“གཞིས་རྩེ་གྲོང་ཁྱེར་སྨན་བཅོས་འགན་བཅོལ་ཅུས་ཀྱི་ལས་དོན་མི་སྣས་ལྗང་མདོག་བགྲོད་ལམ་བཙུགས་ནས་སྨན་བཅོས་འགན་བཅོལ་གྱི་འགྲོ་གྲོན་རྩིས་ཞུ་བྱས་ཏེ། ང་རང་སེམས་ཁྲལ་མེད་པར་མུ་མཐུད་སྨན་བཅོས་བྱེད་ཐུབ་པར་ཐུགས་རྗེ་ཆེ་ཞུ་རྒྱུ་ཡིན”ཞེས་ཁྲེང་ཏུའུ་ཧྭ་ཤིས་སྨན་ཁང་གི་ནད་ཁང་དུ་གཞིས་རྩེ་ནས་ཡོང་བའི་ནད་པ་ཞིག་གིས་སེམས་འགུལ་ཐེབས་བཞིན་བཤད།

ནད་པ་དེའི་ཁ་ཚ་དགོས་གཏུག་གི་གནད་དོན་ཐག་གཅོད་བྱེད་པ་ནི་གཞིས་རྩེ་གྲོང་ཁྱེར་གྱིས་སྤེལ་བའི་སྨན་བཅོས་འགན་སྲུང་གི“ལས་མི་བརྒྱུད་དགོས་པའི་སྨན་རིན་ཙག་ཙིག་རྩིས་ཞུའི”ཞབས་ཞུ་རེད།

ཤེས་རྟོགས་བྱུང་བར་གཞིགས་ན། སྨན་བཅོས་འགན་སྲུང་གི“ལས་མི་བརྒྱུད་དགོས་པའི་སྨན་རིན་ཙག་ཙིག་རྩིས་ཞུ”ཞེས་པ་ནི་འགན་བཅོལ་ནང་ཞུགས་མཁན་མི་སྣས་སྨན་བཅོས་བྱེད་པའི་བརྒྱུད་རིམ་ནང་། དམིགས་བསལ་རྒྱུ་རྐྱེན་དབང་གིས་སྨན་བཅོས་འགན་བཅོལ་མ་ལག་བརྒྱུད་ཐད་ཀར་དྲ་སྦྲེལ་མཇུག་རྩིས་རྒྱག་མ་ཐུབ་པར་རང་ཉིད་ཀྱིས་སྔོན་ལ་སྨན་བཅོས་འགྲོ་གྲོན་སྤྲོད་དགོས་པ་དང་། དེ་རྗེས་འགན་བཅོལ་ནང་ཞུགས་སའི་ས་གནས་ཀྱི་སྨན་བཅོས་འགན་བཅོལ་སྡེ་ཚན་ལ་འབྲེལ་ཡོད་དཔྱད་ཡིག་བསྐྱལ་ནས་སྨན་བཅོས་འགན་བཅོལ་རྩིས་ཞུ་རེ་ཞུ་བྱེད་སྟངས་ལ་ཟེར།

