ལྗོངས་ཡོངས་ཀྱི་རྒྱ་ཆེའི་དགེ་རྒན་དང་སློབ་གསོའི་ལས་དོན་པ་རྣམས་ལ།

དགེ་རྒན་དུས་ཆེན་ཐེངས་40པའི་སྐབས་སུ། ཀྲུང་གུང་བོད་རང་སྐྱོང་ལྗོངས་ཨུ་ཡོན་ལྷན་ཁང་དང་རང་སྐྱོང་ལྗོངས་མི་དམངས་སྲིད་གཞུང་གིས་སློབ་གསོའི་འཐབ་ཕྱོགས་སུ་དཀའ་སྤྱད་འབད་བརྩོན་བྱེད་མཁན་རྒྱ་ཆེའི་དགེ་རྒན་དང་། སློབ་གསོའི་ལས་དོན་པ། དེ་བཞིན་སློབ་གསོའི་བྱ་གཞག་འཕེལ་རྒྱས་གཏོང་ཆེད་ལེགས་སྐྱེས་ཕུལ་མཁན་ལས་བྲལ་དང་རྒན་ཡོལ་ཞུས་པའི་བློ་མཐུན་རྒན་གྲས་བཅས་ལ་དུས་ཆེན་གྱི་བཀྲ་ཤིས་བདེ་ལེགས་དང་ལྷག་བསམ་ཟོལ་མེད་ཀྱི་འཚམས་འདྲི་ཞུ་རྒྱུ་ཡིན། ཐོག་མཐའ་བར་གསུམ་དུ་བོད་ཀྱི་སློབ་གསོའི་བྱ་གཞག་འཕེལ་རྒྱས་ལ་སེམས་ཁུར་དང་། རྒྱབ་སྐྱོར། རོགས་རམ་བཅས་གནང་མཁན་སྤྱི་ཚོགས་ལས་རིགས་ཁག་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན།

སློབ་གསོ་ནི་རྒྱལ་ཁབ་ཀྱི་ཇུས་ཆེན་དང་ཏང་གི་ཇུས་ཆེན་ཡིན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སློབ་གསོའི་ལས་དོན་ལ་ཚད་མཐོའི་མཐོང་ཆེན་གནང་སྟེ། སློབ་གསོའི་ལས་དོན་ཐད་ལ་མཛུབ་སྟོན་གལ་ཆེན་རབ་དང་རིམ་པ་གནང་ནས་སློབ་གསོའི་བྱ་གཞག་གི་སྒྱུར་བཅོས་དང་འཕེལ་རྒྱས་ལ་སྐུལ་འདེད་གཏོང་ཆེད་བསམ་བློའི་མཚོན་ཆ་རྣོན་པོ་མཁོ་འདོན་གནང་ཡོད། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་སློབ་གསོའི་ལས་དོན་དང་བོད་ཀྱི་ལས་དོན་སྐོར་གྱི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་ལེན་མཐའ་གཅིག་ཏུ་བསྟར་བ་དང་། ཏང་གི་སློབ་གསོའི་མཛད་ཕྱོགས་ཕྱོགས་ཡོངས་ནས་ལག་ལེན་བསྟར་བ། སྔ་ཕྱི་བར་གསུམ་དུ་སློབ་གསོ་དེ་སྔོན་ལ་འཕེལ་རྒྱས་གཏོང་བའི་འཐབ་ཇུས་ཀྱི་གནས་བབ་ཐོག་བཞག་སྟེ། སློབ་གསོའི་ལྗོངས་སྟོབས་ཆེན་འཛུགས་སྐྲུན་ལ་སྐུལ་འདེད་མགྱོགས་པོ་བཏང་བས་བོད་ཀྱི་སློབ་གསོའི་བྱ་གཞག་འཕེལ་རྒྱས་ལ་གྲུབ་འབྲས་གསར་པ་ཐོབ་ཡོད།

