ཀྲུང་གོ་བོད་ཀྱི་དྲ་བའི་འཕྲིན།　ད་ལོའི་འབྲུ་རིགས་ཐོན་འབབ་བརྟན་པོའི་ངང་འཕར་སྣོན་དང་རྒྱུན་སྲིང་ཐོན་འཕར་ཡོང་ཆེད་གཞིས་རྩེ་གྲོང་ཁྱེར་གྱིས་སྔ་ས་ནས་ཇུས་འགོད་དང་སྔ་ས་ནས་བཀོད་སྒྲིག་བྱས་ཏེ།　སོན་བཟང་གསོ་སྤེལ་ཁྱབ་གདལ་གྱི་ལས་དོན་དོན་འཁྱོལ་ཡག་པོ་བྱས་པས་དཔྱིད་རྨོས་ལས་དོན་གོ་རིམ་ལྡན་པའི་ངང་སྤེལ་རྒྱུ་འགན་སྲུང་བྱས་ཡོད།

རྒྱལ་རྩེ་རྫོང་རྩེ་ཆེན་ཤང་ནུབ་སྟོད་གྲོང་ཚོར་ཉིན་ཤས་བསྟུད་མར་གྲོང་མི་ཚོས་ཞིང་ལས་དལ་བའི་སྐབས་དང་བསྟུན་ནས།　　ན་ནིང་གི་ནས་སོན་ལེགས་འདེམས་བྱས་པ་དང་སོན་འཐུམ་བརྒྱབ་པ་རེད།　ད་ལོ་ནུབ་སྟོད་གྲོང་ཚོས་ཆབ་མདོ་གྲོང་ཁྱེར་ལ་ནས་ཀྱི་སོན་བཟང་སྤྱི་རྒྱ་ཁྲི་ཚོ17.5མཁོ་འདོན་བྱས་པ་དང་།　　ནས་སོན་ལེགས་འདེམས་བྱེད་པ་དང་སོན་འཐུམ་རྒྱག་རིང་གྲོང་ཁྱེར་ཞིང་ལས་ཚན་རིག་ཞིབ་འཇུག་ཟོའོ་དང་ཞིང་ལས་ལག་རྩལ་ཁྱབ་གདལ་ཞབས་ཞུ་ལྟེ་གནས་ཀྱི་ཆེད་ལས་ལག་རྩལ་མི་སྣས་ས་གནས་ས་ཐོག་ཏུ་བརྒྱུད་རིམ་ཧྲིལ་པོར་ལྟ་སྐུལ་མཛུབ་ཁྲིད་བྱས་ནས། སོན་ལེགས་འདེམས་དང་སོན་འཐུམ་གྱི་སྤུས་ཚད་འགག་སྒོ་ནན་པོ་སྲུང་སྟེ་སོན་བཟང་མཁོ་སྤྲོད་ཀྱི་སྤུས་ཚད་དང་གྲངས་ཚད་འགན་ལེན་བྱས་ཡོད།

གསར་འགོད་པས་ཤེས་རྟོགས་བྱས་པར་གཞིགས་ན།　　རང་སྐྱོང་ལྗོངས་ཀྱི་སོན་བཟང་མཁོ་སྤྲོད་བྱེད་ཚད་ཀྱི་བཀོད་སྒྲིག་ལྟར་ན།　　ད་ལོ་གཞིས་རྩེ་གྲོང་ཁྱེར་གྱིས་ས་ཆ་གཞན་དུ་སོན་བཟང་སྤྱི་འབོར་སྤྱི་རྒྱ་ཁྲི་ཚོ213བཀོད་གཏོང་བྱེད་དགོས་ཀྱི་ཡོད།　དེང་སྐབས་གྲོང་ཁྱེར་དེ་ཡོངས་ཀྱི་སོན་བཟང་ལེགས་འདེམས་དང་སོན་འཐུམ་ལས་དོན་ཁག་གི་འཕེལ་རིམ་བདེ་བླག་བྱུང་ཡོད་པ་དང་།　སྤྱི་ཟླ2པའི་ཟླ་མཇུག་གོང་དཔྱིད་འདེབས་ཐད་མཁོ་བའི་སོན་བཟང་ཚང་མ་བཀོད་གཏོང་དབོར་འདྲེན་ཟིན་པ་རེད།

ཉེ་བའི་ལོའི་རིང་གཞིས་རྩེ་གྲོང་ཁྱེར་གྱིས་བོད་ནས་ཨང2000དང་ཧི་མ་ལ་ཡ་ཨང22སོགས་སོན་བཟང་ཁྱབ་གདལ་གཏོང་ཤུགས་ཆེ་རུ་བཏང་བས་ལོ་མང་བསྟུད་དེ་ལོ་ལེགས་བྱུང་ཡོད།　སྤྱི་ལོ2015ལོར་གྲོང་ཁྱེར་དེ་ཡོངས་ཀྱིས་འབྲུ་རིགས་ཐོན་ཁུལ་གཙོ་བོའི་རྫོང（ཆུས）10ལ་སོན་བཟང་ཁྱབ་གདལ་དཔེ་སྟོན་ཁུལ་བཙུགས་པ་དང་ཁྱོན་མུའུ་ཁྲི་ཚོ67གྱི་སར་ནས་ཀྱི་སོན་བཟང་ཁྱབ་གདལ་བཏང་པ་རེད།　　རྒྱལ་རྩེ་དང་བསམ་གྲུབ་རྩེ།　པ་སྣམ།　ལྷ་རྩེ་བཅས་རྫོང（ཆུས）བཞིས་གཙོ་གནད་ཐོག་མུའུ་རེ་ནས་རྒྱ་མ་སྟོང་ཐོན་ཐུབ་པའི་ཧི་མ་ལ་ཡ་ཨང22མུའུ་ཁྲི་བཏབ་པ་དང་མུའུ་རེ་ནས་རྒྱ་མ་སྟོང་ཐོན་ཐུབ་པའི་བོད་ནས་ཨང2000མུའུ་སྟོང་བཏབ་ནས་ཚད་ལྡན་ཅན་གྱི་ཐོན་སྐྱེད་དཔེ་སྟོན་རྟེན་གཞི་མུའུ15000དོན་འཁྱོལ་བྱས་ཡོད་པ་རེད།