འདི་ནི་སྨན་པས་གཤགས་བཅོས་བྱེད་བཞིན་པ།

ཉེ་ཆར། ལོ་63ལ་སླེབས་པའི་སྒྲོལ་མར་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་ནས་ཉིན་གཅིག་ལ་པུས་ཚིགས་བརྗེ་བའི་རྨ་ཆུང་གཤགས་བཅོས་བདེ་བླག་ངང་བྱས་པ་རེད། སྒྲོལ་མ་པུས་མོ་ན་ནས་ལོ་མང་སོང་བ་མ་ཟད་པུས་ཚིགས་འཁྱོག་པས། སྐས་ཀ་འཛེག་པ་དང་འབབ་སྐབས་ན་ཟུག་ཆེན་པོ་གཏོང་གི་ཡོད། དེ་ལྟ་བུའི་ན་ཟུག་མུ་མཐུད་མི་གཏོང་བའི་ཆེད། སྒྲོལ་མ་ཆེད་མངགས་ལྷ་ས་ནས་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་དུ་སྨན་བཅོས་བྱེད་པར་བསྐྱོད་པ་རེད། ནད་པའི་གཟུཌ་པོའི་ཆ་རྐྱེན་དང་བརྟག་དཔྱད་བྱས་འབྲས་དང་ཟུང་འབྲེལ་བྱས་ནས་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་རུས་ནད་ཚན་ཁག་གི་ཀྲུའུ་རེན་སྨན་པ་ཧོང་ཆིས་ཉིན་གཅིག་ལ་པུས་ཚིགས་བརྗེ་བའི་གཤགས་བཅོས་བྱེད་དགོས་པའི་གྲོས་འགོ་བཏོན་པ་རེད།

སྨན་ཁང་དུ་བསྡད་པའི་ཉིན་དེ་རང་ལ་སྒྲོལ་མར་གཤགས་བཅོས་བྱས་པ་དེ་ཐོག་ནས་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་གིས་ཉིན་གཅིག་ལ་པུས་ཚིགས་བརྗེ་བའི་བོད་ཀྱི་རྨ་ཆུང་གཤགས་བཅོས་ཐོག་མ་ལེགས་གྲུབ་བྱུང་བ་མཚོན་ཡོད་ལ། ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་རུས་ནད་ཚན་ཁག་གི་སྨན་བཅོས་ལག་རྩལ་སི་ཁྲོན་གྱི་སྔོན་ཐོན་ཆུ་ཚད་དུ་སླེབས་པ་ཡང་ར་སྤྲོད་གང་ལེགས་ཐུབ་ཡོད། གཤགས་བཅོས་ཚར་ནས་ཆུ་ཚོད་གཉིས་སོང་རྗེས་སྨན་པའི་རོགས་རམ་འོག་སྒྲོལ་མས་ནད་ཁྲི་ནས་བབས་ཏེ་དྲག་སྐྱེད་སྦྱོང་བརྡར་བྱེད་ཐུབ་ཡོད། གཤགས་བཅོས་ཚར་རྗེས་ཀྱི་ཆུ་ཚོད་24ནས་48རིང་རིག་ཚན་མང་པོའི་ཚོཌ་པས་མཉམ་དུ་ནད་སྐོར་རྒྱག་སྐབས། སྒྲོལ་མ་སོ་སོ་གཅིག་པུ་ས་ལ་བབས་ནས་སྦྱོང་བརྡར་བྱེད་ཐུབ་པ་དང་། ན་ཟུག་ཆེན་པོ་མེད་པ། སྐྱུག་མེར་མི་ལང་བ། གཉིད་ཡག་པོ་ཁུག་ཐུབ་ཀྱི་ཡོད་པས། དཔྱད་དཔོག་བརྒྱུད་སྨན་ཁང་ནས་དོན་ཆོག་གི་ཡོད། སྨན་ཁང་ནས་དོན་རྗེས་ཀྱི་གཟའ་འཁོར་གཅིག་བསྟུད་མར་ཧོང་ཆི་སྨན་བཅོས་ཚོགས་པས་ད་དུང་ཉིན་ལྟར་བརྙན་ལམ་ནས་ནད་གཞིའི་གནས་ཚུལ་དྲིས་ཏེ་སྨན་པ་དང་ནད་པའི་འབྲེལ་བ་བསྐྱངས་པ་རེད།

ཤེས་རྟོགས་བྱུང་བར་གཞིགས་ན། ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་གིས་རིག་ཚན་མང་བའི་མཉམ་ལས་བྱེད་སྟངས་སྤྱད་དེ་རུས་ནད་ཚན་ཁག་དང་། སྦྲིད་སྨན། བདེ་ཐང་སླར་གསོ། ནད་གཡོག་བཅས་གཞི་གཅིག་ཅན་གྱི་ཉིན་གཅིག་གི་གཤགས་བཅོས་བྱེད་སྟངས་བཟོས་པ་དེ་རྒྱལ་ཁབ་ཀྱི་བདེ་ཐང་སླར་གསོའི་འདུ་ཤེས་དང་མཐུན་པ་མ་ཟད། ད་དུང་སྨན་བཅོས་ཐོན་ཁུངས་གྲོན་ཆུང་ནུས་ལྡན་ཐུབ་པ་དང་། ནད་ཁྲི་འཁོར་རྒྱུག་ཐུབ་ཚད་མཐོ་རུ་ཕྱིན་པ། སྨན་ཁང་དུ་སྡོད་དཀའ་བའི་གནད་དོན་ཞི་ལྷོད་དུ་ཕྱིན་ནས་ནད་པའི་ཁུར་པོ་མངོན་གསལ་དོད་པོས་ཡང་དུ་ཕྱིན་ཡོད།