ལྗོངས་ཡོངས་ཀྱི་སློབ་གསོའི་ཁོངས་གཏོགས་དང་ལྷག་པར་དུ་རྒྱ་ཆེའི་དགེ་རྒན་དང་སློབ་གསོའི་ལས་དོན་པས་ཏང་དང་རྒྱལ་ཁབ་ཀྱི་ཆེད་དུ་མི་སྣ་དང་ཤེས་ལྡན་པ་གསོ་སྐྱོང་བྱེད་པའི་འགན་འཁྲི་བློ་ལ་བརྟན་པོར་བཅངས་ནས། ལྷག་བསམ་རྣམ་དག་དང་། ལེགས་སྐྱེས་འབུལ་བའི་སེམས་པ། བྱམས་སེམས་བཅས་ཀྱི་ཐོག་ནས་སློབ་གསོའི་བྱ་གཞག་ལ་ཞུགས་ཤིང་། སེམས་ནུས་ཡོད་རྒུས་མི་སྣ་གསོ་སྐྱོང་བྱས་ནས་མི་དམངས་བློ་ཡིད་ཚིམ་པའི་སློབ་གསོ་ཡག་པོ་ཞིག་གཉེར་ཆེད་བློ་གྲོས་དང་སྟོབས་ཤུགས་ལེགས་སྐྱེས་སུ་ཕུལ་ཡོད། 2018ལོའི་ཟླ་9པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རྒྱལ་ཡོངས་ཀྱི་སློབ་གསོའི་ཚོགས་ཆེན་ཐོག“དགེ་རྒན་གྱིས་ཤེས་བྱ་བརྒྱུད་སྤེལ་དང་། བསམ་བློ་བརྒྱུད་སྤེལ། བདེན་དོན་བརྒྱུད་སྤེལ། བླ་སྲོག་གཏོད་པ། ཚེ་སྲོག་གཏོད་པ། མི་སྣ་གསོ་སྐྱོང་བཅས་བྱེད་པའི་དུས་རབས་ཀྱི་ལས་འགན་ལྕི་པོ་ཁུར་ཡོད”ཅེས་ནན་བཤད་གནང་ཡོད། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པས་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བར་དམིགས་ཏེ། ཕྱོགས་ཡོངས་ནས་སྒྱུར་བཅོས་སྔར་བས་ཟབ་ཏུ་གཏོང་བར་བརྒྱུད་རིམ་ལྡན་པའི་སྒོ་ནས་བཀོད་སྒྲིག་དང་སློབ་གསོ་ཚན་རྩལ་ཤེས་ལྡན་པའི་སྒྲིག་སྲོལ་དང་ལམ་སྲོལ་གཞི་གཅིག་ཅན་གྱི་སྒྱུར་བཅོས་ལ་སྤྱི་འདོམས་སྐུལ་འདེད་གཏོང་བའི་སྐོར་ལ་བླང་བྱ་གསལ་པོར་བཏོན་ཡོད། སླད་ཕྱིན་ལྗོངས་ཡོངས་ཀྱི་རྒྱ་ཆེའི་དགེ་རྒན་དང་སློབ་གསོའི་ལས་དོན་པས་ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། “གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་བླངས་ནས“འདུ་ཤེས་བཞི”ཟབ་ཏུ་གཏོང་བ་དང་། “གདེང་ཚོད་བཞི”བརྟན་དུ་གཏོང་བ།“སྲུང་སྐྱོང་གཉིས”ཐུབ་པར་བྱེད་པ། རྒྱལ་ཡོངས་ཀྱི་སློབ་གསོའི་ཚོགས་ཆེན་གྱི་དགོངས་དོན་སློབ་སྦྱོང་དང་ལག་བསྟར་ཡག་པོ་བྱེད་པ། རང་སྐྱོང་ལྗོངས་ཏང་ཨུད་ཀྱི་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དྲུག་པའི་བཀོད་སྒྲིག་བླང་བྱ་གཞིར་བཟུང་བ། “དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་རྒྱག་པ། སློབ་གསོ་ཕྱོགས་བསྡུས་སྒྱུར་བཅོས་ཀྱི་ལས་འགན་ཁག་དོན་ཐོག་ཏུ་འཁྱོལ་བར་བྱེད་པ། སྔོན་ཐོན་གྱི་སློབ་གསོའི་འདུ་ཤེས་དང་། དོ་དམ་ཆུ་ཚད། སློབ་ཁྲིད་སྤུས་ཚད། སློབ་གྲྭའི་དར་སྲོལ། སློབ་སྦྱོང་གི་དར་སྲོལ་བཅས་ལ་བརྟེན་ནས་སློབ་གསོའི་ལྗོངས་སྟོབས་ཆེན་འཛུགས་སྐྲུན་མགྱོགས་པོ་བྱེད་ཆེད་ལེགས་སྐྱེས་གསར་པ་དེ་བས་ཆེན་པོ་འབུལ་རྒྱུའི་རེ་བ་ཡོད།

