ཉེ་ཆར། བོད་ཀྱི་གཞོན་ནུ་ལོ་ཆུང་གི་ལག་ལེན་སློབ་གསོའི་རྟེན་གཞིའི་2025ལོའི་འཆར་ཅན་དགའ་མོས་འཛིན་གྲྭ་རང་སྐྱོང་ལྗོངས་བྱིས་པའི་ཕོ་བྲང་དུ་སློབ་འགོ་ཚུགས་པ་རེད། ད་ཐེངས་ཀྱི་བྱེད་སྒོ་ནི་བོད་ཀྱི་གཞོན་ནུ་ལོ་ཆུང་གི་ལག་ལེན་སློབ་གསོའི་རྟེན་གཞིས་གཙོ་གཉེར་བྱས་ཤིང་། དེའི་དམིགས་ཡུལ་ནི་གཞོན་ནུ་ལོ་ཆུང་ལ་ཤེས་བྱའི་རྒྱ་མཚོ་དང་དགའ་མོས་ཀྱི་སྐྱེད་ཚལ་དུ་བགྲོད་པའི་སྦྲེལ་ཟམ་ཞིག་བསྐྲུན་ཏེ། ཁོང་ཚོར་རིན་མེད་དུ་སྤྲོ་སྣང་འཕེལ་སའི་ལས་སྟེགས་བཟང་པོ་ཞིག་མཁོ་འདོན་བྱ་ཆེད་རེད།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་དགའ་མོས་འཛིན་གྲྭས་ལོ་ཚོད་མི་འདྲ་བའི་ཕྲུ་གུའི་ལུས་སེམས་འཚར་ལོངས་ཀྱི་ཁྱད་ཆོས་དང་ཁོང་ཚོའི་དགའ་མོས་ལ་གཞིགས་ཏེ། སྔ་འབྱོར་སྔ་ཐོབ་དང་ཁྱིམ་ཚང་གི་དཔལ་འབྱོར་ལ་དཀའ་ངལ་ཡོད་མཁན་སློབ་མ་དང་གཞིས་ལུས་བྱིས་པ་སོགས་དམིགས་བསལ་ཚོགས་སྤྱིས་སྔོན་ལ་ཐོ་འགོད་ཆོག་པའི་རྩ་དོན་ལྟར། སློབ་མ་390རིན་མེད་དུ་བསྡུ་བ་དང་གསོ་སྦྱོང་ཚོགས་ཐུན་1680བཀོད་སྒྲིག་བྱེད་རྩིས་ཡོད་པར། ལུས་རྩལ་དང་། རི་མོ། ཞབས་བྲོ་སོགས་རིགས་ཆེ་གྲས་བདུན་ཚུད་ཡོད་པ་དང་། རྐང་རྩེད་སྤོ་ལོའི་འཛིན་གྲྭ་དང་། རང་རྒྱལ་གྱི་སྲོལ་རྒྱུན་རི་མོའི་འཛིན་གྲྭ བོད་ཡིག་ཡིག་གཟུགས་འཛིན་གྲྭ་སོགས་འཛིན་གྲྭ་22བཙུགས་ཡོད་པ་རེད། དགེ་རྒན་གྱི་དཔུང་ཁག་ནང་སྒྱུ་རྩལ་སློབ་གླིང་དང་སློབ་གྲྭ་དང་དེ་བཞིན་ཆེད་ལས་ཚོགས་པའི་བསླབ་པ་རྒན་གྲས་དང་ལས་རིགས་ཀྱི་ཕུལ་བྱུང་མི་སྣ་འདུས་ཡོད།