2001ལོའི་ཟླ་12ཚེས་6ཉིན་གྱི་ཐོ་རེངས་ཆུ་ཚོད་དང་པོར། གློ་བུར་དུ་སྒོ་བརྡུངས་པའི་སྒྲས་གོ་འཇོ་རྫོང་མི་དམངས་སྨན་ཁང་གི་སྨན་པ་ལི་ཙུའོ་ཀྲུང་གཉིད་ལས་དཀྲོག སྒོ་ཕྱེ་ནས་ལྟ་སྐབས་རྫོང་སྲིད་གཞུང་གཞུང་ལས་ཁང་ནས་ཡིན་ཟེར་བའི་ན་གཞོན་ལས་བྱེད་པ་ཞིག་གིས“རྩེ་པ་ཤང་གི་འབྲོག་པ་ཆོས་དར་ཁྱིམ་དུ་དྲན་པ་འཐོར་ནས་འགྱེལ་འདུག འགྲིམ་འགྲུལ་སྟབས་བདེ་པོ་མེད་པས་ཁྱེད་རང་སྨན་བཅོས་བྱེད་པར་ཕེབས་རོགས་ཞུ་རྒྱུ་ཡིན”ཞེས་བྲེལ་བྲེལ་འཚུབ་འཚུབ་ངང་བཤད།

སྐབས་དེ་དུས་གྲང་ངར་ཇི་ཙམ་ཆེ་ཡང་ཁོང་གིས་ལམ་སེང་སྲིང་བལ་གྱི་ལྭ་རིང་གྱོན་རྗེས། ཁོང་ཚོས་བཤད་པའི་གནས་ཚུལ་ལྟར་སྨན་རྫས་འགའ་ཞིག་གྲ་སྒྲིག་བྱས་རྗེས་གཞོན་ནུ་དེ་དང་མཉམ་དུ་རྩེ་པ་ཤང་དུ་བསྐྱོད།

2001ལོར་ཤང་དང་གྲོང་རྡལ་གྱི་གཞུང་ལམ་སྐྲུན་ཚར་མེད་པས་རྩེ་པ་ཤང་དུ་རྟ་བཞོན་ནས་འགྲོ་དགོས་ཀྱི་ཡོད། དེ་ལྟར་ས་མཐོའི་གྲང་རླུང་དང་ཁ་བ་བབས་པའི་གནམ་གཤིས་ལ་མ་འཛེམས་པར་ལི་ཙུའོ་ཀྲུང་དང་བཅས་པ་རུ་སྣེ་འཁྲིད་མཁན་གྱི་མང་ཚོགས་དང་མཉམ་དུ་རྟ་བཞོན་ནས་རྩེ་པ་ཤང་གི་ཕྱོགས་སུ་སྐྱོད་འགོ་ཚུགས། སྔ་དྲོའི་ཆུ་ཚོད་དགུ་དང་ཕྱེད་ཀར་གཞི་ནས་འབྲོག་རར་འབྱོར་འཕྲལ། ལི་ཙུའོ་ཀྲུང་གིས་འབྲོག་པ་ཆོས་དར་གྱི་ཁྱིམ་གྱི་ཕྱོགས་སུ་རྒྱུག་ཤར་གློད་ནས་སོང་ཡོད།

སྐབས་དེ་དུས་ལི་ཙུའོ་ཀྲུང་གོ་འཇོ་རྫོང་མི་དམངས་སྨན་ཁང་དུ་ལས་ཀ་བྱས་ནས་ལོ་གསུམ་ལྷག་ཙམ་ཕྱིན་པ་མ་ཟད། ཆེད་མངགས་ས་ཆ་གཞན་དུ་ཕྱིན་ནས་ཟབ་སྦྱོང་དང་སློབ་སྦྱོང་བྱས་པས་ས་མཐོའི་ནད་གཞི་བཅོས་པའི་ཐད་ལག་རྩལ་དང་ཐབས་ཤེས་ངེས་ཅན་ལྡན།

ཕྱོགས་ཡོངས་ནས་བརྟག་དཔྱད་དང་། སྨན་སྦྱོར། སྨན་བཅོས་བཅས་བྱས་པ་བརྒྱུད་ནད་པའི་གཟུགས་པོའི་གནས་ཚུལ་རིམ་བཞིན་ཡག་ཏུ་ཕྱིན་པ་མཐོང་རྗེས་ལི་ཙུའོ་ཀྲུང་གཞི་ནས་བློ་བདེ་རུ་ཕྱིན། དེའི་རྗེས་ཀྱི་ཉིན་འགའི་རིང་ལི་ཙུའོ་ཀྲུང་ཕྱིར་ལོག་རྒྱུར་མི་བྲེལ་བར་མུ་མཐུད་ནད་པའི་ཁྱིམ་དུ་ན་ཚར་བརྟག་དཔྱད་དང་སྨན་བཅོས་བྱས་ནས་བསྡད། ནད་པ་རྦད་དེ་དྲག་སྐྱེད་བྱུང་རྗེས་གཞི་ནས་སྨན་ཁང་དུ་ལོག

སྐབས་དེ་དུས་ཀྱི་གནས་ཚུལ་ཕྱིར་དྲན་བྱེད་བཞིན་དུ་ལི་ཙུའོ་ཀྲུང་གིས“དེ་དུས་ནད་པ་ས་བབ་མཐོ་བའི་འབྲོག་རར་ཡོད་པའི་ཁར་དགུན་དུས་ཀྱང་ཡིན་པས་སྨན་བཅོས་བྱེད་པར་དཀའ་ཚེགས་མང་པོ་འཕྲད་བྱུང་། ཡིན་ནའང་ངས་བོད་སྐྱོད་པ་རྒན་གྲས་ཀྱི་སྙིང་སྟོབས་དར་སྤེལ་བཏང་སྟེ་དཀའ་སྡུག་ལ་མི་སྐྲག་པར་འགན་འཁྲི་འཁུར་གང་ཐུབ་ཅི་ཐུབ་བྱས་པ་ཡིན”ཞེས་བཤད།

ལས་ཀར་ཞུགས་པ་ནས་ད་བར་ལོ་26རིང་ལི་ཙུའོ་ཀྲུང་གྲོང་ཚོ་མང་ཆེ་བར་བསྐྱོད་མྱོང་བ་དང་། སྤྱི་ཕན་སྨན་བཅོས་བྱེད་སྒོ་ཐེངས་40ལྷག་ཙམ་སྣེ་ཁྲིད་ནས་སྤེལ་ཡོད། ལོ་20ལྷག་ཙམ་རིང་ལི་ཙུའོ་ཀྲུང་དང་སྨན་ཁང་གི་ལས་རོགས་ཚོས་དཔུང་པ་མཉམ་གཤིབ་ཀྱིས་གཞི་རིམ་དུ་བསྐྱོད་པ་དང་ས་གནས་དེ་གར་གཞི་སྡོད་བྱས་ཤིང་། ནམ་ཡང་གནས་ཐུབ་པའི་སྨན་བཅོས་ཚོགས་པ་ཞིག་བཏོད་ནས་ས་གནས་དེ་གའི་མང་ཚོགས་ཀྱི་བདེ་ཐང་བློ་གཅིག་སེམས་གཅིག་ངང་བསྲུངས་དང་སྲུང་བཞིན་མཆིས།