ཐོག་མཐའ་བར་གསུམ་དུ་བླ་སྲོག་གནས་བབ་མཐོ་སར་བཞག་ནས་བླ་སྲོག་གཏོད་པའི་དུས་རབས་ཀྱི་འགན་འཁྲི་ལྕི་པོ་རང་རྟོགས་ངང་འཁུར་དགོས་ཤིང་། དགེ་རྒན་ནི་མིའི་རིགས་ཀྱི་བླ་སྲོག་གཏོད་མཁན་ཡིན་པས། དགེ་རྒན་གྱི་ཀུན་སྤྱོད་དང་དགེ་རྒན་གྱི་སྤྱོད་ཚུལ་འཛུགས་སྐྱོང་བྱ་རྒྱུ་དེ་གནས་བབ་ཨང་དང་པོར་བཞག་སྟེ། རྒྱུན་སྲིང་ལྷོད་མེད་ངང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པར་བརྟེན་ནས་བློ་སྒྲིལ་སེམས་སྐྱེད་ཀྱིས་སློབ་གྲྭ་ཆེ་འབྲིང་ཆུང་གསུམ་གྱི་བསམ་བློ་ཆབ་སྲིད་སློབ་ཚན་གཞི་གཅིག་ཅན་གྱི་སྒྱུར་བཅོས་གསར་གཏོད་ལ་མགྱོགས་མྱུར་སྐུལ་འདེད་གཏོང་བ་དང་། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་སློབ་གྲྭར་སྤེལ་བར་མུ་མཐུད་སྐུལ་འདེད་གཏོང་བ། སློབ་མའི་ཁྲོད་དུ་རྒྱལ་གཅེས་རིང་ལུགས་ཀྱི་སློབ་གསོ་དང་། ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་སློབ་གསོ། བོད་ལྗོངས་ས་གནས་དང་མེས་རྒྱལ་དབར་གྱི་འབྲེལ་བའི་ལོ་རྒྱུས་སློབ་གསོ་བཅས་གཏིང་ཟབ་སྤེལ་བ། “རྒྱལ་ཁབ་ཀྱི་འདུ་ཤེས་དང་། སྤྱི་དམངས་ཀྱི་འདུ་ཤེས། ཁྲིམས་སྐྱོང་གི་འདུ་ཤེས”བཅས་ཀྱི་སློབ་གསོ་གཏིང་ཟབ་སྤེལ་བ། རྒྱ་ཆེའི་གཞོན་ནུ་ལོ་ཆུང་ཚོར་ཆུང་དུས་ནས་ཕུགས་བསམ་དང་དད་སེམས་བརྟན་དུ་གཏོང་བ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པ། “མོས་སེམས་ལྔ”རྒྱུན་ཆད་མེད་པར་ཟབ་ཏུ་གཏོང་བར་སློབ་གསོ་ཁྲིད་སྟོན་བྱེད་དགོས།

