ཉེ་ཆར། གསར་འགོད་པས་ལྗོངས་ཡོངས་ཀྱི་རིམས་ནད་སྔོན་འགོག་དང་ཚོད་འཛིན་ལས་དོན་ཚོགས་འདུའི་ཐོག་ནས་ཤེས་རྟོགས་བྱས་པར། 2024ལོར་རང་སྐྱོང་ལྗོངས་རིམས་ནད་སྔོན་འགོག་དང་ཚོད་འཛིན་ཅུས་དངོས་གཞི་ཅན་གྱི་འཁོར་སྐྱོད་ཐུབ་སྟེ། གྲོང་ཁྱེར(ས་ཁུལ)7དང་རྫོང(ཆུས)74ཚང་མར་རྫོང་རིམ་པའི་རིམས་ནད་སྔོན་འགོག་དང་ཚོད་འཛིན་ཅུས་བཙུགས་པ་དང་གོང་འོག་འབྲེལ་མཐུད་ཀྱི་རིམས་ནད་སྔོན་འགོག་དང་ཚོད་འཛིན་གྱི་ལས་དོན་མ་ལག་བསྐྱར་སྐྲུན་རགས་ཙམ་ཐུབ་ཡོད། འགོས་ནད་ཀྱི་ཉེན་ཁར་ཁ་གཏད་གཅོག་པའི་ཐད་ཕན་འབྲས་མངོན་གསལ་དོད་པོ་ཐོན་པ་དང་ལྗོངས་ཡོངས་སུ་ཁྲིམས་བཀོད་འགོས་ནད་སྙན་སེང་ཞུ་ཚད་ཁྲི་812.36/10ཟིན་པ་དེ་རྒྱལ་ཡོངས་ཀྱི་ཆ་སྙོམས་ཆུ་ཚད་ལས་དམའ་བ་ཡོད་པ་དང་རིམས་ནད་ཀྱི་གནས་ཚུལ་སྤྱི་ཡོངས་ནས་བརྟན་པོ་རྒྱུན་འཁྱོངས་ཐུབ་ཡོད།

2024ལོར་རང་སྐྱོང་ལྗོངས་རིམས་ནད་སྔོན་འགོག་དང་ཚོད་འཛིན་ཅུས་ཀྱིས་མི་ཚོགས་ཀྱི་རིམས་འགོག་སྲུང་བཅད་བརྟན་དུ་བཏང་བ་དང་། སློབ་ལོ་ལོན་པའི་བྱིས་པར་རྒྱལ་ཁབ་ཀྱི་རིམས་འགོག་སྨན་ཁབ་རྒྱག་ཚད་90%ཟིན་པ་དང་རྒྱུངས་སྐྱའི་གཉན་ཚད་རིམས་འགོག་སྨན་ཁབ་ཐེངས་གཉིས་པ་རྒྱག་ཚད་92%ཟིན་ཡོད། ལོ་ཧྲིལ་པོར་ཐུམ་འབུའི་ནད་ཕོག་མཁན་མི་ཁྲི་156ལྷག་ཙམ་ལ་གྲལ་བཤེར་བྱས་པ་དང་ནད་པ་173ལ་གཤགས་བཅོས་བྱས་ཡོད། སློབ་མའི་རྒྱུན་མཐོང་ནད་ལ་ལྟ་ཞིབ་ཚད་ལེན་བྱེད་ཚད་རྫོང(ཆུས)74རུ་ཁྱབ་པ་དང་། ཨེ་ཙེ་ནད་ཀྱི་ནད་དུག་འགོག་པའི་སྨན་བཅོས་དམིགས་འཛུགས་སྨན་ཁང་89བཙུགས་པས་ནད་དུག་འགོག་པའི་སྨན་བཅོས་དྲ་རྒྱ་རྫོང(ཆུས)ཡོངས་སུ་ཁྱབ་ཡོད།

རང་སྐྱོང་ལྗོངས་རིམས་ནད་སྔོན་འགོག་དང་ཚོད་འཛིན་ཅུས་ཀྱི་འབྲེལ་ཡོད་འགན་འཁུར་བས་འདི་ལོ་རིམས་ནད་སྔོན་འགོག་དང་ཚོད་འཛིན་ཁྱབ་ཁོངས་ཀྱི་སྒྱུར་བཅོས་ཕྱོགས་ཡོངས་ནས་སྔར་བས་ཟབ་ཏུ་དང་ལྟེ་བའི་ནུས་པའི་ཆུ་ཚད་མཐོ་རུ་བཏང་སྟེ་མི་དམངས་ཀྱི་བདེ་ཐང་སྲུང་སྐྱོང་དང་། སྤྱི་པའི་འཕྲོད་བསྟེན་བདེ་འཇགས་འགན་སྲུང་། དཔལ་འབྱོར་དང་སྤྱི་ཚོགས་བརྟན་ལྷིང་སྲུང་སྐྱོང་བཅས་ལ་འདེགས་སྐྱོར་ནུས་ལྡན་བྱེད་ཀྱི་ཡིན་ཞེས་བཤད།