“སྤྱིར་བཏང་དུ་ནད་པས་སྨན་བཅོས་བྱེད་རིང་སྨན་བཅོས་འགན་བཅོལ་མ་ལག་བརྒྱུད་ཐད་ཀར་དྲ་སྦྲེལ་མཇུག་རྩིས་རྒྱག་ཐུབ། འོན་ཀྱང་ནད་པ་ཁ་ཤས་ཀྱིས་ཞིང་ཆེན་གཞན་དུ་སྨན་བཅོས་བྱེད་སྐབས་ཐོ་འགོད་བྱས་ཡོད་ཀྱང་ཐད་ཀར་མཇུག་རྩིས་རྒྱག་མ་ཐུབ་པ་དང་། ལ་ལས་ལྗོངས་ཡོངས་ཀྱི་དྲ་སྦྲེལ་སྨན་ཁང་དུ་སྨན་བཅོས་བྱེད་སྐབས་མ་ལག་ལ་སྐྱོན་ཤོར་བའི་དབང་གིས་དུས་ཐོག་ཏུ་གཱ་དྲད་ནས་མཇུག་རྩིས་རྒྱག་ཐུབ་ཀྱི་མེད། ཡང་ལ་ལའི་སྤྱི་ཚོགས་འགན་སྲུང་གཱ་བོར་བརླག་དུ་སོང་བ་དང་ཆག་སྐྱོན་བྱུང་བའམ་ཡང་ན་གཱ་བཟོ་ཡུན་འགྱང་བ་སོགས་ཀྱི་རྒྱུ་རྐྱེན་སྣ་ཚོགས་ཡོད། རྒྱུ་རྐྱེན་དེ་དག་གི་དབང་གིས་སྨན་བཅོས་འགན་བཅོལ་མ་ལག་བརྒྱུད་ནས་ཐད་ཀར་དྲ་སྦྲེལ་མཇུག་རྩིས་རྒྱག་མ་ཐུབ་པའི་སྐབས། ནད་པས་རང་ཉིད་ཀྱིས་འགྲོ་གྲོན་ཚང་མ་སྔོན་སྤྲོད་མི་བྱེད་ཀ་མེད་ཡིན་པ་དང་། དེ་ནས་འབྲེལ་ཡོད་དཔྱད་གཞི་དྲ་ཐོག་གམ་ཡང་ན་དངོས་སུ་བསྐྱལ་ཏེ་སྨན་རིན་རྩིས་ཞུ་བྱེད་དགོས། དེ་ལས་ནད་པ་དང་དེའི་ཁྱིམ་ཚང་ལ་དཔལ་འབྱོར་གྱི་ཁུར་པོ་ཆེན་པོ་བཟོ་གི་ཡོད”ཅེས་གཞིས་རྩེ་གྲོང་ཁྱེར་སྨན་བཅོས་འགན་བཅོལ་ཅུས་ཀྱི་ལས་དོན་མི་སྣས་གསལ་འགྲེལ་བྱས།

འགན་བཅོལ་ནང་ཞུགས་མཁན་མི་སྣར་སྨན་བཅོས་བྱེད་སྐབས་འཕྲད་པའི་མ་དངུལ་སྔོན་སྤྲོད་ཀྱི་གནོན་ཤུགས་ཆུང་དུ་གཏོང་ཆེད། འདི་ལོ་ནས་བཟུང་གཞིས་རྩེ་གྲོང་ཁྱེར་སྨན་བཅོས་འགན་བཅོལ་ཅུས་ཀྱིས་དམངས་འཚོའི་དགོས་མཁོ་དང་ལེན་ཧུར་ཐག་བྱས་ཏེ། དྲ་ཐོག་དང་དྲ་ཕྱི་གཉིས་ནས་སྨན་བཅོས་འགན་བཅོལ་རྩིས་ཞུ་བྱེད་སྟངས་ཞིབ་ཚགས་བཟོས་ཡོད། དྲ་ཐོག་ཏུ་འགན་བཅོལ་ནང་ཞུགས་མཁན་མི་སྣས་སྐད་འཕྲིན་གྱི་བྱ་རིམ་ཆུང་གྲས“བོད་ལྗོངས་སྨན་བཅོས་འགན་བཅོལ་སྤྱི་རྟགས”བརྒྱུད་དེ། འབྲེལ་ཡོད་དཔྱད་གཞི་སྟབས་བདེ་བའི་ངང་སྐྱེལ་ཆོག་པ་དང་། སྒྲུབ་གཉེར་མི་སྣས་ཞིབ་དཔྱད་བྱས་རྗེས་མྱུར་དུ་སྨན་བཅོས་བྱས་ཚུལ་ཐོ་འགོད་བྱས་ནས་རྩིས་ཞུའི་བརྒྱུད་རིམ་ནུས་ཆེའི་ངང་ལེགས་གྲུབ་བྱེད་ཐུབ། དྲ་ཕྱིར་སྨན་བཅོས་འགན་བཅོལ་སྐར་ཁུང་གིས་ཉིན་རེར་རེ་ཞུའི་དཔྱད་ཡིག་བསྡུ་རུབ་དང་ཐོ་འགོད་ཞིབ་ཕྲ་བྱེད་པ་དང་། དེ་ནས་ཉིན་གཉིས་པར་དཔྱད་གཞི་དག་རྒྱབ་སྟེགས་སུ་བཏང་ནས་ཞིབ་བཤེར་བྱས་ཏེ་རྩིས་ཞུ་བྱེད་ཀྱི་ཡོད།

