འདི་ནི་གྲོང་ཚོའི་སྨན་པ་བསོད་ནམས་བསྟན་འཛིན(གཡོན)གྱིས་ཡུལ་མིར་བདེ་ཐང་བརྟག་དཔྱད་བྱེད་པའི་རྣམ་པ་ཡིན་པ།

བོད་ལྗོངས་གཞིས་རྩེ་གྲོང་ཁྱེར་བསམ་གྲུབ་རྩེ་ཆུས་སྣར་ཤང་སྤྲེ་ས་གྲོང་ཚོའི་འཕྲོད་བསྟེན་ཁང་དུ་གྲོང་ཚོའི་སྨན་པ་བསོད་ནམས་བསྟན་འཛིན་གྱིས་ངོས་ལེབ་གློག་ཀླད་ཅིག་བཀོལ་སྤྱོད་བྱེད་བཞིན་དུ་གསར་འགོད་པར“སྨན་བཅོས་ལག་རྩལ་གྱི་རྒྱབ་སྐྱོར་བརྩོན་ལེན་དང་གཞི་གྲངས་སྣ་ཚོགས་བསྡུ་ལེན་བྱེད་པར་ངོས་ལེབ་གློག་ཀླད་དེ་རང་གིས་གོ་ཆོད་ཀྱི་ཡོད”ཅེས་བཤད།

དེ་ནི་ཧྲན་ཏུང་ཆིང་ཏའོ་ཡིས་གཞིས་རྩེ་གྲོང་ཁྱེར་བསམ་གྲུབ་རྩེ་ཆུས་ལ་རོགས་སྐྱོར་བྱས་ནས་བསྐྲུན་པའི་རིག་ལྡན་སྨན་བཅོས་གཅིག་མཐུན་ཚོགས་པའི་རྣམ་གྲངས་ལ་བརྟེན་ནས་བྱུང་ཞིང་། ཆིང་ཏའོ་གྲོང་ཁྱེར་གྱི་ཁག་བཅུ་པའི་བོད་སྐྱོར་ལས་བྱེད་ཤེས་ལྡན་པའི་ཚོགས་ཆུང་གིས་ཆིང་ཏའོ་ཧེར་སྐྱེ་དངོས་སྨན་བཅོས་མ་རྐང་ཚད་ཡོད་ཀུང་སིའི་ཁེ་ལས་ཀྱི་ཞབས་ཞུ་ཉོ་སྒྲུབ་བྱས་པ་བརྒྱུད། 5Ｇདང་། གྲངས་གཞི་ཆེ་མོ། ＡＩསོགས་ལག་རྩལ་ནང་འདྲེན་བྱས་ནས་ཆུས་དང་། ཤང་། གྲོང་ཚོ་བཅས་རིམ་གསུམ་གྱི་སྨན་བཅོས་གྲངས་གཞི་ཐོགས་མེད་བསྡུས་ནས“བདེ་ཐང་ཆ་འཕྲིན་གྱི་དྲ་བ་བཙུགས་པ”དེས་སྔོན་འགོག་དང་། རག་སྒྲུག བརྟག་དཔྱད། སྨན་བཅོས། དོ་དམ། བདེ་ཐང་བཅས་ཀྱི་དུས་འཁོར་ཧྲིལ་པོའི་བདེ་ཐང་དོ་དམ་གྱི་གདུབ་ཟུམ་བསྐྲུན་ནས། བསམ་གྲུབ་རྩེ་ཆུས་ལ་གཞི་རིམ་གྱི་སྨན་བཅོས་ཐོག་མ་དང་། སྨན་ཁང་སྒྱུར་བ། དོས་དྲག་དང་གཅོང་ནད་དབྱེ་ནས་བཅོས་པ། གོང་འོག་མཉམ་འགུལ་བཅས་ཀྱི་སྨན་བཅོས་ཞབས་ཞུའི་དཔེ་རྣམ་གསར་པ་བཏོད་ཡོད”ཅེས་བསམ་གྲུབ་རྩེ་ཆུས་འཕྲོད་བསྟེན་བདེ་ཐང་ཨུ་ལྷན་གྱི་ཀྲུའུ་རེན་ཚེ་རིང་སྒྲོལ་དཀར་གྱིས་བརྗོད།

