སྟོད་ལུང་བདེ་ཆེན་ཆུས་བདེ་ཆེན་ཤང་དུ་སྐད་གྲགས་ཆེ་བའི་ཆུ་ཚན་གྲོང་ཚོ་ཞིག་ཡོད་པ་དེར་ཆུ་བཟང་གྲོང་ཚོ་ཟེར་བ་དང་། ཕྱི་མི་མང་པོ་ཞིག་གིས་དེ་གོ་ཐོས་བྱུང་ནས་ཆུ་ཚན་རྒྱག་པར་འོང་བ་དང་གྲོང་མི་རྣམས་རང་བྱུང་ཁམས་ཀྱི་ཐོན་ཁུངས་ལ་བརྟེན་ནས་དབུལ་སྒྲོལ་ཕྱུག་འགྱུར་ཐུབ་ནས་དགའ་བའི་འཛུམ་མདངས་འཕྱུར་བཞིན་ཡོད།

ཏང་དང་རྒྱལ་ཁབ་ཀྱིས་ཁྱབ་གདལ་བཏང་བའི་གཟིགས་སྐྱོང་སྲིད་ཇུས་རབ་དང་རིམ་པའི་འོག་སྟོད་ལུང་བདེ་ཆེན་ཆུས་ཀྱིས་ཆུ་འགོ་སྲུང་སྐྱོང་བྱེད་པའི་རྨང་གཞིའི་ཐོག་ཆུ་བཟང་གྲོང་ཚོའི་གཡུ་ཐོག་ལུང་ཤུར་དེ་ཆུ་ཚན་ཁྱད་ལྡན་དུ་བྱས་པའི་ཡུལ་སྐོར་ཞབས་ཞུའི་སོས་དལ་ཁུལ་དུ་བསྐྲུན་པ་རེད།

ཡུལ་སྐོར་ཞབས་འདེགས་སོས་དལ་ཁུལ་གསར་སྤེལ་ལུགས་མཐུན་བྱས་པ་དང་སྦྲགས་ཆུ་བཟང་གྲོང་ཚོའི་གྲོང་མིའི་ཆ་རྐྱེན་ལེགས་སུ་ཆེས་ཆེར་ཕྱིན་ནས་འཚོ་བའང་ཉིན་བཞིན་ཡར་རྒྱས་སོང་ཡོད། དེའི་ནང་ཆུ་བཟང་ཆུ་ཚན་གྱི་འདི་ལོའི་ཡོང་འབབ་སྒོར་ཁྲི་200ལྷག་ཙམ་བྱུང་ནས་དུད་ཚང་རེར་སྒོར་1000བགོས་པ་ཕུད་ད་དུང་མི་རེར་སྒོར་500ལེན་རྒྱུ་བྱུང་བ་རེད།

ཆུ་བཟང་གྲོང་ཚོའི་ཚོགས་ཆུང་གཉིས་པའི་ཙུའུ་ཀྲང་པད་མ་རྡོ་རྗེས་གསར་འགོད་པར“ང་དབུལ་ཞིང་ཕོངས་པའི་སྐབས་སྲིད་གཞུང་གིས་ལས་ཀ་སྤྲད་དེ་ཙུའུ་ཀྲང་བྱེད་དུ་བཅུག་ནས་ཟླ་རེར་གླ་ཆ་སྒོར་2040སྤྲད་པ་མ་ཟད། ལོ་ལྟར་ཆུ་ཚན་གྱི་ཡོང་འབབ་ནས་ཁེ་སྤོགས་སྒོར་2000བགོ་བཤའ་བརྒྱབ་བྱུང”ཞེས་བཤད།

