2008ལོར་ཀྲང་ཡུས་ནུབ་རྒྱུད་འཆར་གཞིའི་དང་བླངས་པར་ཞུགས་ནས་ཐོག་མར་བོད་ལ་ཡོང་བ་དང་། 2010ལོར་བོད་རང་སྐྱོང་ལྗོངས་ཀྱི་གཞུང་ཞབས་པའི་ཡིག་རྒྱུགས་ནང་སྦྱངས་འབྲས་ཨང་དང་པོ་ཐོབ་ནས་ད་བར་བོད་དུ་ལས་ཀ་བྱས་ཏེ་ལོ་17ཙམ་འགྲོ་གི་ཡོད།

ཀྲང་ཡུས་ནི་ཧོ་ནན་ཞིང་ཆེན་ཁྲང་ཀེ་གྲོང་ཁྱེར་ནས་ཡིན་པ་དང་ཀྲུང་གོ་ཞིང་ལས་སློབ་ཆེན་ནས་སློབ་མཐར་ཕྱིན། ཕ་མ་གཉིས་ནི་ས་གནས་དེ་གའི་གཞི་རིམ་གྱི་སློབ་གསོའི་ལས་དོན་པ་ཡིན་པས་བུ་མོ་སློབ་ཆེན་གྱི་དགེ་རྒན་ཞིག་བྱ་རྒྱུའི་རེ་བ་བྱས་མོད། འོན་ཀྱང་ཆུང་བའི་དུས་ནས་ཀྲང་ཡུས་ཀྱི་ཕུགས་འདུན་ནི་རྒྱང་རིང་གི་ཡུལ་ལུང་འགྲིམ་འདོད་པ་རེད།

2008ལོར་ཀྲང་ཡུས་སློབ་གྲྭ་ཆེ་མོ་བའི་དང་བླངས་ཞབས་ཞུའི་ནུབ་རྒྱུད་འཆར་གཞིར་ཞུགས། ལོ་དེར་བོད་ཀྱིས་ལྗོངས་ཕྱི་ནས་དང་བླངས་པ་བསྡུ་བའི་མི་གྲངས་ཧ་ཅང་ཉུང་ཡང་། ཁོང་སྟབས་ལེགས་པར་དེའི་ནང་ཚུད་ཡོད།

སྐབས་དེ་དུས་ཀྲང་ཡུས་ལ་བོད་ཀྱི་གཞི་རིམ་དུ་ལས་ཀ་བྱེད་རྒྱུའི་བསམ་བློ་ཡོད་ལ། ཕ་མའི་བློ་འདོད་ལྟར་པེ་ཅིང་དུ་ཞིབ་འཇུག་སློབ་མའི་ཡིག་རྒྱུགས་གཏོང་རྒྱུའི་བསམ་བློ་ཡང་ཡོད། ལས་དབང་ཡིན་ཡང་སྲིད་དེ། 2010ལོར་བོད་ཀྱི་གཞུང་ཞབས་པའི་ཡིག་རྒྱུགས་ནང་ཁོང་ལ་གྲུབ་འབྲས་ཨང་དང་པོ་ཐོབ་པས་བོད་དུ་མུ་མཐུད་ལས་སྒྲུབ་བྱ་རྒྱུའི་གདམ་ག་བྱས།

2010ལོའི་ཟླ་8པར་ཀྲང་ཡུས་ལྷ་ས་གྲོང་ཁྱེར་ཁྲེང་ཀོན་ཆུས་གླིང་ཕྲན་གཉིས་ཁྲོམ་གཞུང་དོན་གཅོད་ཁང་གི་ལས་དོན་པར་གྱུར། དེ་རྗེས་ཀྱི་ལོ་15ཡི་ནང་གཞི་རིམ་གྱི་ཁྲོམ་གཞུང་དོན་གཅོད་ཁང་དང་། ཁྲེང་ཀོན་ཆུས་ཐད་གཏོགས་ལས་ཁུངས། མཐའ་མཚམས་གྲོང་གསེབ། ལྷ་ས་གྲོང་ཁུལ་སོགས་སུ་བསྐྱོད་དེ། རྨང་བརྟན་དམངས་ཕན་གྱི་གཞི་རིམ་རྩ་འཛུགས་འཛུགས་སྐྱོང་དང་། སློབ་གྲྭ་ཆེ་འབྲིང་ཆུང་གསུམ་གྱི་སློབ་མའི་བསམ་བློ་ཆབ་སྲིད་ཀྱི་སློབ་གསོ་སོགས་ཀྱི་ལས་ཀ་བྱེད་མྱོང་ཡོད། དེ་དག་ལས་ཀྲང་ཡུས་ཀྱི་མི་ཚེའི་མྱོང་བརྒྱུད་རིམ་པར་འབེལ་དུ་སོང་ཞིང་། ཆུང་དུས་ཀྱི་ཕུགས་བསམ་དང་འཚོ་བའི་ལག་ལེན་ཟབ་མོ་ཡང་ཕྱིས་སུ་ཁོང་གིས་བོད་དུ་གཞི་ཚུགས་པ་དང་མེས་རྒྱལ་གྱི་མཐའ་མཚམས་ལ་ཞབས་འདེགས་ཞུ་བའི་ཞིབ་ཕྲའི་བྱ་སྤྱོད་ཅིག་ཏུ་གྱུར།

