ཉེ་དུས། རྒྱལ་ཁབ་ཞིང་ལས་པུས་སྤྲོ་གསེང་ཞིང་ལས་དང་གྲོང་གསེབ་ཡུལ་སྐོར་དཔེ་མཚོན་རྫོང་༼གྲོང་ཁྱེར་དང་ཆུས༽གི་སྤྱི་ལོ ༢༠༡༦ ལོའི་མིང་ཐོ་ཡོངས་བསྒྲགས་བྱས་པའི་ནང་། ལྷོ་ཁ་གྲོང་ཁྱེར་རྒྱ་ཚ་རྫོང་དང་ཆབ་མདོ་གྲོང་ཁྱེར་སྨར་ཁམས་རྫོང་། ནག་ཆུ་ས་ཁུལ་སོག་རྫོང་བཅས་རང་ལྗོངས་ཀྱི་རྫོང་གསུམ་ཚུད་ཡོད་པ་རེད།
ཤེས་རྟོགས་བྱུང་བར་གཞིགས་ན། ཞིང་ལས་པུས་སྤྱི་ལོ ༢༠༡༢ ལོའི་ཚུན་དུ་རང་ལྗོངས་ཀྱི་དཔེ་མཚོན་རྫོང་ ༦ དང་དཔེ་མཚོན་ས་ཚིགས ༩ རྒྱལ་ཡོངས་ཀྱི་སྤྲོ་གསེང་ཞིང་ལས་དང་གྲོང་གསེབ་ཡུལ་སྐོར་དཔེ་མཚོན་རྫོང་དང་ས་ཚིགས་སུ་གཏན་འཁེལ་བྱས་ཡོད་པ་རེད།
སྤྲོ་གསེང་ཞིང་ལས་དང་གྲོང་གསེབ་ཡུལ་སྐོར་གོང་འཕེལ་གཏོང་རྒྱུ་ནི་རང་ལྗོངས་གྲོང་གསེབ་ཀྱི་ཐོན་ལས་དང་པོ་དང་གཉིས་པ། གསུམ་པ་བཅས་མཉམ་འབྲེལ་གོང་འཕེལ་ལ་སྐུལ་འདེད་གཏོང་བའི་གཞི་རྟེན་གསར་པ་ཞིག་ཡིན་ལ། ཞིང་འབྲོག་ཁུལ་གྱི་དཔལ་འབྱོར་གོང་འཕེལ་ལ་སྐུལ་འདེད་གཏོང་བ་དང་། ཞིང་འབྲོག་མང་ཚོགས་ལས་ཞུགས་ཐུབ་པ་དང་འབབ་འཕར་ཡོང་བའི་ཐབས་ལམ་གསར་པ་ཞིག་ཀྱང་ཡིན་པས། ཞིང་འབྲོག་ལས་ཀྱི་མཁོ་སྤྲོད་གྲུབ་ཆའི་རང་བཞིན་ལ་བསྒྱུར་བཅོས་གཏོང་རྒྱུ་དང་ཞིང་ལས་སྟོབས་ཆེར་གཏོང་རྒྱུ། གྲོང་གསེབ་མཛེས་སྡུག་ཅན་དུ་འགྱུར་རྒྱུ། ཞིང་པ་ཕྱུག་པོ་ཆགས་པ་བྱེད་རྒྱུ་བཅས་ལ་སྐུལ་འདེད་བཏང་ནས། མཛེས་ཞིང་སྐྱིད་པའི་གྲོང་གསེབ་གསར་པ་དང་སྐྱོན་བྲལ་གྱི་གྲོང་ཚོ་དང་གྲོང་རྡལ། མཛེས་སྡུག་ལྡན་པའི་བོད་ལྗོངས་བཅས་འཛུགས་སྐྲུན་བྱེད་རྒྱུར་དོན་སྙིང་གལ་ཆེན་ལྡན་ཡོད་པ་རེད།