གྲ་ནང་རྫོང་གྲ་ཕྱི་ཤང་མོན་མཁར་རོང་གྲོང་ཚོའི་ཀརྨ་དབང་ཕྱུག་གི་ཁྱིམ་དུ་འཛུལ་མ་ཐག་མེ་ཏོག་གི་དྲི་བསུང་འཐུལ་ཞིང་དགོད་སྒྲ་ལྷང་ལྷང་གྲགས། གསར་འགོད་པ་སླེབས་པ་མཐོང་སྐབས་ལོ་2སླེབས་པའི་ཚ་བོར་ལྟ་སྐྱོང་བྱེད་བཞིན་པའི་ཀརྨ་དབང་ཕྱུག་གིས་སྤྲོ་སེམས་ཆེན་པོས་ནང་དུ་བསུས།

ཀརྨ་དབང་ཕྱུག་གི་ཁྱིམ་ནི་ཐོག་སོ་གཉིས་ལྡན་གྱི་བོད་བཟོའི་སྡོད་ཁང་ཞིག་ཡིན་པ་དང་། སྒོ་རའི་ནང་དར་སྲོལ་ཆེ་བའི་མོ་ཊ་དང་ཞིང་སྤྱོད་ཐོ་ཕྲུག་ཅིག་བཞག་ཡོད་ལ་ཁང་པའི་ནང་གི་རྒྱན་སྤྲས་དང་སྒྲིག་བཀོད་ལས་དེང་རབས་ཀྱི་ཉམས་བཟང་མཐོང་ཐུབ།

“ཁྱེད་ཚོའི་སྡོད་ཁང་གི་ཆ་རྐྱེན་ལ་ང་ཚོ་ཡིད་སྨོན་འཆོར་གྱི་འདུག”“འདི་གང་ཡང་མ་རེད། ང་ཚོའི་ཁྱིམ་གྱི་ཆ་རྐྱེན་ནི་གྲོང་ཚོའི་ནང་འབྲིང་ཙམ་ཡིན”ཞེས་ཀརྨ་དབང་ཕྱུག་གིས་བཤད་ཅིང་། ཁོང་གིས་ང་ཚོའི་ཁྱིམ་གྱི་གནས་ཚུལ་དེ་སྔ་འདི་འདྲ་ཞིག་མིན་ཞེས་གསར་འགོད་པར་བཤད།

“1988ལོར་ང་རང་དང་ཐོག་མར་ཆང་ས་རྒྱག་སྐབས་ཁྱིམ་སྟོང་དབུལ་ནག་ཡིན”ཞེས་ཀརྨ་དབང་ཕྱུག་གིས་བཤད་ཅིང་། ཁོང་གིས“ད་ལྟའི་འཚོ་བ་འདི་ལྟ་བུ་ནི་སྒྱུར་བཅོས་སྒོ་དབྱེའི་བཀའ་དྲིན་ཡིན། སྒྱུར་བཅོས་སྒོ་དབྱེ་མེད་ན་ང་ཚོ་འདི་ལྟར་ལམ་སེང་ཕྱུག་པོར་འགྱུར་མི་སྲིད”ཅེས་བཤད།

ཆང་ས་བརྒྱབ་རྗེས། ཤིང་བཟོ་ཤེས་པའི་ཀརྨ་དབང་ཕྱུག་གིས་ས་ཕྱོགས་གང་སར་ལས་ཀ་བྱས་ཏེ་འཚོ་བའི་ཆ་རྐྱེན་ལེགས་སུ་གཏོང་རྒྱུར་གཞོལ་བ་རེད། ལྟ་རྒྱ་མཐོང་རྒྱ་ཆེ་བའི་ཀརྨ་དབང་ཕྱུག་གིས་སྐྱེལ་འདྲེན་ལས་ལ་འབད་རྒྱུ་ནི་བགྲོད་ལམ་ཡག་པོ་ཡིན་པ་རྟོགས།

ཤིང་བཟོའི་ཡོང་འབབ་ལ་བརྟེན་ཏེ་ཁོང་གིས་མོ་ཊ་སྦྱངས་ཤིང་། ཁོང་ནི་མོན་མཁར་རོང་གྲོང་ཚོར་ཁ་ལོ་བའི་ལག་ཁྱེར་ཐོབ་སྔ་ཤོས་ཀྱི་གྲས་རེད།

