བོད་ལྗོངས་ཀྱི་སྤྱི་པའི་འཕྲོད་བསྟེན་གྱི་ཉེན་ཁ་འགོག་སེལ་ནུས་པ་ཆེ་རུ་བཏང་བ།
བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། ཉེ་ཆར། གསར་འགོད་པས་འབྲེལ་ཡོད་སྡེ་ཚན་ནས་ཤེས་རྟོགས་བྱས་པར། 2026ལོ་ནི“ལོ་ལྔ་ཚན་བཅོ་ལྔ་པའི”འགོ་ཚུགས་ལོ་ཡིན་པས་བོད་ཀྱི་རིམས་ནད་ཚོད་འཛིན་ལས་དོན་གྱི་ཞན་ཆ་སེལ་རྒྱུར་གཞི་ཚུགས་པ་དང་། ཞན་ཆ་ལེགས་གཏོང་། སྤུས་ནུས་མཐོར་གཏོང་བཅས་བྱེད་པ་དང་། སྔོན་འགོག་གཙོ་བོར་བཟུང་བ་དང་། སྤྱི་ཚོགས་ཀྱིས་མཉམ་དུ་བཅོས་སྐྱོང་བྱེད་པ། མཉམ་དུ་སྔོན་འགོག་དང་ཚོད་འཛིན། ནད་མང་མཉམ་དུ་སྔོན་འགོག་བཅས་མཐའ་འཁྱོངས་བྱས་ཏེ། སྤྱི་པའི་འཕྲོད་བསྟེན་གྱི་ཉེན་ཁ་ཆེན་པོ་སྔོན་འགོག་དང་སེལ་ནུས་ཆེ་རུ་བཏང་ནས་འགོ་ནད་དང་རིམས་ནད་ཀྱི་དུས་བབ་སྤྱིའི་ཆ་ནས་རྒྱུན་མཐུད་བརྟན་པོ་ཡོང་བར་བྱ་རྒྱུ་རེད།
ཤེས་རྟོགས་བྱུང་བར་གཞིགས་ན། 2026ལོར་བོད་ཀྱིས་སྤུས་ཚད་མཐོ་པོས“ལོ་ལྔ་ཚན་བཅོ་ལྔ་པར”རིམས་ནད་ཚོད་འཛིན་གྱི་ཆེད་དོན་འཆར་འགོད་བཟོ་བ་དང་རིམས་ནད་ཚོད་འཛིན་ཁྱབ་ཁོངས་ཀྱི་རྨང་བརྟན་འདུ་འགོད་མགྱོགས་མྱུར་ལག་བསྟར་བྱས་ཏེ་གཞི་རིམ་གྱི་རིམས་ནད་ཚོད་འཛིན་ལས་དོན་དཔུང་ཁག་དང་འཕྲལ་སྡོམ་ཐག་གཅོད་ཀྱི་སྟོབས་ཤུགས་ཆེ་རུ་གཏོང་རྒྱུ་དང་ཆབས་ཅིག ཞིང་ཆེན་རིམ་པས་སྤྱི་འདོམས་བྱེད་པའི་འགོ་ནད་ལྟ་ཞིབ་ཚད་ལེན་གྱི་སྔོན་བརྡ་གཏོང་བ་དང་། འཕྲལ་སྡོམ་བཀོད་འདོམས་ཆ་འཕྲིན་ཅན་གྱི་ལས་སྟེགས། ཐབས་ལམ་མང་བ་དང་རིག་ནུས་ཅན་གྱི་ལྟ་ཞིབ་ཚད་ལེན་དང་སྔོན་བརྡ་གཏོང་བའི་མ་ལག་སྐྲུན་པ་བཅས་བྱས་ནས་ཉེན་ཁར་ལྟ་ཞིབ་ཚད་ལེན་དང་སྔོན་བརྡ་ཐིག་ཚད་ཕྱོགས་ཡོངས་ནས་མཐོ་རུ་གཏོང་རྒྱུ་རེད།
མང་ཚོགས་ཀྱི་བདེ་ཐང་དགོས་མཁོར་དམིགས་ནས་རང་ལྗོངས་ཀྱིས“དམིགས་པ་ལྔ”ཡི་ལོ་གསུམ་བྱ་སྤྱོད་གསར་པ་ལག་བསྟར་བྱས་ཏེ་རིམས་ནད་སྨན་ཁབ་རྒྱག་པའི་ཞབས་ཞུ་ལེགས་སུ་གཏོང་རྒྱུ་མ་ཟད། “ནད་གཞི་བཞི”འགོག་བཅོས་འགག་སྒྲོལ་ལ་སྐུལ་འདེད་བཏང་ནས་སྤྱི་པའི་འཕྲོད་བསྟེན་ཞབས་ཞུའི་དམངས་ཕན་ཕན་འབྲས་རྒྱུན་མཐུད་མཐོ་རུ་གཏོང་རྒྱུ་རེད།
འབྲེལ་ཡོད་གསར་འགྱུར།