“ལེ་དབར་ཁྲི་ཡི་བྱང་ཐང་ནས་ཁྲོམ་རར་བསྐྱོད་མ་ཐུབ་ན་སྲོལ་རྒྱུན་གྱི་འབྲོག་ལས་ནས་དེང་རབས་ཀྱི་འབྲོག་ལས་སུ་དངོས་སུ་ཕྱོགས་སྒྱུར་བྱས་པ་གླེང་ཐབས་བྲལ། འབྲོག་ལས་ཀྱི་ཕན་འབྲས་ཆེར་གཏོང་དང་འབྲོག་པར་འབབ་འཕར་ཡོང་བ་ནི་སྟོང་གཏམ་རེད”ཅེས་པ་ནི་འདམ་གཞུང་རྫོང་ཨུད་ཀྱི་ཧྲུའུ་ཅི་ཀྲང་ཀྲེང་གིས་རྒྱུན་དུ་ཏང་ཡོན་ལས་བྱེད་པ་དང་མང་ཚོགས་ལ་སེམས་བཟང་ཚིག་ནན་གྱིས་བརྗོད་པའི་སྐད་ཆ་ཞིག་ཡིན་ལ་འདམ་གཞུང་གི་འབྲོག་ལས་ཕྱོགས་སྒྱུར་གྱི་ཕྱོགས་སྟོན་ཞིག་ཀྱང་རེད།

ཟླ་བ་རྡོ་རྗེ་ནི་འདམ་གཞུང་རྫོང་གི“ལྕག་ཚན་གཡུགས་ནས་གསེར་གྱི་ལྡེ་མིག་ལེན་མཁན་གྱི”དཔེ་མཚོན་དང་བསྡུས་རིས་ཤིག་རེད། ཤེས་ཚོར་སྐྱེན་པ་དང་བློ་གཤོག་ཡངས་པོར་བརྟེན་ནས་ཟླ་བ་རྡོ་རྗེ་ས་ཆ་དེ་གར་ཅུང་སྐད་གྲགས་ཡོད་པའི་ཕྱུག་འགྱུར་འཇོན་ཐང་ཅན་ཞིག་ཏུ་གྱུར་ཡོད།

དུས་རབས་གོང་མའི་ལོ་རབས་70པར་ཟླ་བ་རྡོ་རྗེ་འབྲོག་པའི་ཁྱིམ་ཚང་དཀྱུས་མ་ཞིག་ཏུ་སྐྱེས་པ་དང་། ཁྱིམ་དུ་གཅེན་གཅུང་8ཡོད་པ་རེད། “ཁྱིམ་དུ་མི་མང་པོ་ཡོད་པས་ཕ་མ་གཉིས་ཀྱི་ཁུར་པོ་ཧ་ཅང་ལྕི་པོ་ཡོད་པ་དང་འཚོ་བར་དཀའ་ངལ་ཆེན་པོ་ཡོད”ལོ་14ལ་སླེབས་སྐབས་ཟླ་བ་རྡོ་རྗེས་ལག་ནང་གི་འུར་རྡོ་གཡུགས་ནས་ཕྱི་ཕྱོགས་སུ་ལས་མི་བྱེད་པར་ཕྱིན་པ་རེད།

2001ལོར་མཚོ་བོད་ལྕགས་ལམ་སྐྲུན་འགོ་ཚུགས་པ་དང་ཟླ་བ་རྡོ་རྗེས་སེམས་ཐག་ཆོད་པོས་དངུལ་ཁང་ནས་སྒོར་ཁྲི་20གཡར་ནས་སྐྱེལ་འདྲེན་རླངས་འཁོར་ཞིག་ཉོས་ཏེ་ལྕགས་ལམ་གྱི་ལས་ཡུལ་དུ་སྐྱེལ་འདྲེན་བྱས་པར་ཡོང་འབབ་སྒོར་ཁྲི་40ཙམ་བྱུང་ནས་ཁྱིམ་དུ་ཡོང་འབབ་ཐེངས་དང་པོ་བསགས་པ་རེད། 2006ལོར་ཟླ་བ་རྡོ་རྗེས་ཤང་ཏང་ཨུད་ཀྱིས་དྲིལ་བསྒྲགས་བྱས་པའི་སྲིད་ཇུས་ནང་ནས་རྒྱལ་ཁབ་ཀྱིས་ཡུལ་སྐོར་ལས་རིགས་འཕེལ་རྒྱས་ཤུགས་ཆེན་གཏོང་རྒྱུར་རྒྱབ་སྐྱོར་བྱ་རྒྱུ་ཡིན་པ་ཤེས་རྟོགས་ཐུབ། འདམ་གཞུང་རྫོང་གི་གནམ་མཚོའི་ཡུལ་སྐོར་མཛེས་ལྗོངས་ཁུལ་གྱི་ཐུན་མོང་མ་ཡིན་པའི་ལེགས་ཆར་དམིགས་ནས་ཟླ་བ་རྡོ་རྗེས་ཡུལ་སྐོར་གྱི་ཚོང་ལས་གོ་སྐབས་དམ་འཛིན་བྱས་ཏེ་ཞིང་ལས་དངུལ་ཁང་གི་སྐྱེད་མེད་དངུལ་བུན་སྒོར་ཁྲི་10གཡར་ཏེ་འདམ་གཞུང་རྫོང་གི་འབྲོག་པའི་ཡུལ་སྐོར་སྤྲོ་གསེང་གྲོང་དང་པོ——པད་མ་དཀར་པོའི་སྤྲོ་གསེང་གྲོང་གསར་འཛུགས་བྱས་པ་རེད།

