2019ལོ་ནས་བཟུང་། ཧོ་པེ་ཀྲུང་ལུགས་གསོ་རིག་སྨན་རྫས་སློབ་ཆེན་ནས་ཐོན་པའི་ཁག་5ཡི་སློབ་མ་44བོད་ཀྱི་ས་ཐག་རིང་ཤོས་ཀྱི་མངའ་རིས་ས་ཁུལ་དུ་བསྐྱོད་ནས་ས་གནས་དེ་གའི་སྨན་བཅོས་འཕྲོད་བསྟེན་བྱ་གཞག་ནང་ཞུགས་ཏེ། ས་གནས་དེ་གའི་མང་ཚོགས་ཀྱི་ཚེ་སྲོག་བདེ་ཐང་སྲུང་ཆེད་རང་ཉིད་ཀྱི་མཚར་སྡུག་ལང་ཚོ་སྐྱེས་སུ་ཕུལ་ཡོད།

ལེང་དབྱི། པེ་ཅིང་གི་ལས་ཀ་བཞག་ནས་མངའ་རིས་སུ་བསྐྱོད་པ།

སྒར་རྫོང་མི་དམངས་སྨན་ཁང་དུ་ལེང་དབྱིར་བཅར་འདྲི་བྱེད་སྐབས། ཁོ་པ་ནི་ལས་བྲེལ་ཤིན་ཏུ་ཆེ་བ་དང་ནད་པར་ལྟ་རྟོག་བྱེད་དགོས་པའི་དབང་གིས་ང་ཚོ་དང་སྐད་ཆ་ཚིག་འགའ་ཤས་ལས་ཤོད་ལོང་རག་གི་མི་འདུག

“དགོངས་པ་མ་ཚོམས། ང་ད་ལྟ་ནད་པ་བཅུ་ལྷག་ཙམ་ལ་ལྟ་རྟོག་བྱེད་དགོས་ཀྱི་ཡོད་པས། ཁྱེད་ཚོ་སྒུག་ཡུན་རིང་སོང”ཞེས་ལེང་དབྱི་ཡིས་གསར་འགོད་པར་བཤད།

ལེང་དབྱི་ནི་ཧོ་པེ་ཧེང་ཧྲུའེ་ནས་ཡིན་པ་དང་2021ལོར་ཧོ་པེ་ཀྲུང་ལུགས་གསོ་རིག་སྨན་རྫས་སློབ་ཆེན་གྱི་ནད་སྐྱོང་རིག་པའི་ཆེད་ལས་ནས་ཐོན་པ་རེད། སློབ་གྲྭ་འགྲིམ་སྐབས་ནས་ཁོང་བོད་ལ་འགྲོ་འདོད་ཆེན་པོ་ཡོད། སློབ་གྲྭ་ཐོན་པའི་ལོ་དེར་ཏག་ཏག་མངའ་རིས་ས་ཨུད་རྩ་འཛུགས་པུའི་ལས་དོན་མི་སྣ་སློབ་གྲྭ་དེར་ཡོང་ནས་དྲིལ་བསྒྲགས་ས་ཚིགས་བཙུགས་པས་ཁོང་གིས་ས་གནས་ས་ཐོག་ཏུ་མངའ་རིས་ཀྱི་གདན་ཞུའི་དྲིལ་བསྒྲགས་པར་གཞི་བལྟས་པ་རེད།

སྐབས་དེ་དུས་ལེང་དབྱི་པེ་ཅིང་བཅིངས་འགྲོལ་དམག་སྤྱི་ཁྱབ་སྨན་ཁང་གི་གསོ་རིག་ལྟེ་གནས་བཞི་པས་བསྡུས་ཡོད་མོད། འོན་ཀྱང་ཁོང་གིས་དྲིལ་བསྒྲགས་པར་གཞི་བལྟས་རྗེས་བློ་ཐག་ཆོད་པོས་མངའ་རིས་སུ་བསྐྱོད་རྒྱུའི་གདམ་ག་བྱས་པ་རེད།

མངའ་རིས་བདམས་པའི་ཐོག་མའི་བསམ་འདུན་གླེང་སྐབས། ཁོང་གིས་སྐབས་དེ་དུས་དྲིལ་བསྒྲགས་པར་གཞི་བརྒྱུད་མངའ་རིས་ཀྱི་སྨན་བཅོས་ཐོན་ཁུངས་དཀོན་པོ་ཡོད་པ་ཤེས་རྟོགས་བྱུང་བས། རང་ཉིད་ཀྱིས་སྦྱངས་པའི་ཆེད་ལས་ཤེས་བྱ་དང་རྩལ་ནུས་ལ་བརྟེན་ནས་མངའ་རིས་སུ་ནུས་པས་གང་ལྕོགས་ཀྱིས་བྱ་བ་ཞིག་སྒྲུབ་འདོད་བྱུང་ཞེས་བཤད།