སྟོད་ལུང་བདེ་ཆེན་ཆུས་སུ་དཔེ་མཚོན་འདི་ལྟ་བུ་བགྲང་གིས་མི་ལང་བ་ཡོད། དབུལ་སྒྲོལ་འགག་སྒྲོལ་གྱི་དམག་འཐབ་རྒྱག་འགོ་ཚུགས་ཚུན་སྟོད་ལུང་བདེ་ཆེན་ཆུས་ཀྱིས་དབུལ་པོའི་ཁྱད་ཆོས་ལ་དམིགས་ནས་རྣག་ཐོག་བཙག་འཁེལ་ཡོང་བར་བྱས་ཏེ། 2018ལོའི་ཟླ་10ཚེས་1ཉིན་དངོས་སུ་དབུལ་སྒྲོལ་ཐུབ་ནས་དབུལ་ཞྭ་ཕུད་ཅིང་། “ལོ་གཉིས་རིང་དབུལ་སྒྲོལ་བྱས་ཏེ་དུས་བཀག་ལྟར་དབུལ་ཞྭ་འབུད་ཐུབ་པའི”དམག་བཀའ་འཁུར་ལེན་ཞུ་ཡིག་བདེ་བླག་ངང་ལག་བསྟར་ཐུབ་ནས་དབུལ་སྒྲོལ་འཕོ་འགྱུར་གྱི་ལམ་དུ་སྐྱོད་འགོ་ཚུགས་ཡོད།

2015ལོའི་ལོ་མཇུག་ཏུ་སྟོད་ལུང་བདེ་ཆེན་ཆུས་ཀྱིས་གནད་སྨིན་དབྱེ་འབྱེད་ཀྱི་བླང་བྱ་གཞིར་བཟུང“ཞིབ་བཤེར་བཞི་དང་ཞིབ་ལྟ་བཞི། དཔྱད་གདེང་གསུམ་དང་གཏན་འཁེལ་གསུམ། ཡོངས་བསྒྲགས་གསུམ་དང་སྤྱི་བསྒྲགས་གཅིག་བསྡུར་བ་གཅིག”བཅས་ཀྱི་དབྱེ་འབྱེད་གོ་རིམ་ལག་ལེན་ནན་པོ་བསྟར་ཏེ་མི་རེར་ལོ་རེར་ཆ་སྙོམས་ཡོང་འབབ་ཁེ་གཙང་སྒོར་2855ལས་དམའ་བའི་མང་ཚོགས་དབུལ་པོ་དུད་ཚང་1471དང་མི་4947དབྱེ་འབྱེད་བྱས་པ་དེས་གྲོང་ཁྱེར་དེ་ཡོངས་ཀྱི་ཡིག་ཚགས་དང་གཱ་བཟོས་པའི་དབུལ་པོའི་མི་གྲངས་བསྡོམས་འབོར་གྱི་11.2%བཟུང་བ་དང་དབུལ་པོ་ཐོན་ཚད་10.8%རེད། 2017ལོའི་ཟླ་8པ་དང་12པར་ཟླ་གཉིས་རིང་འགུལ་རྣམ་ལེགས་སྒྲིག་བྱས་རྗེས་ཡིག་ཚགས་དང་གཱ་བཟོས་པའི་དུད་ཚང་དབུལ་པོ་1392དང་མི་4854ཟིན་པ་དེས་གྲོང་ཁྱེར་ཡོངས་ཀྱི་ལེགས་སྒྲིག་རྗེས་ཀྱི་སྤྱི་འབོར་གྱི་10.9%བཟུང་ཡོད། སྲིད་ཇུས་ཀྱི་བླང་བྱ་དང་མང་ཚོགས་ཀྱི་འདོད་འདུན་གཞིར་བཟུང་ཁྱོན་ཡུལ་གཞན་དུ་གནས་སྤོ་དགོས་པའི་མང་ཚོགས་དབུལ་པོ་དུད་ཚང་792དང་མི་2912གཏན་འཁེལ་བྱས་པ་དེས་སྟོད་ལུང་བདེ་ཆེན་ཆུས་ཀྱི་ཡིག་ཚགས་དང་གཱ་བཟོས་པའི་དུད་ཚང་དབུལ་པོའི་56.9%བཟུང་བ་རེད།