ཁ་ལོ་བའི་ལག་ཁྱེར་རག་རྗེས་1995ལོར་ཀརྨ་དབང་ཕྱུག་གིས་དངུལ་གཡར་ནས་སི་ཁྲོན་གྱི་ཁྲེང་ཏུའུ་རུ་སྒོར་ཁྲི་8.3རི་བའི་ཤར་རླུང་རྟཌ་ཅན་གྱི་ཟོག་འཁོར་ཞིག་ཉོས། “དངུལ་ཚང་མ་གཡར་བ་ཡིན། དངུལ་ཁང་གི་དངུལ་བུན་ཁོ་ན་སྒོར་ཁྲི་5ཟིན་ཞིང་། སྐབས་དེ་དུས་ནང་མིས་དངུལ་བུན་འཇལ་མི་ཐུབ་པའི་སེམས་ཁྲལ་བྱས་ནའང་འཁྱུག་ཙམ་ཞིག་ལ་འཇལ་ཐུབ་བྱུང”ཞེས་ཀརྨ་དབང་ཕྱུག་གིས་བཤད། ཁོང་གིས“དེ་དུས་དངུལ་གསོག་སླ་པོ་ཡོད། འབད་བརྩོན་བྱེད་ཐུབ་ན་སྐྱེལ་མི་ཚར་བའི་དངོས་ཟོག་ཡོད”ཅེས་བཤད།

2002ལོར་ཀརྨ་དབང་ཕྱུག་གིས་རླངས་འཁོར་གསར་པ་བརྗེས་པ་མ་ཟད་ཆེད་མངགས་བཟའ་ཟླ་ཚེ་རིང་སྒྲོལ་དཀར་ལ་གློག་སྒུལ་སྦག་སྦག་ཅིག་ཉོས། “བཟའ་ཟླས་སྦག་སྦག་བཞོན་ནས་འགྲོ་སྐབས་ཉེ་འཁོར་གྱི་མི་རྣམས་ཀྱིས་ཡིད་སྨོན་བྱེད་པས་མོ་རང་ཡང་ཧ་ཅང་དགའ་པོ་བྱེད་ཀྱི་འདུག”ཅེས་ཀརྨ་དབང་ཕྱུག་གིས་སྤྲོ་སྣང་ངང་བཤད། ཁོང་གིས“ད་རེས་རླངས་འཁོར་ཉོ་བྱེད་སྒོར་ཁྲི་9པོ་ནི་ངེད་བཟའ་ཚོ་གཉིས་ཀྱིས་དངུལ་སྐར་མ་རེ་རེ་བྱས་ནས་བསགས་པ་ཡིན། གཞན་ལ་དངུལ་སྐར་མ་གཅིག་ཀྱང་གཡར་མེད”ཅེས་བཤད།

ཀརྨ་དབང་ཕྱུག་དང་འདྲ་བར་བཟའ་ཟླ་ཚེ་རིང་སྒྲོལ་དཀར་ཡང་ཧ་ཅང་འཇོན་པོ་ཡོད། 1999ལོར་གྲོང་ཚོའི་ནང་ཚོང་ཁང་ཆུང་བ་ཞིག་གཉེར་བ་མ་ཟད་ཚོང་ཡང་ཉིན་བཞིན་ཡག་ཏུ་སོང་བ་དང་2000ལོར་ཡན་ལག་ཚོང་ཁང་ཞིག་ཀྱང་གཉེར་ཡོད། “དེ་དུས་ཁོང་གིས་རླངས་འཁོར་གྱི་སྣུམ་བླུག་བྱེད་ཀྱི་དངུལ་མེད་ན་རྟག་པར་ངའི་ས་ནས་དངུལ་འཁྱེར་གྱི་ཡོད”ཅེས་ཚེ་རིང་སྒྲོལ་དཀར་གྱིས་དགའ་སྤྲོའི་ངང་གསར་འགོད་པར་བཤད།

ད་ཆ་བཟའ་ཚོ་གཉིས་ཀྱིས་ངལ་གསོ་ཞོར་ཚ་བོ་ཚ་མོར་ལྟ་སྐྱོང་བྱེད་ཀྱི་ཡོད་པས་གྲོང་མི་རྣམས་ཀྱིས་ཡིད་སྨོན་བྱེད་ཀྱི་ཡོད། “རྐོ་འདྲུའི་འཕྲུལ་འཁོར་བོགས་གླར་བཏང་བའི་ཡོང་འབབ་ཁོ་ནས་ངེད་གཉིས་ཀྱི་འཚོ་བར་སེམས་ཁྲལ་མེད”ཅེས་ཀརྨ་དབང་ཕྱུག་གིས་བཤད།