ཉེ་ཆར། གསར་འགོད་པར་བོད་རང་སྐྱོང་ལྗོངས་ཁྲོམ་ར་ལྟ་འདོམས་ཅུས་ནས་ཤེས་རྟོགས་བྱུང་བར། ཅུས་དེས་ད་ལོའི་ཟླ་8པར“དྲ་གྲགས་ཟ་ཁང་དང་། དྲ་གྲགས་བཟའ་བཅའ་དྲ་ཐོག་ནས་ཁྱེད་ཀྱིས་མངགས། དྲ་ཕྱིར་ངས་ཞིབ་བཤེར་བྱེད”ཅེས་པའི་འདེམས་ཤོག་འཕེན་པའི་བྱེད་སྒོ་སྤེལ་བ་དང་། ཟླ་10པར་དྲ་ཕྱིར་ཞིབ་བཤེར་ལས་དོན་དངོས་སུ་སྤེལ་བ། ཟླ་11ཚེས་20ཉིན་གྱི་སྔོན་ལ་ལེགས་སྒྲུབ་བྱས་པ་དང་འབྲེལ་སྤྱི་ཚོགས་ལ་ཞིབ་བཤེར་གྱི་གནས་ཚུལ་ཡོངས་བསྒྲགས་ཀྱང་བྱས་ཡོད།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་བྱེད་སྒོས“དྲ་གྲགས་ཟ་ཁང”དང་། “དྲ་གྲགས་སྲེག་ཟས”“དྲ་གྲགས་རྒྱ་ཁོག”སོགས་ལ་དམིགས་ཏེ། “དྲ་གྲགས་བཟའ་བཅའ”སོཌ་གཙོ་གནད་འདེམས་བཤེར་བྱ་ཡུལ་དུ་བརྩིས་ཡོད། འདེམས་ཤོག་འཕེན་པའི་བྱེད་སྒོ་དེ་རྒྱལ་ཡོངས་ཀྱི་བཟའ་བཅའི་བདེ་འཇགས་གཟའ་འཁོར་གྱི་དྲིལ་བསྒྲགས་བྱེད་སྒོའི་དུས་ཚོད་རིང་བཀོད་སྒྲིག་བྱས་ནས། སྐད་འཕྲིན་ནས་དྲི་བ་དྲིས་ལན་གྱི་བརྟག་དཔྱད་དང་མང་ཚོགས་འདེམས་ཤོག་འཕེན་པར་གདན་དྲངས་པ་བརྒྱུད། དྲ་ཐོག་ནས་འདེམས་ཤོག་འཕངས་པའི་མིང་ཐོའི་གོ་རིམ་ལྟར། ས་གནས་དང་གྲོང་ཁྱེར་ཁག་གི་འདེམས་ཤོག་མང་ཤོས་རག་པ་དང་ཁྲོམ་རར་གནས་བབ་ཅུང་མཐོ་བའི་དྲ་གྲགས་ཟ་ཁང་དང་དྲ་གྲགས་ཚོང་ཁང་10བདམས་ནས་དཔེ་འདེམས་ཞིབ་བཤེར་བྱས་ཡོད།

རང་སྐྱོང་ལྗོངས་ཁྲོམ་ར་ལྟ་འདོམས་ཅུས་ཀྱི་འབྲེལ་ཡོད་འགན་འཁུར་བས། བྱེད་སྒོ་དེ་སྤེལ་བའི་དམིགས་ཡུལ་ནི། འཛད་སྤྱོད་པ་དེ་བས་མང་བ་བཟའ་བཅའི་བདེ་འཇགས་ཀྱི་སྤྱི་ཚོགས་མཉམ་བཅོས་ཁྲོད་ཞུགས་ནས། རྒྱ་ཆེའི་མང་ཚོགས་ཀྱི་བཟའ་བཅའི་བདེ་འཇགས་འདུ་ཤེས་དང་སྤྱི་ཚོགས་ལྟ་སྐུལ་གྱི་འདུ་ཤེས་སྔར་བས་ཟབ་ཏུ་བཏང་སྟེ། བཟའ་བཅའི་བདེ་འཇགས་ཀྱི་གནད་དོན་སྤྱི་ཚོགས་ཡོངས་ཀྱིས་མཉམ་བཅོས་བྱེད་པའི་རྣམ་པ་ཞིག་ཆགས་པར་སྐུལ་འདེད་བཏང་སྟེ། མི་དམངས་མང་ཚོགས་ཀྱི“ལྕེ་རྩེའི་བདེ་འཇགས”སྲུང་སྐྱོང་ཏན་ཏིག་བྱ་ཆེད་ཡིན་ཞེས་ངོ་སྤྲོད་བྱས།