ཉེ་བའི་ལོ་ཤས་རིང་། རྫ་ཡུལ་རྫོང་གིས“རྒན་གཅིག་གཞོན་གཅིག”གི་གཙོ་གནད་ཚོགས་སྤྱིར་དམིགས་ནས་མཉམ་འགུལ་ལམ་སྲོལ་དང་། གནད་སྨིན་ཞབས་ཞུ། འཚར་ལོངས་གསོ་སྐྱོང་བཅས་ཕྱོགས་གསུམ་གྱི་ཐད་ནས་ཤུགས་བརྒྱབ་སྟེ། ཞབས་ཞུའི་ནང་དོན་རྒྱུན་ཆད་མེད་པར་རྒྱ་སྐྱེད་བཏང་ནས་མང་ཚོགས་ཚོར་དམངས་འཚོའི་བྱ་བ་དངོས་ཏན་ཏིག་བསྒྲུབས་པ་རེད།

རྒན་གསོའི་ཞབས་ཞུའི་ཐད། རྫ་ཡུལ་རྫོང་གིས། “དམངས་སྲིད་གཙོ་ཁྲིད་དང་སྡེ་ཁུལ་གཞོགས་འདེགས་ཟུང་དུ་འབྲེལ་བའི་ཁ་གསབ་ལམ་སྲོལ་ལག་ལེན་བསྟར་ཏེ། སྡེ་ཁུལ་གྱི་ལས་དོན་པ་9དང་། སྤྱི་ཚོགས་ཀྱི་ལས་དོན་པ་4 ཏང་ཡོན་དང་བླངས་པ་སོགས་ཀྱི་སྟོབས་ཤུགས་བསྡུ་སྒྲིལ་བྱས་ནས་མུ་མཐུད་ཞབས་འདེགས་ཡག་པོ་ཞུས་པ་རེད། སྡེ་ཁུལ་གྱི་ལས་དོན་པ་དུས་བཀག་ནང་རྨང་གཞིའི་དངོས་ལུགས་གསོ་བཅོས་ཀྱི་ཤེས་བྱའི་གསོ་སྦྱོང་ལ་ཞུགས་ཏེ། ཁྲག་ཤེད་འཇལ་སྟངས་དང་། འཕུར་མཉེད་དང་དངོས་ལུགས་གསོ་བཅོས། ཁམས་གསོའི་མཛུབ་ཁྲིད་སོགས་ཀྱི་རྩལ་ནུས་ཁོང་དུ་ཆུད་པར་བྱས་ནས་ལས་གནས་སུ་ཞུགས་པ་རེད།

དྲ་མིག་པས་དུད་ཚང་རེ་རེ་བཞིན་ལ་གྲལ་བཤེར་བྱེད་སྐབས་སྡེ་ཁུལ་དུ་ཁེར་སྡོད་རྒན་རྒོན་40ཡོད་པའི་ཁྲོད་དུད་ཚང་2ཀྱི་རྒན་རྒོན་3ལ་ཟ་མ་སྐྱེལ་དགོས་པ་ཤེས་རྟོགས་བྱུང་བས། དམངས་སྲིད་སྡེ་ཚན་གྱིས་ཁོངས་གཏོགས་ཁུལ་གྱི་གཅེས་སེམས་ཟ་ཁང་དང་སྤྱི་འདོམས་མཐུན་སྦྱོར་བྱས་ནས་འཚོ་བཅུད་ལྡན་པའི་ཟ་མ་མཁོ་འདོན་བྱས་པ་དང་། སྡེ་ཁུལ་གྱི་ལས་དོན་པ་དང་ཏང་ཡོན་དང་བླངས་པ་ལས་གྲུབ་པའི“ཟ་མ་སྐྱེལ་མཁན་ཡན་ལག་རུ་ཁག”གིས་ཉིན་ལྟར་གཏན་འཁེལ་གྱི་དུས་ཚོད་དང་ས་ཆར་ཟ་མ་སྒོ་རྩར་སྐྱེལ་གྱི་ཡོད་པ་མ་ཟད། དང་བླངས་པས་དུས་མཚུངས་སུ་ཟ་མ་སྐྱེལ་བ་དང་འཚམས་འདྲི་ཟུང་འབྲེལ་གྱི་ཞབས་འདེགས་ཞུ་གི་ཡོད་པ་རེད།

བྱིས་པ་བཅོལ་ཉར་ཐད། རྫ་ཡུལ་རྫོང་གིས་སྡེ་ཁུལ་གྱི་ཏང་དམངས་ཞབས་ཞུའི་ལྟེ་གནས་དང་དུས་རབས་གསར་པའི་ཤེས་དཔལ་ལག་ལེན་ས་ཚིགས་ལ་བརྟེན་ནས“ཉི་མ་མེ་ཏོག”བཅོལ་ཉར་ཞབས་ཞུའི་འཛིན་གྲྭ་བཙུགས་པ་རེད། འཛིན་གྲྭའི་ནང་སྦྱོང་ཚན་ཟུར་ཁྲིད་ཁུལ་དང་། སྤྲེ་འཕེལ་བྱེད་སྒོ་ཁུལ། དཔེ་དེབ་ལྟ་ཀློག་ཁུལ། སློབ་གསེང་རོལ་རྩེད་ཁུལ་བཅས་ཚད་ལྡན་བཀོད་སྒྲིག་བྱས་པ་མ་ཟད། ད་དུང་སྒྲོག་ཙེ་དང་། དཔེ་དེབ། རྩེད་ཆས། འཕྲལ་སྡོམ་སྨན་རྫས་སོགས་གྲ་སྒྲིག་བྱས་ཏེ་ཕྲུ་གུ་ཚོར་འགྲོ་ས་ཡོད་པ་དང་རྩེད་མོ་རྩེ་ས་ཡོད་པའི་འགན་ལེན་བྱས་ཤིང་། མིག་སྔའི་བར་བཅོལ་ཉར་འཛིན་གྲྭས་རིམ་རྩིས་བརྒྱབ་ན་ཞབས་འདེགས་ཞུ་ཐེངས་280ལྷག་ཙམ་ཟིན་ནས་ཁོངས་གཏོགས་ཁུལ་གྱི་བྱིས་པ་མི་ཐེངས་350ལྷག་ཙམ་ལ་ཕན་པ་ཐོབ་པ་དང་ཞབས་ཞུའི་དུས་ཡུན་ཆུ་ཚོད་500ལྷག་ཙམ་ཟིན་གྱི་ཡོད་པ་རེད།