2017ལོའི་ལོ་མཇུག་བར་སྟོད་ལུང་བདེ་ཆེན་ཆུས་ཀྱི་ཡིག་ཚགས་དང་གཱ་བཟོས་པའི་དུད་ཚང་དབུལ་པོ་1392དང་མི་4854ཡི་མི་རེར་ལོ་རེར་ཆ་སྙོམས་ཡོང་འབབ་སྒོར་7802.26ཟིན་པ་དང་ཕྱོགས་བསྡུས་དབུལ་པོ་ཐོན་ཚད་0.17%ཡིན་པ། ཡིག་ཚགས་དང་གཱ་བཟོས་པའི་དུད་ཚང་དབུལ་པོ་དཔྱད་གདེང་བྱེད་ནོར་ཤོར་བ་དང་སྒྲོལ་ནོར་ཤོར་བའི་གནས་ཚུལ་མ་ཐོན་པར་མང་ཚོགས་ཀྱི་བློ་ཡིད་ཚིམ་ཚད་90%ཡན་ཟིན་པ་རེད།

“ལོ་ལྔ་ཚན་བཅུ་གསུམ་པའི”རིང་ནི་སྟོད་ལུང་བདེ་ཆེན་ཆུས་ཀྱིས་གནད་སྨིན་དབུལ་སྐྱོར་དང་། གནད་སྨིན་དབུལ་སྒྲོལ། ཕྱོགས་ཡོངས་ནས་འབྱོར་འབྲིང་སྤྱི་ཚོགས་སྐྲུན་པ་བཅས་ལ་སྐུལ་འདེད་ཏན་ཏིག་གཏོང་བའི་དུས་སྐབས་གལ་ཆེན་ཞིག་སྨོས་མེད་ཡིན་ལ། ཕྱོགས་ཡོངས་ནས་དམིགས་ཚད་རྗེས་སྙེག་དང་ཚད་བརྒལ་བྱེད་པའི་རྒྱལ་ཁ་ཕུ་ཐག་གཅོད་པའི་དུས་མཚམས་ཀྱང་རེད། རྒྱང་སྐྱོད་ལམ་བུ་གསར་པ་དེའི་སྟེང་2018ལོར་སྟོད་ལུང་བདེ་ཆེན་ཆུས་ཀྱིས་གྲོང་གསེབ་དར་རྒྱས་གཏོང་བའི་འཐབ་ཇུས་ལག་ལེན་གཏིང་ཟབ་བསྟར་བ་གོ་སྐབས་སུ་བྱེད་པ་དང་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རིམ་པ་སྤོར་བ་གྲོང་གསེབ་དར་རྒྱས་གཏིང་ཟབ་གཏོང་བའི་དམ་འཛིན་བྱ་གཞི་གལ་ཆེན་དུ་བརྩིས་ནས་ཏང་གི་འགོ་ཁྲིད་ཐོག་མཐའ་བར་གསུམ་དུ་ཁྱབ་པ་མཐའ་འཁྱོངས་ཀྱིས་གྲོང་ཁྱེར་དང་གྲོང་གསེབ་མཉམ་འདྲེས་འཕེལ་རྒྱས་ལ་སྔར་བས་སྐུལ་འདེད་གཏོང་བ་དང་། རྨང་གཞིའི་སྒྲིག་བཀོད་དང་སྤྱི་པའི་ཞབས་འདེགས་གྲོང་གསེབ་ཏུ་སྣུར་སྲིང་བྱེད་པར་སྐུལ་འདེད་གཏོང་བ། གྲོང་གསེབ་འཕེལ་རྒྱས་ཀྱི་ཞན་ཆ་གསབ་པ་བཅས་བྱས་ནས་མང་ཚོགས་དབུལ་པོ་ཡུན་རིང་འབབ་འཕར་ཕྱུག་འགྱུར་བརྟན་པོ་ཡོང་བའི་ཕུགས་ཕན་ལམ་སྲོལ་རིམ་བཞིན་ཆགས་པར་བྱས་པ་རེད།