའི་ཡོང་འབབ་ཕྲན་བུ་དེར་བརྟེན་གྱི་ཡོད།

2009ལོར། སྟབས་མི་ལེགས་པ་ཞིག་ལ་གློ་བུར་དུ་བྱུང་བའི་ལས་འཛོལ་ཞིག་གིས་བསོད་ནམས་ཀྱི་རྐང་པ་གཉིས་ཀྱི་ཚོར་བ་ཉམས་ཏེ་ཉལ་སར་ལུས།

ཁྱིམ་ནང་གི་ཀ་རྟེན་འགྱེལ་སྟབས། ནང་མི་ཚང་མ་རེ་ཞིག་སེམས་སྡུག་གི་གནས་ལ་གྱར། འོན་ཀྱང་སློབ་གྲྭ་འགྲིམ་བཞིན་པའི་ཕྲུ་གུ་དང་། མལ་སར་ལུས་པའི་བཟའ་ཟླ། ལོ་ན་བགྲེས་པའི་ཕ་མ་བཅས་ཀྱི་མདུན་དུ་ལྷག་སྒྲོན་གྱིས་སྡུག་བསྔལ་ཚང་མ་སེམས་ནང་ཉར་ཏེ་ཉམས་ཆུང་བུད་མེད་དེའི་ཕྲག་སྟེང་དུ་ཁྱིམ་ཚང་གི་ཁུར་པོ་ལྕི་པོ་འཁུར། དེས་ན་ཁྱིམ་ནང་གི་ཡོངས་འབབ་ཚང་མ་བཟའ་ཟླའི་སྨན་རིན་དུ་གཏོང་དགོས་ཀྱི་ཡོད་སྟབས་ཁྱིམ་ཚང་གི་འཚོ་བར་དཀའ་ངལ་ཆེན་པོ་འཕྲད།

2015ལོར། གྲོང་རྡལ་གྱི་ལས་བྱེད་པས་བརྟག་དཔྱད་དང་ཤེས་རྟོགས་བྱས་རྗེས། ལྷག་སྒྲོན་གྱི་ཁྱིམ་ཚང་ཡིག་ཚགས་དང་གཱ་བཟོས་པའི་དུད་ཚང་དབུལ་པོར་བཅུག་པས་བསོད་ནམས་ཀྱི་སྨན་བཅོས་འགྲོ་གྲོན་རྩིས་ཞུ་བྱུང་སྟེ་ནང་མི་ཚང་མར་སླར་ཡང་འཚོ་བ་གསར་པ་སྐྱེལ་རྒྱུའི་རེ་བ་སྦྱིན།

དབུལ་ཞྭ་རྦད་དེ་འཕུད་ཆེད། ལྷག་སྒྲོན་གྱིས་རྟག་ཏུ་རང་ཉིད་ཀྱི་ལག་གཉིས་ལ་བརྟེན་ནས་ལས་གཏོད་དང་དབུལ་སྒྲོལ་བྱེད་པའི་འདུན་པ་འཕེལ།

2016ལོར། རྫོང་དུ་མ་བྱན་གྱི་གསོ་སྦྱོང་འཛིན་གྲྭ་ཞིག་འཚོག་རྒྱུ་ཡིན་པ་ཤེས་སྐབས། ལྷག་སྒྲོན་གྱིས་འཕྲལ་མ་ཉིད་དུ་གྲོང་ཚོ་ཨུ་ལྷན་དུ་མིང་ཐོ་བཀོད། དུས་ཡུན་ཉིན་30ཡིན་པའི་གསོ་སྦྱོང་རིང་ཁོང་གིས་ནང་མིར་ལྟ་རྟོག་བྱེད་ཀྱིན་མཐའ་སྐྱོང་བྱས་མཐར་ལག་རྩལ་སྣ་གཅིག་ཤེས་ཐུབ་པ་རེད།

