“ཚང་མས་ཤུགས་བརྒྱབ་ནས་ད་དུང་དེ་ལས་མགྱོགས་ཙམ་བྱེད་རོགས”ཞེས་ཕི་ཁ་རླངས་འཁོར་དུ་དོ་པོ་བླུག་བཞིན་པའི་གྲོང་སྡོད་ལས་དོན་རུ་ཁག་གི་རུ་དཔོན་ཝང་ཅུན་དབྱིས་ཚང་མར་དེ་ལྟར་ལྕག་སྐུལ་བྱས།

འདི་ལོ་ལྷ་རྩེ་རྫོང་ཁྲོམ་ཆེན་གྲོང་ཚོས་ཞོག་ཁོག་དམར་པོ་མུའུ་10ལྷག་ཙམ་བཏབ་པར་ཐོན་འབོར་རྒྱ་མ་ཁྲི་4ལྷག་ཙམ་བྱུང་ཡོད། དེ་རིང་གྲོང་སྡོད་ལས་དོན་རུ་ཁག་གིས་ལམ་ཐག་སྤྱི་ལེ་150ལྷག་ཙམ་གྱི་གཞིས་རྩེ་གྲོང་ཁྱེར་དུ་ཞོག་ཁོག་དམར་པོ་རྒྱ་མ་1000ལྷག་ཙམ་སྐྱེལ་བར་འགྲོ་དགོས་ཀྱི་ཡོད། “འདི་ནི་གྲོང་སྡོད་ལས་དོན་རུ་ཁག་གིས་འབྲེལ་གཏུག་བྱས་ནས་འཚོང་རྒྱུའི་ཞོག་ཁོག་རྒྱ་མ་6000རེད། འདི་ལོ་ཞོག་ཁོག་དམར་པོར་ལོ་ལེགས་བྱུང་ནས་ཐོན་འབོར་ན་ནིང་གི་ཡུལ་དེ་གའི་ཞོག་ཁོག་གི་ལྡབ་གསུམ་ཟིན་ཡོད”ཅེས་ཝང་ཅུན་དབྱིས་བཤད། ཞོགས་པ་སྔ་པོ་ནས་གྲོང་སྡོད་ལས་དོན་རུ་ཁག་གི་མི་རྣམས་ཞོག་ཁོག་དོ་པོ་རླངས་འཁོར་དུ་བླུག་པར་བྲེལ་བཞིན་མཆིས།

ཁྲོམ་ཆེན་གྲོང་ཚོས་ཞོག་ཁོག་དམར་པོ་འདེབས་དགོས་དོན་གང་ཡིན་ནམ་ཞེ་ན། དེ་ཡང་ལྷ་རྩེ་རྫོང་ཁྲོམ་ཆེན་གྲོང་ཚོར་བཅའ་སྡོད་རང་སྐྱོང་ལྗོངས་ཁྲོམ་ར་ལྟ་སྐུལ་དོ་དམ་ཅུས་ཀྱི་ལས་དོན་རུ་ཁག་ནས་འགོ་ཚུགས་ཏེ་ཤོད་དགོས་ཀྱི་ཡོད།

ཁྲོམ་ཆེན་གྲོང་ཚོ་ནི་ལྷ་རྩེ་རྫོང་གི་ཤིན་ཏུ་དབུལ་བའི་གྲོང་ཚོ་ཞིག་ཡིན་ལ་ས་བབ་མཐོ་ཚད་སྨི་4050ཟིན་པ་དང་རང་བྱུང་ཁོར་ཡུག་ཞན་ཙམ་ཡོད། ལས་དོན་རུ་ཁག་གིས་ས་གནས་ས་ཐོག་ཏུ་བརྟག་ཞིབ་དང་དུད་ཚང་ཚང་མར་འཚམས་འདྲི་བྱས་པ་བརྒྱུད། ཡུལ་དེར་ཞོག་ཁོག་འདེབས་པའི་སྲོལ་རྒྱུན་ཡོད་ཀྱང་ཐོན་འབོར་དེ་ཙམ་ཡག་པོ་མེད་པ་མ་ཟད། ད་དུང་གྲོང་ཚོའི་ལས་བྱེད་པ་དང་མང་ཚོགས་ཀྱི་བསམ་བློ་རྙིང་ཞེན་བག་འཁུམ་དབང་གིས་གྲོང་ཚོར་ལོ་ཏོག་འདེབས་པའི་གྲུབ་ཆ་དང་སྣ་ཁ་གཅིག་རང་ལས་མེད་པ་ཤེས་པ་རེད།