“ལས་མི་བརྒྱུད་དགོས་པའི་སྨན་རིན་ཙག་ཙིག་རྩིས་ཞུའི་སྐབས་སུ་འཛིན་ཤོག་རག་པའི་ཉིན་ནས་རྩིས་པའི་ལས་ཀའི་ཉིན་30ནང་ལེགས་སྒྲུབ་བྱ་རྒྱུའི་གཏན་འབེབས་བྱས་ཡོད་མོད། འོན་ཀྱང་ང་ཚོས་ཞབས་ཞུ་ལེགས་སུ་བཏང་བ་བརྒྱུད་སྒྲུབ་གཉེར་དུས་ཚོད་ལས་ཀའི་ཉིན་10བར་ཉུང་དུ་བཏང་ཡོད”ཅེས་གཞིས་རྩེ་གྲོང་ཁྱེར་སྨན་བཅོས་འགན་བཅོལ་ཅུས་སྨན་བཅོས་འགན་བཅོལ་ལྟེ་གནས་ཀྱི་ཀྲུའུ་རེན་གཞོན་པ་ལྷག་པ་བཀྲ་ཤིས་ཀྱིས་བཤད།

བསྡོམས་རྩིས་བརྒྱབ་པར་གཞིགས་ན། འདི་ལོ་ཚུན་དུ། གཞིས་རྩེ་གྲོང་ཁྱེར་སྨན་བཅོས་འགན་བཅོལ་ཅུས་ཀྱིས“ལས་མི་བརྒྱུད་དགོས་པའི་སྨན་རིན་ཙག་ཙིག་རྩིས་ཞུ”ཁྱོན་441ལེགས་གྲུབ་བྱས་པར། རྩིས་ཞུའི་དངུལ་གྲངས་སྒོར་ཁྲི་520.75ཟིན་པ་དང་མགྱོགས་ཤོས་སུ་དུས་ཡུན་ཉིན་7ནང་སྒྲུབ་གཉེར་ཐུབ་ཡོད།

“ང་ཚོས་ད་དུང་ནད་པའི་རྗེས་མཐུད་སྨན་བཅོས་གནས་ཚུལ་ལ་མུ་མཐུད་རྗེས་སྙེག་བྱས་ནས་སྨན་བཅོས་འགན་བཅོལ་སྲིད་ཇུས་ཀྱི་སྦྲེལ་མཐུད་ཞབས་ཞུ་ཡག་པོ་བྱ་རྒྱུ་མ་ཟད། སྨན་བཅོས་འགྲོ་གྲོན་མཐོ་བའི་གྱོད་དཔེར་དམིགས་ནས་ཞིབ་བཤེར་དང་གཏོང་སྤྲོད་གོ་རིམ་ལེགས་སུ་བཏང་སྟེ། འགན་བཅོལ་ནང་ཞུགས་པའི་མང་ཚོགས་ཀྱི་ཐོབ་ཐང་དུས་ཐོག་ཏུ་དོན་འཁྱོལ་ཐུབ་རྒྱུའི་འགན་ལེན་བྱ་རྒྱུ་ཡིན”ཞེས་ལྷག་པ་བཀྲ་ཤིས་བཤད་པ་རེད།