མང་ཚོགས་ཀྱི་བདེ་ཐང་ཡིག་ཚགས་བཙུགས་ནས་བདེ་ཐང་གི་གདིང་གཞི་གསལ་པོ་རྟོགས་པར་བྱེད་པ།

སྤྲེ་ས་གྲོང་ཚོའི་གྲོང་མདོར་ཆིང་ཏའོ་ཡིས་རོགས་སྐྲུན་བྱས་པའི་ཐོག་བརྩེགས་གཉིས་ལྡན་གྱི་ཐོག་ཁང་གསར་རྐྱང་ཞིག་ཡོད་པ་དེ་ནི་གྲོང་ཚོའི་འཕྲོད་བསྟེན་ཁང་ཡིན་པ་དང་། དེ་གར་ལས་ཀ་བྱེད་བཞིན་པའི་གྲོང་ཚོའི་སྨན་པ་གཉིས་ནི་ཡུལ་མིའི་བདེ་ཐང་སྲུང་མཁན་རེད།

ལོ་89ལ་སླེབས་པའི་རྣམ་རྒྱལ་ནི་གྲོང་ཚོའི་ལོ་ན་མཐོ་ཤོས་ཀྱི་རྒན་རྒོན་ཞིག་རེད་ལ། སྨན་པ་བསོད་ནམས་བསྟན་འཛིན་གྱིས་སེམས་ཁྲལ་ཆེ་ཤོས་བྱ་ཡུལ་ཞིག་ཀྱང་རེད། ཟླ་རེར་ཁོང་གིས“རིག་ནུས་དཔེ་ཁུག”དང་ངོས་ལེབ་གློག་ཀླད་འཁྱེར་ནས་རྒན་རྒོན་ལ་སྒོ་རྩར་བདེ་ཐང་ཞབས་ཞུ་བྱེད་པར་འགྲོ་བ་དང་། ཁུག་མའི་ནང་དུ་ཁྲག་ཤེད་འཇལ་ཆས་སོགས་བླུགས་པ་དང་ངོས་ལེབ་གློག་ཀླད་ནང་རྒན་རྒོན་གྱི་བདེ་ཐང་དཔྱད་གཞི་བླུགས་ཡོད།

ཁོང་གིས་ངོས་ལེབ་གློག་ཀླད་ནང་བརྟག་དཔྱད་ཚད་ལེན་གྱི་གནས་ཚུལ་ཁག་ཞིབ་ཕྲ་བཅུག་ནས་གློག་རྡུལ་བདེ་ཐང་ཡིག་ཚགས་ཤིག་བཟོས། བསོད་ནམས་བསྟན་འཛིན་གྱིས“གྲོང་ཚོའི་སྨན་པའི་སྨན་བཅོས་འཇོན་ཐང་དེ་ཙམ་ཆེན་པོ་མེད་པས་ང་ཚོས་སྒྲུབ་གང་ཐུབ་བྱ་རྒྱུ་དེ་ནི་རྗེས་འདེད་བརྟག་དཔྱད་བྱས་ནས་ནད་པར་བདེ་ཐང་གི་ཡིག་ཚགས་བཟོ་བ་དང་བདེ་ཐང་གི་གདིང་གཞི་ཤེས་རྟོགས་བྱས་ནས་གོང་རིམ་སྨན་བཅོས་སྒྲིག་གཞིར་ཆ་འཕྲིན་ཆ་ཚང་ཤེས་སུ་འཇུག་རྒྱུ་དེ་རེད”ཅེས་ངོ་སྤྲོད་བྱས།

ཆིང་ཏའོ་ཧེར་སྐྱེ་དངོས་སྨན་བཅོས་མ་རྐང་ཚད་ཡོད་ཀུང་སིའི་བསམ་གྲུབ་རྩེ་ཆུས་ཁོངས་ཀྱི་སྨན་བཅོས་ཆ་འཕྲིན་ཅན་གྱི་ནུས་པ་ཆེ་རུ་གཏོང་བའི་རྣམ་གྲངས་ཀྱི་འགན་ཁུར་བ་ཀྲང་མིང་དབྱང་གིས། “ང་ཚོའི་རྣམ་གྲངས་ཐད་རིམ་པ་ཁག་དང་རིགས་ཁག་གི་སྨན་བཅོས་ལས་ཁུངས་ཀྱི་ཆ་འཕྲིན་མ་ལག་དྲ་སྦྲེལ་ཐུབ་ནས་གྲོང་མིའི་སྨན་བཅོས་བདེ་ཐང་གྲངས་གཞི་ཕྱོགས་བསྡུས་ཐུབ་སྟེ་གནད་སྨིན་སྨན་བཅོས་བྱེད་པར་རྒྱབ་སྐྱོར་ནུས་ལྡན་བྱས་ཡོད”ཅེས་བཤད།