ལིའུ་ཅན་ཀྲུང་། ཀྲུང་ལུཌ་གསོ་རིག་མཐའ་མཚམས་སུ་དར་རྒྱས་གོང་འཕེལ་བཏང་བ།

ལེང་དབྱི་དང་འདྲ་བར་ལིའུ་ཅན་ཀྲུང་མངའ་རིས་ལ་མ་ཡོང་གོང་ལས་ཀ་རག་ཡོད། དེ་ནི་ཁྲོམ་འདོན་སྨན་རྫས་ཁེ་ལས་ཤིག་ཡིན་པས་ཐོབ་ཆ་ཧ་ཅང་ཡག་པོ་ཡོད།

“སྐབས་དེ་དུས་ཟུར་ཁྲིད་པས་འཛིན་གྲྭའི་ཚོགས་པའི་ནང་ཆེད་དམིགས་ལས་བསྡུའི་འཆར་གཞི་བསྐུར་བ་མ་ཟད། སློབ་གྲྭའི་ནང་ཤིན་ཅང་དང་བོད་ཀྱི་ཆེད་དམིགས་ལས་བསྡུའི་འཆར་གཞིའི་དྲིལ་བསྒྲགས་པ་ཡང་སླེབས་ཡོད། ང་དེར་ལྟ་འདོད་ཆེན་པོ་བྱུང་ནས་ས་གནས་ས་ཐོག་ཏུ་འབྲེལ་ཡོད་གནས་ཚུལ་ཤེས་རྟོགས་བྱེད་པར་ཕྱིན་རྗེས་མངའ་རིས་སུ་འགྲོ་རྒྱུའི་ཐག་བཅད་པ་ཡིན”ཞེས་ལིའུ་ཅན་ཀྲུང་གིས་བཤད།

ལིའུ་ཅན་ཀྲུང་ནི་2019ལོར་མངའ་རིས་སུ་ཡོང་བའི་ཧོ་པེ་ཀྲུང་ལུགས་གསོ་རིག་སྨན་རྫས་སློབ་ཆེན་གྱི་སློབ་ཐོན་སློབ་མ་ཁག་དང་པོ་ཡིན་པ་དང་མངའ་རིས་ས་ཁུལ་མི་དམངས་སྨན་ཁང་ཀྲུང་ལུགས་གསོ་རིག་ཚན་ཁག་ཏུ་ལས་ཀ་བྱེད་ཀྱི་ཡོད། སྐབས་དེ་དུས་ཚན་ཁག་དེ་བཙུགས་ནས་ལོ་གཅིག་སོང་མ་ཐག་ཡིན་པ་དང་སྨན་པ་3ལས་མེད་པས་དཀའ་ཚེགས་ཆེ་ཤོས་ཀྱི་འགོ་ཚུགས་དུས་མཚམས་སུ་གནས་ཡོད།

ལིའུ་ཅན་ཀྲུང་དང་ལས་རོགས་ཚོ་ཐུན་མོང་འབད་བརྩོན་འོག་ཀྲུང་ལུགས་གསོ་རིག་ཚན་ཁག་གིས་2022ལོར་ཀྲུང་ལུགས་སྨན་མཛོད་ཁང་བཙུགས་པ་དང་2023ལོར་ནད་སྡོད་པུའུ་རུ་སྤོས་ནས་ནད་སྡོད་ནད་པ་ཉར་འགོ་ཚུགས་ཡོད།

འདི་ལོ་ནི་ལིའུ་ཅན་ཀྲུང་མངའ་རིས་སུ་ལས་ཀ་བྱེད་པའི་ལོ་མཐའ་མ་དེ་ཡིན་པ་དང་། ལོ་5ཡི་ཞབས་ཞུའི་དུས་ཚོད་ཐིམ་རྗེས་ཁོང་ཕ་ཡུལ་དུ་ལོག་ནས་ལས་ཀ་བྱེད་ཞོར་ཕ་མར་ལྟ་རྟོག་བྱ་རྒྱུ་ཡིན་པ་རེད།

“ཁ་མ་བྲལ་གོང་མངའ་རིས་ཀྱི་ཀྲུང་ལུགས་གསོ་རིག་སྨན་རྫས་ཀྱི་བྱ་གཞག་ལ་བྱ་བ་རེ་ཞིག་སྒྲུབ་འདོད་འདུག”ཅེས་ལིའུ་ཅན་ཀྲུང་གིས་ཤོད་ཞོར་དུ་ནན་ཏན་ངང་ནད་པའི་སྒལ་པར་གསེར་ཁབ་བཙུགས།

མངའ་རིས་སུ་ཁྱིམ་གཞིས་འཛུགས་མཁན་ནམ་ཡང་ན་ཁ་བྲལ་མཁན་གང་ཡིན་རུང་མངའ་རིས་ཀྱིས་ནམ་ཡང་བརྗེད་མི་སྲིད།

