འདི་ནི་ལྷ་ས་གྲོང་ཁྱེར་ཁྲེང་ཀོན་ཆུས་བུ་བཅོལ་ཁང་བརྒྱད་པའི་ཕྲུ་གུ་ཚོས་འཁྲབ་སྟོན་བྱེད་བཞིན་པ།

ཁམ་བུའི་མེ་ཏོག་རབ་ཏུ་བཞད་ཅིང་ཕྱེ་ལེབ་སྒེག་མོས་གར་སྟབས་ལང་ལིང་སྒྱུར་བའི་དཔྱིད་དུས་ཀྱི་ཉིན་ལ། གསར་འགོད་པ་དང་བཅས་པ་ཞོགས་པའི་བསིལ་རླུང་དང་བསྡོངས་ཏེ་རྐང་ཐང་མར་གནའ་གྲོང་ལྷ་སའི་ར་མོ་ཆེའི་སྲང་ལམ་བརྒྱུད། ལྷ་ས་གྲོང་ཁྱེར་ཁྲེང་ཀོན་ཆུས་བུ་བཅོལ་ཁང་བརྒྱད་པར་བཅར་འདྲིར་བསྐྱོད།

སློབ་གྲྭའི་རྒྱལ་སྒོ་མ་འཛུལ་གོང་ནས་ཕྲུ་གུ་ཚོའི་སྐད་སྒྲ་རྣ་ལམ་དུ་ལྷང་ལྷང་གྲགས་ཡོང་། རྒྱལ་སྒོའི་གཞོགས་གཡོན་དུ་ཕྲུ་གུའི་རྩེད་ཆས་ཆ་ཚང་བསྒྲིགས་ཡོད་ཅིང་། སྒེའུ་ཁུང་ནས་སློབ་ཁང་ནང་དུ་ལྟ་སྐབས་དགེ་རྒན་གྱིས་ལག་བརྡ་བྱེད་བཞིན་ཕྲུ་གུ་ཚོར་གཞས་སློབ་བཞིན་འདུག ང་ཚོ་ཡོང་བ་མཐོང་བ་དང་རྒན་ལགས་ཀྱིས་སློབ་ཚན་ཁྲིད་མཚམས་བཞག་ནས་ང་ཚོའི་གམ་དུ་ཡོང་།

སྐབས་དེར་ཕྲུ་གུ་ཁ་ཤས་སློབ་ཁང་གི་སྒོ་ཁར་དོན་ཡོང་བ་དང་། ཁྲ་ཆུང་མིག་ཟུང་ཀེམ་ཀེམ་དུ་གཡོ་བཞིན་ང་ཚོར་ལྟ་བཞིན་འདུག

སློབ་ཁང་གི་གྱང་ལྡེབས་སུ་ཤོག་བུའི་མེ་ཏོག་སྙིང་རྗེ་པོ་ཡུག་གཅིག་ཏུ་སྦྱར་བ་ཤིན་ཏུ་མངོན་གསལ་དོད་ཅིང་། དེ་དག་ནི་རྒན་ལགས་ཁོང་རྣམ་པའི་ཕྱག་སོར་ལས་ཐོན་པའི་སྒྱུ་རྩལ་གྱི་བརྩམས་ཆོས་མང་པོའི་ཁྲོད་ནས་ངོམ་རིན་ཆོག་པ་ཞིག་ཡིན་པ་གོར་མ་ཆག

འཁྲབ་སྟོན་སྐབས་སུ་ཕྲུ་གུ་ཚོས་གྱོན་པ་གསར་རྐྱང་རེ་བརྗེས་ཡོད་ཅིང་། བུ་ཚོས་ཆེད་མངགས་རྐང་ལྷམ་གསར་པ་རེ་གྱོན་པ་དང་ལག་པ་གཡུག་གཡུག་བྱེད་ཀྱིན་གཞས་གཏོང་བ་དང་། བུ་མོ་ཚོའི་མཁུར་ཚོས་དང་མཆུ་ཏོར་རྒན་ལགས་ནས་མཚལ་དམར་བྱུགས་ཤིང་། རྐང་པ་ཀྲབ་ཙམ་ཀྲབ་ཙམ་གྱིས་ཞབས་བྲོ་འཁྲབ་ནས། འགུལ་ཤེས་པའི་ཨ་ལད་པད་གོག་ཇི་བཞིན་ཡི་གར་འོང་།

