“དེ་སྔོན་ལག་རྩལ་མི་ཤེས་པས་འཚོལ་ཞིབ་བྱེད་ཀྱིན་དྲོད་ཁང་གཉེར་སྐྱོང་བྱས་པ་ཡིན། སྐབས་དེར་ཐོན་ཚད་མཐོ་པོ་མེད། ཕྱིས་སུ་གྲོང་ཚོར་ཚན་རྩལ་ཆེད་མངགས་པ་བཏང་ཞིང་། ཁོང་ཚོས་ང་ཚོར་ཞིང་ནང་སྐྱེ་དངོས་ཀྱི་ཐོན་ཚད་མཐོ་རུ་གཏོང་རོགས་དང་། འདེབས་འཛུགས་ཤེས་བྱ་སློབ་ཁྲིད། སྔོ་ཚལ་གྱི་ནད་འབུ་འགོག་བཅོས་བྱེད་རོགས་བཅས་བྱས་པས་ང་ཚོའི་ཡོང་འབབ་ཇེ་མང་དུ་ཕྱིན་སོང”ཞེས་དྲོད་ཁང་གི་སྐོར་གླེང་སྐབས་སྟག་རྩེ་རྫོང་འབྲོམ་ཐོད་ཤང་གི་གྲོང་མི་ཚེ་རིང་གིས་འཛུམ་མདངས་རྒྱས་བཞིན་དེ་ལྟར་བཤད་བྱུང་།

ཤེས་རྟོགས་བྱུང་བར་གཞིགས་ན། 2016ལོར་ལྷ་ས་གྲོང་ཁྱེར་གྱིས་ཚན་རྩལ་ཆེད་མངགས་པ་709བཏང་བ་ལས་ཆུས་རིམ་པའི་ཚན་རྩལ་ཆེད་མངགས་པ་534དང་གྲོང་ཁྱེར་རིམ་པའི་ཚན་རྩལ་ཆེད་མངགས་པ་175ཡོད་པ་རེད། ཁོང་ཚོས་ཤང་དང་གྲོང་རྡལ་57དང་སྲིད་འཛིན་གྲོང་ཚོ་267དུ་ཚན་རྩལ་ཞབས་ཞུའི་ལས་དོན་སྤེལ་བ་དང་། ལག་རྩལ་གསར་པ་དང་སོན་གསར་ནང་འདྲེན་བྱེད་རོགས། ཞིང་འབྲོག་ལས་ཀྱི་དཔེ་སྟོན་རྟེན་གཞི་འཛུགས་པ་བཅས་གྲོང་ཚོ་དབུལ་པོའི་ཚན་རྩལ་ཞབས་ཞུ་དང་ལས་གཏོད་ཁྲིད་སྟོན་གྱི་ལས་དོན་ནང་ཚན་རྩལ་ཆེད་མངགས་པ་ཡོངས་སུ་ཁྱབ་ཐུབ་པ་བྱུང་ཡོད།

གནད་སྨིན་དབུལ་སྐྱོར་ཁྲོད་ཀྱི་ཚན་རྩལ་ཤེས་ལྡན་པའི་སྐུལ་འདེད་ཀྱི་ནུས་པ་འདོན་སྤེལ་གང་ལེགས་བྱེད་ཆེད་ལྷ་ས་གྲོང་ཁྱེར་ཚན་རྩལ་ཅུས་ཀྱིས་ཚན་རྩལ་ཆེད་མངགས་པ་སྒྲིག་འཛུགས་ཧུར་ཐག་བྱས་ཏེ་གཞི་རིམ་དུ་བསྐྱོད་ནས་ཞིང་འབྲོག་མང་ཚོགས་དང་ཞིང་ལས་ཁེ་ལས་ལ་ཞིང་ལས་སྐྱེ་དངོས་འདེབས་འཛུགས་དང་། ཁྱིམ་བྱ་གསོ་ཚགས། ཞིང་ལས་ཐོན་རྫས་ལས་སྣོན་ཞིབ་དཔྱད་སོགས་ཚན་རྩལ་ཞབས་ཞུ་དང་ཁྲིད་སྟོན་བྱས་ཡོད། ཞིང་འབྲོག་ཚན་རྩལ་ཆེད་མངགས་པས་མེད་པ་ནས་ཡོད་པའི་བར་དང་ཉུང་བ་ནས་མང་བའི་བར་གྱི་འཕེལ་རིམ་ཞིག་བརྒྱུད་རྗེས་ཚན་རྩལ་ཆེད་མངགས་པ་གྲུབ་ཆ་གཙོ་བོར་བྱས་པའི་ཞིང་འབྲོག་པའི་ཆེད་ལས་དཔལ་འབྱོར་མཉམ་ལས་རྩ་འཛུགས་དབྱར་མཚོ་རྒྱས་པ་བཞིན་གོང་འཕེལ་འགྲོ་བའི་རྣམ་པ་ཞིག་ཆགས་པ་ལས་ཞིང་ལས་ཐོན་འབབ་འཕར་བ་དང་ཞིང་པའི་ཡོང་འབབ་འཕར་བར་ཕན་འབྲས་བཟང་པོ་ཐོན་ཡོད་པ་རེད།