སློབ་མ་གཙོ་བོར་བྱེད་པའི་མི་སྣ་གསོ་སྐྱོང་གི་འདུ་ཤེས་བརྟན་པོ་བཙུགས་ནས་ཚེ་སྲོག་གཏོད་པའི་དུས་རབས་ཀྱི་འགན་འཁྲི་ལྕི་པོ་རང་རྟོགས་ངང་འཁུར་དགོས་ཤིང་། སློབ་གསོ་ནི་མིའི་རིགས་ཀྱི་བླ་སྲོག་གཏོད་པའི་བྱ་གཞག་རླབས་པོ་ཆེ་དང་། སློབ་གསོའི་ངོ་བོ་ནི་གོ་རྟོགས་སད་པ། སློབ་མར་དགའ་ཞེན་བྱེད་པ་ནི་དགེ་རྒན་ལས་རིགས་ཀྱི་རྩ་བའི་བྱེད་ཕྱོགས་བཅས་རེད། སློབ་མ་ཚང་མ་བྱམས་དང་བརྩེ་བས་སྐྱོང་དགོས། རང་ཉིད་ཀྱི་ཡོན་ཏན་དང་། མྱོང་གྲུབ། ཉམས་མྱོང་བཅས་ཀྱིས་སློབ་མར་བདེན་ལེགས་མཛེས་གསུམ་གྱི་ཡང་དག་པའི་ལྟ་བ་གྲུབ་པར་བྱེད་པ་དང་། སློབ་མའི་རིན་ཐང་གི་བརྡར་ཤ་གཅོད་ནུས་དང་། རིན་ཐང་གདམ་གསེས་བྱེད་ནུས། རིན་ཐང་གསར་གཏོད་བྱེད་ནུས་བཅས་གསོ་སྐྱོང་དང་ཇེ་ཡག་ཏུ་གཏོང་དགོས། སློབ་མ་ཚོས་མི་ཚེའི་གོམ་པ་ཡག་པོ་སྤོ་བ་དང་མི་ཚེའི་གོམ་པ་དང་པོ་ཡག་པོ་སྤོ་བར་རོགས་རམ་བྱེད་པ་དང་། སློབ་སྦྱོང་བྱེད་པ་དང་། བྱ་བ་སྒྲུབ་པ། མི་ཚུལ་ལྡན་བྱེད་པ་བཅས་ཀྱི་མིག་དཔེ་སྟོན་པ། “བཞི་ལྡན”གྱི་དགེ་རྒན་ཡག་པོ་ཞིག་ཧུར་ཐག་བཅས་བྱས་ནས་སློབ་མའི་གཤིས་རྒྱུད་དང་ཀུན་སྤྱོད་གསོ་སྐྱོང་བྱེད་མཁན་སློབ་དཔོན་ཞིག་ཏུ་འགྱུར་བའི་ཆོད་སེམས་འཇོག་དགོས།

སློབ་གསོ་མཁས་ཅན་གྱི་སྙིང་སྟོབས་དར་སྤེལ་དང་རྒྱུན་འཛིན་ཤུགས་ཆེན་བྱས་ནས་མི་སྣ་གསོ་སྐྱོང་བྱེད་པའི་དུས་རབས་ཀྱི་འགན་འཁྲི་ལྕི་པོ་རང་རྟོགས་ངང་འཁུར་དགོས་ཤིང་། མི་གང་འདྲ་ཞིག་གསོ་སྐྱོང་བྱེད་པ་དང་། གསོ་སྐྱོང་ཇི་ལྟར་བྱེད་པ། སུའི་ཆེད་དུ་གསོ་སྐྱོང་བྱེད་པ་བཅས་ནི་སློབ་གསོའི་རྩ་བའི་གནད་དོན་རེད། རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེས་སློབ་གསོའི་ལས་དོན་ལ་བཏོན་པའི་བླང་བྱ་གསར་པའི་མདུན་དུ། “སློབ་གསོའི་ལས་ལ་རྩེ་གཅིག་གཞོལ། རྒྱལ་སྟོབས་འཕེལ་བར་ང་ཡིས་འབད”ཀྱི་ཕུགས་འདུན་བརྟན་པོ་འཛུགས་པ་དང་། མི་ཚེ་ཧྲིལ་པོར་སློབ་སྦྱོང་བྱེད་པའི་འདུ་ཤེས་འཛིན་པ། དམ་པ་དོན་གཉེར་དང་གཟབ་ནན་སློབ་བརྩོན་གྱི་སློབ་གཉེར་གྱི་རྣམ་འགྱུར་རྒྱུན་འཁྱོངས་བྱེད་པ། གནས་ཚུལ་གསར་པར་ཞིབ་འཇུག་ཧུར་ཐག་བྱེད་པ། གནད་དོན་གསར་པ་རང་འགུལ་གྱིས་ཐག་གཅོད་བྱེད་པ། སློབ་གསོ་དང་སློབ་ཁྲིད་ཀྱི་ཆོས་ཉིད་གསར་པ་འཚོལ་ཞིབ་བཅས་བྱས་ནས་དཔེ་ཁྲིད་མི་སྐྱོང་གི་འཇོན་ཐང་ཟམ་མི་ཆད་པར་ཆེ་རུ་གཏོང་དགོས་ལ། སེམས་རྣལ་དུ་ཕབ་ནས་རང་རྟོགས་ཀྱིས་སློབ་ཁྲིད་དང་། སེམས་རྩ་འཁོལ་པོས་སློབ་གཉེར། སྣང་བ་སྐྱིད་པོས་སློབ་གཉེར་བཅས་བྱས་ནས་ཀུན་སྤྱོད་དང་། ཤེས་རིག ལུས་རྩལ། མཛེས་དཔྱོད། ངལ་རྩོལ་བཅས་ཕྱོགས་ཡོངས་ནས་འཕེལ་རྒྱས་ཀྱི་སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་ཤུལ་འཛིན་པ་སྔར་བས་མང་པོ་གསོ་སྐྱོང་བྱེད་དགོས།