གཞན་ཡང་། སློབ་གྲྭས་བྱིས་པའི་རིག་རྩལ་འཁྲབ་སྟོན་གྱི་བྱེད་སྒོ་སྤེལ་བ་ཕུད། བརྗོད་དོན་གཙོ་བོའི་འཛིན་ཚོགས་འཚོགས་པ་དང་། སྒྲོག་སྦྱང་འགྲན་བསྡུར་སྤེལ་བ། རྒྱལ་དར་བསྒྲེངས་ཤིང་རྒྱལ་གླུ་གཏོང་བ་སོགས་སྣ་མང་ཕུན་སུམ་ཚོགས་པའི་བྱེད་སྒོ་སྤེལ་ལ། དགེ་རྒན་རྣམ་པས་སློབ་མ་ཚོར“བོད་ཀྱི་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་པའི་དྲན་གསོའི་ཉིན་མོ”ཇི་ལྟར་བྱུང་བ་དང་། ཞིང་བྲན་ལམ་ལུགས་ཞེས་པ་ཅི་ཞིག་ཡིན་པ། རྒྱུ་རྐྱེན་གང་ལ་བརྟེན་ནས་ཞིང་བྲན་ལམ་ལུགས་ཆགས་པ་དང་། དྲན་གསོའི་ཉིན་མོ་དེ་འདྲ་ཞིག་གཏན་འཁེལ་བྱེད་དགོས་པའི་དོན་སྙིང་སོགས་འགྲེལ་བཤད་ཁ་གསལ་བརྒྱབ་པ་རེད།

སློབ་སྤྱི་ལྷག་ཆུང་གི་ངོ་གདོང་ལས་འཛུམ་མདངས་འཕྱུར་ཞིང་། ཁོང་གིས་སློབ་མའི་སློབ་གསོ་ནི་དགེ་རྒན་ཕྱོགས་གཅིག་པུའི་སློབ་གསོ་དང་ལྟ་སྐྱོང་ལ་བརྟེན་ན་མི་འདང་བས། ཁྱིམ་ཚང་སློབ་གསོ་དང་དེ་བཞིན་སྤྱི་ཚོགས་ཀྱི་སློབ་གསོའི་གཞོགས་འདེགས་དང་ཁ་འབྲལ་དུ་མི་རུང་། དེ་བས་ཕྲུ་གུ་ཚོའི་འཚར་ལོངས་ལ་དགེ་རྒན་དང་ཁྱིམ་ཚང་། སྤྱི་ཚོགས་ཡོངས་ཀྱིས་དོ་ཁུར་བྱེད་དགོས་ཞེས་བཤད།

སློབ་མ་ཚོས་སྐད་གསང་མཐོན་པོས་གླུ་དབྱངས་ལེན་པ་དང་མགྲིན་པ་གཟེངས་སུ་བཏེགས་ནས་སྒྲོག་སྦྱང་འགྲན་བསྡུར་སོགས་བརྒྱུད། ཏང་ལ་བསྟོད་གླུ་ཕུལ་ཞིང་རྒྱལ་ཁབ་ལ་དགའ་ཞེན་ཆེན་པོ་མཚོན་པར་བྱས། མ་འོངས་པར་ཡིད་ཆེས་ཀྱིས་ཁེངས་པ་དང་རེ་བས་ཕྱུག་པའི་སྟངས་སྟབས་རེ་རེ་ལས། དུས་ནམ་ཡང་ཏང་གི་རྗེས་སུ་འབྲང་བ་དང་རྒྱང་སྐྱོད་ཀྱི་ལམ་བུ་གསར་པར་ཕྱོགས་པའི་ཆོད་སེམས་བརྟན་པོ་མཚོན་པར་མ་ཟད། འཁྲུག་ཆ་དོད་ལ་སྣ་མང་ཕུན་སུམ་ཚོགས་པའི་བྱིས་པའི་རིག་རྩལ་འཁྲབ་སྟོན་ལས་ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ་བའི་མདུན་ལྗོངས་མཛེས་པོ་ཞིག་དགེ་སློབ་ཀུན་གྱི་མིག་ལམ་དུ་མངོན་པར་བྱས།

སློབ་མ་ཕུལ་བྱུང་ཁག་གཅིག་ལ་དེ་ཉིན་རྒན་ལགས་རྣམ་པས་རང་ངོ་མས་བཟོས་པའི་མེ་ཏོག་ཆུན་པོ་དང་སྤུས་ཀ་དག་པའི་སློབ་ཆས་སོགས་བྱ་དགར་སྤྲད་པ་རེད།