རྒྱང་ཁྲིད་སྨན་བཅོས་དང་ལས་ཕྱོད་ཆེ་བའི་མཉམ་ལས་བྱས་ནས་སྨན་བཅོས་ནུས་པ་ཆེ་རུ་བཏང་བ།

ཆ་འཕྲིན་འཁོར་རྒྱུག་བྱེད་པ་ཕུད། ཆ་འཕྲིན་ཅན་གྱི་བྱེད་ཐབས་ལ་བརྟེན་ནས་སྨན་བཅོས་ནུས་པ་ཡང་སྣུར་སྲིང་བྱེད་བཞིན་ཡོད།

གློ་བུར་དུ་བྱུང་བའི་དོན་རྐྱེན་ཁྲོད་མཐུན་སྦྱོར་སྨན་བཅོས་ཀྱི་ལེགས་ཆ་མངོན་གསལ་དེ་བས་དོད་པོ་ཡོད་ཅིང་། ཐེངས་ཤིག་བསམ་གྲུབ་རྩེ་ཆུས་ལྷན་ཤང་དུ་རླངས་འཁོར་གྱི་ལས་འཛོལ་ཚབས་ཆེན་ཞིག་ཐོན་པ་དང་། ལས་འཛོལ་ཐོན་ཡུལ་ནས་བསམ་གྲུབ་རྩེ་ཆུས་ལྟེ་བའི་སྨན་ཁང་བར་རླངས་འཁོར་བསྡད་ཚེ་ཆུ་ཚོད་གཅིག་ལྷག་ཙམ་འགོར་བ་དང་། ས་གནས་དེ་གའི་འཕྲོད་བསྟེན་ཁང་གིས་མྱུར་སྐྱོབ་རླངས་འཁོར་དང་སྨན་པ་བཏང་བ་དང་ཆབས་ཅིག བསམ་གྲུབ་རྩེ་ཆུས་ལྟེ་བའི་སྨན་ཁང་གིས་ཆ་འཕྲིན་ཅན་གྱི་མ་ལག་བརྒྱུད་མྱུར་སྐྱོབ་བྱ་རྒྱུར་རྒྱང་ཁྲིད་མཛུབ་སྟོན་བྱས་པ་རེད།

དུས་མཚུངས་ནད་པའི་གཞི་རྩའི་བདེ་ཐང་གནས་ཚུལ་དང་རྨས་སྐྱོན་ཕོག་པའི་གནས་ཚུལ་སོགས་ཀྱང་བརྒྱུད་བསྐུར་བྱས་པས་ལྟེ་བའི་སྨན་ཁང་གིས་སྔོན་ཚུད་ནས་གྲ་སྒྲིག་བྱེད་ཐུབ་སྟབས་མཐར་ནད་པ་བདེ་བླག་ངང་སྨན་ཁང་དུ་འབྱོར་ནས་སྐྱོབ་བཅོས་ཐུབ་པ་རེད། ཀྲང་མིང་དབྱང་གིས་ངོ་སྤྲོད་བྱས་པར་གཞིགས་ན། རིག་ལྡན་སྨན་བཅོས་གཅིག་མཐུན་ཚོགས་པའི་ལས་སྟེགས་བཙུགས་ཟིན་པའི་སྨན་བཅོས་ལས་ཁུངས་ནང་བསམ་གྲུབ་རྩེ་ཆུས་ལྟེ་བའི་སྨན་ཁང་དང་། སྡེ་ཁུལ་འཕྲོད་བསྟེན་ཞབས་ཞུའི་ལྟེ་གནས་ཁག་2 ཤང་གི་འཕྲོད་བསྟེན་ཁང་ཁག་10 གྲོང་ཚོའི་འཕྲོད་བསྟེན་ཁང་ཁག་161བཅས་ཚུད་ཅིང་། དེ་དག་ལ་གྲིབ་བརྙན་དང་། བརྟག་བཤེར། སྙིང་ཁམས་གློག་པར་བཅས་ས་ཁོངས་མཐུན་སྦྱོར་ལས་སྟེགས་ཆེན་པོ་གསུམ་བཙུགས་ནས་སྨན་ཁང་སྒྱུར་བ་དང་རྗེས་འདེད་ཞབས་ཞུ་མངོན་འགྱུར་ཐུབ་སྟེ་ས་ཁུལ་དང་། ཤང་། གྲོང་ཚོ་བཅས་ཀྱི་སྨན་བཅོས་དང་སྔོན་འགོག་མཉམ་འདྲེས་བྱས་ཐོག་སྨན་བཅོས་སྒྲིག་གཞིའི་ཞབས་ཞུའི་ནུས་པ་ཆེ་རུ་ནུས་ལྡན་ཕྱིན་ཡོད་པ་རེད།