ལ་ཀླུང་བརྒྱབ་ནས་མངའ་རིས་སུ་བསྐྱོད།

2024ལོའི་ཟླ་7ཚེས་16ཉིན། ཧོ་པེ་ཀྲུང་ལུགས་གསོ་རིག་སྨན་རྫས་སློབ་ཆེན་ཏང་ཨུད་ཀྱི་ཧྲུའུ་ཅི་དང་སློབ་སྤྱི་ཀའོ་ཝུའེ་ཅོན་གྱིས་རུ་ཁག་སྣེ་ཁྲིད་དེ། མངའ་རིས་ས་ཁུལ་དུ་སློབ་ཐོན་སློབ་མར་འཚམས་འདྲི་བྱེད་པར་བསྐྱོད་ཡོད། མངའ་རིས་ས་ཨུད་རྩ་འཛུགས་པུའུ་དང་སྨན་ཁང་ཁག་གཅིག་དང་བཞུགས་མོལ་ཚོགས་འདུ་འཚོགས་ནས། སློབ་ཐོན་སློབ་མ་མངའ་རིས་ས་ཁུལ་དུ་ལས་ཀ་དང་འཚོ་བའི་གནས་ཚུལ་དང་དེ་བཞིན་སློབ་གྲྭའི་ཤེས་ལྡན་པ་གསོ་སྐྱོང་ཐད་ཀྱི་བསམ་འཆར་དང་གྲོས་འགོ་ཤེས་རྟོགས་ཞིབ་ཕྲ་བྱས་པ་མ་ཟད། ཚོགས་འདུ་གྲོལ་རྗེས་ད་དུང་སྨན་ཁང་དུ་བསྐྱོད་ནས་སློབ་མར་འཚམས་འདྲི་བྱས་པ་རེད།

“ང་ཚོའི་སློབ་གྲྭའི་སློབ་ཐོན་སློབ་མ་ཚོས་སྦྱངས་པའི་ཆེད་ལས་ཀྱི་ལེགས་ཆ་གང་ལེགས་བཏོན་པ་དང་། དུས་རབས་གསར་པ་དང་རྒྱང་ལམ་གསར་པར་ལང་ཚོའི་སྟོབས་ཤུགས་ལེགས་སྐྱེས་ཕུལ་ནས་རྒྱལ་ཁབ་ཀྱི་མཐའ་མཚམས་ཀྱི་གཞི་རིམ་དུ་ལས་ཞུགས་བྱེད་པར་སྐྱོད་མཁན་ཕུལ་བྱུང་སློབ་ཐོན་སློབ་མ་འབོར་ཆེན་ཐོན་ཡོད”ཅེས་ཧོ་པེ་ཀྲུང་ལུགས་གསོ་རིག་སྨན་རྫས་སློབ་ཆེན་ཏང་ཨུད་ཀྱི་ཧྲུའུ་ཅི་དང་སློབ་སྤྱི་ཀའོ་ཝུའེ་ཅོན་གྱིས་གསར་འགོད་པར་བཤད།

བསྡོམས་རྩིས་བརྒྱབ་པར་གཞིགས་ན། མིག་སྔར་མངའ་རིས་སུ་ལས་ཞུགས་བྱས་པའི་ཧོ་པེ་ཀྲུང་ལུགས་གསོ་རིག་སྨན་རྫས་སློབ་ཆེན་གྱི་སློབ་ཐོན་སློབ་མ་རྣམས་མངའ་རིས་ས་ཨུད་རྩ་འཛུགས་པུའུ་དང་། མངའ་རིས་ས་ཁུལ་མི་དམངས་སྨན་ཁང་། མཚོ་ཆེན་རྫོང་མི་དམངས་སྨན་ཁང་། དགེ་རྒྱས་རྫོང་མི་དམངས་སྨན་ཁང་། སྤུ་ཧྲེང་རྫོང་མི་དམངས་སྨན་ཁང་སོགས་ལས་ཁུངས་སྡེ་ཚན་དང་གཞི་རིམ་སྨན་ཁང་དུ་ལས་ཀ་བྱེད་ཀྱི་ཡོད། འདི་ལོ་སླར་ཡང་སློབ་མ་11མངའ་རིས་ས་ཁུལ་གྱི་སྨན་བཅོས་འཕྲོད་བསྟེན་ཤེས་ལྡན་པར་བསྡུ་རྩིས་ཡོད་པ་དང་བསྡུས་པའི་མི་གྲངས་ལོ་དྲུག་བསྟུད་མར་ཧོ་པེ་ཞིང་ཆེན་གྱི་ཨང་དང་པོར་སླེབས་ཀྱི་ཡོད་པ་རེད།