ཤིན་ཧྭ་གསར་འགྱུར་ཁང་ལྷ་ས་ནས་གློག་འཕྲིན་འབྱོར་གསལ། ཉེ་དུས་བོད་ལྗོངས་ཁྲེང་ཀོན་ས་མཐོའི་བཞོན་མའི་ཚན་རྩལ་ལྡུམ་ར་ཐོག་མའི་སྒོ་བྱང་འགེལ་བའི་མཛད་སྒོ་ལྷ་སར་འཚོགས་ཤིང་། དེ་ནི་བོད་ཀྱི་བཞོན་མའི་ཚན་རྩལ་ལྡུམ་ར་ཐོག་མ་དེ་རེད། ངོ་སྤྲོད་བྱས་པར་གཞིགས་ན། བཞོན་མའི་ཚན་རྩལ་ལྡུམ་ར་ནི་དཀར་ཆུའི་ལས་རིགས་ཀྱི་ཤེས་ལྡན་པ་གསོ་སྐྱོང་དང་། ཚན་རྩལ་གསར་གཏོད། སྤྱི་ཚོགས་ཞབས་ཞུ་བཅས་གཞི་གཅིག་ཏུ་འདུས་པའི་གསར་གཏོད་བྱེད་སྟངས་ཤིག་རེད།

2023ལོ་ནས་བཟུང་། ཀྲུང་གོ་ཞིང་ལས་སློབ་ཆེན་གྱིས་ལྷ་ས་གྲོང་ཁྱེར་ཀྲི་ཀྲའོ་བཞོན་མ་གསོ་ཚགས་ལྟེ་གནས་དང་གར་པ་སྐྱེ་ཁམས་འབྲོག་རར་བཞོན་མའི་འོ་མ་འབབ་ཚད་ཚད་འཇལ་ལས་དོན་བསྒྲུབས་ཏེ་བཞོན་མ་གསོ་ཚགས་ར་བའི་བཞོན་མ་རེ་རེ་དང་ཟོག་ཁྱུ་ལ་ཚན་རིག་དང་མཐུན་པའི་ཚོད་སྙེར་བྱས་ནས་བཞོན་མ་ར་བ་གསོ་ཚགས་དོ་དམ་ལ་ལེགས་སྒྲིག་འོས་འཚམ་བྱས་ཏེ་བཞོན་མའི་འོ་མ་མང་དུ་འགྲོ་ཐུབ་པ་བྱས་ཡོད། 2023ལོའི་ལོ་མཇུག་ཏུ་སློབ་གསོ་པུས་བོད་ལྗོངས་ཁྲེང་ཀོན་ས་མཐོའི་བཞོན་མའི་ཚན་རྩལ་ལྡུམ་ར་འཛུགས་རྒྱུར་དངོས་སུ་ཆོག་མཆན་སྤྲད་པ་དང་། 2024ལོའི་ཟླ་3པར་ཀྲུང་གོ་ཞིང་ལས་སློབ་ཆེན་གྱི་འབུམ་རམས་པ་ཧྥང་ཆན་ཧའེ་སོགས་ཚན་རྩལ་ལྡུམ་རར་བཅའ་སྡོད་བྱས་ནས་ལས་དོན་སྤེལ་ཡོད།

བོད་ལྗོངས་ཁྲེང་ཀོན་ས་མཐོའི་བཞོན་མའི་ཚན་རྩལ་ལྡུམ་རའི་དབུ་བཞུགས་རིགས་གཅིག་མཁས་ཅན་ཀྲུང་གོ་ཞིང་ལས་སློབ་ཆེན་གྱི་དགེ་རྒན་ཆེ་མོ་བ་ཝང་ཡ་ཁྲུན་གྱིས་བཞོན་མའི་ཚན་རྩལ་ལྡུམ་རས་མཐོ་སློབ་དང་ཚན་ཞིབ་སྒྲིག་གཞི་དང་མཉམ་འབྲེལ་བྱས་ནས་ས་མཐོའི་དཀར་ཆུའི་ལས་རིགས་ལ་རྒྱུས་མངའ་ཡོད་པའི་ལག་རྩལ་ཤེས་ལྡན་པ་ཁག་གཅིག་གསོ་སྐྱོང་བྱེད་པ་དང་ཚན་རྩལ་ཞིང་སྐྱོར་ལ་ཤུགས་སྣོན་བརྒྱབ་སྟེ་བོད་ཀྱི་བཞོན་མའི་རྒྱུད་བཟང་ལས་རིགས་ལ་འཛད་མཐའ་མེད་པའི་སྒུལ་ཤུགས་མཁོ་འདོན་བྱེད་ཀྱི་ཡིན་ཞེས་བཤད།