མ་ལག་འཁོར་སྐྱོད་མ་གནས་ཆུང་དུ་བཏང་ནས་དོ་དམ་ལས་ཕྱོད་ཆེ་རུ་ཕྱིན་པ།

ཆིང་ཏའོ་གྲོང་ཁྱེར་གྱི་ཁག་བཅུ་པའི་བོད་སྐྱོར་ལས་བྱེད་ཤེས་ལྡན་པའི་ཚོགས་ཆུང་གི་སྣེ་ཁྲིད་པ་ཝང་ཏུང་གཡོད་ལ་སྣང་ཚུལ་ཞིག་གིས་བག་ཆགས་ཟབ་མོ་བཞག་ཡོད་པ་སྟེ། བོད་དུ་ཡོང་ནས་ཡུན་རིང་མ་སོང་གོང་། ཁོང་གིས་གཞི་རིམ་དུ་འཕྲོད་བསྟེན་ལས་དོན་ལ་བརྟག་ཞིབ་བྱེད་སྐབས། གཞི་རིམ་འཕྲོད་བསྟེན་ཁང་གི་ལས་དོན་པས་གྲངས་གཞི་སྣ་ཚོགས་ལ་ལྟ་བཤེར་བྱེད་པར་མ་ལག་མང་པོའི་ནང་ཕར་འཛུལ་ཚུར་འཛུལ་བྱེད་དགོས་པ་དང་ཐ་ན་ཕར་རྒྱུག་ཚུར་རྒྱུག་བྱས་ནས་གློག་ཀླད་མི་འདྲ་བ་སྤྱོད་དགོས་པ་ཤེས།

“བརྟག་ཞིབ་བྱས་པ་བརྒྱུད། ལས་ཀ་བྱེད་སྐབས་ལས་དོན་པ་གཅིག་གིས་མང་ཤོས་སྐབས་མ་ལག་ཁག་7ནང་འཛུལ་ནས་གྲངས་གཞི་སྣ་ཚོགས་འཚོལ་དགོས་པ་དང་། དེ་ལྟར་བྱས་ཀྱང་ཤོག་ཐོག་ཏུ་ལུས་པའི་གྲངས་གཞི་མང་པོ་ཞིག་ད་དུང་བེད་སྤྱོད་ནུས་ལྡན་ཐུབ་ཀྱི་མི་འདུག” དེར་བརྟེན། རིག་ལྡན་སྨན་བཅོས་གཅིག་མཐུན་ཚོགས་པའི་ལས་སྟེགས་ཤིག་སྐྲུན་པའི་བསམ་ཚུལ་དེ་བོད་སྐྱོར་འཆར་འགོད་ནང་བཅུག་པ་ཡིན་ཞེས་ཝང་ཏུང་གཡོད་ཀྱིས་ཕྱིར་དྲན་བྱས།

དུས་ཡུན་ལོ་གཉིས་ནང་། ཆིང་ཏའོ་གྲོང་ཁྱེར་གྱི་ཁག་བཅུ་པའི་བོད་སྐྱོར་ལས་བྱེད་ཤེས་ལྡན་པའི་ཚོགས་ཆུང་གིས་ཆིང་ཏའོ་ཧེར་སྐྱེ་དངོས་སྨན་བཅོས་མ་རྐང་ཚད་ཡོད་ཀུང་སི་དང་མཉམ་དུ་ས་གནས་དེ་གར་རིག་ལྡན་སྨན་བཅོས་གཅིག་མཐུན་ཚོགས་པ་ཞིག་རིམ་བཞིན་བཙུགས་པ་རེད།

དེ་ནས་བཟུང་བསམ་གྲུབ་རྩེ་ཆུས་ཀྱི་ས་ཁོངས་སྨན་བཅོས་འཕྲོད་བསྟེན་ལ་གཅིག་གྱུར་དོ་དམ་བྱུང་ཡོད། མ་ལག་དེ་བེད་སྤྱོད་བྱེད་འགོ་ཚུགས་རྗེས་མང་ཚོགས་ཀྱིས་སྨན་བཅོས་བྱེད་བདེ་པོ་བྱུང་བ་མ་ཟད། སྨན་བཅོས་ཁོངས་གཏོགས་ལ་སྟབས་བདེ་དེ་བས་མང་པོ་བྱུང་ཡོད།