གསོ་སྦྱོང་མཇུག་འགྲིལ་རྗེས། ལྷག་སྒྲོན་གྱིས་ཇ་ཁང་ཞིག་འཛུགས་རྒྱུའི་བསམ་བློ་འཁོར་ཡང་མ་དངུལ་ཐད་དཀའ་ངལ་ཆེན་པོ་འཕྲད། ཕྱིས་སུ་གྲོང་ཚོའི་ལས་བྱེད་པའི་རོགས་རམ་འོག ཁོང་གིས་གནད་སྨིན་དབུལ་སྐྱོར་གྱི་གྲངས་འབོར་ཉུང་བའི་ཡིད་རྟོན་དངུལ་བུན་གྱི་སྲིད་ཇུས་ལ་བརྟེན་ནས་ཞིང་ལས་དངུལ་ཁང་ནས་སྒོར་ཁྲི་5གཡར་ཏེ་ཇ་ཁང་བཙུགས།

རང་ཉིད་ཀྱི་ཕུལ་དུ་བྱུང་བའི་ལག་རྩལ་དང་ཁ་དན་ཚིག་གནས་ཀྱི་གཉེར་སྐྱོང་ལ་བརྟེན་ནས་ཇ་ཁང་བཙུགས་རྗེས་ཚོང་རིམ་བཞིན་ཡག་ཏུ་ཕྱིན་པས་ལྷག་སྒྲོན་གྱིས་ལོ་གཅིག་ནང་དངུལ་བུན་གཙང་འཇལ་ཐུབ་པ་དང་། 2017ལོར། ནང་མི་ཚང་མའི་ཆ་སྙོམས་ཡོང་འབབ་སྒོར་5404ལྷག་ཙམ་ཟིན་པ་རེད།

“ཏང་གིས་ང་ཚོར་སྲིད་ཇུས་བཟང་པོ་མང་པོ་བཏོན་ཡོད་མོད། འོན་ཀྱང་སྲིད་ཇུས་ཇི་ཙམ་ཡག་རུང་ང་ཚོ་རང་ཉིད་ཀྱིས་འབད་འཐབ་མ་བྱས་ན་ག་ནས་འགྲིག དཔེར་ན། མི་ཞིག་སར་འགྱེལ་སྐབས་གཞན་གྱིས་སྐྱོར་རོགས་བྱེད་པ་ཕུད་ད་དུང་སོ་སོས་ཀྱང་ཤུགས་རྒྱག་དགོས་ཀྱི་ཡོད། བདེ་སྐྱིད་ལྡན་པའི་འཚོ་བ་སྐྱེལ་དགོས་ཚེ། ཕུ་ཐུང་བརྫེས་ནས་ངར་ཤུགས་སྒྲིམས་དགོས”ཞེས་ལྷག་སྒྲོན་གྱིས་རང་ཉིད་ཀྱི་འཚོ་བར་འགྱུར་ལྡོག་བྱུང་བ་དེ་དཀའ་སྤྱད་འབད་འཐབ་བྱས་པའི་འབྲས་བུ་ཡིན་པ་ར་སྤྲོད་བྱས།

ན་ནིང་ལོ་སྟོད་དུ་ལྷག་སྒྲོན་གྱིས་རང་མོས་ངང་དུད་ཚང་དབུལ་པོ་ནས་ཕྱིར་འཐེན་བྱ་རྒྱུའི་རེ་ཞུ་བྱས་པ་དང་ད་ལྟ་དབུལ་སྒྲོལ་རྦད་དེ་ཐུབ་ཡོད། དེས་ན་ཁོང་གི་རང་མགོ་རང་འདོན་དང་རང་བརྟེན་དབུལ་སྒྲོལ་གྱི་ངར་ཤུགས་ཀྱིས་ཀྱང་གྲོང་ཚོ་ཡོངས་ཀྱི་མང་ཚོགས་དབུལ་པོར་དཀའ་ངལ་ལ་མི་འཛེམ་པར་འཚོ་བ་གསར་པ་གཏོད་རྒྱུར་ཡང་སྐུལ་ལྕག་ཐེབས་ཡོད་པ་རེད།