རིམ་ཁག་ཏང་ཨུད་དང་སྲིད་གཞུང་གིས་སློབ་གསོའི་ལས་དོན་དང་དགེ་རྒན་གྱི་ལས་དོན་ལ་ཚད་མཐོའི་མཐོང་ཆེན་བྱས་ཏེ་དགེ་རྒན་གྱི་ཐོན་ཁུངས་བཀོད་སྒྲིག་སྔར་བས་ལེགས་སུ་གཏོང་བ་དང་། དགེ་རྒན་གྱི་ཁྲིམས་མཐུན་ཁེ་དབང་འགན་ལེན་བྱེད་པ། དགེ་རྒན་གྱི་གནས་བབ་དང་ཐོབ་ཐང་མཐོ་རུ་གཏོང་བ། དགེ་རྒན་གྱི་ལུས་སེམས་བདེ་ཐང་ལ་སེམས་ཁུར་བྱེད་པ། དགེ་རྒན་ལ་བརྩི་བཀུར་དང་སློབ་གསོར་མཐོང་ཆེན་བྱེད་པའི་སྤྱི་ཚོགས་ཀྱི་དར་སྲོལ་དར་སྤེལ་ཤུགས་ཆེན་གཏོང་བ་བཅས་བྱས་ཏེ་རྒྱ་ཆེའི་དགེ་རྒན་རྣམས་ལས་གནས་སྟེང་ནས་བདེ་སྐྱིད་ཚོར་བ་དང་། བྱ་གཞག་ལ་གྲུབ་འབྲས་ཐོབ་པ། སྤྱི་ཚོགས་སྟེང་སྙན་གྲགས་འཕེལ་བ་བཅས་བྱས་ཐོག ཕྱར་བ་གྲུ་འདེགས་ཀྱིས་སློབ་གསོའི་ལྗོངས་སྟོབས་ཆེན་འཛུགས་སྐྲུན་བྱས་ཏེ་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད་སྲ་ཞིང་བརྟན་པའི་འདེགས་སྐྱོར་བྱེད་དགོས།

མཇུག་ཏུ་ལྗོངས་ཡོངས་ཀྱི་རྒྱ་ཆེའི་དགེ་རྒན་དང་སློབ་གསོའི་ལས་དོན་པ་རྣམས་ལ་དུས་ཆེན་སྤྲོ་པོ་དང་། སྐུ་གཟུགས་གསལ་ཐང་། ལས་དོན་ལམ་ལྷོངས་བཅས་ཡོང་བའི་བཀྲ་ཤིས་སྨོན་འདུན་ཞུ་རྒྱུ་ཡིན།

ཀྲུང་གུང་བོད་རང་སྐྱོང་ལྗོངས་ཨུ་ཡོན་ལྷན་ཁང་དང་།

བོད་རང་སྐྱོང་ལྗོངས་མི་དམངས་སྲིད་གཞུང་གིས།

2024ལོའི་ཟླ་9ཚེས་9ཉིན།