ད་ཆ། མ་ལག་ནང་འཛུལ་ཚེ། སྨན་སྣ་ཚོགས་ཀྱི་མཛོད་ཉར་གནས་ཚུལ་གསལ་པོར་མཐོང་ཐུབ། སྨན་རྫས་གང་ཞིག་ཉུང་དུ་ཕྱིན་ཚེ་མ་ལག་གིས་དུས་ཐོག་ཏུ་དྲན་སྐུལ་བྱེད་ཀྱི་ཡོད། གལ་སྲིད་དུས་ཡུན་ཐུང་ངུའི་ནང་སྨན་རྫས་རིགས་ཤིག་ཟད་གྲོན་ཆེན་པོ་བྱུང་ཚེ། ལས་དོན་པས་རིམས་ནད་ཐོན་ཡོད་མེད་དང་དེ་བཞིན་དེར་དམིགས་སའི་རང་བཞིན་ལྡན་པའི་སྔོན་འགོག་ལས་དོན་སྤེལ་དགོས་མིན་ལ་དཔྱད་ཞིབ་བྱེད་ཆོག

བསམ་གྲུབ་རྩེ་ཆུས་འཕྲོད་བསྟེན་བདེ་ཐང་ཨུ་ལྷན་གྱི་ཀྲུའུ་རེན་གཞོན་པའི་འགན་འཁུར་མྱོང་བའི་ཆིང་ཏའོ་ཡི་བོད་སྐྱོར་ལས་བྱེད་པ་ཧྲའོ་ཝུའེ་ཡིས། རིག་ལྡན་སྨན་བཅོས་གཅིག་མཐུན་ཚོགས་པས་ད་དུང་སྲིད་གཞུང་ལ་རམ་འདེགས་བྱས་ནས་དོ་དམ་ཞིབ་ཚགས་ཅན་མངོན་འགྱུར་ཡོང་བར་བྱས་ཡོད་ཅེས་ངོ་སྤྲོད་བྱས།

སྔོན་ཆད། ལྗོངས་ཡོངས་ཀྱི་སྨན་བཅོས་གནས་ཚུལ་ཤེས་རྟོགས་བྱེད་དགོས་ཚེ་རིམ་པ་བཞིན་གནས་ཚུལ་གོང་ཞུ་བྱེད་དགོས་པས་གྲངས་གཞི་རྗེས་ལུས་ཐེབས་པ་དང་ཐིག་པོ་མེད།

ད་ཆ། བཀོད་འདོམས་ལྟེ་གནས་ཀྱི་བརྙན་ཤེལ་ཆེན་པོའི་ཐོག་སྨན་བཅོས་ཐོན་ཁུངས་བེད་སྤྱོད་གནས་ཚུལ་དང་། སྨན་བཅོས་འགན་བཅོལ་ཐེབས་རྩ་འཁོར་སྐྱོད་གནས་ཚུལ། སྤྱི་པའི་འཕྲོད་བསྟེན་ཞབས་ཞུའི་མྱུར་ཚད། སྨན་རྫས་མཛོད་ཉར་གནས་ཚུལ་སོགས་ཀྱི་གྲངས་གཞི་སྣ་ཚོགས་མངོན་ཡོད་པས་ལས་སྒོའི་ཐབས་ཇུས་དོ་དམ་དེ་བས་གནད་འཁེལ་བྱུང་ཡོད།

“བསམ་གྲུབ་རྩེ་ཆུས་ཀྱིས་ཆ་འཕྲིན་ཅན་ལ་བརྟེན་ནས་དམ་ཟབ་རྣམ་པའི་སྨན་བཅོས་གཅིག་མཐུན་ཚོགས་པ་འཛུགས་སྐྱོང་མགྱོགས་སུ་བཏང་སྟེ། གཞི་རིམ་གྱི་སྨན་བཅོས་ནུས་པ་ཆེ་རུ་ནུས་ལྡན་བཏང་ནས་མང་ཚོགས་ཀྱིས་ཁྱིམ་གྱི་སྒོ་རྩར་སྨན་བཅོས་ཐུབ་པར་བྱས་ཡོད”ཅེས་གཞིས་རྩེ་གྲོང་ཨུད་ཀྱི་རྒྱུན་ཨུ་དང་བསམ་གྲུབ་རྩེ་ཆུས་ཨུད་ཀྱི་ཧྲུའུ་ཅི་ཁྲེན་ཀང་གིས་བཤད།