ཝང་ཅུན་དབྱི་ལ“སྣ་ཁ་གསར་པ་ནང་འདྲེན་དང་ལག་རྩལ་ལ་བརྟེན་ནས་ཞོག་ཁོག་འདེབས་པའི”བསམ་བློ་འཁོར། དེས་ན་ཕྱོགས་མང་པོ་དང་འབྲེལ་གཏུག་བྱས་པ་བརྒྱུད། ལས་དོན་རུ་ཁག་གིས་ཡུན་ནན་ནས་ཞོག་ཁོག་དམར་པོ་སྣ་ཁག་4ནང་འདྲེན་བྱས་པ་དང་འབྲེལ། འདེབས་འཛུགས་ཆེད་ལས་མཁས་ཅན་གྱིས་འདེབས་འཛུགས་ལག་རྩལ་དང་ཞིང་ནང་གཡོག་བྱེད་བྱེད་སྟངས་སོགས་གྲོང་ཚོར་མཛུབ་སྟོན་བྱེད་པར་གདན་དྲངས་པ་རེད།

སྙིང་རུས་ཅན་གྱིས་རྡོ་ལ་ཨི་ཁུང་འབིགས་། འདི་ལོ་གྲོང་ཚོར་བཏབ་པའི་ཞོག་ཁོག་ཡག་པོ་སྐྱེས་པ་མ་ཟད། ཞོག་ཁོག་གཅིག་གི་ལྗིད་ཚད་ལྕི་ཤོས་ལ་རྒྱ་མ་1.5ཟིན་པ་དང་། མུའུ་རེ་ནས་ཐོན་འབོར་རྒྱ་མ་4000ཙམ་ཟིན་པས་ཡུལ་དེ་གའི་མང་ཚོགས་ཀྱིས་ཞོག་ཁོག་དམར་པོར་ཕྱུག་འགྱུར་གྱི་ནོར་བུ་ཞེས་བརྗོད་ཀྱི་ཡོད།

ཞོག་ཁོག་དམར་པོའི་ཚོད་འདེབས་ལེགས་གྲུབ་བྱུང་ནའང་། ཁྲོམ་རའི་འཚོང་ལམ་ཇི་ལྟར་གཏོད་དགོས་མིན་ཐད་རང་སྐྱོང་ལྗོངས་ཁྲོམ་ར་ལྟ་སྐུལ་དོ་དམ་ཅུས་ཀྱིས་མངགས་པའི་གྲོང་སྡོད་ལས་དོན་རུ་ཁག་གི་རུ་མི་རྣམས་ཀྱིས་རང་ངོས་ཀྱི་ལེགས་ཆ་འདོན་སྤེལ་གང་ལེགས་བྱས་ཏེ་ཉོ་མཁན་དང་འབྲེལ་གཏུག་ཧུར་ཐག་བྱས་པ་དང་ཕྱོགས་མང་པོའི་ཐད་ནས་ལྷ་རྩེ་རྫོང་གི་ཞོག་ཁོག་དམར་པོ་དྲིལ་བསྒྲགས་དང་ཁྲོམ་རར་ཡང་ཚོད་ལྟ་བྱས་ནས་བཏོན་པ་རེད།

ཝང་ཅུན་དབྱིས་ཞོག་ཁོག་དམར་པོ་ཁྲོམ་རར་འདོན་་ཐེངས་དང་པོར་བྲིན་ཁ་རྒྱུག་པོ་བྱུང་། འཛད་སྤྱོད་པ་མང་དག་ཅིག་གིས་ཞོག་ཁོག་གི་བྲོ་བ་ཡག་པོ་ཡོད་ལུགས་རྗོད་ཀྱི་འདུག་ཅེས་གསར་འགོད་པར་བཤད།

