ཟླ་9ཚེས་18ནས་20ཉིན་བར་རྒྱལ་ཡོངས་མཐོ་སློབ་ཀྱི“གསར་བརྗེའི་སྙིང་སྟོབས་རྒྱུན་འཛིན་དང་ཀྲུང་གོ་གུང་ཁྲན་ཏང་མིའི་སྙིང་སྟོབས་མ་ལག་ཐོས་བསམ་མྱོང་རྟོགས་བྱེད”ཅེས་པའི་བོད་རང་སྐྱོང་ལྗོངས་ཀྱི་དཔེ་སྟོན་སྒྲོག་འགྲེལ་བོད་ལྗོངས་ཞིང་འབྲོག་སློབ་གླིང་དང་བོད་ལྗོངས་ལས་རིགས་ལག་རྩལ་སློབ་གླིང་དུ་སོ་སོར་བྱས་པ་རེད།

སྒྲོག་འགྲེལ་ཚོགས་འདུའི་ཐོག་དམག་ཞབས་ཐིམ་པའི་དམག་མི་དང་། སྔོན་ཐོན་མི་སྣ། ཏང་གི་ལོ་རྒྱུས་རིགས་གཅིག་མཁས་ཅན། མཐོ་སློབ་ཀྱི་བསམ་བློ་ཆབ་སྲིད་རིགས་གཅིག་མཁས་ཅན། དེ་བཞིན་ཚན་རྩལ་ལས་དོན་པ་སོགས་གདན་དྲངས་ནས་བརྗོད་དོན་གཙོ་བོའི་དཔེ་སྟོན་སྒྲོག་འགྲེལ་བྱས་པ་དང་། འཆད་ཁྲིད་པ་གཙོ་བོས་ཡན་ཨན་གྱི་སྙིང་སྟོབས་དང་། ཨ་འགོག་ཁྲའོ་རོགས་ཀྱི་སྙིང་སྟོབས། བོད་སྐྱོད་པ་རྒན་གྲས་ཀྱི་སྙིང་སྟོབས། མཚོ་བོད་ལྕགས་ལམ་གྱི་སྙིང་སྟོབས། “ལམ་གཉིས”ཀྱི་སྙིང་སྟོབས་སོགས་ལ་དམིགས་ནས་ཀྲུང་གོ་གུང་ཁྲན་ཏང་མིའི་སྙིང་སྟོབས་མ་ལག་དང་ཀྲུང་གོ་གུང་ཁྲན་ཏང་མིའི་སྙིང་སྟོབས་མ་ལག་གི་དུས་རབས་ཀྱི་ནང་དོན་དང་དུས་རབས་ཀྱི་རིན་ཐང་གང་ཡིན་པ་དང་། དེ་བཞིན་ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་གྱི་རྒྱང་ལམ་གསར་པའི་ཐོག་བསམ་པའི་སྟོབས་ཤུགས་གཅིག་སྡུད་ཇི་ལྟར་བྱེད་དགོས་པ་དང་། ཀྲུང་གོ་གུང་ཁྲན་ཏང་མིའི་སྙིང་སྟོབས་མ་ལག་རྟོགས་པ་དང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་75འཁོར་བའི་འོད་སྟོང་འཕྲོ་བའི་ལོ་རྒྱུས་ཀྱི་ལམ་བུའི་ཐོག་གསར་བརྗེའི་སྙིང་སྟོབས་རྒྱུན་འཛིན་ཇི་ལྟར་བྱེད་དགོས་པར་གོ་བདེ་ཤེས་སླའི་སྒོ་ནས་འགྲེལ་བཤད་བརྒྱབ་པ་རེད།