ཀྲང་ཡུས་ཀྱིས། ཁྲོམ་གཞུང་དོན་གཅོད་ཁང་དུ་ལས་ཀ་བྱས་པ་ལས་ཕྱིས་སུ་ངའི་ལས་ཀའི་རིན་ཐང་ལྟ་བར་ཤུགས་རྐྱེན་ཆེན་པོ་ཐེབས་པ་དང་། རང་ཉིད་དགའ་ཤོས་ཀྱི་ལས་ཀ་སློབ་གསོའི་ལས་དོན་ཡིན་པའང་རྟོགས་ཞེས་བཤད། གཞི་རིམ་དུ་སྦྱོང་བརྡར་ལོ་3བྱས་རྗེས་2014ལོའི་ཟླ་དང་པོར་རང་སྐྱོང་ལྗོངས་ཀྱི་གཞུང་ཞབས་པའི་གདམ་གསེས་ཡིག་རྒྱུགས་བརྒྱུད་ཁོང་རང་སྐྱོང་ལྗོངས་སློབ་གསོ་ཐིང་གི་ལས་ཀར་རྒྱུགས་འཕྲོད།

ཀྲང་ཡུས་ཀྱིས་སློབ་མའི་བསམ་བློ་ཀུན་སྤྱོད་ཀྱི་སློབ་གསོ་དེ་འབྱུང་འགྱུར་གྱི་རྨང་གཞིའི་འདུ་འགོད་ལ་འབྲེལ་བ་ཡོད། དེ་མི་གསོ་སྐྱོང་བྱེད་པའི་གལ་ཆེའི་ནང་གི་འགངས་ཆེ་ཞིག་ཡིན་ལ། བོད་ཀྱི་སློབ་གསོའི་བཀྲག་མདངས་འཚེར་ས་ཞིག་ཀྱང་རེད་ཅེས་བཤད།

“སློབ་གསོ་མི་སེམས་སུ་ཟུག་དགོས་ན། ཆུང་དུས་ནས་རྒྱལ་གཅེས་ཁྱིམ་གཅེས་ཀྱི་སློབ་གསོ་རྒྱག་དགོས་པ་མ་ཟད། ཆ་རྐྱེན་དང་གོ་སྐབས་ནུས་པས་ལྕོགས་ཚོད་ཀྱིས་བསྐྲུན་ནས་དགེ་རྒན་དེ་བས་མང་བས་མི་གསོ་སྐྱོང་གི་ཐོག་མའི་བསམ་འདུན་བརྟན་སྲུང་དང་རང་ཉིད་ཀྱི་བྱང་ཚད་མཐོ་རུ་གཏོང་དགོས”སློབ་གསོའི་ཆ་འཕྲིན་ཅན་གྱི་བྱེད་ཐབས་ལ་བརྟེན་ནས་སྤུས་ལེགས་ཀྱི་སློབ་གསོའི་ཐོན་ཁུངས་སློབ་གྲྭ་ཚང་མར་ཁྱབ་པར་བྱེད་པའམ་ཡང་ན་གོ་སྐབས་དེ་བས་མང་བ་བཏོད་དེ་བོད་ཀྱི་དགེ་སློབ་རྣམས་ལྗོངས་ཕྱིར་ལྟ་སྦྱོང་དུ་བསྐྱོད་པ་སོགས། ཀྲང་ཡུས་ཀྱིས་སློབ་གསོ་བརྒྱུད་ནས་བོད་ཀྱི་ཕྲུ་གུར་ཕྱི་ཕྱོགས་ལ་ལྟ་བའི་སྐར་ཁུང་ཞིག་གཏོད་གང་ཐུབ་བྱེད་དགོས་པའི་ངོས་འཛིན་བྱེད་ཀྱི་ཡོད།

ཀྲང་ཡུས་ཀྱིས་རང་ཉིད་ནི་བོད་ཀྱི་སློབ་གསོ་འཕེལ་རྒྱས་ཀྱི་མྱོང་བརྒྱུད་མཁན་དང་། ལག་ལེན་པ། ཟིན་ཐོ་འགོད་མཁན། འཚོལ་ཞིབ་མཁན་བཅས་ཡིན་པར་སྤོབས་པ་ཆེན་པོ་སྐྱེ་གི་འདུག འབྱུང་འགྱུར་ངས་མུ་མཐུད་འབད་བརྩོན་བརྒྱུད་ནས་ཉེ་འགྲམ་གྱི་མིར་བྱ་བ་དངོས་དེ་བས་མང་བ་སྒྲུབ་པར་སྣེ་ཁྲིད་བྱས་ཏེ། བོད་ཀྱི་སློབ་གསོ་བརྟན་པོའི་ངང་མདུན་ཕྱོགས་སུ་འཕེལ་རྒྱས་དང་བོད་ཀྱི་མི་དམངས་ལ་བདེ་སྣང་དང་ཐོབ་སྣང་དེ་བས་མང་བ་ཐོབ་པར་བྱེད་ཀྱི་ཡིན་ལ། བོད་ཀྱི་སློབ་གསོའི་འཕེལ་རྒྱས་ཀྱི“རྨང་རྡོ”ལྟ་བུ་ཞིག་ཀྱང་བྱེད་འདོད་ཡོད་ཅེས་བཤད།