ཁྲོམ་ཆེན་གྲོང་ཚོའི་ཞོག་ཁོག་དམར་པོའི་སྤུས་རྟགས་སྔར་བས་གཏོད་ཆེད། གྲོང་སྡོད་ལས་དོན་རུ་ཁག་གིས་ཞོག་ཁོག་དམར་པོའི་འདེབས་ཁྱོན་ཆེ་རུ་གཏོང་བའི་ཐག་བཅད་པ་དང་། “གྲོང་ཚོ་གཅིག་ལ་སྤུས་རྟགས་གཅིག”དང“མཉམ་ལས་ཁང+རྟེན་གཞི+ཞིང་དུད”བཅས་གྱི་གཉེར་སྐྱོང་རྣམ་པར་གཞིགས་ཏེ་ས་ཁོངས་ཀྱི་ཁྱད་ཆོས་མངོན་གསལ་དོད་པ་དང་ཟུར་སྣོན་རིན་ཐང་ཆེ་བའི་ཁྲོམ་ཆེན་གྲོང་ཚོའི་ཁྱད་ལྡན་ཐོན་རྫས་བཏོད་ཡོད།

དེ་དང་དུས་མཚུངས། ལས་དོན་རུ་ཁག་གིས་གྲོང་མིའི་སྲོལ་རྒྱུན་འདེབས་སྟངས་ལ་འགྱུར་ལྡོག་གཏོང་རྒྱུར་ཁྲིད་སྟོན་དང་། འདེབས་འཛུགས་གྲུབ་ཆ་ལེགས་སྒྲིག པད་ཁ་འདེབས་ཚད་རྒྱ་ཆེར་བཏང་བ་དང་འབྲེལ། འགྲོ་གྲོན་བཏང་ནས་ཆེད་ལས་ལག་རྩལ་མི་སྣ་གདན་དྲངས་ཏེ་གྲོང་མིར་ཞོག་ཁོག་དམར་པོ་དང་། པད་ཁ་སྤུས་ལེགས། “བོད་ནས་ཨང་2000”སོགས་ལོ་ཏོག་འདེབས་རྩལ་གསོ་སྦྱོང་བྱས་ནས་གྲོང་མི་ཚང་མས་འདེབས་རྩལ་གཅིག་ནས་གཉིས་བར་ཁོང་དུ་ཆུད་པའི་འགན་ལེན་བྱས་པ་རེད།

མིག་སྔར། གྲོང་སྡོད་ལས་དོན་རུ་ཁག་གིས་ད་དུང་གྲོང་ཚོར་ཁྲོམ་ཆེན་དང་ཁྲོམ་ཕུ་ཞིང་པའི་ཆེད་ལས་མཉམ་ལས་ཁང་གཉིས་འཛུགས་རྒྱུར་མཛུབ་ཁྲིད་བྱས་པ་དང་། མཉམ་ལས་ཁང་གཞི་རྟེན་དུ་བྱས་ནས་ཁྲོམ་ཆེན(ཁྲོམ་ཕུ)གྲོང་ཚོའི་མུའུ་644ཡི་དཔལ་འབྱོར་ལོ་ཏོག་འདེབས་འཛུགས་རྟེན་གཞི་འཛུགས་སྐྲུན་རྣམ་གྲངས་འཆར་འགོད་རེ་ཞུ་བྱས་པ་དང་རྣམ་གྲངས་དེས་ངལ་རྩོལ་མི་སྣ་30ལྷག་ཙམ་གྱི་ལས་ཞུགས་གནད་དོན་ཐག་གཅོད་ཐུབ་པ་དང་ཡིག་ཚགས་དང་གཱ་བཟོས་པའི་དུད་ཚང་དབུལ་པོ་13དབུལ་སྒྲོལ་ཐུབ་རྒྱུར་སྐུལ་ཁྲིད་ཐུབ་ཡོད་པ་རེད།

ཤེས་རྟོགས་བྱུང་བར་གཞིགས་ན། ལོ་གཅིག་ཁོ་ནར་ཁྲོམ་ཆེན་གྲོང་ཚོའི་མི་རེའི་ཆ་སྙོམས་ཡོང་འབབ་ན་ནིང་གི་སྒོར་2081ནས་འདི་ལོའི་སྒོར་4327བར་མང་དུ་ཕྱིན་ནས་དུས་མཚུངས་ལས་108%འཕར་ཡོད་པ་རེད།