བོད་ཀྱི་གསོ་བ་རིག་པ་སྔར་བས་དར་སྤེལ་དང་རྒྱུན་འཛིན་བྱས་ནས་བོད་ལུགས་གསོ་རིག་བྱ་གཞག་འཕེལ་རྒྱས་ལ་སྐུལ་འདེད་གཏོང་ཆེད། ཉིན་ཤས་གོང་། དུས་ཡུན་ཉིན་3གྱི་2024ལོའི“རྒྱལ་སྨན་སློབ་དཔོན་ཆེན་མོ་དབང་འདུས་དང་སྨན་རིག་མཁས་ཅན་དགའ་བོའི་རིག་གཞུང་དགོངས་དོན་རྒྱུན་འཛིན་གྱི་ཟབ་སྦྱོང་བྱེད་སྒོ་ལྷ་སར་སྤེལ་བ་རེད།

ཤེས་རྟོགས་བྱུང་བར་གཞིགས་ན། ཐེངས་འདིའི་བྱེད་སྒོ་ནི་བོད་ལྗོངས་བོད་ལུགས་གསོ་རིག་སློབ་ཆེན་གྱིས་གཙོ་གཉེར་དང་བོད་ལྗོངས་བོད་ལུགས་གསོ་རིག་སློབ་ཆེན་ཞོར་གཏོགས་སྨན་ཁང་གིས་གཉེར་འགན་འཁུར་བ་ཞིག་རེད། ལྗོངས་ཡོངས་ཀྱི་གྲོང་ཁྱེར（ས་ཁུལ）ཁག་གི་བོད་ལུགས་སྨན་ཁང་དང་དེ་བཞིན་མཚོ་སྔོན་སློབ་ཆེན་དང་ལྷོ་ནུབ་མི་རིགས་སློབ་ཆེན་སོགས་ལྗོངས་ཕྱི་ནང་གི་བོད་ལུགས་གསོ་རིག་སྨན་བཅོས་སྒྲིག་གཞི་དང་མཐོ་རིམ་སློབ་གླིང་སོགས་ཚན་པ་59ཡིས་མངགས་པའི་ལས་སྒོའི་རྐང་འཛིན་པ་དང་སློབ་ཆེན་སློབ་མའི་འཐུས་མི་78གསོ་སྦྱོང་ནང་ཞུགས་ཡོད་པ་རེད།

བོད་ལྗོངས་བོད་ལུགས་གསོ་རིག་སློབ་ཆེན་གྱི་འབྲེལ་ཡོད་འགན་འཁུར་བས། ཐེངས་འདིའི་བྱེད་སྒོ་སྤེལ་བ་ནི་མཁས་དབང་ཁོང་རྣམ་པས་ལོ་མང་སྨན་བཅོས་དང་སློབ་ཁྲིད་གནང་བར་ཁས་ལེན་གང་ལེགས་དང་གཟེངས་བསྟོད་ཆེན་པོ་བྱས་པ་ཡིན་ལ། འདི་ལས་བོད་ལུགས་གསོ་རིག་དར་སྤེལ་གཏོང་བར་སྐུལ་འདེད་ཐེབས་རྒྱུ་མ་ཟད། ད་དུང་མཁས་དབང་རྣམ་པའི་རིག་གཞུང་ཐད་ཀྱི་བཞེད་དགོངས་དང་ནད་ཐོག་སྨན་བཅོས་ཀྱི་ཉམས་མྱོང་དག་བརྒྱུད་རིམ་ལྡན་ལ་གཏིང་ཟབ་པའི་སྒོ་ནས་སྔོག་འདོན་དང་། རྒྱུན་འཛིན། ཞིབ་འཇུག དར་སྤེལ་བཅས་བྱས་ཏེ། དེ་བས་ཕུལ་དུ་བྱུང་བའི་བོད་ལུགས་གསོ་རིག་གི་མཐོ་རིམ་ཆེད་ལས་མི་སྣ་སྔར་བས་མང་པོ་གསོ་སྐྱོང་བྱས་ནས། དུས་སྐབས་གསར་པའི་བོད་ལུགས་གསོ་རིག་བྱ་གཞག་འཕེལ་རྒྱས་གཏོང་བར་ལེགས་སྐྱེས་གསར་པ་འབུལ་གྱི་ཡིན་ཞེས་བརྗོད་པ་རེད།