ནག་ཆུ་ས་ཁུལ་ཨ་མདོ་རྫོང་རྩ་རིང་གྲོང་རྡལ་ལྷ་མཚོ་གྲོང་རྡལ་གྱི་གྲོང་མིས་འགན་བཅོལ་དངུལ་ལེན་བཞིན་པ།
གསར་འགོད་པར་ལྗོངས་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིང་ནས་ཤེས་རྟོགས་བྱུང་བར་གཞིགས་ན། རང་ལྗོངས་སུ་གྲོང་ཁྱེར་དང་གྲོང་གསེབ་ཀྱི་གྲོང་མིའི་གཞི་རྩའི་རྒན་གསོའི་འགན་བཅོལ་ནང་ཞུགས་པའི་མི་གྲངས་རྒྱུན་ཆད་མེད་པར་མང་དུ་ཕྱིན་ཏེ་ད་ཆ་རྒན་གསོའི་འགན་བཅོལ་ནང་ཞུགས་པའི་མི་གྲངས་ཁྲི༡༥༦ཟིན་ཡོད། འགན་བཅོལ་དངུལ་གྱི་ཚད་གཞི་ཡང་ལོ་བཞི་བསྟུད་མར་མཐོ་རུ་ཕྱིན་ནས་སྤྱི་ལོ༢༠༡༠ལོའི་མི་རེར་ཆ་སྙོམས་ཟླ་རེའི་སྒོར༥༥ནས་ད་ལྟ་སྒོར༡༤༠བར་མཐོ་རུ་ཕྱིན་པ་དེ་རྒྱལ་ཡོངས་ཀྱི་ཆ་སྙོམས་ཚད་གཞི་ལས་སྒོར༢༧གྱི་མཐོ་བ་ཡོད་པ་རེད།