ཉེ་ཆར་གསར་འགོད་པས་རང་སྐྱོང་ལྗོངས་སློབ་གསོ་ཐིང་ནས་ཤེས་རྟོགས་བྱས་པར་གཞིགས་ན། ད་ལོའི་སྟོན་ཀའི་སློབ་དུས་ནས་བཟུང་རང་ལྗོངས་ཀྱི་སློབ་གསོའི“འགན་ལེན་གསུམ”གྱི་གྲོན་དངུལ་དེ་སློབ་མ་རེར་ལོ་རེར་ཆ་སྙོམས་ཁ་གསབ་ཚད་གཞི་སྒོར་80མཐོ་རུ་བཏང་ནས་སྒོར་5700(གྲོང་གསེབ་ཀྱི་འོས་འགན་སློབ་གསོའི་སློབ་མའི་འཚོ་བཅུད་ལེགས་གཏོང་འཆར་གཞིའི་གྲོན་དངུལ་སྒོར་1000ཚུད་པ)ཟིན་རྒྱུ་རེད། 2025ལོར་རང་ལྗོངས་ཀྱིས“འགན་ལེན་གསུམ”གྱི་མ་དངུལ་སྒོར་དུང་ཕྱུར་33.64བཀོད་སྒྲིག་དོན་འཁྱོལ་བྱས་པར་སློབ་མ་ཁྲི་72.61ལ་ཕན་པ་ཐོབ་ཡོད་པ་རེད།

ཤེས་རྟོགས་བྱུང་བར་གཞིགས་ན། སློབ་གསོའི“འགན་ལེན་གསུམ”གྱི་སྲིད་ཇུས་ནི་ཏང་ཀྲུང་དབྱང་གིས་བོད་ལ་ཐུགས་ཁུར་རྒྱབ་སྐྱོར་དང་བོད་ཀྱི་སློབ་གསོར་ལག་བསྟར་བྱས་པའི་དམིགས་བསལ་གྱི་གཟིགས་སྐྱོང་སྲིད་ཇུས་ཤིག་རེད། རང་སྐྱོང་ལྗོངས་ཏང་ཨུད་དང་སྲིད་གཞུང་གི་བློ་བརྟན་འགྱུར་མེད་ཀྱི་འགོ་ཁྲིད་འོག སྲིད་ཇུས་དེ་1985ལོར་ལག་བསྟར་བྱས་པ་ནས་བཟུང་རྒྱུན་ཆད་མེད་པར་འཐུས་སྒོ་ཚང་དུ་ཕྱིན་པ་དང་འགན་སྲུང་ནུས་པ་རྒྱུན་ཆད་མེད་པར་མཐོ་རུ་ཕྱིན་ཡོད།

“སློབ་གསོའི‘འགན་ལེན་གསུམ’གྱི་སྲིད་ཇུས་ལག་བསྟར་བྱས་པ་དེས་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་། བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་བཀག་འཛིན་བཟོ་བའི་མི་འབོར་དང་། མི་སེམས། ཤེས་ལྡན་པ་བཅས་ཀྱི་གནད་དོན་ཐག་གཅོད་བྱེད་པར་སྐུལ་འདེད་གཏོང་བ། སློབ་གསོ་དྲང་གཞག་དང་གཞོན་ནུ་ལོ་ཆུང་སྐྱོན་བྲལ་ངང་འཚར་ལོངས་ཡོང་བར་སྐུལ་འདེད་གཏོང་བ་བཅས་ལ་ནུས་པ་གལ་ཆེན་ཐོན་ཡོད”ཅེས་ལྗོངས་སློབ་གསོ་ཐིང་ནོར་དོན་ཁྲུའུ་ཡི་ཁྲུའུ་ཀྲང་ཝང་གོ་ཧྭ་ཡིས་བརྗོད།