སྡེ་ཁུལ་དུ་བཙུགས་པའི་བོད་སྨན་ཁང་།
ཉེ་ཆར། གསར་འགོད་པ་གྲྭ་བཞི་གྲོང་གསར་སྡེ་ཁུལ་དུ་བཙུགས་པའི་བོད་སྨན་ཁང་དུ་སྐྱོད་སྐབས། སྒོ་རྩར་བང་རིང་པོ་བསྒྲིགས་པའི་སྨན་པ་བསྟེན་མཁན་ནང་གྲྭ་བཞི་གྲོང་གསར་སྡེ་ཁུལ་གྱི་གྲོང་མི་དང་ཕར་འགྲོ་ཚུར་འོང་བྱེད་མཁན་གྱི་གྲོང་མི་འདུག
གྲྭ་བཞི་གྲོང་གསར་སྡེ་ཁུལ་གྱི་ཏང་སྤྱི་ཁྱབ་ཀྲི་པུའི་ཧྲུའུ་ཅི་བསྟན་འཛིན་ངག་དབང་གིས་ངོ་སྤྲོད་བྱས་དོན། རྒན་རྒོན་གྱི་བདེ་ཐང་ཞབས་ཞུའི་དགོས་མཁོ་སྐོང་ཆེད། གྲྭ་བཞི་གྲོང་གསར་སྡེ་ཁུལ་གྱིས་སྡེ་ཁུལ་གྱི་བོད་སྨན་ཁང་བཙུགས་པ་མ་ཟད། བོད་ལྗོངས་བོད་ལུགས་གསོ་རིག་སློབ་ཆེན་དང་བྷོ་ཁམས་བོད་ལུགས་སྨན་ཁང་གི་རིགས་གཅིག་མཁས་ཅན་གདན་དྲངས་ཏེ། “ཀྲི་པུའུ་སྟོང་དང་ཏང་ཡོན་ཁྲི”ཡིས་སྡེ་ཁུལ་དུ་ཞབས་འདེགས་ཞུ་བའི་བརྗོད་དོན་གཙོ་བོའི་བྱེད་སྒོ་སྤེལ་ཏེ་ཁོངས་གཏོགས་ཁུལ་གྱི་རྒན་རྒོན་ཚོར་རིན་མེད་ངང་བདེ་ཐང་བློ་འདྲི་དང་འོས་འགན་སྨན་བཅོས་བྱས་ཡོད།
གསར་འགོད་པ་བོད་སྨན་ཁང་དུ་སྐྱོད་སྐབས། རྐུབ་སྟེགས་གྲལ་སྟར་བསྒྲིགས་ནས་འདུག་ལ། སྨན་པས་རྩ་བརྟག་ས་དང་། སྐབས་འཕྲལ་གྱི་ནད་དཔྱད་ཉལ་ཁྲི། གྲལ་འགྲིག་པའི་སྨན་སྒམ་བཅས་མཐོང་བྱུང་། བསྟན་འཛིན་ངག་དབང་གིས། གྲྭ་བཞི་གྲོང་གསར་སྡེ་ཁུལ་གྱིས་བཙུགས་པའི་བོད་སྨན་ཁང་དེ་བྷོ་ཁམས་བོད་ལུགས་སྨན་ཁང་དང་མཉམ་ལས་བྱས་ཏེ་བཙུགས་པ་ཞིག་རེད། སྨན་ཁང་གི་རིགས་གཅིག་མཁས་ཅན་གྱིས་ཉིན་ལྟར་རིན་མེད་ངང་རྩ་ལྟ་བ་དང་ནད་པས་སྨན་བཅོས་འགན་བཅོལ་གཱ་ནས་སྨན་རིན་ཡང་སྤྲོད་ཆོག་ཅེས་བརྗོད།