དེ་རྗེས་རྒྱལ་ཁབ་ཀྱི་དམངས་ཕྱུག་སྲིད་ཇུས་བཏོན་པའི་ཁར་རང་ཉིད་ཀྱི་སྤྱང་གྲུང་དང་དཀའ་སྤྱད་བློ་གྲོས་ལ་བརྟེན་ནས་ཟླ་བ་རྡོ་རྗེས་ཡུལ་སྐོར་དང་འབྲོག་ལས་ཐོན་རྫས་ཀྱི་ཡོང་འབབ་ཁག་གཉིས་ཁོ་ནར་ལོ་ལྟར་སྒོར་ཁྲི་30ལྷག་ཙམ་བསགས་ཐུབ་ནས་ཁོང་འབྱོར་འབྲིང་ཕྱོགས་སུ་བསྐྱོད་ཐུབ་པ་བྱུང་ཡོད།

རང་ཉིད་རིམ་བཞིན་ཕྱུག་འགྱུར་འབྱོར་འབྲིང་ཕྱོགས་སུ་བསྐྱོད་པ་དང་དུས་མཚུངས་ཟླ་བ་རྡོ་རྗེས་དཀའ་ངལ་ཡོད་པའི་ཡུལ་མི་ཚོ་བརྗེད་མེད། ཁོང་གིས་རང་འགུལ་ངང་སྒོར་ཁྲི་10བཏོན་ནས་དུད་ཚང་དབུལ་པོར་འཚོ་བ་དང་ལས་ཞུགས་སོགས་ཀྱི་གནད་དོན་སེལ་རོགས་བྱས་ཡོད་པ་རེད། ཟླ་བ་རྡོ་རྗེས་ད་དུང་སྤྲོ་གསེང་གྲོང་གི་ཡོང་འབབ་ཀྱི་65%གྲོང་ཚོའི་དབུལ་སྐྱོར་རྣམ་གྲངས་ལ་བཏང་ཡོད་པ་དང་། མཉམ་ལས་ཁང་འཛུགས་པ་བརྒྱུད་གྲོང་ཚོ་གཅིག་པའི་འབྲོག་པ་རྣམས་ཀྱིས་འཛུགས་སྐྲུན་དང་། ཆུ་བེད། ལམ་བཟོ་སོགས་ཀྱི་རྣམ་གྲངས་སྤེལ་རྒྱུར་སྣེ་ཁྲིད་བྱས་ཏེ་འབྲོག་པར་ལས་ཞུགས་ཐག་གཅོད་བྱེད་རོགས་བྱས་ཡོད། འདམ་གཞུང་རྫོང་དང་། འདམ་ཆུ་ཁ་གྲོང་རྡལ་གྱི་ཏང་ཨུད་དང་སྲིད་གཞུང་གིས་ཀྱང་མ་དངུལ་སྒོར་ཁྲི་30བརྩོན་ལེན་ཧུར་ཐག་བྱས་ནས་དུད་ཚང་དབུལ་པོ་པད་མ་དཀར་པོའི་སྤྲོ་གསེང་གྲོང་གི་མ་རྐང་ནང་ཞུགས་པའི་བྱ་ཐབས་སྤྱད་ནས་སྤྲོ་གསེང་གྲོང་རྒྱ་སྐྱེད་བཏང་སྟེ་དབུལ་སྐྱོར་ལ་སྐུལ་འདེད་བཏང་བ་རེད།

ཉེ་བའི་ལོ་ཤས་རིང་ཟླ་བ་རྡོ་རྗེས་རང་ཉིད་ཀྱི་གཉེར་སྐྱོང་གནས་བབ་ཡག་པོ་ཡོད་པའི་ཡུལ་སྐོར་སྤྲོ་གསེང་གྲོང་དེ་གྲོང་ཚོའི་མཉམ་སྡེབ་ཀྱི་དཔལ་འབྱོར་དུ་བྱས་ནས་ཁེ་སྤོགས་ཕལ་ཆེ་བ་དེའི་ཁྲོད་བཏང་བས་མི་མང་པོར་ཕན་པ་ཐོབ་ཡོད་པ་དང་། བྱ་ཐབས་དེ་འདྲ་བརྒྱུད་སླར་ཡང་མི་20ལྷག་ཙམ་ལས་ཞུགས་ཐུབ་རྒྱུར་རོགས་རམ་བྱས་པ་དང་མི་30ལྷག་ཙམ་དབུལ་སྒྲོལ་ཐུབ་པ་རེད།

འདམ་གཞུང་རྫོང་ཨུད་དང་རྫོང་སྲིད་གཞུང་གི་ནུས་ལྡན་ཁྲིད་སྟོན་འོག་ཟླ་བ་རྡོ་རྗེ་འཕེལ་རྒྱས་ཀྱི་ལམ་བུའི་ཐོག་དེ་བས་བདེ་བླག་ངང་བགྲོད་ཐུབ་པ་བྱུང་བ་དང་ཁོང་གི་བྱས་རྗེས་ཀྱང་ས་ཆ་དེ་གའི་མི་སེར་གྱི་ངག་རྒྱུན་དུ་ཁྱབ་ནས་འདམ་གཞུང་རྩྭ་ཐང་ཐོག་གི་གཏམ་སྙན་ཞིག་ཏུ་གྱུར་ཡོད་པ་རེད།