གྲོང་མི་ཚེ་རིང་གིས། “ལོ་གསར་གོང་ངའི་བཟའ་ཟླར་གྲིབ་སྐྱོན་ཕོག་ནས་སྨན་ཁང་མང་པོ་ཞིག་ཏུ་ཕྱིན་ནས་སྨན་བཅོས་བྱས་ཀྱང་དྲག་སྐྱེད་དེ་ཙམ་བྱུང་མ་སོང་། བྷོ་ཁམས་བོད་ལུགས་སྨན་ཁང་གི་སྨན་པ་ཨོ་ཡོ་བསོད་ནམས་ཚེ་རིང་ལགས་གསེར་ཁབ་རྒྱག་མཁས་པོ་ཡོད་པ་གོ་ཐོས་བྱུང་བས་བཟའ་ཟླ་ཁྲིད་དེ་ནད་ལྟ་བར་ཡོང་བ་ཡིན། གསེར་ཁབ་རྒྱག་པ་དང་སྨན་ཐུན་ཁ་ཤས་བཟས་རྗེས་ཡག་པོ་དྲག་འདུག་པས་སྨན་པ་ཨོ་ཡོ་བསོད་ནམས་ཚེ་རིང་ལགས་ལ་ཐུགས་རྗེ་ཆེ་ཞུ་གི་ཡིན”ཞེས་བཤད།
ཨོ་ཡོ་བསོད་ནམས་ཚེ་རིང་ནི་སྔོན་མ་ཆབ་མདོ་གྲོང་ཁྱེར་གོ་འཇོ་རྫོང་སྨན་རྩིས་ཁང་གི་ཡོན་ཀྲང་ཡིན་ཞིང་། རྒན་ཡོལ་ཞུས་རྗེས་ལྷ་སར་སྡོད་ཀྱི་ཡོད། ཁོང་རྒན་ཡོལ་ཞུས་ཟིན་ནའང་ནད་པ་མང་པོ་ཞིག་ཁོང་གི་ཁྱིམ་དུ་སྨན་པ་བསྟེན་པར་ཡོང་གི་ཡོད། དེར་བརྟེན་ཨོ་ཡོ་བསོད་ནམས་ཚེ་རིང་གིས་ཁྱིམ་མིའི་གྲོས་འགོའི་འོག་གྲྭ་བཞི་གྲོང་གསར་དུ་སྨན་བཅོས་ཁང་ཞིག་བཙུགས་ནས་རིམ་གྱིས་བྷོ་ཁམས་བོད་ལུགས་སྨན་ཁང་དུ་འཕེལ་རྒྱས་བྱུང་ཡོད།
“སྔ་དྲོ་བོད་སྨན་ཁང་དུ་ནད་པ་མང་བར་བརྟེན་ནད་ལྟ་བར་འགྲོ་གི་ཡོད། ཕྱི་དྲོ་ནད་པ་ཉུང་བས་ང་རང་གི་སྨན་ཁང་དུ་ལོག་ནས་རྩ་ལྟ་བར་འགྲོ་གི་ཡོད”ཅེས་ཨོ་ཡོ་བསོད་ནམས་ཚེ་རིང་གིས་བཤད།
བསྟན་འཛིན་ངག་དབང་གིས། གྲྭ་བཞི་གྲོང་གསར་སྡེ་ཁུལ་གྱིས“རྒན་རྒོན་ལ་ལྟ་རྟོགས་བྱ་རྒྱུ”དེ་མུ་མཐུད་དམིགས་ཚད་དུ་བྱས་ཏེ། ཞབས་འདེགས་ཞུ་སྟངས་ཟམ་མི་ཆད་པར་གསར་གཏོད་བྱེད་པ་དང་། རྒན་གསོའི་ཞབས་ཞུའི་རྨང་གཞིའི་སྒྲིག་བཀོད་ཀྱི་དྲ་མིག་ཅན་འཛུགས་སྐྲུན་ལ་རྒྱུན་མཐུད་སྐུལ་འདེད་གཏོང་བ། ཞབས་ཞུའི་མཁོ་སྤྲོད་ལེགས་སུ་གཏོང་བ། རྒན་རྒོན་ལ་ཕྱོགས་ཡོངས་དང་རིམ་པ་མང་པོས་ཞབས་འདེགས་ཞུ་བར་གཞོལ་བ། ཞབས་ཞུའི་སྤུས་ཚད་མཐོ་རུ་གཏོང་བ། རྒན་རྒོན་དང་ཉམས་ཞན་ཚོགས་སྤྱིར་དེ་བས་དྲོ་སྐྱིད་དང་སྟབས་བདེའི་འཚོ་བའི་ཁོར་ཡུག་སྐྲུན་པ་བཅས་བྱས་ཏེ། ཞི་མཐུན་སྡེ་ཁུལ་འཛུགས་སྐྲུན་བྱེད་པར་སྟོབས་ཤུགས་སྐྱེས་སུ་འབུལ་གྱི་ཡིན་ཞེས་བརྗོད།